kinsa ba?

ibahig ang mga
kabalaka
kalimti ang mga
kahiubos
ayaw ambata
ang kasina

kay wala ka
mag-inosara bahin
nianing mga
butanga

lantawa ang buwak
nga gumamela
nga mihalad sa iyang
kapuwa diha sa adlaw
nga wala gani
makaila kaniya

kuwang siya sa kahumot
maoy ilang 
panaway apan bisan na

anaa ang humot nga
ilang-ilang nga
maayong pagkasabod diha
sa iyang gugma sa
bulan
wala usab kini
ambata

hunahunaa na lang
ang kabalaan sa gugma

sa imong gugma
bahala na
kon kinsa ang makadawat
niini
bahala na kon
kadtong imong gitagaan
niini
walay mata walay dunggan
walay dughan

padayon
sama sa buwak
sama sa hangin
sama sa mga panganod
total lumalabay man
lang ang tanan

kinsa bay makabantay
kinsa bay makahinumdom
sa atong mga kabuang
sa atong kadangag
sa atong kabugo usahay
diha sa paghandom
sa mga walay angay
sa mga bato sa mga bonbon
sa mga abog