2015/07/30

unsaon man
pag-undang sa
usa ka sundang
nga sa kahangtoran
magpabilin man
ang iyang
pagkasundang?

bisag habol
bisag pondol
sundang man
lang gayod
siya gihapon


abi mo dili lalim
kon ikaw ang tingog sa ilalom
sa imong kasingkasing
unya dili ka
paminawon

kon ikaw dili iyang gipili
aron sundon
kon ang imong mga unod
nagkurog sa kahaw-ang
sa kalagot nga ang imong
kainit wala
mihungaw gikan sa
pusod sa imong  mga
pagbati

nindot ang iyang pahiyom
sa usa ka dignidad
unya ikaw nga usa ka tingog
sa iyang kasingkasing
sa baba sa iyang mga wala
malitok
nag-udhak kanunay sa
mga wala
matuman nga gihandom

apan sa kaulahian
ikaw nakaingon nga
salamat lang gihapon
nga siya anaa gihaya
gihalaran sa tanang mga
buwak
sa tanang mga pagdayeg
nga siya usa ka lig-on
nga nilalang
nga wala magpasagad
sa sugo sa unod
sa kapritso sa kasingkasing
nga mas daghan gisakit
ning kalibotan
kaysa gilipay

sa tanang gasubo nga akong gikahinagbo


kanunay gyod nako sila giaghat
nga dili intawon magpadala 
sa gisagubang nga kabug-at 

ihukad ang mga sinugbang baboy
ilamog ang tulo ka itlog sa tuba 
nga gikutawan og init nga sikwate

itagay nato ang kinutil taman
sa atong kalipay bisan ugma na 
matapos ang kalibotan

2015/07/29

gipangumusta ko ang
nangumusta usab kanako
gikabalak-an ko baya usab
ang iyang mga gikabalak-an
kabahin kanako

ingon diay ana ang mga pangumusta
gusto lang natong
ihapnig ang mga kabalaka
nga morag mga manggang
nangalata diha sa karsada
kaniadto
ang kaadlawon kanunay
mao ang piliong panahon
sa paggikan

samtang ikaw usab
nagpatulog-tulog sa
katreng uway

miiyak ka sa  kamingaw
apan dili mo gustong makita
ko ang gilak sa
imong mga luha

sa kaadlawon mogawas
ako sa pultahan
subay sa gailog nga
kahayag og kangitngit

dili nato gusto ang
pagbabay sa mga kamot
diha sa mga pulong
nga nagkurog

matag kaadlawon gayod
kadto
hangtod nga ikaw gitaral
na sa mga kamot sa
kamatayon

nagsakit ang akong dughan
apan unsa pa ba ang akong
mahimo?

lakat sa kapalaran
subay sa maayong dalan
mao kini ang akong tubag
sa imong mga kabalaka

2015/07/27

matag gabii
gipamati ko ang
tingog
matag adlaw
bisan asa
ania kanako ang
tingog

nadungog ko kini
sa kanunay
bisan og unsa kahinay
gibati ko kini
kanunay
bisan sa tanang
kalaay

wala ko kini
gisugid kanimo

sayod ako kon unsa
ang imong
itambag kon ako
kang suginlan niini

busa gitago ko ang
maong tingog
sama sa usa ka
bato diha sa lalom
nga dagat


mas milig-on ang
akong mga bukton sa
pagpas-an sa imong
kabug-at
mas kusog ang akong
tiil
mas paspas kini
sa pag-apas kanimo
latas sa
gilabyan nga
panahon
mas miabtik ang akong
mata
mas milantip ang akong
pangisip
diha sa atong kangitngit
mas milig-on ang akong
kasingkasing sa hinatag
nga kamingaw
og kapuol
mas malipayon na ang
kaugalingon
diha sa pagdawat sa
tanan
nahisama ako sa usa
ka bata
nga nagdula na
karon sa nataran
nga wala'y kahibalo
kon unsa
ang sunod og unsa
ang dangatan

