2/25/2013

koleksyon sa mga maskara

 

seguro matingala ka
nganong nangolekta ko ug daghan
kaayong maskara

kon mangutana ka
ang akong tubag himoon ko na lang
nga taphaw

ang mga maskara ug ang pagtigom niini
usa usab ka larangan sa
arte

mahimong motoo ka apan kon imo
akong sitahon gayod pag-ayo
aduna koy laing tubag

ang mga maskara mao usab ang mga
nawong sa atong
pagpakabuhi

mao usab ang pagpakigbisog
sa dili nato andam pang madawat

kawili


 

unsa bay kahadlokan
sa langgam kon ang iyang mga
pako andam na
kanunay?

ang hangin? kauban kini niya
sa kiliran
ang ulan? awit kini sa iyang
panaw
ang mga kabukiran? ang
halayong lawod sa
pito ka dagat?
mao kini ang iyang
balayan

kaloy-an ko ikaw nga walay
pako
kauban sa mga bato ug mga
bukog
ikaw ang mahibilin dinhi
sa natad sa
kawili.

sa akong upat ka tiilan



ang lamesa kon
imong sukaran sa pagkaon
nindot lantawon
ug bisag imo pa kining
halaran sa
mga awit kuyog sa imong
hinigugma
lamesa lang gihapon kini

kon imo kining biyaan
dili trapohan ug mapuno
kini sa abog
lamesa lang gihapon kini

kon ako ang imong biyaan
adunay mahimong dakong
kausaban

gusto kong pugngan ka
apan sayod ako nga
dili ka mabut-an

adunay panahon nga ako
mahisama sa lamesa
nga bisan ug unsay imong
buhaton
lamesa lang gayod ako
gihapon
bisag maunsa ka pa
bisag ikaw mismo ang
mahimong abog
sa akong
upat ka tiilan

2/23/2013

pagkulit


 

gibilaran ko sa makadaghan
ang mga gilikayan nga
sangpotanan

kanunayng nagsirkus kining
akong hunahuna

sa usa ka nawong anaa
ang kalig-on ang kabato apan
dili malipayon

sa laing bahin anaa ang
nakatulon sa iyang kaugalingong laway
sa tumang kalipay
apan samdan ang kalag

adunay isla sa tungatunga sa lawod
ning bulawan nga timbang

walay gibuhat
kundili mao lamang ang pagkulit

sa mga pulong
pagpanday sa balay sa mga

katarungan

kinsa ka man?

 


kinsa ka man
o

numero?

nganong gisunod mo ang
akong tunob

bisan sa kalalom na
sa kagabhion

ning akong pagtukaw
sa mga

walay utlanan

ning akong paghikotar
sa mga

lintunganan


parayig sa kagabhion


 

mao kini ang parayig

daygi ko

ayaw ako ug patohoa
nianang

dili paghikap

gilimbongan mo ako
sa wala mahikap

ayaw ako ug saari nianang
paglantaw lamang

hangtod kanus-a ba ako
mohawid sa damgo lamang?

hangtod kanus-a ba ako
mosakaysakay sa mga pako sa
mga binilaran nga
walay bungag kinutuban?

namarayig ako kanimo
ning kagabhion

unta tinood ka.

ang kahadlok

 http://ts3.mm.bing.net/th?id=H.4998320596518398&pid=15.1

unsa kaha
kon diha sa akong pagtalikod sa
kalipay

giduslak mo kanako
ang punyal
sa kamatayon?

unsa kaha nga ako
gilinla mo sa usa ka kutsara nga
kalipay

sa usa o tulo ka gutlo nga orasan
unya ang balos niini mao ang

way pagkapalong nga kalayo didto
sa atong duha ka impyerno?

gisaad ko sa akong kalag
nga ampingan ko gayod ang mga kahuyang
sa akong mga unod

ug lapos sa akong bukog
diha ang hugot nga
pagdili sa usa ka pagtoo

lit-ag

 


kabalo kong wala ka
matulog

di ka katulog maong ikaw anaa
nagsunodsunod

ikaw ang akong damgo
ug damgo sab ko nimo

 wa mahaluna ang atong
kasingkasing

wa mahaom ang atong
mga pangagho

ilatad ang habol ug ihaon ang
alugnan

nangamay na kanato ang
higdaanan


dali duol kanako
hapohapa ang akong dughan

idap-ig ang imong kumingking sa
akong baba

puyuka ang akong dila
ayaw ug saba



alang kang M.

