1/31/2010

ang gugma sa akong kaugalingon

sugdan ko kini dinhi
ang paghigugma ko sa akong
kaugalingong
dagway,

dinhi ang unang lakang
paingon sa kalbaryo sa paghigugma
na unya sa uban

dagko na nato silang igkita
dili na mausob ang ilang panglantaw

kon makalimtan ko ang akong kaugalingon,
pwes kinsa na man kaha ako?

ako ba sila? dili sila moangkon niana
ako ba siya? ipanghimakak niya ako

og bisan kanus-a dili ko mahimong ipamugos
ang akong kaugalingon
kaniya, kanila,

kon malimtan ko ang akong kaugalingon
balikon kog tan-aw ang samin

yubiton ko ang mga pasalig
ako ang ako, ako ang akong kalibotan,
ako ang akong kaugalingon
ako ang kapitan, ako ang general,

ako ang magbuot sa akong kapaingnan.

ang pagpaabot sa maanyag nga babaye sud sa iyang kwarto nga gialihan sa venetian blinds

unya na
dili ugma

unsa pa
ba'y dugayan

nianang kaanyag
og kabatan-on

unsa ba ang
igong hinungdan

anang kalangay?
ah, sakto ka

unya na, dili ugma
ang katumanan

sa kalipay diha
sa pag-inusara.

sabta higala

sabta higala nga sa atong tibook
nga kinabuhi
wala sugod nga ang mga medyas
maoy nangita sa lapa-lapa

bisan sa kadaghan nila
nagpabilin silang wala'y pagtagad sa mga tiil

medyas lang sila
apan wala sila magkinahanglan kanato

mao usab ako sa atong duha
medyas ko, tiil ka, naanad na ako nianang wala'y pagpangita sa unsa pa,

ang akong mga kauban
nagpondo lamang sa among gikabutangan

ikaw, pila pa ba ka medyas ang imong handomon?
nganong dili ka man magtiniil sama sa imong naandan?

sa dihang wala na sila kanako

seguro makasabot ka na karon
nga ang mga butang nga wala na kanato
mao ang mas maghatag og kalipay

wala na ang medyas sa akong tiil
wala na usab ang akong brief sa akong sampot

ako na karon ang matood
hubo nga panumduman og kon gusto nimo akong masabtan sa hingpit

dili mahimo nga dili mo ako hikapon
bation mo ako sa imong mga palad

kon imong sutaon didto sa unahan
wad-on ko na usab ang akong lawas aron hingpit mo na akong maimo

O! akong Diyos.

paglantaw gikan sa taas


gisaka ang pipila ka ang-ang
giablihan ang duha ka bintana
og ang usa ka pultahan
aron masud-ong nato gikan
dinhi sa taas
kon unsa kita kagamay kaniadto

ambot og nasultihan ba ka nako
nga usahay mas makita nato ang tinood
kon kita magpalayo

daghan kadto gagmay man ugaling
apan dako kini og kalabotan sa pagtuyok
sa atong kalibotan
dako kini og kalambigitan sa atong
umaabot nga kamatayon

sa taas man god wala ang pulong
nga nakalawgaw sa atong hunahuna
ania dinhi ang tumang kahilom
ang mas lalom nga pagsukod sa mga hinungdan

dili ba gusto man nimong masabtan
ang mga ngano kabahin kanimo?
tupad kanako hawiri ang akong kamot
idapion sa akong dughan pamatia ang dili pulong
nga katin-awan
mas makita mo ang tanan sa kataposan
diha sa pagpiyong na sa imong mga mata.

ang nasabtan

sama sa bulok sa kasingkasing
wala nato kini makita
apan ato lang nga nabati
nagtinan-away ta
dili maukab ang baba
og aron walay masulti
nga sakit nga pulong
nga unya puhon atong ikaulaw
milingi ta sa kilid og dayon sa unahan
mitikang og duha ka lakang
og dayon mibiya
wala na nato lingia pa
ang atong nahibaw-an

hangin lamang apan
makasamad, makabun-og

nagpabilin og ulat
sa akong palad

sa mga butang

sa mga butang nga sayod ka
og sayod ko
nga sayod ta nga dili na angay
nga litokon sa pulong
og sa unsang rason og
hinungdan
nianang mga butanga
nasabtan na kini nato pag-ayo
og busa
mas gipili na lang nato ang
pagpakahilom

Mikalma Siya

Nagwara-wara ang kurtina
Gisirad-an ang bintana
Mikalma siya.

Akoy
2010.1.31

Unahon

Unahon ko dinhi.
Palanggaon ko ikaw.

Akoy
2010.1.31

unsaon man namo paghimo og nindot nga balak?

nga ikaw
nagbalikbalik man og paniid
kanamo

wala ka ba'y lingaw?

kami dinhi
gustong magbuhat og mga balak
sa gugma

kagabii pa kami
nagbilar sa kinalamiang balak
sa kalibotan

apan ikaw anaa
rag paso-paso nanghadlok
kanamo
(nga nagmalipayon sa
among mga pagmugna
og mga balak
sa kalipay)

palihog ayaw na og balik
basin og
himoon unya namo ang
balak
sa imong kamatayon.

