ang konsensya

naay panahon sa pagbalibad
sa kalumo 

sama niadtong nagkita mo
sa lawak
unya ikaw atua sa iyang likod
mihalok sa iyang liog
hinay, basa, gipauyunan ang
panaw sa gilok unya ang
imong mga kamot mihaploy
sa iyang kilid paingon sa 
iyang sampot
pilit ang kalami diha sa
kainit

ang lawak hilom unya ang
upat ka dingding apil ang kisame
morag misaad nga kon aduna may
buslot kini manapak 
ang salog walay imik mikonsente
sa inyong gibuhat
diha sa paglagiti sa katre sa
dihang nahupyak ang mga alugnan
sa inyong dula diha sa
pabug-at sa kakusog sa pagdapion
sa inyong mga lawas 
nga wala na kabalo kon kinsa
kadto samtang ang usa misulod
diha sa iyang gisudlan

adunay nagpahipi lamang 
nga wala mangilabot
didto sa sulod sa imong kasingkasing
apan dili kini magdugay

pagkahuman sa maong hitabo
sa dihang nasuot na ang mga nangatangtang
mimata kini
nanudlay sa iyang buhok dayog
sulti diha kanimo nga ikaw nakapanglimbong
ug dili kini siya mohilom 
hangtod nga ikaw masuko
ug gusto nga nga manumbag
gani hangtod nga ikaw gusto na
usab nga mopatay

apan mikatawa kini ug kusog
gitulisok ka
gihagit: hala, pagkuha ug sundang
takbasa ako
takbasa ang kasingkasing
takbasa ang imong kaugalingon!!!