naay mga luna sa atong
karon nga bisan ang balili
dili na mokatay
ang mga binhi sa nangka
dili na mogitib
ang hulaw nagpabilin dinhi
sa pipila na ka tuig

hangtod nga miabot siya
sa imong kinabuhi

lahi sa tanan, anaa ang
hunasan nga hinay hinay nga
nagpaabot sa pag-abot sa ulan

ang tubig bugnaw kaayo apan
init ang dughan
ang tangkugo mibawog
ang mga tiil misugod sa usa
ka sayaw

kanunayng sayop ang panahon
dinhing lugara
ang giingon mong gugma wala
dinhi

ang mga panganod nagisiging
taliwan
sa kanunay nagsulti kanimo
nga ikaw sama kanila

kining lugara dili alang kanimo
alang lamang kini kanila og busa
sila nagpabilin

asa kaha ang gugma sa imong
kasingkasing gibutang sa Ginoo?
asa kaha kini tugbangan sa
lunsay nga gugma usab paris
sa imong gibati?

hunas, taob, kulog hayang ang
kalibotan
ikaw nagpabilin nga kamot nga
nangabri alang sa wala pa gihapon
miabot

samdan na kini sa tikbas sa kahayag
gihapdosan pa gihapon sa tusno sa
kangitngit sa tanang kagabhion
nga sa kanunay nagputos sa pagkatulog
sa imong kinabuhi