TROIS

mao kini ang away
nga bintaha

ako ra usa
duha baya sila

debulto sa kahilom

mao kini ang ilang
debulto sa kahilom

gialirongan sa mga
bulak
tan-awa dili kini mga
tunukon

hapsay ang palibot
wala kini sagbot

bugnaw ang hangin
wala ang polusyon

mao kini ang kahilom
dili ang pagpakahilom

karon nga wala ka na dinhi

pagkamalipayon na
gyod sa upat ka buok
nimong mga
sulugoon

ako lang man seguro
ang nagpakaaron ingnon
nga nagsubo

ako nga sumangil og pahid
kunuhay sa akong aping
nga morag dunay inagian
sa mga luha
sa usa ka buaya

respeto lang usahay
para sa tigre
ang pag-ingon og
Take care.

kusog nga rock music

gipangkutlo nako ang mga pulong
gikan sa mga punoan sa akong
hunahuna
kusog ang baha sa
track 14 sa tracid traxxx

are we human?
nangutana ang rock singer

wa pa ko mahuman ining
akong gipangpupo
nga mga letra gikan sa
mga sanga sa akong
hunahuna

are we dancing?
or are we human?
my hands are cold
...looking for the answer?

wa kong kasabot aning
iyang buot ipaibot

gisungsong nako ang
akong kalaay
diha sa singit sa kusog
kaayong bulwa
sa mga pangutana
nga morag mga liki
nga bingka

nanghayhay ko sa akong
mga kabalaka
diha sa hangin

i am alone
looking for the answers.

(drums, then music fades)

dula dual lang ning ato

kon ako ang bato
ikaw ang tubig
kon ako ang papel
ayaw pilia ang gunting
kon ako ang gunting
bato ka ha?
kon kogmo ko
ok lang kong palad ka
kon kuko ka
nipper ko
kon kahoy ka
bata ko nga mokatkat
kon suba ka
haw-an ko
kon kalaha ka
ako ang sugnod
kon baktin ka
anayon ko ha?
kon bungtod ka
bangaw ko
kon tulay ka
ulan ko
kon karomata ka
dili ko kabaw
kon luwa ka
sikma sab ko
kon ubo ka
vicks vaporub ko
kon doktor ka
nurse ko ha?
kon alom ka
aping lang ko
kon spray net ka
buhok ko nimo
kon antipara ka
mata ko
kon karsones ka
briek ko ha?
kon tubig ka
baso ko
kon kaldero ka
sug-ang ko
kon bus ka
gasolina ko
kon hangin ka
panganod ko ha?
kon dagat ka
seaweeds ko
pwede pod coral reef
bahala na og bisan unsa ko
og bisan unsa ka
basta ang importante
kuyog lang gyod tang duha ha?

unsa ba'y buhaton ugma puhon?

magsakripisyo ko
ugma puhon
ang imong lambi og
lagom kaayong
wait
akong hagkan

dili ko mangahilam-os
og dili ko
manipilyo
ang akong kiki akong
pabag-on gikan
karon
hangtod nga ikaw
akong
hagkan

Unsay Buhaton?

Giabli niya ang kurtina
Mitan-aw sa unahan
Nakita ang iyang hunahuna,
"Unsay buhaton ugma puhon?"

Akoy
2010.1.31

kumpisal sa usa ka bana nga daghan og nawong

sakto ang pintor
sa pagbati

usahay ang akong
mga mata
ang baba og ang ilong
magkatuagsa

usahay sa akong
pagpamakak kanimo
aron dili ka masakitan
ang akong nawong
nanaghan

usahay gani
wala na ako'y nawong
nga ikaatubang kanimo

apan pasayloa
kay bisan pa nining
kadaghan sa akong mga
ilong og mata og baba
ikaw man lang
gihapon ang
akong gihigugma

gikan sa opisina paingon sa condo

ingon ani ang kinabuhi
niya
sa manila

gikan sa opisina
pagkahuman sa overtime
hangtod alas diyes sa gabii
mopauli siya
direkta na sa iyang
condo

maghubo
mohay-ad sa kutson nga katre
motakilid sa wala
motakilid sa too
moligid ligid
dili katulog
naglutok ang mata
nagtinutukay silang duha

hago nga mga mata
og ang bulb nga tig-a

kalingawan sa mga minyo didto sa ermita

nagparis paris
diha sa bugnaw og ngitngit nga lawak
mibirit og kanta
inom og red horse
sumsom sa beak steak
daghang botelya nagpasad
sa kilid sa sofa

ang mga mingyong kugang
naglingawlingaw
layo sa ilang mga asawa

kalinaw

ang lalaki nga bulag sa
asawa
taas og bungot
walay pamalbas
walay alot
nagtindog sa kilid
sa ilang labat nga
kawayan
ang usa niya ka kamot
naghawid
og barbecue nga saging
ang usa
naghawid sa sigarilyo
siging pabulhot
sa iyang baba
morag pugon

tupad niya ang iyang
iro nga itom
naghay-ad nga
gihaploy sa iyang
tiil

sulayan lang nako

gisulayan nako og
adto sa tumoy sa
chocolate hill sa
Carmen

mitungtong ko
sa bato
wa man nako
makita ang
Sugbo

ang tigulang nga lalaki nga Dipolognon

naglingkod ang tigulang nga lalaki
sa daplin sa baybayon
nagtiniil lang
natabonan ang iyang lapalapa
sa puti nga balas
milabay ang hangin
gikan pa sa bungtod
mitaghoy siya
pagkalayo kaayo sa
iyang panglantaw
miabot sa
pantalan sa dumaguete

way nakakita oi

natapisod ko
sa ngitngit
way nakakita
gipapha nako
ang balas og
abog
gipahiran nako
ang lapok
sa akong agtang
migawas ko
sa eskinita
wa na milingi og
balik
gitakbo ko
og kahayag sa
adlaw sa kabuntagon
mipahiyom ko

