pagpili sa mga tipase

dunay gipatay
bag-o lang diha sa gawas
sa bulwagan

ako pang gisulayan og
pagsabot ang
akong kaugalingon nganong
wala na akoy gibati nga
kahadlok kon basin sa sunod
moabot kini kanako

nganong wala na ako mangutana
kon angayan ba kadtong
tawhana nga
tagaan sa akong naandan
nga kalooy

tagaan ko kinig pila ka gabii
nga pagtagad
sama niadtong ako naghunahuna
samtang
gilain nako ang puti nga bugas
sa mga tipase
sa mga gagmayng bato
nga makatigpod sa atong
mga ngipon kon
kini makaon