musika sa walog nga luhaan

 ang kakusog sa ulan

nga nakababag sa atong lakaw

gihimo tang musika sa atong

mga dunggan

ang miabot nga baha nga mitupong

sa bentana sa atong balay nga nakapabalhin

kanato didto sa ibabaw sa atop

gihimo natong musika lang gihapon

ang tungang gabii nga kabugnaw 

taliwala ning dakong kalamidad samtang

nagpaabot kita sa tabang nga gisaad

unya wala gyod miabot

gihimo ta gihapong musika sa atong

mga dunggan nga karon nagkurog na

sa tumang kabugnaw

pagkaugma sayong buntag sa dihang

napalgan na ang daghang mga patay nga

nanglutaw unya namurot ang mga aping

ug tiyan gihimo ta gihapong mga musika

sa atong mga dunggan

gimugna ta ang pinakaanindot nga awit sa

kamatayon, ang mga liriko sa kasakit, ang

mga symphoniya sa mga pagbakho ug uban

pang mga nota sa pagmahay atong gisuksok

giapil gayod bisan unsa pang kaligotgot

sa mga nakadungog bahin kanato ug sa mga

wala nangambat dili kita musika kon dili dakong

problema nga kon mahimo lang wagtangon sa

lain na usab nga kalamidad aron malimpyo ang

kalibotan sa mga walay angay, aron mahapsay ang

mga dalan, mawala ang mga lapokon, mobalik

ang mga kabuwakan sa hardin ug mosumbalik na

ang kaanindot sa pantawan

kita ang mga musika sa walog nga luhaan

sa tore nga garing, sa kahayag nga walay pagkapalong nga ilang ilubong sa mga basahon

sa giagop-up nga mga novenahan.