morag wala lang
kay akong
gikalimtan

kapoy baya pod og
puyopuyo diha
sa kagahapon
way bunga ang
kaulawon

ikaw nga buta ra kaayong nahigugma

ikaw nga buta ra kaayong
nahigugma sa tawong wala
mahigugma kanimo

ikaw nga gasimag ang mata
apan nagpakabuta
ikaw nga dili mapukaw kay
nagpatulogtulog diha
sa duyan sa gugma
nga dili matood

nahisama ka sa usa ka kogmo
nga gilikitlikit sa iyang mga tudlo
og dayon
giitsa sa kawanangan og
wala na gayod makita

alas otso, alas onse, ala una, alas kwatro

dihay namaligya
og pirit sa
bukid

sa alas otso
tag traynta ang
kilo

dunay mikubit
sa presyo

sa alas onse
tag baynte singko
wala na
kaayoy mikubit

sa ala una
tag baynte na lang
wala na
kaayoy mipalit

sa alas kwatro
tag diyes na lang
ang kilo
wala nay tawo
ang merkado

sa alas singko
gipanghatag na lang
wala nay midawat
sa maong isda
nga dubok na kaayo

ako nga nabilin didto
mao ang miboluntaryo
nga midawat


(nahisama niini
ang akong pagdawat
kanimo)

hibaw-i

hiabaw-i
higala ko nga magbabalak
og magbabalaod
nga kining atong mga
sampot
(nga nagtago sa atong
mga hugaw)
gipalayo baya
sa ginoo sa atong ulo
nga sudlanan
sa atong mga hunahuna
og sa atong kasingkasing
nga naghambin sa
atong mga damgo

aron unta walay
tae nga mahilamog
niini

hunahuna nga walay hugaw
mga damgo nga walay damak

ang gamayng bata nga lalaki

ang kandiison
nga gamayng batang lalaki
nga gadala sa
bibliya
durong pamati sa
mga itubag
sa kaslonon
ngadto sa pari
nga nangutana kanila

sayod siya nga puhon
siya na usab
ang motubag sa mga
pangutana

dili nako makita
sa iyang kandiis
og sa iyang lihok
kaayong mga
kamot og tiil
nga kining bataa
may puruhan
nga magpari

luyo sa akong mga mata

ang akong
wala makita

ang akong dili
gustong
makita

ang akong nakita
nga akong
gipanghimakak
tungod
kay sakit sa akong
panumduman

luyo sa akong
mata mao
ang imong likod

sa ubos sa akong
mata
mao ang
akong kasingkasing
nga adunay
mga samad
og wala pa
maalim

1/30/2010

Gapaluyo

Unsa'ng hunahuna
Ang gapaluyo
Sa imong mata?

Akoy
2010.1.30

Aaaah

Aaaah

Namahaw ba ko?

.....

11:43 AM


Akoy
2010.1.30

pangidaron

buhok ang unang motog-an sa edad
busa kinahanglan
nga kini tinaon

ang sunod nga motog-an sa imong tinood nga edad
mao ang imong
panultihon
sulayan nimo pagtak-om ang baba
gamay lang ang isulti

ayaw paghisgot anang mga sakit
og tambal

ang sunod
mao ang tinan-awan
tigulang ka na kay dili ka na makaharong og tutok sa adlaw

nagduka ka sa sayong kabuntagon
og dili ka
makatulog sa kagabhion

masayop ka sa pagsangpit sa ilang mga ngalan
og gipangit nimo ang imong antipara
nga anaa ra sa imong agtang

mga kabalaka

nagluko ang
kagul-anan sa iyang lawak
tagbo ang
mga kamot sa suwang
nanirado ang
baba
apan ang hunahuna
morag mga dahon
nga gibwagsa
sa hangin
bisag asa ang giabtan
wala'y klaro ang
padulngan
If life disappoints your hopes,
Be niether sad, nor mad!
In days of dejection prove obedience:
Believe a better day is not in the distance.

The future comforts one`s heart,
The present is cheerless:
All is instantly, everything is to be gone,
And only when it`s gone it will become sweet

kon wala ka gilipay sa kinabuhi
ayaw kagool, ayaw og kasuko
sa mga adlaw sa kapakyas ipamatood ang pagkamasinugtanon
tuhoi nga ang maayong adlaw dili ra layo

ang kaugmaon mao'y maglingaw sa kasingkasing
ang karon mamahimong magul-anon
ang tanan kalit nga mahanaw
og nianang pagkahanaw mao na dayon ang katam-is

( a translation of a poem by Pushkin)

Medical Doctor Database

Special Package for this week

Practicing MDs in the USA

788,648 in total * 17,633 emails

Many different medical specialties

Can easily be sorted by 16 different fields


US Pharmaceutical Company Executives Database
Names and email addresses of 47,000 employees in high-ranking positions

American Hospitals
23,000 Admins in more than 7,000 hospitals {a $399 value]

American Dentists
Virtually every dentist in the United States with full contact details

American Chiropractors Contact List
Over than 100k chiropractors practicing in the USA


This week only you pay only:
$390 for all 5 datasets

reply to: Laurence.Addison@highpowerlists.net

Deadline: Friday


To invoke no further correspondence status please send an email to disappear@highpowerlists.net

1/29/2010

Buluhaton

Dili lum-an
Hangtod mo-
Puti.

Akoy
2010.1.29

Pagmedyas

Pagmedyas!
Naanad na ka
Naanad na kang
Molakaw nga way
Medyas-medyas.

Akoy
2010.1.29

Siya

Dali mobisto
Dili motahod
Sa pagtakuban
Sa uban.
Di ba siya
Morag toro?
Morag buldoser?
Pahilayo kaniya kon
Ikaw dili buot maligsan.


