sa katam-is sa kagawasan........

kana ganing ikaw
na lang usa
didto sa barko
kay ang tanang
pasahero nakanaog
na bitbit ang ilang
mga butang paingon
sa ilang panimuyo
o kaha bisan asang
tugpahanan,

ikaw sab, mokanaog
bitbit ang imong butang
paingon sa imong
gihunahuna pa nga
padulngan,

o kaha ba bisag
labyanan lamang

tagboon mo ang
kagawasan
maglamano mong
duha unya ingnon
ka niya nga adtoon
ninyo ang lugar diin
pakatulgon ang mga
katarungan

didtong dapita
magbilar ang kasingkasing
sa tanang pagbati:

(kabawo kana kon unsa

apan ang wa mo 

mahibal-i mao ang

unya sangpotanan niini)

misugot ka
mikuyog ka
ug miabot kamo didto
sa labyanan
lamang,

gihunahuna mo 
ulahi  ang pagbasol
apan sa laing bahin
ang kalipay anaa usab
sa pagsulay sa
pakighimamat sa
pagtilawtilaw sa mga
lumalabay lamang


nahikatulog ang mga
katarungan
gipahinanok ang
mga handomanan
nagbilar ang kasingkasing
nahubog  sa tagay
sa mga 
kalipay nga hilabihan

makalanag nga
katam-is
dugwa sa kahamis


nindot ang kabuntagon
apan
sakit ang imong ulo
kapoy ang imong lawas
sa pakighimamat mo 

sa pagtilawtilaw mo sa
katam-is sa kagawasan
sa katam-is nga hilabihan
sa kahamis nga way
utlanan........