oedipus rex

 nakita mo ang iyang

ngabil, pagkalami untang hagkan

ang iyang lawas, pagkalami

untang gakson,

sahay, makaingon ka nga ang

tinuok niya lami lamyon,

matag gabii gihandom mo kini

hangtod nga makatulog ka

sa kamingaw

makita mo siya, apan morag wala lang

walay tingogay, morag dili mo kaila

kon magtagbo naa ra poy pangambat

sama sa panagdait sa matag adlaw sa

bisan kinsang tawo nga kaila mo, 

kaila mo apan dili kaila, mao kana ang

tumang pagpugong, tungod kay dili 

mahimo nga malambigit ka niya, tungod

kay dili gayod, tungod kay kon mahitabo

kana, mora kag si Oedipus nga nakatubag

sa tigmo sa Sphinx, mahugno ang kalibotan,

madugmok ang Sphinx, mamatay, molambo

ang gingharian, unya moabot na dayon

ang panahon sa pagpanudya, mahibaw-an

ni Oedipus nga gipatay diay niya ang

iyang amahan, ug gipakaslan ang iyang inahan.

siya ang nakatubag sa tigmo, ikaw ang Sphinx

busa ayaw ipamugos ang imong kapalaran

diha sa usa ka mito, aron dili ka magbasol, 

ipabilin ang mito isip usa ka mito, pugngan mo

ang baha, lig-onon mo ang trangka sa usa ka

gatos nga pinirisong baka.