 

duha ka naniradong pultahan
alang sa duha ka kanunayng nagpahipi
nga kinabuhi

duha ka abling bintana alang sa
duha ka mga bukton nga andam modawat
sa kabuntagon ug kagabhion

buslot nga atop alang sa matang
nag-iyak

nalangkat nga kisame alang sa
nagusbat nga kaugalingon

ang kanunayng paglaom mao lang
gihapon ang salog nga yuta

ang init nga habol og ugnan sa katre
ang maghatag ug mga saad

kutsarita

 

ang matag adlaw kanako
dap-ig na lang sa kahayag
sa matag kagabhion nga ako na
lang usa sa akong
tanlag

gibati ko ang kanunayng
pagbudhi

apan kining pagpakabuhi

ang dili pag-ampo diha sa mga kamot
sa kamatayon

naghimog kaanad ug ang pagbudhi
dili na nawong sa mabubhion

mao kini ang katarungan nganong
sa matag adlaw gihimo nako ang ingon

gikalipay ko ang wala nimo hisabti
nagsadya ako sa inyong kalibog

mao kini ang pagpakabuhi diha sa
pagbuka sa baba sa akong pagkabata

dayog hungit sa mga pasaylo
nga kinutsarita

alang kang S.

 



gahagong nga balak
walay kahasngan

sa usa ka guot nga
lawak

imong nadakpan

gitagong kaibog

abi niyag unsa

20 ka tuig nga
wa magkita

nagkatagbo
wa matuyo

sa gubot nga
dalan sa malate

lima ka brasas
nga kaulag

gipugos ug lubong
sa baga nga

panahon unya
karong nagkita

mao ra
tsa, estorya

dayog pasalamat
ug tugon nga

basin puhon
magkita na pod ta

kon swertehon
sa palad

kadtong nagsulat kabahin sa ikapitog kapin nga kalipay

 


sa iyahang balak kuno siya
nautgan

nagpaabot gihapon
nga imong hagwaon
aron
magawsan

ambot kining tawo kon maalimungawan

 


dunay naligsan sa trak de karga
tungod lang ug dakop sa mikariling
nga sinsilyo  sa
karsada

nagbulag nga bana ug asawa tungod
lang sa adobong baboy nga
napago sa kalaha agig subay sa
sinesine


inahan nga giabisan ug liog sa iyang
anak nga lalaki
sa hait kaayo nga sanggot
tungod kay
sayo kaayo kining gipukaw
unya gikapoy kay nabilar
sa disco sa pista
sa Matam

dili ikatingala


 

dunay  gipatay
tungod lang sa wala giuli nga
usa ka parisan
 nga
sapatos




virtwal

ang akong
gihawiran mao lamang ang
mga panapton sa akong mga
damgo

gipistahan ko ang
naa kanimo

kon ugaling dili ka ganahan
ayaw lang pod ug ihatag

ang katumanan niining tanan
kutob ra gayod sa
pagtutok

2/13/2013

kon sakiton kita

 



kining sakiton kita
(ayawg tagnaa kon kinsa)

dili tawo ang nagsakit
kanako
dili panghitabo ang
makasakit kanato

kining masakitan na kita
kaayo
sa pagtusok kanako
sa dagom
sa kalaay
sa punyal sa
kabuhong nga walay
sangpotanan
sa panglantaw nga makalumos
tungod kay
walay katigloman

nianang pagkalaglag
nga walay
salog

sayon na lamang kaayo ang
pagpangagho
wa gani ka kabantay nga ang
pagpanakla
nahimo na nga
kanunayng
sanglitanan

sa atong duha ka kinabuhi




sa atong dula ning
kinabuhi

ako ang hantakan
ikaw ang burador

ako ang tihaya nga
patag
ug ikaw ang
adlaw sa
kabuntagon

ang akong mga
kamot
mihawid sa
kilid sa
higdaanan

ikaw ang misud-ong
kanako
samtang gipiyong ko
ang akong mga
mata

wala ako'y tingog nga
nagtindog sa kilid sa
usa ka pangpang
unya sa dihang mipahawa ka na
ako kadtong
milupad paingon sa
kawanangan

kon mangita ka ug patay nga
lawas
wala kini didto kay ang
hangin dili gayod mahimong
usa ka lubnganan


pagsud-ong sa pagpadayag sa panahon

 

ania ako
walay tuyo

ingon ka
laag-baboy
kuno ang
tawong
walay tuyo

ang panahon
god kuno
bulawan
ug kinahanglan
dili kini
usik-usikan
nianang
latagaw
nga hunahuna

