ang akong kapungot diha nimo

ang akong
kapungot diha nimo
nagkatuiris
maong dili nako
masulat

kining pagkasulata
pinugos
unya dili mao kini
sayop kini

ang akong kapungot 
diha nimo morag mga
karaang punoan sa lubi
nga nagsayawsayaw sa
kusog kaayong hangin
gikan sa habagatan
dili kamao kon asa
matumba

namakwit ang namoyo
dinhing dapita
unya ang mga balay
nangaharag sa kahadlok

ang mga baroto nga ilang
gihipos
atua naabtan sa baha
gikuha sa mga balod
gidagit paingon sa lawod
unya hangtod karon
wa na gyod igkita