upat ka bakak

gisugdan mo sa
tadtaran, nga ang kalibotan
lingin og patag nga
tadtaran
unya ang tinood mao ang
imong likod,

gipadayon mo sa mga
saad, nga ang saad usa ka
tulay nga milanding
sa pantalan,
unya ang pantalan usa
ra diay ka
pantawan

gisumpayan mo sa
pulong nga putol nga ang
paghingpit niini mao
ang balikog nga
ngalan sa tumoy sa pulong
nga miangkla diha
sa imong dunggan nga
gihimo niyang sanggotan

ang ikaupat mao ang
mas bug-at sa dihang mikatawa
ka unya
dali kaayong miingon nga
kini duwaduwa lang
nga mahimong ilabay dayon
hikalimtan

duna kay gibilin nga
kamatooran: kay ngano
duna pa bay tinood nga
santo sa atong
simbahan?