o, kinabuhi nganong
karon ka man lamang
kanako
nasabtan?
ania ang tingog
sa ilalom sa akong
tungol

dili baya kaayo
nindot
dili pod kini alang
kanimo

ako kining tingog nga
siging
nagapanghupaw
dinhi sa walog sa luhaan

suma pa sa nobenahan
ni Nanay
kon ako kini kunong
pamation pag-ayo
sa matag adlaw sa
akong kasubo
mao kuno kini ang tingog
sa akong kalag

og kon ako pa gayod kining
tagaan sa saktong
pagtagad
sa saktong panahon
mao gayod kuno kini
ang tingog sa akong
Ginoo...
mahimo bang bahinbahinon ang
kaugalingon
sama sa giambitan nga kabaw
nga giihaw sa usa ka
pista diha sa balangay?

ang pipila ka monton nga maayong
unod alang
sa Ginoo ang mga sungay
ikog, tiil, dila,
alang sa Yawa?

dayon pagkahuman sa pagbahig
o pagbahin
mamahawa kamong tanan

unya ang nahibilin nga giihawan
kadtong daplin sa sapa
mahupong na gayod sa kalinaw?

2015/07/25

nindot ang blanko
sama sa imong blanko nga mata karon
ning sayong kabuntagon

nindot ang dagat sa daplin sa baybayon nga
wala pay tunob bisan sa agianan sa umang

nindot lantawon ang mga balas nga
wala pay sinulatan sa hangin nga bag-o pa lamang
nga gipapas sa balod sa baybayon

ganahan ko kanunay diha sa pagsugod
lunsay, bag-o,

human sa paghikalimot
mao na usab ang kaanindot sa paghinumdom
wala sa laraw
anaa lang ang
baraw

kon gipapila ka
pa lang unta
lahi unta ang
imong gikuha

nakulit sa palad
ang imong
kapalaran

kadlisi, sulayi
basin
dili ka maapiki

suhi ka, ingon sila
sa piang
ikaw ang tugbang
nindot balikan ang
paraiso ni eba
samtang wala pa
si adan

anaa ang pula og
sinaw nga mansanas

sa ibabaw sa sanga
anaa ang gasanga nga dila
sa bitin

nagpunay og balak
pakighigala

makamao kang makigsandurot
sa ilang gitagong kapungot

ipis sa bino, punit sa kusahos,
mahimong mosulti bisan puno
pa ang alingagngag

kinahanglan kini aron
mabati mo ang ilang mga kasakit

adunay pagkahubog
sa pipila ka gutlo

makigsandurot ka nga
ikaw sama kanila

tagay, sumsom, kusnit,
tusik, pignit

pagkahuman niini
balikan mo ang imong kaugalingon

hisgotan mog balik ang
imong katuyoan

tagay sa imong kaguol
inom, sumsom, sa imong mga
katuyoan

lig-on ka na usab,
lakaw, subay sa dalan nga
wa pa nimo
matumban

pamati, ikaw lang, ikaw lang
gihapon
diha sa paningkamot

sila manakay sa ilang
tagsa-tagsa ka sakayan

bisag usa ka tunob
dili ka binlan

magpasalamat ka nga ikaw
dili pareha nila
naghisgot silag
baog
unya ang bayot nga
talinis og suwang
nagpadungog-dungog
na kining pulunga
kuno sakit

ang bayot mibuhakhak
og katawa
miduyog ko

mikuyog ko paingon
sa laing buhakhak
hangtod nga pag-abot
sa unahan
tungod kay mipiyong
man siya sa iyang
mata nga lagom

kalit nako siyang
gisikaran
akong gihulog sa
sakyanan

natikay-ang siya
sa usa ka kamatooran
nga abi niyag
dili iyaha
ang ilang mga nawong
diha sa imong pagsulod nahimong
mga pangutana

