bahala na ug walay tinagdanay

kumusta ka na?
dugay na nga wala kita
magkita

karon nakahinumdom 
ako kanimo
sa kaadlawon
diin wala pa nako
abrihi ang bentana
sa akong balay

bugnaw pa kaayo ang
hangin
hadlok ako nga basin
ako kabuhion

kumusta ka na kaha?
wala na ako nakadungog
bahin kanimo
walay balita gikan sa imong
lugar

sa kataposang panagkita nato
didto sa bukid
namatikdan nato ang itom
nga alibangbang
apan wala kita nagpakabana
niini
gani nagsulti ka man
(isip komedya lang kaha?)
nga kon adunay mamatay
kanato
sa bisan unsang hinungdan
unta wala na lang
paramdamay

ingon ka
usa lamang kini ka panaw
pauli gihapon kitang tanan
sa tinood tang panimalay
usa lang
didto na lang ta magkita
pag-usab
bahala na ug walay
tinagdanay.