ania ako
sa gihapon walay
tuyo

nagtagad lamang
sa mga
pagkapukan

naglantaw lamang
sa pagkahulog sa
tanang dahon

namati lamang sa
hunghong sa hangin
sa awit sa
mga kasikas sa
dahon sa
kawayan

kon aduna man
ugaling ako'y
katuyuan

ako lamang
gisud-ong ang
pagpadayag sa
kinaiyahan
diri kanako

diha ang
sayaw sa panahon
diha ang
harana sa mga oras
ang pag-irog sa
kalibotan

ang mga pagbiya ug
pag-abot
ang pagbukhad ug
pagkumkom

bawos sa pag-usab sa panahon


 

pagkapaspas sa panahon

mas paspas pa kini kaysa
mga pagpangahulog sa balahibo sa
manok nga gidungoy

nalupig ang mga dahon sa
ipil-ipil nga gibudhian sa
hulaw

mas paspas pa kini sa
pagkapalid sa mga balas
daplin sa baybayon
sa bagyong sendong

wala makapugong ang mga
gamot
wala makapugong ang mga
bato

ako nga naglantaw
nagpungko sa dakong bato
unya sa dihang mipahawa ako
sa makadyot aron lang
paghikot sa anay nga nakabuhi
sa tangkal
pagbalik nako
nangausob ang tanan

ang bato giupawan sa
dagat
ang lubi natumba
ug nagpaingon kanako
ang mora kadag-ag balay
nga balod
sa dagat

gipapas ko sa panahon
apan mibalos ko

giundangan ko ug sulat
ang kabahin kanilang tanan

2/12/2013

alang sa akong mga bisita nga mga undan nga pulong


 

matag adlaw giduaw mo
ako

sa sayong kaadlawon
momata ako ug
mangandam
kanimo

abli ang pultahan
sa akong kasingkasing
dagkong bintana ang
akong hunahuna
nga bisan kanus-a
wala gayod kini
mga trangka

andam ang akong mga
kamot
sa iyang pagbukhad
sama sa mga buwak sa
bayabas

ang akong mga bukton
kanunayng haw-ang
ang akong baba
nanaghoy
ang akong kalag
nanghayhay

ang akong ngipon nagkagot
apan wala kini kalagot

ako ang inyong ubos
nga tigsulat

2/11/2013

balikas sa kapalaran


 

kaniadto
nakita mo ako nga
tungaw lamang

gidungog ang akong
gahom sa
paghatag ug katol
bisan
sa akong kagamay

apan bisan pa
niana
wala ako panumbalinga
kaayo

tungaw lang
lahi sa bangaw

human sa 52 dos
ka tuig
nagtagbo ang atong dalan

nagkita ang luwag ug
ang kasili
diha sa talad-kan-anan

wala ka katoo
nga ang tungaw mahimo
sad diay
nga kabaw

nagpanglingo ka
nagpangyawa

gibalikas mo ang
imong kapalaran

kay karon ikaw ang
tungaw
sa imong kalimutaw

paglaum




adunay gasunod sa akong
tunob

kanunayng naa sa akong
likod


 

kon molingi ko
wala ako'y makita

kon mohunong ko
wala sab ako'y madungog

mipadayon ko sa akong
panaw

wala ko na panumbalinga
ang atong kagahapon

magpaabot ako sa saktong
higayon

nga ikaw ug ako magkita lang
gihapon

sa atong karon ug unya gakson nato
pag-ayo ang atong
ugma

ang mga balaod dinhi

kanunayng nagmata ang
naniid kanako

unya ako
kanunayng sang
nagpakaaron-ingnon nga
patay
tulog

apan sayod ko nga sayod sila
sa akong
pagpiyong nga
usab kanunayng namati

kon unsa ang sunod
ug asa ang
tumong

wala dinhi ang pagmahay
abri ang mga tulumanon
kon kinsa ang masipyat
impas
kon kinsa ang dili kaagwanta
sibat

pagpili

nausob na ako

sayran ta ka nga kon papilion mo ako kon

lansang ba o martilyo
mas gusto ko ang lansang

sihi ba o alibangbang
pilion ko ang sihi

bato ba o tubig
wala ako mausob niini

kanunay kong gipili ang
bato

unya ikaw sab ang
siging kasayop anang gunting

ikaw ang wala mausob
kanunay ka gihapong anaa

sa pikas nga luna
diin ang mga sayop
sadya

gasa

ang imong gasa kanako mao ang kwadrong
wala'y larawan

balay nga walay bintana

dalan nga walay utlanan..................................