unya nabati nimo nga ikaw
ang sayop nga tubag

naandan mo na kini milingkod
ka sa usa ka ngitngit nga lugar

og karon nga usa ka na lamang
ka anino sama sa ilang mga kagahapon

gibalikan nila ang ilang nabungat
kaganiha og dali lamang kaayo nilang

gikalimtan ang sayop nga tubag
sa paghisgot sa bisan unsa na lang

2015/07/21

moabot na seguro ang panahon
sa panudya

kadtong wa mamati og
nagtoong molabay lang ang
kahadlok

magbasol
magsubo kay ang paglimod
mamunga sab baya

ang tambaya sa duha ka
wala nay mainom
uga

walay lami
ang kahulugan magpabiling
idlas

kon akong dakpon mosamot
sa pag-ikyas

wala na ang akong gianhi
kanhiay
busa nakaingon kog unsa pa
kahay pulos sa
paghandom sa mga oras

ugma motaliwan ko kon dili
ka motaliwan
andam na ako sa pag-atubang
sa mangluwa kanako

gamay lang nga lugar ang
akong gikinahanglan
usa ka panyo
usa ka palad

taliwala natong duha

sud sa kotse
makamao kong motabon
sa umaabot nga
pait
tali kanato

dali lang

gipakusgan nako ang
stereo
aron dili na nako madungog
ang gikahadlokan nakong
syagit
sa kahilom

kadali lang

ikaw nagtulog-tulog
morag haloan sa ting-init
sa umahan nga
naughan sa tubig

2015/07/20

ginganlan mog paglaom

adunay gamit
ang gili pagpangambat

mag-ugot ang
kalagot
nga wala na maambat
sa kilid sa
gubang labat

gusbat ang karon
apil na kaha ang ugma?

apan kanus-a lang ba
ang kahapsay
dinhing dapita?

kon mobiya ka
unsa ba ang imong madala?
kon magpabilin ka
unsa ba ang imong
mahipos?

unsa ba ang molungtad
og unsa ba ang molubad?

dili na maambat ang
kapalaran
wa kay mahimo bisan
unsa pa man

mosayaw ka? mohapa?
moambak?
ang kapalaran
mipadayon sa paglakat
bisan og unsang
kagusbat

nabuslot ang bakat
nga imong giambat
walay nausik
walay nawislik

unsa bay matigom?
unsa ba ang  makumkom?
naa ang pagloom
ginganlan mog paglaom

kagubot

di na maambat
kining unos
nga kapila na
nagbalikbalik sa
atong tugkaran
nga kapila na
nakapagubot sa
atong mga buhok
nga unta
nagmalinawon man
sa atong
agtang

gawas sa balay
wala na kita manudlay
gani
giganahan na man
kitang naglantaw
sa kaanindot sa kagubot
sa mga buhok
nga kalkag

nganong karon
man lang nato nakita
ang kaanindot sa
mga gubot
sa kalami usab sa
mga lukot?

anaa ang sudlay
nagmingaw sa ibabaw
sa tokador
nga sa pipila ka
adlaw
wala na
gigamit

2015/07/19

sulayan lang god

DILI daw maayo
nga ikaw ang moalot
sa kaugalingon mong
buhok

sama nga dili sab
maayong ikaw ang motahi
sa imong kaugalingong
sapot

kon ikaw kuno ang mangabogar
sa imong kaugalingong kaso
matagboan mo daw ang
kolokoy nga abogado

