si dario, 32, lalaki, taas og bungot
kulongon ang buhok, maestro, bugtong
anak, lapad ang ilang kalubihan,
dakoa ng ilang mga basakan
buena familia, ilado ang ilang apelyedo
sa among lugar, abogado ang tatay,
ang nanay doktora, hangtod karon
anaa naghandom lang gihapon sa
anino sa tumoy sa lubi,
dili gayod niya malimtan ang
nanghitabo didto sa dihang nag-edad
pa lamang siya og desisais, ang iyang
unod, mainiton nga mabag-id sa laing
unod didto sa baybayon, 1975 pa kadto,
si Elmer, iyang amigo, labaw pa sa suod,
ambot og unsa kaha ang tinood,
wala ako masayod, wala ko magpakisayod,
buhi pa si dario, apan dili motug-an sa
tinood nga nahitabo nga dili gayod niya
malimtan, didto sa daplin sa baybayon,
gibuhat nilang duha ang matawag natong
makaulaw og dili angayan,
sa duha ka lalaki nga mga ambongan
ang anino sa tumoy sa lubi anaa pa
gihapon sa tumoy sa dila ni dario,
gusto niyang yubiton pag-otro
gusto niyang makalimtan, apan
unsaon kaha? iyang gihagkan ang
laing mga ngabil, apan mao lang gihapon
mobalik siya sa anino sa tumoy
sa punoan sa lubi sa iyang tinood
nga gihigugma.Walay ngabil sa usa
ka babaye ang makapahikalimot niya
sa iyang kaagi.
