basurahan

 ag ikog sa pagi ni tatay

nakabunal ni ramon nga among

sulugoon sa tulo ka tuig

maayong pagkalabhag sa likod

ni ramon, wala kaantos

milayas, ug sa akong nasayran

nanimpalad sa halayong dapit

ug wala na gani miuli sa ilang

panimalay

naglunos daw si ramon,

miabot ang balita nga didto

ra usab siya namatay ug 

dali daling gilubong

milabay ang pipila ka tuig

natigulang na si tatay

namatay ug una si nanay

nga dako usab ug pagmahay

namatay ra gayod si tatay

nga walay mipatulo ug luha

bisag gamay

ako nga walay gibuhat

sa paglabay sa panahon

sa mga panghitabo nga 

mas maayo pang sa dayon

kalimtan

maoy naglubong sa ikog sa

pagi nga pinangga ni tatay

tupad sa kasilyas, kilid sa

tangkal sa upat ka baboy

didtong dapita nga nakankan

kay gihimo namong  basurahan.