sama nga dili sab maayong
ikaw ang magtahi sa imong
kaugalingong samad

mag-uli sa bali mong bukog
magsumpay sa naputol mong dila

dili maayong ikaw ang magkutkot
sa imong kaugalingong
lubnganan

apan bisan og dili kini maayo
sulayan ko kining tanan

PITBUL

gitambalan ko ang imong
samad

ikaw sa salog mihay-ad
mingisi

gihaploy ko ang imong kilid
apil ang buhok sa pagsalapid

gitutukan mo ako
og nahimo akong itoy sama nimo

hangyo sa kaulag

gihangyo ko
nga biyaan mo  ako

og tuod man mibiya
ka samtang ako
nagbasa sa libro

ang alibangbang
nahimong bato

nipis na lamang ang
hangin

nawala ang kakulba
apil ang kamaya

kabahin nimo kalipay

usahay
di ko ganahan nimo
kalipay

kamabaw, kahaw-ang
kadangag
man hinoon ang imong
sa kanako
gihatag

pag-aninaw sa pag-inusara


dili mingaw sud-ongon
ang posteng gainusara 
sa kilid sa taytayan
tabok sa sitio

bibo man gud
ang iyang kahayag nga dayag nanamin diha 
sa kahilom sa sapa

2015/07/18

walay tawo ang payag
pagkahabog sa kahoy
nanirado ang pultahan
bintanang way giablihan
sa laing bahin, hilom ang
palibot, madungog ang mga
tunod sa salumsom, ang
awit sa baki, ang paghulog
sa ulan
bugnaw nga kalibotan
sa yamog nga kapalaran

suma sa saad, suma sa sabot, kuyog ta paingon sa utlanan.

nganong nausab
kaha? samok na
lantawon ang
sa matag adlaw
mo makita dinhi

kaniadto pagkaanindot
sa mga buwak
makalingaw ang mga
alibangbang
humot ang lawak unya
ang mga kagabhion
pagkalamian

nganong nausob na
man ang karon? giampo
ko ang pagbalik sa
panahon, apan wala na
ako'y mahimo niini

molungtad ako sama
sa bato
ulan init, bagyog baha
bato ako kanunay

ning patay nga mga
pagbati
ning kasumo sa
kinabuhi
latason ang mga
orasan
antoson gayod ang
tanan

suma sa saad, suma
sa sabot, kuyog ta
paingon sa utlanan.

2015/07/17

ni bisan kinsa ug bisan kanus-a

kon tuparon ka
sa tiguwang nga babaye
nga gamhanan
ikaw gayod ang
mabiyaan

sayod kas bintaha
wala ka uyamot
busa gamita nga pipila ka
tuig
sa usa ka pagtigom

hilom lamang
sarapa ang tanan
walay gamit ang
pulong
sa ilang kalibotan

kon makuha mo na
ang tanang
ilang tinagoan
balik didto
tupad sa tiguwang nga
babayeng
gamhanan

karon pilion ka na
niya
labaw sa tanan
apan panahon na
sa imong panimalos

ihatag ang aslom
nga pahiyom
pusta ang tanan
dayon nimog biya
sa lugar

ikaw nga iyang
gipili
karon dili na gayod
maangkon


ni bisan kinsa
ug bisan kanus-a

ikaw og ako

hawid sa rehas
sa katreng puthaw
sa kilid sa
kalipay
ang laing kamot
isanday

tindog, lingkod,
sibog, lantaw, itunong
ang kahaw-ang
sa tukod sa kamingaw,

isulod ang kalaay
sukod sa kahilom
gawas, sulod ang
katahap
pulihan sa kapintas
diha sa
kalami

tak-om ang kasaba
hubkas sa kabalaka
kitang duha
mangapa
mahingangha
sa wala ta damha

ikaw og ako
karong gabhiona
mag-ila-ila kon unsa
kita
kon asa kita kutob
sa atong
gininhawa....

katulog...

mahimong hikalimtan ko
na ikaw
kay ania ako
hago ang lawas sa
panaw sa hunahuna
sa paglupad sa kalag
sa paghapla
sa unod subay sa
kalig-on sa bukog

wala kanako ang
pagbasol sa paghikalimot
kanimo
ikaw nga sa dakong
disyerto sa akong kasakit
kanunayng
mikuyog kanako

anino, dan-ag nga kahayag,
dalan sa kamingaw
kitang duha kaniadto

apan karong gawasnon na
ako gikan kanimo
og sayod ako nga kini
ikalipay mo

mahimong hikalimtan ko
na ikaw
sa dayon

balak nga masulub-on
lalom nga pangagho
luha sa hangin
dinha sa pantalan sa
kinutuban
ang sakayan sa akong
kinabuhi
iankla, ihukot,
pahulay, 
katulog.