ikaw buhi

makatarunganon ang pagpamakak
kon imo kining gibuhat aron ka mabuhi

wala nay laing paagi aron ka makalusot
niaang lungag
aron ka mahimong gawasnon
kon dili diha lamang sa pagpamakak

sayod ako niini ug wala ko na ikaw aswahi
nganong ako
giapil mo sa imong mga bakak

nganong ako wala na diha kanimo
nganong ako gihimo mong hangin ug imong
gipaanod sa unos sa imong mga
kamatuoran

dili na ako mangutana, wala ako'y nasabtan,
gihunahuna ko usab nga ikaw angayan nga mabuhi
sama kanako

kay labaw sa tanan, anaa ang pagmahal ug diha
sa pagmahal, labaw sa tanan
ikaw buhi

chaplet of mercy

si tita bebe tiguwang na.
ang iyang mga anak nga pito ka buok morag mga langgam nga namahawa na sa ilang salag
unya nanglupad sa lagyo kaayong lugar ug naghimo na usab ug ilang tagsa-tagsa ka mga salag alang sa ilang mga itlog,

busa si tita bebe nga tiguwang na nagpuyo na lang nga nag-inosara sa iyang balay nga karaan nga kabilin sa iyang bana nga si Ite nga namatay wala na ka tuig ang milabay nga ang gipasumanginlan mao ang espiso kaayo nga tsokalate nga gikan sa tableya nga hinatag sa iyang igsoon nga taga-Jimenez,

karong buntaga si tita bebe diri sa among balay namahaw: tinolang isda, mais nga nilung-ag, salad nga guso, kapeng bisaya, dayon usa ka pongpong nga lanzones nga gikan pa sa Jolo nga dala ni emma gikan sa zamboanga city,

gamingaw ang tiguwang, ug mihirit pagkahuman ug pamahaw kon unsa man kuno'y iyang dalian pag-uli nga wala man siya'y bata nga patutyon, ug busa namalhin kami sa hardin sa kilid sa among balay ug nagsumpayay ug mga sugilanon. Ang iyang apo nga si Parker karon pa kami masayod nga girehab diay didto sa Facienda sa Masbate, usa na ka tuig ang milabay. Milantaw ko sa akong relo, alas 9 na sa buntag, unya wala pa ko'y kaligo, unya si emma, wala pa ka panutbras.

nga si Nap human ug retire sa PNOC gikuha diay nga consultant sa usa ka companiya sa Ethiopia ug dili ipasaba nga ang iyang sweldo didto 400 dollars matag semana, ug busa si Reggie na lang usab ang nabilin sa ilang balay sa dumaguete. Si Parker mibalhin nag puyo sa cagayan de oro ug kamao nga momasa ug pan, ug nangunay kinig atiman sa iyang gamayng bakery sa Divisoria.

Miss Bisaya siya kaniadto sa 1950 unya gipangasawa siya ni Ite sa edad nga 16.

Karon ang iyang kinabuhi anaa rag simba sa matag buntag. Miundang una siya sa Dawn Rosary kay medyo mitukar ang iyang panohot. Pagkahuman ning pamahaw, ( sa akong relo alas 10 na sa buntag) mouli na usab siya sa iyang balay nga karaan, ug dayog himo sa iyang mga tulumanon: rosaryo, pangadye sa chaplet of Mercy, naa pay debosyon sa Blessed Virgin Mary, sa Santo Nino, ug lain pang novena sa Divine Mercy ug sa Sacred Heart.

Dili na siya ganahan pa nga mamubo sa iyang mga tanom. Gikapoy na siya.

sandayong

ang panahaon nga
nanglabay morag mga dahon
sa avocado nga paspas kaayong nangahulog
nga karon nagtapok sud sa sandayong nga inig hulog sa kusog kaayo nga ulan
magbara sa agianan sa tubig,

unya ang tubig moawas sa sandayong moikyas paingon sa kisame unya kitang duha nga nangatulog sa katre
morag mga piso nga nangabasa dayog kurog sa katugnaw.

2/10/2013

Lawak Sa Balak


Naa bay lawak ang balak? 
Naa bay suok nga iyang tagoanan? 
Nganong dili man mogawas?
 Nganong di man magkit-an? 

Akoy 
2012.2.10

Mao Ra Ba Gihapon?


Komosta ka na man tawon?
Daghan na ang nanglabay nga panahon
Daw nagkalain-laing salida kun sugilanon.
Ubay-ubay na ang imong mga panahom
Sa kinabuhi, sa pagtuo, sa Dios ug sa tawo
Imong salabotan nagkalalom
Ang kasingkasing malinawon
Dako ang kausaban sa tanan,
Ang palibot kun 
Ang kalibotan.
Ug ikaw...
Mao ra ba gihapon?

