kon nganong
naghimo ka ug kaugalingon
mong pinulungan
panapot,
pinahapay sa buhok
pamaagi sa paglingkod
mga oras nga
tingkatulog ug
pag-abot ug pagbiya
sabton kong
dili mo na masabtan ang
kalibotan nga unta
puy-an natong tanan
lahi ang
paghatag ug pagkuha
wala na ang
pamalaod ug kasabotan
nagdaob ka sa laing
nataran
gilimpyohan mo
ang usa ka
tinapakan
himoon mo na ang kaugalingon
mong salag
ang imong agianan
ug tagoanan

unsa ba ang gibuhat nila
kanimo?
ah, nangita ka lang sa
hustisyang ilang
gipatay,
gilubong
ug wala na
makita

giputos mo ang nahibiling
bukog niini
gitago diha sa
lawak sa imong
kasingkasing