tinabas

miabot ang kakapoy
sa pagpamati kon naunsa ang
iring nga
gisilotan sa pagsungkab
sa usa ka kolon nga
inun-onan

kon unsay tinood nga nauna
manok ba o itlog, usba ang
pangutana

asay mas lami? asay mas makalingaw?

mubo ra ang  panahon
para sa kalipay
kon imong idugang ang
kasakit
mas mogamay

pilia ang angayan ang makalipay
ang makapatubo
ilabay ang daotan, ang makadaot

ang gahi nga ubo, ang sip-on nga tin-aw
ang kaanindot sa bulan diha sa punoan
sa balite
ang kabo sa tubig nga nakulob sa banggera

dunay sawa nga nangitag kainit sa dapog
nga imong gihawiran
sa walay kukahadlok tungod
sa kangitngit

kadtong nagpiyong ka samtang mikatkat
sa pangpang
sayod ka kon pila ang nahulog didto sa
paghawid sa bato nga luag
apan tungod sa buwak sa kahoy nga
imong gipangandoy
naabtan mo ang maong tinguha
sa walay kukahadlok tungod sa kangitngit