taas unya labong....

gisulayan nato ug
patong ang usa ka pulong
sa laing pulong

morag kalo sa ulo sa usa
ka tiguwang
morag bata sa iyang
abaga nga
morag gahimo sa
iyaha nga usa ka kabayo
samtang siya
ang naglingkod sa montora
samtang gahawid sa
bunal nga morag ikog
sa pagi

kining pagpatungpatong sa pulong
maoy nakaingon sa 
kataposang nilugdangan

ang pagkahagbong ang
pagkakay-ag ang kusog nga
tingog sa pagkahulog dayon
ang pagbanos sa tumang
kahilom kay dili ka buot nga
ang bata nga malipayon 
sayong mahimong lain na
usab nga masulub-on nga
sama kanimo

sagdi lang, inig kahuman 
niining tanan samtang nangita
pa kitag paagi nga walay
mabasol, mobalik ra usab
ang kinabuhi, modagan ang
bata, magdula-dula sa gawas
sa balay unya makit-an niya
ang tinood nga kabayo
nga sa kakulang sa iyang
pagsabot wala siyay kahadlok
nga basin ug masipaan siya
samtang gisulayan niyag
hikap ang kaanindot sa
iyang ikog nga puti,
taas ug labihan kalabong.