2019/03/25

ang akong dakong sayop

salamat
kon wala ka pa
wala gayod nako
mabati ang akong
sayop ang akong
dakong sayop.

salamat 
sa akong kiliran
ania ang akong
sayop ang akong
dakong sayop.

salamat
nakat-on ako
kanimo

ikaw ang akong
sayop ang akong
dakong sayop.

O hangin!
tayhopa na intawon
ang akong sayop
ang akong dakong
sayop.


2019/03/24

talan-awon sa panit sa iro nga nawad-an na ug balahibo

dili nindot lantawon
ang karapata
kon dili kini burot sa kabusog
dili sab kini hingpit
kon wala diha sa iyang
tupad ang iyang
anak-anak
nga kon makatapot sa panit
sa iro
sagad.

nangita sa anghel.

ania ka
sa habog nga lugar
nanira ang
pultahan
usa ka abre
nga bentana
diin makita mo
ang tibuok syudad
ang kagilak sa
maladyamanteng
kahayag
ang kalapad
sa kalibotan
ania ka nakigsulti
sa panganod
migakos sa hangin
nangita sa anghel.

mitoo ang langit

misaad kas 
altar
nga wala na
ang pag-usab

o ang pag-usab
usab

morag misurop
na ang kahadlok
morag nadutlan
ka sa gayod sa
tutok sa kasakit

wala na kalupig
ang saad sa kalipay

dili na kalinlang
ang kiat nga bakak

ang aso nga dili
makumkom
nangagumkom
nadungog samtang
imong gikaon

karon milupad ang
kalag
naluspad ang ngabil
dayog luhod
sa balas
misulat sa saad
nga dili na gayod
mousab....

mitoo ang langit
mitalidhay ang
panganod

sa imong pagsulat ug balak

usa ka ka 
iro nga nagtilap sa
imong samad
samtang nagpahulay
una sa silong sa
dapog

wala sukad nga
ikaw ang
iro nga miambak
ambak sa
kalipay
tungod sa gihatag
nga dakong 
bukog sa baka nga
anaa pay
utok ug unod

kanus-a pa kaha
mahimong usa ka itoy
ang imong balak
nga nahinanok ug tulog
sa kilid sa tutyanan
nimong inahan?

2019/03/22

climate change

samtang gabaha sa taiwan
ag didto mi
nagpahuraray nga mora mig
nawong sa usa ka rescue mission
sa among mga 
baratohong raincoats
matag picture picture
morag mga piso nga nangabasa
ug gibyaan sa among inaan

nya sa dihang nakauli mi sa
pinas
pagtugpa sa manila dayog lupad
sa dipolog
haskang inita gayod nga morag
gipamaak ang among panit sa
daghang hulmigas

dayog agas sa binulbog namong
mga singot
dayog kanaog sa sakyanan diha
sa daghang abog nga namulbos
sa maong mga aping

unya sa among mga tiil
morag nanura kanamo ang
katawa sa nangliki na
 nga yuta.

ruby

gwapa siya
batan-on
maayo sang 
moestorya
gaaligi ang
wit and humor
lami kan-on
morag curacha
nga gitunoan
ug gihapahalangan
didto sa
alabar's

multi bar multi versity

kaduha siyang mikuha sa
bar
katulo siyang nagbalhin
balhin ug
university

para nako dili kini angay
nga ipanghambog
gani dili na angayan nga
ipanugilon pa

apan matod pa niya
mi allign ang mga stars alang
kaniya

kadtong mga bright
sorry na lang
siya ang shooting star
sa ngitngit natong kagabhion
siya ang gitawag nga elevator promotion
sa mubo lamang nga higayon
kay lagi
lakas man kaayo siya 
ni digong.

kabahin ni Noe nga bag-o lang mipasar sa bar sa iyang bagang antyohos

kon unsa daw ang akong
ikasulti bahin niya atubangan
sa daghang nahubog na 
niadtong gabhiona maoy akong
nabungat ang kasagarang 
masulti sa dili na angay nga
isulti pa, res ipsa loquitor, dayon
niyag katawa samtang nagbula pa
sa beer ang iyang baba.

