sa taya ania nabutaan....

ania ka haduol na
sa tungang gabii 

samtang nagsulat ko
anaa ka usab diay diha
mibasa kanako
unya dili kitang duha
kaila gani layo man
gayod unta kita kaayo
apan naa koy gibati nga
kalipay, nga mora bag
kita nagtapad unya 
gibati nato ang kainit
sa atong mga kiliran

abi mo nakatulog ako
ug sayo sa kakapoy sa
akong mga buluhaton
unya sa akong pagmata
karong orasha akong
gihagpat ang akong mga
damgo sama sa paghagpat
nako sa kalamunggay
aron akong ilunod sa
lamian kaayong tinola nga
malasugi,

karon ani ako ania
sa akong kaugalingon
nakighinabi sama sa
naandan, apan duna
laing nahitabo nako
karong gabhiona, 

dili kini kabahin sa mga
bitoon ug aninipot kabahin
kini sa kahilom nga 
sa tinood diay sabaan 
usab, kay abi mo ang
kasaba usahay dili diha
sa pagsyagit, o sa pagyama
yama, sa pagyubit sa pulong
apan kabahin usab kini sa
kasingkasing nga gustong
mahigugma apan dili na
niya matuhog pa ug balik
ang mata sa dagom nga
sa akong pagsusi
sa kadugay sa paghikalimot
sa taya ania nabutaan.