Akoy
2010.1.29

silang duha nga nagbulag

silang duha nga nagbulag
nahisama na lamang
sa duha ka
alibangbang nga
naglupad
lupad

sa ilang
mga hunahuna

mga kasingkasing
nga gastado
og karon
nangita sa
kamatooran



si bebot

sama sa tulabong
hinay ang pagpahawa
nga walay
panamilit
mipasiplat gamay
sa gikawilihan
diha sa iyang likod
ang iyang gihigugma
kaniadto

apan pagkahuman
milupad na kini
og bisan og wala
manaad kay
giloom na ang
kahilom

sayod ako nga
siya dili na gayod
siya mobalik
bisan kanus-a
pa

ako ang usa ka kahoy


ako ang
usa ka kahoy
nga mitubo
sa tumoy sa usa ka habog
kaayo nga bungtod
nga imong gilantaw og
gihangad

(gikasinahan
gihisgotan
og gipanabi sa
inyong mga
silinganan
sa balangay
nga malinawon
nga ako ang
usa ka
kahoy nga
gipangga
sa hari)


wala ako'y mga dahon
wala ako'y bunga
lalom na kaayo ang
gidulngan sa akong
mga gamot
nga nakighimamat
sa mga bato
didto sa ilalom
sa kalibotan
og sa mga balas
didto sa ibabaw
niini

lig-on ako
mitoo ang kusog nga
hangin kanako

dili ako matumpag
sa bagyo
wala ako
makab-ot sa
baha

ang akong mga sanga
higala sa
mga giway sa
adlaw

ang akong panit
tambal usab sa imong
kamingaw
tungod
sa iyang pagkapait

aduna ako'y ngalan
apan sa kadugay na
sa panahon
sa wala nako pagpangudlot
og pagpamunga
gipapas na kini
sa kasakit

ako ang imong kahoy

sa pipila ka adlaw puhon
aron ako

makatabang sa imong
kalisod
tag-a ako
himoa ako nga sugnod
paghimo og kalayo
nga adunay mga kamot
nga mohaploy
sa kasuko nako sa langit

akong nahunahunaan diha sa akong paglakawlakaw sa oval


kahinumdum
ko sa iyang giingon

nga bisan kadtong
nanagtindog lamang

(kay lagi wala na'y lingkoranan
alang kanila
kay ang tanang lingkoranan sa
gahom og
oportunidad
giangkon na man sa sama
kaninyo
nga mga hapsay og pamanit)


bisan kadtong nagpaabot
lamang


(gani wala sila kasayod kon
unsa ang ilang gipaabot
naglutok ang ilang mga mata
diha sa layo kaayong
mga gipanghandom)


nagsilbi usab kana sila
og dili man kanimo
kanila nga wala dinhi
nga layo kaayo kanato

busa ikaw nga naglantaw
nga dunay gihuptan sa imong
mga kamot
nga dunay lingaw
sa pulong mo pa,

ayaw sila biaybiaya
ayaw silag sawaya nga mga wala'y pulos
ayaw silag panghimaraota

nga sila imong gibuhi sa bunga
sa imong kahago
nga sila mga alimatok sa imong
mga lapalapa nga
imong langkaton og
patyon sa
mga abo sa imong mga kaliwat
nga nagmug-ot diha sa
ilang kamatayon
nga giiyakan sa daghang
mga tisay diha
sa ilang haya
sud sa siyam ka mga orasyon

sila nga nagpaabot sa wala'y klarong gipaabot
sila nga naghandom sa mga saad nga wala nimo tumana
nag-antos usab
milunang nianang dakong tunaan sa pagpailob
naglapok-lapok sa
mga paglaom

ayaw panaway
kay ikaw diha usab mabuhi kanila
gani
sila man ang imong samin
ang imong mga gamot og mga
dahon puhon

balos sa taas kaayo nga balak kaganiha


dyotay'ng
kahilom.

palihog higala ko

atong pamation
ang orasyon

sa usa ka
itom nga
alibangbang

mibatog diha sa atong
mga ngabil

non-stop nga balak


kining atoang duha migo,
non-stop nga
pagpamalak

mora bag gadali
kay basin kulang na
ang mubo na lang
kaayong
panahon

una pa,
asa ba kita paingon?

basta ako
naa koy adtoon
apan sakit palandongon
nga dili ni nako
gusto

sugo lang kini
sa akong lawas
apan sa
tinood lang
gusto unta ko
nga magpabilin
dinhi

matulog lang sa duyanan
mamati
sa awit sa kinaiyahan

apan migo
dili man god ako ang
magbuot

gibutang ko dinhi
wa ko
kabalo unsay ilang
tuyo kanako

dayon ila na kong
papahawaon
sa walay pagkasayod
kon unsa
ang hinungdan

nangutana ko
apan miingon
tong usa nga
wa ko kaila

"trabaho lang ni sir
wala'y personalan"
maoy iyang tubag

gipapaabot ko nila
diri sa tersena
dugay dugay na
sagol ang kakulba
og kalaay
(kinsa ba ang
ganahan
magpaabot?)

nagsulatsulat na lang
ko niining
non-stop balak

basin og
aduna na usa'y
moabot
nga sama kanako

basin og mabasa
niya ang tanan
basin og
duna ra unya siya'y
masabtan
og siya unya ang
mosulti kanako
sa wala nako
nasabtan

gusto ko nga
kini masabtan unta

apan bisan
ako
buta usab

mitoo
misalig
misunod

kanunay nga
andam

bisan og walay
nasabtan

giabre ko ang
akong dughan
gipakita ko
ang akong
kasingkasing

giisa ko ang
akong mga kamot
diha sa pagdayeg

basin unya
og ako kaloy-an
bisag wala na
gani ang
gugma

kay akong nabasa
kausa
luwason diay
ako sa gugma
og sa kalooy
dili sa akong
gisulat og
binuhatan

looy ang atong
kahimtang
kay kita
kon tinod-on
mga balas og
dahon lamang

gipasaligan
nga higugmaon
sa adlaw
og amomahon
sa bulan

pila na kaha ka
luha ang
atong giulan
sa kabukiran
sa atong mga
kasakit?

