salamat Ginoo

pagsulod mo sa lawak
anaa ang nagpatongpatong nga basahon

dili kini kabahin sa literatura kay kon imong pamation ang ilang mga tingog diha sa mga
panid, mabati mo ang mga nag-iyak, og ang mga larawan sa nangamatay molangyaw sa
hangin dayog pakita sa ilang mga samad, mga putol, mga wala na makit-i

maong sa imong pagsulod disir ka molingkod moginhawa ka og lawom
lantawon pag-ayo ang palibot, ang mga kurtinang giabogan, ang salog nga wala pa
malimpyo ang mga bolpen og papel nga wala mahapnig sa ilang saktong butanganan

human niini mopiyong ka sa imong mga mata mopadayag sa imong Bathala,
mangayog panabang, mananghid nga sa dili pa nimo sugdan og halungkat ang mga
panid sa daghang basahonon unta

giyahan ka sa katarong, molungtad ang kaligdong nga unta inig human nimog basa
masulat mo ang kamatooran og sa katapusan gipalupad mo ang mga tamsi nga ilang

gitirador og gihawla, nga unta kadtong mga samad maalim, nga unta inig human
niining laing lapoy nga adlaw, nadakop mo na usab ang kataposang kahayag aron dalhon nimo
sa imong balay, ibutang sa kasingkasing, kuyog sa imong hinanok nga pagkatulog.