Akoy
2012.2.10

2/09/2013

laag aron kuno mahikalimot

bag-ong lugar
lakat, suroy, lantaw
pahulay
lingkod sa bato
sa xiamen

lupad sa bangkok
 palutawlutaw sa
sakayan
lapos chiangmai

sirit sa hongkong
palit ug singsing
hirit sa macau
kaon ug lugaw

dalig balhin sa
singapore
puyog sengkang
pagkakadlawon
layas sa kuala lumpur
kadyot lang
laag sa langkawi
hangtod
kota kinabalu

naunsa na god ka?
pagkapula sa imong
lubot
imong nawong
morag kinumot

2/06/2013

tungod sa gugma


duha ang nakita
mong nawong

nahibat ang akong
panan-aw? og ikaw
ba kaha ang nahibat?

nalingla ako sa
imong pagkamasolub-on

gidagit ako sa kalooy
gihatod niya ako

kang kamatayon
sa walay pagbasol

2/05/2013

tomboy

 

sa hardin
sa gugma
dili lain
lantawon ang
mga nindot
kaayong mga
buwak
nga tag-as
ug mga
siwil

mapplethorpe

sa paghawid mo
sa sigarilyo
duna koy nakita
nga wala nila makita

gisalom nako
ang dagat
diin hapit ka
malumos
walay buhi nga
isda didtong
dapita
namakak sila
sa ilang giingon
nga ang lusay
misayaw kilid
sa batong
asgad ug buhi

ang kamingaw
sa baba dili
matukib sa bisan
unsang pulong

barko ang sigarilyo
diha sa dila nga
dungguanan

hulip sa imong
gihandom
matag gabii
diin ang hangin
morag naningil
sa mga utangan

ang imong mga
mata mitakbas
kanako
samdan ako
apan
nanglimbasog
nga mabuhi


dakog buslot




nagtagbo ang mga tudlo
 sa atong lapalapa
naghalok ang atong mga kuko
nahinangop
nagpasiatab ang kumingking
nga karon
gibuhat nato ang gidili
unya
sa kanunay
nakalusot kita sa ilang
 mga sibot
kay nahisama kita sa gagmay kaayong
mga isda
sa ilang sibot nga dagko kaayog
mga buho
sama sa ilang mga palwang
 ilong

kalambigitan


 adunay dakong kalambigitan
ang karaang typewriter ug
 ang tigulang nga manunulat

sa pipila ka tuig
mikabat ug  saysenta ka tuig
gigamit ang maong typewriter
sa mga tudlo sa maong tiguwang

sa una
wala lamang kini
apan sa kadugayan bisag
wala'y gigamit nga pulong
nasabtan nila ang usag-usa

nahimong baba ang
typewriter
nahimong dila
hangtod nga sa dihang
miabot na ang tigkuha
sa tiguwang
ang typewriter nahimong
kasingkasing

wala kay makitang
dugo
wala kay madungog
nga bakho

apan anaa diha
sa gitay-an nga mga
letra
anaa ang ang
nagpabilin nga kasakit
anaa diha
mitago ang
bakho

gisulod ko ang
lawak
diha sa nagtakuban
nga kahilom


2/04/2013

pilosopia sa usa ka sala

The permission
of evil is designed to work out a greater good – 
a lasting and valuable lesson.

diha sa 
sala

natawo 
ang kahibalo

ug diha sa
kahibalo
anaa ang
katagam

gibilin ang
pahimangno

ang tanan
padung sa
maayong dalan

kuyog ang
sala
aron 
mahugasan

hawid
sala, hawid
pagbasol

moyukbo silang
tanan

sa Nagmugna
sa Naghatag
sa Misugot nga kining
tanan
mahitabo

halad ang sala
sa kaluwasan

pag-abot sa paglaom

http://www.godsplan-today.com/0_Images/Grief2.jpg
 ang kanunayng maulahi
mao man gayod ang
pag-abot sa
pagbasol
nga inig abot
dayog tabon sa nawong
dayog hibi
iyak, patulo sa luha
sumbag sa dughan
ang uban gani
mosyagit
sa kasakit

abi mo ug
 mao na lang
kini ang
 kataposan

adunay laing maulahi
apan lahi
ang iyang pag-abot
hinay
sama sa pagbatog
diha sa
bintana
anang usa ka
puti nga
alibangbang



sala



TIPermissionEvil2.jpg (16682 bytes) mora bag
gisalsal nako ang akong
dila diha sa usa ka
palangganang asukar
unya sa siging
nudnod ang katam-is
nahimong
makalanag
makalilong hangtod
nga ang tanan
nahimong puros
pait

morag nahisama ako sa
tawong naligo sa gasolina
unya giduslitan ko
sa posporo unya dakong
kasunog ang nahitabo
unya ang nahibilin mao
na lang ang
abo....