pila na kaha ka
iyagak ang atong
gihipos aron
dili madunggan
sa tanan?

dili na matakos
dili na masukod
wala diha ang
pagpanudya
wala kita'y gahom
wala kita'y kapilian

ugma ang kahayag
tagaan ra kuno
kita sa ganti
niining atong
pagpailob
pagapurungan ra
kuno kita sa
kadaugan

unta.

tam-is nga mga pulong


tungod sa katam-is
sa iyang pulong
nga iyang gitipigan
sud sa iyang
baba

tan-awa
giutitud ang iyang
mga ngabil

nasuko si diana


nasuko si diana
dihang giingnan nako siya
nga ang iyang
balak morag ice cubes,

wala siya mangutana
kon ngano
apan sa akong nasabtan
sa iyang pangpanglood
nga ang iyang balak
bugnaw ra kaayo
dali mahilis
basa
og dayon og kawala
kay gisuyop
sa yuta


wala ko nianang mga
butanga

lahi ang akong
kwentada

ang ako god
nga ang ice cube
kamao man god
nga mobulsa
og kahayag

dala na niana ang
mga bitoon

1/28/2010

Di Ko Makiglalis

Di ko
Makiglalis
Sa akong tiyan.
Gutom kon gutom.
Barog dayon!
Dayon kaon!

Akoy
2010.1.28

Katikig Sa Tangkugo

Giligo og init,
Gihapyod-hapyod sa tudlo
Ang liog gilingo-lingo
Hangtod nawala
Ang katikig sa tangkugo.

Akoy
2010.1.23

Napaso

Iyang pantalon, pinapuok
Kimbot-kimbot, ang sampot
Aaah, init ang sabaw!

Akoy
2010.1.21

kon unsaon pagsulat ang balak

una, andama daan ang imong
mga tudlo
ihan-ay diha sa keyboard
dayon tutok sa
monitor

tutok lang
dugaya pagtutok
ayaw paghunahuna og unsa pa

ayaw padani sa kalagot
og kapongot

tutok lang
palihoka ang imong mga tudlo
nga morag nangita og
nota sa usa ka
classical piece ni beethoven

mora lang ka og ga-pyano
tuplok tuplok lang
ayaw paghunahuna og bisan unsa
padagan lang sa imong mga tudlo
himas, tuplok,
gamit sa kumingking
kanang mora kag milantaw
sa usa ka
ballet

solo ang ballerina
pink ang tutu
giputos siya sa lawod nga
kangitngit

mitukar ang piano
og misayaw siya
mitikang, miambak
mituyok tuyok

dayon nahuman ang musika
og siya miyukbo
og gisabwagan siya sa daghang
mga buwak

dayon mihilos ang telon.

humana. mamauli na ta.

human na ang balak.
nga walay pulos.
kining balaka, ambot og duna ka ba'y
gibati nga lain
kabahin niining balaka
nga nag-usik usik lang sa imong
panahon

ah, duna,
kaligotgot, kanang bation nato
kon kita giilad

mao kini ang akong balak
walay pulos
kay ang gihatag mao man god
ang kaligotgot

ugma magsulat na pod tang duha
og balak
kanang atong mapuslan
magsulat ko
samtang ikaw magbasa
akong hunahunaon pag-ayo ang
mga pulong
ang mga letra ako pilion
ang mga maot akong langkaton
ang mga sayop akong
usbon

ugma, balik diri
magdungan tag himo og balak
sulayan nato ang
tema sa gugma
basin og
maalibyo ra ang atong
gitipigan nga mga
kaligotgot
nga bisan unsaon natog
tago mogawas gayod

morag kadtong
migahi nga gustong mogawas
nakiglantugi
nakigbisog

sa bakos,
sa butones,
og sa zipper.

laog

sakay mi sa
Don Alfredo paingon sa Manila
gikan sa Pulawan,

kaniadto tagsa ka semana
baya ang biyahe
nga og kon magbagyo
motago baya ang barko
didto sa Estancia,

kining akong iyaan sa pag-agawan
kusog kaayong mokuot
sa adobong baboy
nga gibutang sa dakong
lata sa mantika

apan sa panahon nga
mag-ukit na siya sa iyang
skyflakes
magbukot baya siya og
habol.

dili ganahan nga mangimbitar

"hello happy birthday!", maoy iyang greeting
sa cellphone, kinaunhang tawag
atong buntaga

"thanks" maoy iyang tubag,
gi-text lang.

Oo, Tinuod, Nindot Ang Adlaw Karon

(Nakita ko niya gakaon sa paniudto,
Sa gamayng kan-anan. Iyang gisangpit, gitimbaya.)
"Diin ka gikan,dugay wa ka hikit-an?"

"Gikan ko miuli sa akong nasod,
Ug miadto didto sa Singapore. Ikaw komosta na man?"
(Gipasiplatan ang kaanyag sa amiga nga sama kaniya kagwapa.)

"Naa ra gihapon sa akong tindahan.
(Gabaligya'g pangbabaye, pangpatahom nga bestida.
Miadtong miduaw ko, gihatagan ko niya og porselanang pitser, gibutangan
nakog tsa.)
Bisita unya". (Miyango ba ko o wala? Usa ka tuig kapin na mi, wa magkita.)

