BULAHAN

 bisan dako pa ang alom

bisan pa ug ang akong pamanit

maglatag sa daghang mga

ulat sa akong kagahapon

ania ako, mipahiyom unya

hangtod karon

dakong buhi lang gihapon

pasensya na

gikubalan na man god ang

akong kasingkasing

unya ang akong piang nga

naghatag kanako nianing

pagkakimpang diha sa usa

ka kiang

mibalansi  lang gihapon

sa akong pagpanimbang

gamit ang laing tiil

nga dili pa inutil

diskarte lang god

sa usa ka tawo nga dili 

dali mapungil

nga dili ikaulaw ang

duha ka bangkil

tungod ang kay pagpakabuhi

magpabilin nga maayong

taras sa mga maayong binhi

nga miusbong

sa abonong lugar ning atong

kalibotan

bulahan ang mga bungi

nga nagpabilin sa pagtoo nga

sila adunay talagsaong

katahom

bulahan ang mga mubog

pangwenta nga nagpabilin

diha sa tam-is nga pahiyom

bulahan ang mga bigaon nga

nangaburos nga walay amahan

nga nagmalipayon sa

ilang mga anak nga gipatutoy

sa ilang mga gatas nga

gihatag sa Makagagahom

nga ilang gisaligan ug giampoan

ayaw ambata ang ilang mga

pagtamay

padayon diha sa imong kalipay

diha sa kaigang padayon sa

pagpamaypay

ang importante Manang mao

nga ikaw buhi lang gihapon

mihanggab sa lag-as nga hangin

nga dili na paliton

miinom sa bugnaw nga tubig nga

gikan sa busay

nga sa pangpang naglataylatay.