hinungaw sa kalag

sa tinood lang
nakapangutana ako

"ngano kaha nga
ania man ako dinhi?"

sa una seguro
tungod kay wala
sab akoy saktong
kapaingnan

apan milubad kana
nga katarungan

duna akoy adtoan
dili kining lugara
duna akoy puy-anan
mga higala
dili kining lugara
dili ko na kamo
kaayo kaila

hagbay rang gusto
nakong mopahawa
andam na ang akong
dalhonon
ang akong panultion
sa pagikan
dugay ko na nga
gihan-ay
sama sa paghapnig
nako sa pipila ka
sapot nga akong
kinahanglang dalhon,

apan ania pa gihapon
ako dinhing lugara
wala na ang katarungan
wala an ang hinungdan

balay nga karaan
mga patay nga dahon
sa hardin
tiguwang nga irong
gikagid na gani
lamesang gianay
lubog nga tubig
radyong guba 
ponder nga flashlight
gabok nga hagdanan
lata nga kisame
gibokbok nga kawayang
salog

natumba na ang 
gabok nga punoan sa 
mangga
wala na ang tulay
sa pikas tampi sa suba
paingon sa lungsod

gakagot ang akong mga
ngipon sa mga butang nga
bisan kanus-a dili nako
mahuman
nagkurog ang akong mga
kamot sa dili nako masugdan

wala akoy pulos sa akong
gipili
nagpabilin akong talawan
sa bugno sa kinabuhi

ikaw nga milantaw
kanako gikan sa unahan
nakakita ug usa ka tore
nga galukdo sa bulan diha
sa kagabhion

nadungog nako ang imong
mga pagbasol
ang imong mga pangamuyo
nakapasubo kanako

ngano kaha nga mas nindot
man ang layo
unya ang kaduol nga imong
mahawiran
hapdos man sa imong 
pagbati?

nakigharong pa ako sa gubat
sa akong kaugalingon
walay kapilian kondili ang
ako rang kapildihon