pagkawalwala gayod natong tanan

wala na man untay
gahom ang mga patay diri 
kanato

pagkawalwal gayod
pagkabuang gayod natong
tanan

ania nanggiaway kita kabahin
sa patay
kabahin sa iyang paglubong
kabahin sa dungog nga iya
kuno gihapon

hagbay ra kini siyang nadugta
didto sa ilalom sa yuta
karong gikalot na usab ang
iyang lubong
giabrihan pag-usab ang lungon
gikuha ang mga bukog apil pa
gani ang unta hagbay rang
napalid nga mga abog

anaa ang mga bungkag nga bukog
gihapnig, gisulod sa laing lungon,
gisirad-an, gisuroy,
aron ingnon nga dungganon

sulod sa atong kasingkasing 
kita ang mas nasayod
walay pulos kadtong tawhana
nga karon bukog na
ugma, mobalik na siya sa iyang
pagkaabog

kinahanglan pa ba gayod
nga awayan  nato kana?
ang lapok bisan pag itupad sa
mga bulawan
magpabiling lapok
dili mapapas ang dugo nga uga
sa bato nga mibuno sa imong
agtang

adunay mga butang nga pasagdan
na lang 
aron sa hingpit hikalimtan