(Milakaw na siya. Akong gisangpit, gitugonan.)
"Ingna imong Papa nga nakakita ko sa mga hulagway niya."
(Siya ang maestro nga potograper nga midasig kanako,
Ug mibaligya sa daan niyang kamera nganhi kanako. Wa na gamita ron.)

"Asa dapit?"

"Didto sa bag-ong 'bar' (Tubaan, kon sa ato pa.)"

"Ah, didto sa ilang Yang Hong".

"O''.

(Oo,
Tinuod, nindot ang adlaw.
Minindot samot sa iyang pagtumaw.
Unsa kaha kon makahigayon ko pagduaw kaniya, puhon?)

(Gihalog ko niya sa tumang kahinangop, sa way kukaulaw,
Atubangan sa akong mga bisita, kaniadto kadto.
Usa na lamang kini ka handomanan karon, usa ka tin-aw nga handurawan.
Gibinlan ko niya niini sa iyang paglakaw, sama sa adlaw nga gapadayon sa
iyang panaw.)

(Nahuman na ang paghandom, undangon na kining balaka, kon balak bay
tawag niini.
Moinom na lang kog tsa, kay daw dili ko kapadayon hangtod dili nako
mainon ang tsa karon.)


Akoy
2010.1.28

Tinuod

Ingon niya gahapon
Nindot ang adlaw karon.
Tinuod.

Akoy
2010.1.28

Balahibo Sa Ilong

Ang balahibo
Migimaw sa lungag.
Putlon, 'nail cutter' gamiton.
Ang ilong nanghupaw, daw kabaw.
Unsa na kaha kon masipyat ang amaw?
'Nail cutter' pa kaha ang itawag sa pangputol
Sa balahibo sa lungag sa ilong nga migimaw?

Akoy
2010.1.28

Gigutom

Wa ko gutma.
Nakadumdom ko
Nga wa koy paniudto.
Gigutom tingali ko.

Akoy
2010.1.28

Gugmang Gidungoy

Gugmang giatay,
Manok ba nga
Gidungoy?

Kalooy,
Kasayang
Sa gugma.

Akoy
2010.1.28

Giuhaw

Giwahing
Ang kurtina
Gitungab ang
Tubig, samtang
Gitan-aw ang bukid...
Gabalod-balod iyang bungtod.

Akoy
2010.1.28

Gugmang Giatay

Gugmang giatay,
Manok ba nga
Gidungoy?

Kalooy,
Kasayang
Sa giatay.

Akoy
2010.1.28

vox populi vox die

ang tingong kuno sa katawhan
mao usab ang tingog sa Diyos,

tinood? mag-unsa man ni kristo
kadtong misyagit sila nga siya
ilansang sa krus?

ang Dios ba ang misyagit nga
ilansang ang Dios?

deserving

always man jud
nga deserving ang katawhan sa ilang gipili
nga mahimong leader
sa ilang katilingban,

kon ang mayor sugarol, kurakot, ignorante
tungod kana kay kasagaran sa namili
sugarol, kurakot, og ignorante usab

people choose what they deserve, di ba?

dilil ni balak, ayaw kabalaka
pahungaw lang kini sa usa ka PhD holder
nga gipildi lang og
ordinaryong sugarol, kurakot, ignorante,
og kawatan
sa position nga pagkakapitan sa
ilang barangay

self-confidence

bisag giinsulto na
pahiyom
lang gihapon

bisag daghang kiki
pahiyom lang
gyod gihapon

bisag gipestepeste na
gidugangan man noon ang pahiyom

ang iyang pagsalig sa kaugalingon
wala mangilabot sa iyang kasina og kasuko

Ang Tawo (tubag)

sa ininglish pa self confidence
sa bisaya pa hambog!

.

Ang Tawo

Hambog!

Akoy
2010.1.28

Katulgon Pa, Mibangon Na

Gamata na ko
Bisan gapiyong ang mata
Gapiyong-piyong
Bisan ga-inom og kape.


Akoy
2010.1.28

bilib kos kabaw ni nong kardo

kining kabaw ni
nong kardo
kon mapandol
mobangon lang og iya
wala'y daghang
unga

bisan unsaog bunal
sa iyang anak
sa dakong lipak sa
kawayan
dili man lang
mag-ambat

wa sugod ning kabawa
manungag
kon malimtan og tugway
sa pasto
wala lay reklamo

usahay maglutok ang
mata
apan di ko kaingon
nga siya sad
gusto nang mamatay

ugma adlawan na sab nako

49 na ko.
daghan na ug uban ang akong ulo.
dili na kaayo kakita sa layo ang akong mga mata.
hanap na
luya na

pati ang mga damgo nga haskang daghana
hanaphanap na usab
morag mga gabon nga mitabon sa mga kahoy
morag mga kabaw nga niwang og walay tunaan

ang mga gugma sud sa akong dughan
morag mga gagmayng balay sa daplin sa dagat
uban gabok na kaayo
uban nangahirig na ang mga haligi
ang mga bintana nanglupad na

ang akong gipuy-an mao na lamang
ang akong gikalingawan
og palig-on
dokdok sa martilyo, gabas sa gabsonon
sipilya dinhing dapita
lansang sa mga naputol

dinhi na lang ko
kay wala na'y lain pang kapaingnan

asa pa man diay ko?
gikan na ko sa bungtod
nag-ampo
nangaliya tupad sa kahoy nga tugas
nakigsandurot sa bulan nga bag-o
pang misubang

kinsa ba ang akong lain nga duolon?

kadtong kabayo nga gustong manipa
kadtong bitin nga andam mopaak
kadtong kabaw nga manungag
sunoy nga manuhik
mga langaw nga samokan?


ugma daghan ang moanhi sa balay
mokaon sa akong giandam
moinom sa bino
mokitkit sa panit sa lechon
mokalos sa akong kan-on


pagkahuman unya sa gamay nga salo-salo
manulod na sab ta sa kwarto
manutbras ko, manghilam-os
maghubo

49 na ko
daghan pa ko og ipamatood diha kanimo

mga saad nga wala matuman
mga bag-ong damgo

magsaad na usab ako og ikaw nga namati sa
akong yamayama

mopahiyom na lamang
imo kong hagkan og dayon motoo sab ko

nga ang kinabuhi diay lami pa gihapon.