nakaingon ko sa Ginoo
sakto ka Diyos ko,
unta sa unang kahibalag
wala na lang gayod unta
ako motilaw

karon di na nako
matilawan ang katam-is
unya nahimo akong
abog nga
gipalid sa hangin

2/03/2013

sunog sa 1963


 gamayng kagikan sa
sunog
sa tibuok lungsod
gikan sa usa
ka dula
sa usa ka
bata
nga gikan sa
gadangag
nga inahan

usa ka palito
sa posporo




gisaknit


ang mga isla sa kahayag
naglatag sa atong agianan
kita ang mga anino lamang
nagtoo
nga dili kita masakitan

sng mga panganod
nanugok
sa pista sa kalangitan
ug kitang mga anino
ang ilang
gihisgotan

naghisgot kag kasakit
ang uban naghisgot ug dimalas
kasagaran nagpadayag
sa kahiubos

ang mga isla sa kahayag
nangawala
ug atong mga madungog
man na lamang ang
mga tingog

wala na usab ang paglaum
nga maoy kataposang
suga sa kangitngit
nahanaw na usab kitang mga
anino
gisaknit
sa lalom nga dagat

salimuang sa mga lumot

ang imong kabilin

mga luha

nga nauga kuyog sa mga abog

sa kadugay sa panahon

napapas ang mga dayag nga hinungdan

nganong kasakit lang ang

kanunay nga nahisgotan sa mga katigulangan

ang tanang kaasgad

maoy nasunod

ang mga nahikalimot kon mahinumdom man ugaling

dagat ang

nahimong mga pasumangil

nganong ang

mga hagdanan ug ang mga bintana

nagsalimuang sa mga

lumot

http://ts3.mm.bing.net/th?id=H.4531835632813558&pid=15.1


ang pagbalik











kadtong mibalik ka
unya ang mga
iro mitagbo nimo sa nataran
dayog
kiwil sa ilang mga ikog
ug paghot
sa kalipay

nakaiyak ko
sa tago

2/02/2013

pagbinbin

 

giadto mo ako sa akong balay
gipangayo mo ang tambag
ug ako kining gihatag

dili maayo ang gamitay
moabot ang panahon nga
ikaw ang
mabitay

unya gipangutana mo ako
kon unsa ikaw
ug ako ang irong kanimo
miaw-aw

ingon ko: ikaw ang tigulang
lantawa ang imong upaw
ikaw ang walay nahot
ug ang kinabuhi wala nay
madawdaw kanimo

pagkasakit kong manulti
ug wala ka mahaluna niini

usahay gihunahuna ko kon ako angay bang magmahay
sa akong pagpasakit kanimo

mikatawa lamang ako
ug mipadayon sa akong naandang buhaton
gipala ko ang mga hugaw
ug ako kining gihipos
gibitbit nako ang
bug-at nga mga kamatooran
wala ko kini gisabwag
ako kining gipahiluna sa akong tokador
ug ako kining giampoan

pagkabangis ko
ug ako kining
gikasakit pag-ayo

2/01/2013

ang naputol nga pusod sa langit

http://ts4.mm.bing.net/th?id=H.4591149110723631&pid=15.1

ang sumpay sa kinabuhi sa langit ug yuta
mao ang linti

ang huni mao ang dalugdog
ang tanan
malisang
ang mga bata manago
sa ilalom
sa katre

sa usa ka takos nga
kaisog
gitutukan ko ang
langit nga naigo sa
hait nga kahayag

naputol ang pusod
ug unya nahimugso ang
daghan
kaayong mga bitoon

kita usab mga bulkan

http://ts2.mm.bing.net/th?id=H.4653198460322033&pid=15.1

kon buot hunahunaon
kitang tanang mga
bulkan,

hilom kita nga
bukid
ug sa atong palibot
nanubo ang
mga sagbot

tak-om ang
mga baba sa
atong mga
kabatoan

usahay sa gamay
lamang nga
pagkabingkil
moliki ang
atong ulo
dayog buga nato
sa atong mga
kalayo

nagbaga kitang
sulog sa
dagat

gihimugso nato
ang mga pangpang
ang mga isla

gipapas nato ang
mga kagahapon
sa mga balangay

gilumsan nato
ang mga syagit sa
panahon

unya pagkahuman
sa maong katalagman
mobalik kita
sa tumang kahilom

ug silang wala
makakita sa atong
mga kapungot ug
mga kabangis
moabot na usab sa
atong tiilan

mopahulay
moginhawa ug
lalom ug
moingon
nga kining lugara
mao ang akong
hagbay rang
gihandom

husay, malinawon,
wala sugod mahikap
ug puno sa mga tanghaga
ang sugdan na usab
nilag pangita.

