kabalo ko
guston nimong sulaton ang kinalamiang balak
og sa matag adlaw
imong gihunahuna ang mga pulong
nga angay niini
apan usahay mablanko ka
mapalaw ka

kasabot ko
nganong usahay mokalit ka lang
og tungtong
sa akong hawak
nangapkap ka
sa kinalamiang pulong
sa akong
mga kamot
sa akong lig-on nga bagon

hangtod mga moiyagak ka
kuyog sa usa ka pahiyom

dayon sugdan mo na pagsulat
ang kinalamiang balak
sa atong kinabuhi

ugma pamation ko
ang imong awit.