tungod kay usa ka man lang
ka gamay nga bato
dili ka maambat

tungod ka daghan  man kamo
nga mga  gagmayng bato
kon duna'y  mapulpog o
mawa kaninyo
dili na kini angayang tagaan
pa ug bisag dyotay lang
nga pagtagad o
 panahon
aron masuta kon kinsa ang
nagkuha ug
ngano ug pila ba ang nawala
ug duna ba'y kausaban
aron duna say
silotan sa maong
kalapasan

moingon silang
mga gamhanan o tinugyanan
sa gahom ning
kalibotan,

"ay bato lang kana,
biyai
daghan pa kitag angayang
buhaton
kaysa mag-ambat nianang
gamayng bato
nga nagpasad sa
dalan!!"

ingon ana ang mahitabo kon
ikaw usa ka gamay nga bato lamang
ning atong katilingban

apan kon
adunay batang buang nga mogamit
kanimo
gamayng bato
 ug itirador sa ilang
mga matang
nagbudlat ug atubang diha sa kwarta
ug kahakog
ug kahubog nianing bino sa ila
kunuhan nga pagkahangdon,
unya maayong pagkaigo
ang puti nga kalimutaw
ug unya mabuak ang
maong mata
ug unya sila mangabuta
nan makapanguta na dayon sila


" aguy...ug unsa ba kadto?
nganong gitirador man kita?
unsa ba ang hinungdan
ning atong pagkabuta?"

ug dinhing dapita ang batong gamay
dili na gamay
ang batong dili maambat karon
gipangitaan na ug ngalan
ug lugar
o kagikan

gipangitaan na ug mga katarungan
nganong
siya bisan sa pagkagamay
angay diay usab
nga tagaan sa
pag-atiman

naunsa na kaha kadtong batang buang
nga migamit kanimo
batong gamay
aron pagtirador sa
usa ka gamhanan?