lahi ang dia diri sa sulod sa kasingkasing


bisan ug daghan kitang
nanakay
ning atong gamay nga baroto

bisan ug maayong
pagkagama ang atong
timon ug katig
nga lig-on

bisan ug ang atong
mga katawa morag
kakusog sa bulusok sa ulan
ug kaalingasa nga nahisama sa
mga balod sa dagat

kamo nga naglantaw
ug kuyog  kanako wala
lang gayod gihapon
makadungog sa akong
kahilom

kamong akong
mga kuyog-sandurot
ug mga igsoon sa buhat
ug pagtoo
 wala
kamo'y mga mata
nga makaaninaw
nga ako pag-inosara

ako nga naglangoy sa
akong dakong lawod
naglutawlutaw
sa akong mga balod

unya sa tumang
kabalaka
nagpanghadlok kay
ang islang akong unta
dunggoan

 wala ko
pa gihapon maaninaw

ang mga anay sa atong katilingban


ang gibantog nga dakong kahoy
kaniadto sa
atong balangay,  habog, baga dili gani magakos
sa pulo nga sama kanato,
pagkalalom sa iyang mga gamot
ang kinakusgang hangin kaniadto
nga mikuha ug
usa ka balayan nga tawo
wala makapukan niini
bisan gani ang mga langgam
nga nagsulay ug salag
nalisang
kay gipuy-an kini sa
dakong halas ug unya
inig kagabii
manglupad ang mga kwaknit
unya kini
mangdagit

ikaw nga nawad-an sa paglaum
mikagiw
nanimpalad sa laing dapit
unya gidungog nga
ikaw
hagbay nang
patay

wala na kami makabalita kanimo
daghang mibanaw nga
dugo sa ilalom sa karaang tulay
aron lang
ihalad sa maong dakong
kahoy
aron kini hukman sa panahon
ug dayon
mapukan

natigulang na kami
namuti na ang among mga buhok
nagsakit na ang among mga tuhod
unya usa ka higayon niana
sa usa ka
maayong kabuntagon
walay ulan
walay unos
nindot ang adlaw
linaw ang panahon
kalit lang natumba ang maong
kahoy

kadtong mga anay
sa katilingban
ang among nakita
sa ilalom sa
maong kahoy
ang nakapatumba niini

hilom sila
walay dinagko nga
kalihokan
dili sila ang kisaw
sa isdang mitiglom
sa tubig
sila ang dili
dayag
sila ang wala
nato malamano
sud sa
tibook tang
kinabuhi

naulaw kitang
mga tawong nag-ampo
sa usa ka
Bathala
kitang mga nagsunod sa
balaod
kita diin ang mga adlaw
ug gabii
maayong pagkahapnig
diha sa
pagkahinanok nato
sa atong
katulugon

balak alang sa gugma


ang gitisok mo migitib. Bisan unsa. Ang pulong mga imong gitanom sa akong baba, migamot sa akong dila. nanahon ang akong mga buhok, namuwak ang akong utok.
ang hunghong nga tam-is nga imong gipahiluna sa akong dalunggan
nangutay, milabong padulong sa akong bukton,
nanalingsing ang akong mga tudlo.
kadtong ulan sa akong dughan
nangahimo nga mga suba sa akong
pagbati
miawit ang sulog
ug mikurog ang akong
mga paa
sa kabugnaw sa
tubig nga midagayday
sa mga batohon kong
mga pangandoy

ang gidapion mo sa akong
tiyan
usa ka init sa bag-ong kahaponon
nahimong usa ka dilaab
sa gabagang pagbati sa
kagabhion
nahimugso ang bulan
sa akong mga mata
ug mikuyanap ang kahayag
sa duha ta ka
ngitngit nga kalibotan

migitib ang tumang kahayag
nanubo ang mga liso sa paglaum
nahimong kahoy
nga daghan kaayog sanga
nga naglumba sa
pagakos
sa mga hawak sa
kaadlawon
http://ts3.mm.bing.net/th?id=H.4660070487753214&pid=15.1

kita ang mawala



dili manabi ang mga balod sa dagat kon kini moabot ug moagi sa atong balangay.
dili kini mananghid nga ania na siya aron kuhaon ang tanan.
 bata, tigulang, lalaki, babaye, balayng dako balayng gamay, nanay o tatay,

sakto ka,
 pagkagamhanan,
walay pamatasan,
dili siya ang tag-iya kanato,
kita kuno ang tag-iya kaniya,
apan naunsa ba kini?
siya ang manguha,
siya ang muguba,
kita ang mangawala.

