ang ok-ok ni kafka

wa kay mahimo

sa dihang nahimo kang

ok-ok ni kafka

gipakatawo kang

ok-ok na daan

dili na kana mausob

daghang miingon 

nganong nagpaka-ok-ok ka man

nga mora bag ikaw ang

nagbuotbuot kabahin niini

aron dili kaayo sakit

moingon ka:" ngano, unsa diay

ang ok-ok? daghan mang ok-ok,

ok ra man ang ok-ok, 

dili ba? bisag pamatyon pa nimo

ang mga ok-ok nga sama kanako

magpabilin pa gihapong daghang

ok-ok dinhi, gani mas modaghan

pa kini, kon imong sumpoon"

ang mga limpyado nga mga

babaye, misyagit, pesteng mga

ok-ok, hugaw, baho,

langto, patya patya patya!

bisan gani ang mga bata nga

walay buot mahadlok man sa

ok-ok,

apan ok-ok ka, bisan unsaon

ok-ok man gihapon

gikalud-an, gilikiyan, walay

ganahang modawat kanimo

sa panimalay

walay ok-ok nga magpakamatay

busa, miingon ang ok-ok, "ganahan

ko sa akong pagkaok-ok" apan sa

iyang higala miingon siya sa tinood,

"kinsa ba kahay ganahan nga 

maok-ok? sa tinood lang bisag ako

dili ganahan, apan bisan unsaon

ok-ok, ok-ok lang gayod gihapon

walay kausbanan, ang natawhan.

wala gisulat ni kafka ang ok-ok,

ang ok-ok ang nagsulat bahin kaniya.

kay ngano, naay antena ang agtang

ni kafka? ang ok-ok ray naa

samtang nagpahayahay diha sa 

iyang sofa.