sukod

i

ang kapuno sa kalipay sa usa ka
dughan
sukdon kini sa
kalapad og kadako
og kalalom
sa kahaw-ang

ii

ang kakusog sa pagdagan
unya sa tubig
sukdon kini sa
kataas og kalapad
sa ugat nga iyang
subayon

iii

ang kaligdong sukdon
kini sa usa ka
matahom nga
pagsulay

iv

ang tanan adunay sukod:

ang mga dangaw
magsukod sa bangaw

ang ulan sukdon sa
kabasa sa mga bulak
og dahon

ang imong kakugi
og pagmabinantayon
sukdon kana sa pipila
ka buslot sa imong
atop inig abot
na sa ting-ulan

v

kining akong gugma diha
kanimo
kon imong masukod
pakyas ako
sa kataposan

sayod ka sa gipanulti
sa mga
makialamon

ang gugmang matuod
walay sukod
ang kalalom og kamatooran
niini
dili masugilon nianang
mga dupa sa pisi

ang tubig niini dili
matukib
sa hinaw-asan sa usa ka
sag-ob