1/27/2010

ang pinakasikat natong amigo

ang pinakasikat natong amigo kaniadto
didto sa isla sa bato
diin kita mangaligo nga manggihobo lang
bulad sa adlaw ang atong
mga lawas
og dayon og ambak sa lalom kaayo
nga suba

kadto si Longkoy nga taas kaayog
siplit
hapit gani miabot sa langit

dili galot, walay tingog, walay malisya
ang sikat nga
palautog

balor

kahinumdom ka ba sa
gagmay pa kita
nga wala nato gibaligya
ang atong napasol nga
haluan bisan pag
gidoble ni Nong Kanor
ang bayad?

ang atong rason
kita gayod ang mokaon sa
atong kinugihan

nangatawa ta
naghunahuna k0n unsa kahay
lami sa ilang kwarta
kon kini pagksiwon?

salig sa kaugalingon

samtang gilantaw sa kahinam ang
gidili
samtang nag-unot ang kakulangon
og kawad-on
samtang naghalok ngabil sa ngabil
ang katam-is og
kaaslom

gisulat sa pulong ang iyang buot
ipasabot
giukit ang tipasi og giluwa ang unod

ambot ba, sayod ka baya,
mas lami man jud ang gidili

nagtinilaay ang mga dila sa duha
ka yawa
sa kilid sa bintana

nahulog ang lawas didto sa hagdan
og ang kalag gusto na untang molupad

sa dihang miabot ka og nagpasalig
nga dili kini sahi nga mahitabo

mao kini ang kasagaran ang ilang
gipanghimakak
og busa kita nagsalimuang sa
walay hinungdan

dili na ako mopatoo
og dili na usab ako magpatootoo

dan-ag

daghang pamaagi ang
pagpangita sa dan-ag

ang uban moderetso
kon asa ang kayo,

aduna say uban
mosulod una sa kangitngit

aron mahimong bililhon
bisan na lang ang kahayag sa

usa ka aninipot bisan na lang
gani og gilak sa usa ka bildo

nga nanghulam lang usab og
kahayag sa bitoon

makabuta ang kahayag
busa ako dia mibukot sa habol

sa kangitngit og bisan unsaon
kog sipa sa akong tiil

dili gayod ako mosibog
unsaon ko man god ang kahayag?

mas makakita na man hinoon ako
dinhi, mas makadungog.

pagpanilip

naghubo ang babaye
misunod og hubo ang lalake

puti kaayo ang babaye
ang lalake tabonon apan gwapo

taas og buhok ang babaye
balbon ang lalake

gihawiran sa lalake ang nawong
sa babaye
milingkod ang babaye
mitupad ang lalake


gigakos sa babaye ang lalake
gihagkan ang ngabil sa babaye

pagkahuman ilang gipamunit
ang ilang gihubo nga


mga tsinelas.

kon nganong bakakon na kaayo si loloy

kaniadto si loloy nga akong ig-agaw dili jud kamaong mamakak,
suko kaayo ang akong uyoan
kay siging kabisto sa akong iyaan tungod
sa pagkamatinud-anon ni
loloy,

sige siyang mabunalan
masagpaan, agi anang sultig tinood

sa pagkadako na niya
gisugdan na niya og pamakak aron lang makatabang
sa uban

makadawat siyag pasalamat
usahay kwarta
usahay balosan ang iyang pagkabakakon
sa lain na usab nga bakak

iyang nakita nga mas miasenso ang iyang
kinabuhi diha sa pagpamakak
kaysa mosulti siya sa tinood
nga kasagaran siya baya hinoon ang mapiit
og maentonses

sa dugay nahimo nga doktor sa pagpamakak
si loloy
maayo na kaayong manambal ang iyang mga bakak
sa mga masakiton
nabuhi ang mga patay
milakaw ang mga bakol
nakakita ang mga buta

nahimo siyang kapitan sa ilang barangay
nakadaog pagkakonsehal hangtod nga siya
nahimong mayor

gituboy na siya karon nga mahimong
gobernador,

balibaran kaha kini ni Loloy?

ang intelihente

lahi ang pakigsulti kanimo
ikaw nga gidungog nga
intelihente, dili ko kapataka og yawit
kay akong salaon ang akong isulti
basin og makaingon ka
nga bogo ko, nahadlok ko nga unya puhon
imo na akong likayan kay lagi
dili angay nga makiglantugi kanimo
apan sa kadugayan sama sa mga
kanunay nga panghitabo
mogawas ra gayod ang natural
ang tinood og pasayloa nga
akong napamatud-an
nga ikaw usa diay
ka impostor.

giganahan ka kanako
kay ako usab sama kanimo

ingon sila nga ang kawatan
suko sa iyang parehong kawatan

og ang bakakon dili ganahan
sa pareho niyang bakakon

apan ngano bang
mitapot man kita sa usag-usa
morag lipstick sa
imong ngabil morag
mantsa sa starapple diha
sa imong baba
morag tagok sa nangka
diha sa imong mga tudlo

mao na ba kaha kini ang
gugma?

kangilngig ba
nanglimabawot jud akong
bulbol.

ang animal



ang mga dahon akong gipangtangtang
akong gibilin ang mga tunok
akong gilimpyohan ang mga mantsa
pagkahuman akong gibulibod
sa akong hawak
akong gipaubos
hangtod nga midugo
ang dili angay

unsang hitabo nga
migahi man hinoon

Kahumot Sa Kusina

Paghanggab
Sa hangin,
Nanuhotsuhot
Ang kahumot sa giluto
(gikan sa kusina sa silingan)
Nga kalit misulod sa akong ilong
Ngadto sa kutokuto nga gigutom.