2019/03/18

ang kaulag ug ang balak

nagkuyog ang duha
ang kaulag ug ang balak

nagkurap kurap nga morag
mga buta nga nangawala
nagkaguliyang sa kangitngit
sa ilalom sa dakong kahoy
unya sa ibabaw ang mga daghan
kaayong mga bitoon
nga nangumbitay sa daghang
dahon sa mga panganod

sa dihang

nawa ang tanang
kabalaka
sa dihang nangutana
ka kon
unsang orasaha
ang sunod tang
paghiusa.

nakita ko ang 
daghang pahiyom sa
buwak nga santan
sa adlaw dapit sa
kasadpan

2019/03/04

ang kasakit.....

ang kasakit naghilomhilom 

basin sa akong kabahin lang kini

ang kahilom miabot milingkod sa salag

sa kasakit, 

dugay, hangtod nga nangitlog kini ug kalinaw

ang kasakit nagpabilin, gilumluman lamang hangtod

nga kining mga itlog gituka sa bag-ong kinabuhi

mahuman lamang kini hangtod nga motubo ang

mga pako hangtod nga kini makamao na nga 

molupad palayo sa salag diin nagpabilin ang

wala na kinahanglana nga balahibo, gagmayng

layang dahon, nahibiling tipaka,

patik sa kasakit, batikan nga masulub-on

magtutudlo na usab kabahin sa kahilom.

2019/03/03

yano lamang

maong
ang among pagpuyo
sa matag
adlaw na lamang

wala na kami gihuna
huna bahin 
anang ugma

karon lang ang ania
kanamo
unya igo igo ra
gayod

kon aduna man gani
sobra
nasayop ka

imo kanang pangandoy
nga gusto pa nimong
makab-ot

kaming ania lamang
sa karon
walay ikapasalig kanimo

ang ugma damlag
usa na lamang ka bisita
nga wala namo
giapil sa kumbida.

ang among kumbera
ginagmay ra
usa ka baso nga tubig
usa ka kumo sa kan-on
parisan sa among
pangagho
nga nagpaabot sa 
kurakungho.

kadtong walay anak

sa maong dula sa kinabuhi
kulang kami

daghan kamig kulang
aron madala ang kahayag
ngadto sa saktong padulngan

kulang kami ug kamot
usa na lang ang among tiil
wala na usab ang dilaab
sa dughan

kon unsa man ang ania
o mabilin
hutdon gayod namo kini

hangtod nga inig-abot
sa kahayag sa among
kamot
igo sab ang pagkapalong
sa among 
mga pangandoy

ang kasakit ni C.

dawaton ko ang akong
dakong sayop
nganong gitawag nakog
bato ang bato

ang iwon, iwon, ug ang
sanga nga gasanga sanga

unta pan na lang, unta 
salampati na lang kaha
o dili ba dalan na lang
dalan nga agianan natong
tanan

2019/03/02

kawalaon

bisan sa kadako
sa lawod
bisan dili na ako
makita
bisan ug ako na
lamang ang
kataposang pasayan
nga gihakop
sa butanding, ania,
ako, ako lang gihapon
nagpakatakos
sa kawalaon.

bungot

ang imong bungot
nga taas nga nagbitay og
misangko sa imong
dughan nga
gihapuhap sa imong
kamot 
nga nagpalami sa imong
palad nga
walay kubal
mao ang nakapahinuklog
kanako nga ikaw
layo ra kaayo sa tinood
unya ako sab
mao ang nagpabiling bakak
nga misulay diha
sa pagkamatinud-anon

esmeraldo

dili mo mahakop
ang tanan
esmeraldo

pilion mo lamang
kon unsa ka
kon asa ka mas
malipayon

kon duha o upat
ba kaha ang imong
nawong
maglibog pati ang
imong ilong

bisan ug upat pa ang
imong palad
ang mga balas nga
imong pagahiposon
mangahulog lang gayod
gihapon

Panginhas dire