alang kang dodong ambros

bisan kanus-a
dili gayod kita
managsama
bisan sa gagmay
pa kita
diha sa usa ka balay
sa managsamang
ginikanan

wala ko kahinumdom
nga managsama ang
atong pagtagna kabahin
sa panagkita sa
kasili ug luwag

nauna ko nimo
ug kanunay gayod akong
mag-una
subay sa agianan sa 
akong kapalaran

kon moabot na gani
ang panahon sa
pagsubo
ayaw ako padungga nianang
imong bakho

wala na akoy pagsalig
sa luha
wa na usab ako mitoo anang
kunuhay kaguol
sa mga nangabilin

mas daghan ang imong
mga gamot
kabalo ko nga dili ka na
usab
maparog sa nagpahipi
nga malditong hangin