ang nahinumduman sa akong pagkabata


 ang akong
nakita nga si mama
naghigda sa
katre
wala makatulog
lalom na
sa gabii kadto

unya miabot si
papa
nga hubog
nanimahong
tanduay
nagsuka sa
salog
unya mitupad
ni mama
dayon
gitanom niya
sa aping
sa akong
inahan
ang halok nga
walay
tingog




http://ts2.mm.bing.net/th?id=H.4978224380314929&pid=15.1

kadaugan




kumo sa kamot
matang nipis
babang abri
ugat sa agtang
buhok nga tul-id
tago nga dila
mga dalan
sa aping paingon
sa nagsyagit nga
kasingkasing

tambayawan

gamay
lang kaayo
ang
kalipay
sa bata

mapuyok
mo kini
sa usa ka
kendi


usa ka
bakya

apan nganong
wa pa man
gayod nimo
kini siya hisabti?

nganong mitapot
ka man
sa balayan
sa
tambayawan?






kining atong pagpakabuhi

hakpa ang langit
gaksa ang hangin
andama ang
lawas
ayaw kalimot
nga ang mga
tiil
magdapat
lang gayod gihapon
sa yuta

http://ts2.mm.bing.net/th?id=H.4790311021446481&pid=15.1

Damgo


Kinsay
 nagdamgo nga 
natulog man ka?
Ug
 sa imong pagmata,
 kinsa uroy ang 
nagadamgo 
kanimo?

Akoy
2012.2.1

Kahayag Ug Anino


May 
kalainan ba 
kon 
ako ang kahayag
 ug ikaw ang anino
kon 
ako ang anino 
ug ikaw ang kahayag
Nga
 dili man kita 
ang tigpasiga sa suga?

Akoy
2012.2.1

Balak Nga Nagtingkagol


Naa bay balak diha
Nga nagtingkagol?
Buot nakong
Buy-an.

Akoy
2012.2.1

ang ilang gipanulti


unsa ba ang
gisulti sa pangpang
diha kanimo?

nga sila labaw
kanato

unsa ang tugon
sa mga kabukiran?

nga aduna pa
kita'y wala
masaka

unsa ang gipadungog
sa dalan?

ah, subay lang kuno
kay ang matag adlaw
kanunay gayod kining
walay kahumanan

 

ang sayaw sa gugma

nakita ko
nabati ko usab

kalayo kini
nga nagdilaab sud
sa imong dughan

nabati ko usab
ang maong dilaab
diha sa pagdap-ig

gidapion ko ang
akong kalag
sa imong kalag

lahi ang atong
kalayo
gibati mo usab
kini

pagkainit
adunay awit ang
kainit

misayaw kitang duha
midako ang dilaab
ug bisan sa kadugay
wala kita masunog

nahupay ang
kahigwaos
nawala ang dilaab
sa atong
pagkatulog

kadtong nakakita
kanato
wala'y nadungog

kita kunong duha
nanayaw
sa tumang kahilom
sa tumang kangitngit

ang gugma
adunay dilaab sa kalayo
nga dili makita
ug ang atong sayaw
sa atong musika
bisan kanus-a
dili kini nila
madungog


tungod sa kaanindot

ang kahayag sa adlaw
ning sayong kabuntagon
nanuhot suhot sa
mga sanga sa kahoy

ikaw nga naglantaw sa
maong
hitabo

nagnganga.

ang dayag kanimo

ang mga dayag
nga kamatooran
dili
malitok

gaan
kuyog sa hangin
gikan
sa hagawhaw mong
tingog

gisud-ong ko kini
mipatigbabaw
ang
akong kalooy

dili ko usab
malitok
busa gihawiran ko na
lamang ang
imong abaga
gilamano ko ang
imong
kamot

ang imong pagbiya
wa na namo
gikaguol

ang sayop natong duha

adunay
alibangbang

naalaan nato
nga usa
lamang ka
dahon