sa dihang misulat na ang kasingkasing

nagsugod ug sulat ang kasingkasing.
bisag dili kaayo kamao mosulat.
wala kini nahibaw-an sa kinabuhi.
wala pod kaayo kini nakat-unan,
kulang sa pagdungog, mas labaw
nga kulang sa pagsabot.

dugay kaayo siyang misulat.
daghang nagpaabot. daghang wala
kaayo nakabantay, kay lagi
wala sila maghandom nga sa
usa ka higayon  mosulat na gayod
ang kasingkasing.

sa dihang nakasulat ni kinig usa ka
pulong sa papel nga hugaw, nga basa,
nga daan, nahigmata ang kalibotan.

nabuhi ang patay. nagsugod ug pangutana
ang lawas, kon unsa ang katarungan
sa usa ka gugma.