sa tawong wala nay kahadlok pa kon unsa ang mahitabo sunod ugma

ikaw na lang ang
wala mahadlok
nangalibog sila
unta ilang mahibaw-an
kining tanan:

wala na man
usay nabilin kanimo
wala ka na usay
gustong balikan
ug gustong
molungtad

ang dalan paingon
sa imong balay
natabonan na sa kakugnan
ang hagdanan
nangapangag na
ang atop gipalid na
sa miaging bagyo
gani ang adlaw milanding
man sa salog nga buslot
sa dingding nga
gikakubtan sa mga anay

hagbay rang 
nangamatay ang imong
mga ginikanan

gipatay sab ang imong
asawa ug anak

unsaon pa ba kining
imong gahom?
kining mga kabilin?

miabot na ang wala
mao kana ang tinood nga
katarungan nganong ang
kahadlok
dili motupad kaniya
dili molingkod sa iyang
lamesa
dili magdugay sa iyang
tugkaran

ang kabalaka usa ka
tamsi nga naigo sa
tirador
nahulog sa dalan
gikulinitan sa mga
hulmigas
gihuman sa mga ulod
gitaban sa hangin ang
mga balahibo
unya ang mga bukog
nanagtanga sa 
miabot nga kagabhion....