hagwa sa pag-inosara

gabii na usab
sirad-an ang bintana
dagkotan ang suga

kuhaon ang habol
ibuklad sa
katre
ilatag ang lawas
lantaw sa
kisame

lain na usab nga
hagwa
sa akong pag-inosara

2015/07/10

makalibog
kagahapon usa ka
ka prinsesa

nagdahunog ang
akong kasingkasing
nawa kos
akong kaugalingon

makalibog nganong
karon usa ka na lang
ka iring
nga libat nga para
kanako
dili gani angayan
nga lantawon

unsang lumay
kaha ang akong
nakaon?

adunay talamdan

adunay
tamdanan
magpabilin ang
pagsunod sa mga
talaan

sa sayong buntag
kon ikaw unya maglung-ag
ayaw ipaaibabaw ang
sugnod sa
kolon

mahimo mo bang ibutang
ang tubig
sa dapogan samtang ang
bugas
gilatag mo sa sa taklob
sa kalderong imong
gikulob?

dali na, o ispirito

dali
sulod sa akong lawak
dali sulod sa akong lawas
dali sulod sa akong kalag
kay ania dinhi
ang mga pagtoo ang mga
pagtoon kon unsaon
paglipay ang mga nahisalaag
diha sa tumong kasubo
dali na
ipakita kanako ang hubo
mo nga kasantos
nindot ang imong
gigikanan
wala pa ang sala
wala pa ang kaalam
usa ka ka paraiso
nga wala natultuli sa
langgam
wala pa masusi sa mga
kamot
sa adlaw
dali
dali na
tudloi ako kon unsa
ang putli nga gugma

kami kamo

palihog usba ang imong
pagsangpit kanamo kami nga
mga magbabalak sa
hangin
kami nga nag-ampo sa bulan
kami nga
nagpadaplin aron mobungat
sa kahilom
kami nga midapig sa kaanyag
sa among kangitngit

dili kami mga bathala
kami mao kamo kami mao
ang wala mohawid sa
kalayo
kami ang kanunayng miginhawa
og lalom
naglaom nga unta madakpan
sa among gininhawa
ang tunok sa kinabuhi

paghangop lamang

dili ko man makumkom
ang balas
dili ko mahulma sa
akong mga kamot
ang imong yuta

sa kahaponon duyanon
ko ang imong anino
hangpon ko kini
gakson sa hangin

sa mga panganod sa
akong damgo
sa hingpit angkonon
ko ikaw

2015/07/09

ang Sphinx ngadto kang Oedipus

dili unta angayan
apan ambot ikaw man
ang makamaong
mopukaw kanako

gikahadlokan ko ang
sunod
kon unya mahitabo
unya ako mapukan

sama sa pagkatubag
sa akong tigmo diha
kanimo
gamhanang Oedipus

mahimong mabuak
ang tanang ania kanako
ang akong kasingkasing
ang akong mga pako
nga karon puros mga
bildo sa imong atubangan

apan kalooy ba
kay sayod ka nga sumala
sa tagna sa usa ka
sugilanon

ikaw lang gihapon ang
maalaot
lugiton mo ang imong
mga mata
ug maglatagaw ka
nga mag-inosara

ang mas sakit
kay bisan kanus-a
dili mo lang gayod
gihapon litokon
ang akong ngalan

