sagdi lang ang akong pagkasuhi

kon magpareho ang atong
mga tingog
dili lami pamation

pananglitan ang tanang
tingog sa gangis
sa ting-init
dili ba god sakit kaayo
sa atong
dunggan?

ang sitsit sa halas
bisag upat lamang ka
halas nga nagdungan
ug tago diha sulod
sa kakugnan
dili ba god sumo?

gani mawa man ang
atong kahadlok basin
ta paakon

maong paglipay nga ang
akong tingog
suhi, 
dili ba ang suhi nga
tingog
sama sa suhing bata
mao may
makamaong mohilot?