ang dili pagsalig sa kaugalingon

sa pipila ka adlaw
nailad ko nimo
giihap ko ang kagahapon
nailad ko nimo
suma sa akong listahan
sa pipila na diay ka
katuigan

kon buhaton ko ang naa
sa akong hunahuna
dayon makulbaan na
gani ang akong panumduman
anaa ka diha sa tunga
sa akong kinabuhi moingon
dili kini daotan
lamian kini makaayo kini
kanimo
makahatag kini kanimo
og kalipay 
nganong mabalaka ka man
nga daghan pa man ang ugma
og daghan man usab sila
daghan man usab kita?

human niadto
nasamdan  ang akong kasingkasing
nakulit sa akong konsyensya
ang bato nga nabuak nga dili
na gayod matapak
gibinbin ko ang mga tunok
sa rosa sa akong dughan
giantos ko ang kabug-at
sa silot sa kaugalingon

miingon ka sagdi si
edipos nga milugit sa iyang
mga mata
nga karon buta na og
nagpalimos sa kadalanan
sagdi siya nga miluwa sa
iyang pagkahari

lahi ka
walay nakahibalo bahin kanimo
wala si Teresias
wala pa ang hulaw 
wala pa manghilabot ang mga
timos sa mga oremos

pagpakahilom lamang
lingkod sa terasa
lantawa ang kalinaw sa
kalibotan
ang kaanindot sa kahaponon

nahulog ang luha
miulan ang akong kagabhion
og nakapangutana ako
kinsa ba gayod ikaw sa akong
kinabuhi
ikaw nga akong kaugalingon mismo
nga makamao ka
mang mobudhi kanako?