ang tighukom

anaa lang gihapon
ang buwak sa gawas
ning atong bag-ong
gipuy-an

milabay sab ang hangin
paingon sa dagat
anaa ang adlaw
kanunayng mihayag

pasayloa nga dili na
ako makalantaw
kaninyo

dili ko na madayeg
ang katahom, kainit,
kaalimyon,

gasubo ako sa dagkong
suliran sa uban
sa kanunay gisulayan ko
paghubad ang
mga kagubot

pulong nga misalapid
buhok nga nanagsupak
mga balikog nga katuyoan
tinipigang kasilag
pahiyom nga gadumot
saad nga pasundayag

gamhanan gihapon ang
kalaog
gipukan ang matood

mga dragon sa atong kaminyoon

kon imong bantayan ang iyang
pag-abot
hadlokon ka,
mobuga sa kalayo
mamunal sa iyang ikog
mopakita sa iyang hait nga
mga bangkil

apan kon dili nimo ambaton
magpuyo kini
matulog og gani mohaguk man

sahay molakaw lang kini dayon
nga walay pananghid

ako sab ingon ana
busa ayaw lang akog ambata
mas ganahan kong matulog
mohagok
magdamgo
mawala sa kalibotan nga atong
gipuy-an

gamay lang gayod ang gipangita
nga kalipay sa akong lawas

kapoy kini gustong mopahulay
og sa dihang mahinanok sa katulugon
mangawala ang tanang mga dragon
og nagpadragondragon

2015/07/06

wala miambat sa mga igihan

igihan ang batang lalaki
sa iyang inahan
nga unta magmasahe sa
akong asawa
didto sa daplin sa baybayon
samtang gipalabay namo
ang mga oras
human sa usa ka semana
nga kahago

domingo karon
nindot ang duyanan
bugnaw ang hangin
asul ang dagat
lunhaw ang mga kalubihan
tam-is ang sabaw sa butong

humot ang sinugbang pulag ikog
init ang kan-on
nga gilatag diha sa dakong
saging nga dahon


kusog nga miiyak ang
bata
sakit sa dunggan
mas nindot ang awit sa dagat
wala miambat
sa mga igihan

hikapon mo ako

hikapon mo ako
kapoy ang akong mga kaunoran
init ang imong palad
gihatag mo na usab ang
kalayo kanako

mopiyong kos akong
mga mata
motalikod
samtang ang imong palad
nahisama sa sakayan
nga milutaw sa akong
dagat

dinhi ra kita kutob
ang unahan
dako ko nang tulubagon
unya dili pa ako
andam

mahilis ang kaulag

sayong momata sa buntag
wa pa ang adlaw
nagsugod ka na ug tikawtikaw

init og tubig
tak-ang sa linung-ag
silhig sa salog
init sa sud-an
andam sa pamahaw

lakaw sa gawas
nag-amag pa ang mga suga
sa dalan
nangatulog pa ang mga iro
daghan pang dahon
ang nasaag
basa pa ang yuta
sa ulan kagabii

tuyok-tuyok sa plaza
hangtod panington
kuyog ang imong paboritong
iro

pagkahuman balik sa balay
kutaw og kape
abre sa tv
lantaw sa bag-ong
balita
kabahin sa laing bagyong
miabot

nanghinaot ka nga unta
mahilis ang kaulag

2015/07/05

sa ngalan sa gugma magpabilin ang kadena sa atong panaghiusa....

ganahan ko kon ang tanang
natong isulti bisan asa tang duha
maglagyo mag
magdug-ol
magtingogay man og
magbungol 

dunay sense, kana bang makahunong
ka kadyot aron tukibon ang pulong
kon unsa gayod ang iyang
buot ipaibot sama sa lansang nga

namartilyohan diha sa kahoy nga
banaba nga morag dunay dugo nga 
milakra

midahinob o misurop unya
nagpakita sa lama sa kasakit

pwedeng magdugay ang atong
panagsandurot basta dunay direksyon
ang panaw sa atong mga 
hunahuna

dugay na kadto karon naglutaw ko
sa panganod
wala na kanako ang paghandom sa
unsay angayan isulti o kon asa paingon
ang atong mga panultion

dako ang atong suliran 
og walay angay nga makahibalo aron
kita ilang ingnon nga
kitang duha gigabaan

kon unsa ang mga samad o ang
mga takbas 
o pagluba ning atong kapalaran

we just ignore it, kon dunay mangutana
nganong milungtad ta sa pipila ka tuig
og wala milubad

usa lang ang atong tubag: it is love.
sa ngalan sa gugma 
magpabilin ang kadena sa atong
panaghiusa....

