kon mapapas na...

wala ako
maghandom 
nga puhon
kon mapapas
na ako
ning atong
kalibotan 

nga ako 
inyong himoan
ug rebulto nga
mora unya akog
si sto. niño o
dili ba kaha si
san pedro

unsaon ko pa
man kaha kana?

bisan pag
kahoy sa lubi ang
inyong gamiton
unya ako
pagatuslokon
unsa pa ba ang
akong bation?

sa akong pagpanaw
isip hangin
puhon
unsa pa ba kahay
handomon?

ang adlaw, ang langit,
ang kawanangan
kon asa man ugaling
paliron ang dahon
nga kahayag
lahos kini sa suba nga
ang sulog
walay pagkatulog...