alang kang J.D. F.

ang mga iro
nangalipay sa mga bukog
samtang ang mga
manok nagubot sa mga
 mumho

daghang unod sa imong
plato
nga sa kabusog wala na
gani nimo 
matandog

kon sulayan mog 
lapang
bisag pinaagi sa
tinidor lamang
kasukaon ka na

nahinumduman ko
ang imong pagpamasol
diin ang paon mas dako
pa sa imong kuha

apan lagi kay nalipay ka
man maong ako ka na lang
gipasagdan

ayaw  gani sukda ang
imong kaugalingon kabahin
anang kadaugan ug
kapildihan

ayaw sukda ang dili mo
gayod masukod
pasagdi lang nga kini
modako
kay ugma kon ugaling
matuboan na kini sa duha
ka pako
pila may sugilon
akong ipabati usab diha
kanimo
ang mas labaw nga kalipay
diha sa paglupad

apan sa kanunay
ayaw kalimti si daedelus...