samang pangutana

lain na sang babaye ang imong
gidala sa beach

gwapa, puti, may pagka blonde
ang buhok
taas, nindot ang legs, gamay og
hawak
pula ang ngabil, batan-on sama
nimo

gilutoan nimong sea noodles
paris sa sandwhich 
bugnaw nga coca-cola
ug pipila ka chichiria

sweet mong duha diha sa duyanan
nga uway
nga medyo gaguot mong duha
apan kabalo ko nga diha sa sikit
ang lami

gikan na ko diha, busa sahay
makakatawa ko

pareho lang gihapon ang atong
mga pangutana: pila pa kaha sama
nining mga bayhana ang
magbasol nganong sama sa usa

ka dangag nga isda mitukob man
sa paon nga wati nga mitabon sa
taga?

kabahin sa iyang balak

unsa ba ang iyang gisulti?
di ba kabahin lamang sa iyang gipiling
lihok,

kaadlawon, bugnaw ang hangin
siya lang usa naglakaw sa dalan
dili kaayo hayag ang mga poste
dayon mitalithi,

gisuot niya ang itom nga jacket
sapaw sa iyang baga nga shirt
gitaod ang kawo sa iyang ulo
mitaghoy dayon mipadaon siya
paglakaw sa unahan...

mora gihapon kabahin kini sa umaabot nga kamatayon

kapoy baya kaayo
maghimo og balak sa tungang
gabii, apan
matag tungang gabii
gahimo ka pa gihapon
og balak, bisan kon
nagpunay kag
bagotbot sa kakapoy,

makalibog nganong
ingon ani ang panghitabo

samtang nagtagik ka
ang hangin mikusog og ang
mga kahoy naglagiti diha
sa kilid sa atop sa imong
balay

arang nakatulog na ang
tanan
apan ning kakusog sa hangin
sayod ka nga sila usab
nagpamati lamang

moabot kaha ang dakong 
baha unya anoron ang
balay?
o kaha ang kinadag-ang balod
nga modasmag
aron papason ang mga
daan dinhing 
dapita?

samtang nagtagik ka sa
mga pulong
nawala ang kakapoy
wala ang kabalaka 
ang imong gisulat 
makapahupay sa tanang
kabalaka

mora gihapon kabahin kini
sa umaabot nga 
kamatayon

ang mga tam-is nga lanzones

sa unahan
gahitik ang mga bunga sa
lanzones

nagtagbo ang duha
ka dalan
ang kabatan-on
mipahiyom
nasina ang katigulangon
naghandom
og laing agianan

dunay mibakho
nga nagtabon sa iyang nawong
itom ang bandana
gipamati mo ang awit
sa pagmahay

sa unahan gahitik ang
bunga sa mga punoan sa
lanzones

mipaingon ka didto
puno ang paglaom sa
pagkatkat sa pagpamupo
nagtulo ang imong laway
mibanaw sa imong dila
ang nag-uros-uros
nga kahinam

tam-is ang mga lanzones
di na maambat ang mga pangos
sa pagkatkat

tentasyones

giabaga ang imong
hunghong
nga gilok sa
duha ka
dalunggan

gikitik mo pag-ayo
ang nahikatulog
hangtod nga kini
nagmata

nakita ang kaanindot
sa dili unta angayng
buhaton

og tuod man nabuhat 
kini og pagkahuman
mingitngit ang kalibotan
miulan og dayon 
nabasa ang natintal
nagkurog sa kabugnaw
gihilantan og gitakigan

