moingon ka nga kini mao ang nindot
imong giisa ang usa ka lila nga bulak
nga imong gihinganlan
og buladot

wala magpakabana ang akong
dunggan
ang akong baba mihunghong
nga ang imong giingon nga nindot
sagbot man kana
diri sa among
patag

og akong gikutlo ang among pinakanindot
nga bulak nga asul
ang bulok sa iyang mga gihay
nga ang kahomot
mosurop sa kinalawman
sa unod
lapos pa gani sa bukog
nga sukadsukad wala gayod mitubo
sa inyong bungtod

og ang imong mga mata mibuhakhak og katawa
kay ang akong gipanghambog
kan-onon man lang diay
sa inyong kanding

wala magkasinabot ang atong gusto

og diha nagsugod ang arte
sa kritisismo
nga hangtod karon
nawad-an na akog pagtoo