ikaw nga naghunghong
nangambot
mikatawa sa kalipay

lain na usab ang balayan
nga naguba
nga wala katindog pagbalik

mibalhin ka sa laing
pamuyo
gihan-ay ang laing
mga tam-is nga pulong
diha sa bag-ong hunghong

sa walay sala

dili ang lawas
labi na nga dili ang nawong
ang nakapatandog sa 
yawa

ang iyang pagkabirhen
ang iyang pagkawalaysala
ang iyang kamapahiubsanon
maoy nakapaibog
sa bantogang
daotan

kahayag sa kabayo

sayo sa buntag
nakita ko ang bag-ong
debuho sa
atong Ginoo

sa likod sa bagang panganod
nagpanikad ang
adlaw sa iyang kahayag

mihangad ko sa langit
puno sa pagdayeg

ngano kaha?

wala nay buhok
kulubot na ang nawong
hinay na ang lawas
kurog na ang tuhod

apan mipitik pa gihapon
ang kasingkasing sa
tiguwang

gilood ang apo sa tuhod
apan sa laing bahin
ang pagpitik nagdugang 
sa kaabtik 
nakapataas sa iyang
lubad nga kinabuhi

og ngano kahang gikasuko
kini sa iyang bugtong nga anak?

2015/07/03

tukaw

sa alas tres sa
kaadlawon
nagtukaw ko
diha sa paningkamot
nga ang akong
kasakit sama sa mga
tunob sa iring didtos
atong nataran
dili makatugaw sa mga
bagtok nga
unta madakpan

ikaw lang gihapon

wa  ko ikaw biyai
paabot lang
ania pa ako sa akong lakaw
nangita sa pamaagi
aron ako
makabalik kanimo

dili ko dalhon ang hangin
inig-abot nako
simhota ako sa akong
ginhawa....ikaw lang gihapon
ang kahumot
sulod niini

pagpailob

mas daghan ang
kangil-ad
nga atong makita
unya mas daghan
ang dili nato mausob
mas daghan pa
gani ang panahon nga
wala kitay
mabuhat

inig abot sa balay
magpanglingo ka

nanimahong iro ang
salog
daghang dahon sa
nataran
bug-at ang mga pulong
dili mo masabtan ang
gilitok sa imong
kaugalingon

molingkod ka sa basa nga
bangko sa gawas
molantaw ka sa palibot
nagpanglingo ka
gihapon

wala na nimo huboa ang
imong medyas og
sapatos

mipungko ka sa bangko
mitutok sa bentana
gitulon ang imong laway
gitago ang dila
gipugngan ang pagsyagit

ang imong ikadalit mao
lamang ang
usa ka balay nga kahilom


2015/07/01

kabahin sa miawas nga gantang

kadtong imong gikawatag halok
usa ka gabii niana
natagboan mo sa dalan kuyog
ang iyang uyab nga
igsoon sa asawa sa imong
bilas

wa kang katingog og imong
giampo nga unta siya usab
mahimong amang
sa nahitabo kabahin sa miawas
nga gantang

walay isdang baho sa ilang talad-kan-anan

kon unsa man ugaling
ang imong gihimo sa luwag
mahibaw-an ra gihapon kini
sa kasili

busa aron likayan ang
pang-it puhon sa tanlag
mas maayo pag
wala na lang

hiposa ang kamot sa bulsa
ipahimutang ang hunahuna
sa saktong hawanan
kon mahimo kon unsa sila
mao usab ikaw

walay labad sa ulo
walay kauwaw sa mata sa adlaw
sa imong haya puhon
walay ikatampo ang mga
banggiitang tabian
walay kuha ang mamasolay
walay isdang dubok sa ilang
talad-kan-anan

Panginhas dire