Akoy
2010.1.27

unsa ba ang pagpamalak alang kanako?

nahikatulog na ako
nahinanok
apan lain ang akong
gibati

puno kaayo ang akong
pus-on
dili mahimo nga ako
dili mangihi

nindot ang bation kon
mahaw-as na ang tanang
ihi sa akong
pantog nga kabuthonon

pagkahuman og pangihi
bisan og piyong ang
mga mata sa
kaadlawon

pagkalami gayod
sa bation

morag tubig sa ulan

morag tubig sa kusog
kaayo nga ulan
sa bulan sa enero
akong gisalod kini
sa akong dughan
ang tanan nakong
mga kapakyasan

bugnaw kaayo kini
nga akong gikaligo
sa tibook nakong
lawas

pagkahuman
nanarapo ko
nag-ilis ko sa akong
sapot og akong
giatubang ang
usa ka bag-ong
adlaw

wala'y ulan nga
dili motuaw
aduna ra'y adlaw
gihapon
alang sa tagsa-tagsa
kanato

mao kana ang tambag
ni tatay kanako

didto sa duha ka mga nag-away kabahin sa itlog sa manok

nakamata ko
sa ilang panaglantugi
kon kinsa gayod ang angayan
nga makaangkon
sa manok nga ilang
napudyotan sa dalan
dapit sa uga
nga kakugnan

ako silang giingnan
nga nagdamgo ko
nga akong gilung-ag
ang itlog og
ako nang gikaon

Kahinam

Sama sa yutang naughan
Gahinam-hinam siya
Pag-abot sa ulan.


Akoy
2010.1.27

ang ulan sa unahan

morag silhig
ang ulan sa unahan

ang suba nga
puno sa basura
nagpaabot

Dagook

Ang dagook
Morag dalogdog
Sa dakong ulan
Sa unahan.

Akoy
2010.1.27

Mobalak Ko

Nganong

Naa ko dire?

Mobalak ko.

Akoy
2010.1.27

Estorya Sa Samin

Gwapo
Gihapon ka
Bisa'g
Nagkagidlay.

Akoy
2010.1.27

1/26/2010

nagpasalamat ako

nagpasalamat ako sa akong kaugalingon nga ako wala gayod magpatintal sa imong
mga tutok

bisan gani sa paghawid sa imong duha ka kamot sa akong mga bukton wala ako
malukmay nga unta
ang akong dughan gusto
na man untang
moabli kay ang imong
tam-is nga mga pangagho iya na nga pasudlon
aron kini maghimo og salag
sa mga tamsi

nagpasalamat ako nga
ako nagpabilin nga lig-on
usa ako ka puthaw nga labat
og ang mga kawatan wala gayod nako pasudla
kadton gustong mokawat
unta sa akong kaligdong
nga diha gikan kanimo

apan ang akong gipasalamatan sa tanan (og kini mao ang mas bug-at)
og halandomon
mao gayod ang akong pagpabilin diha sa akong tiunay nga
pagkabakakon

ania ako sa bug-os nako nga "self-denial"
(christian virtue
man god kaha ni)
gikan pa kini sa akong pagkagamay, pagkaluyat, pagkahuyang,
nga bisan pa og ila akong patyon
dili gayod ako moangkon
bisan og gahi na kaayo ang akong mga bukog
nga sarang na sa maong gubat
makigbisog

ayaw ako hunahunaa,
ayaw ako og sabta,
wala na kini hinungdan

ang importante
nga karon ako ania lang gihapon sa atubangan nimo
miampo og wala na'y lain pang pulong nga yubiton

ikaw na ang mosabot,
ikaw na ang magmas-magmahal kanako

patay nga dagat

tungod sa kalaay sa atong giadtoan
nangita kitag laing lugar nga kagawsan sa atong mga kahiubos sa gugma
sa kaluya sa lawas nga naglibotlibot lamang sa atong mga tiil.

misulay ta og suroy sa daplin sa dagat nga patay
nga haskang bahoa na

morag pulo ka bagtok ang patay na didto og pulo
na usab kaadlaw nga gibiyaan na lamang nga nalata
og wala gilubong o bisan na man gani
lamang og gitabonan na lang sa langkay
o dili ba dahon sa saging

sakit pamation ang sugilanon kon giunsa nila pagpatay ang
kaniadto buhi nga dagat
nga mahigugmaon sa mga bukton sa bato
og paa sa mga balason nga lapyahan

sakit sa ilong ang kabaho

gibidli ko sa hangin nga nagdala og sugilanon kabahin sa
pagkamatay sa kalibotan
kasokaon na ako pag-ayo apan ako na lamang kining giantos
sa usa ka paglaom nga magpahilayo
na lang unta kita sa atong nakita og nasimhot og nadungog

nag-estorya kitang duha nga mora usab og
tawong masakiton nga nagtinga na
og gusto na usab nga mangamatay

pakig-estorya sa kaugalingon

miabot na kita dinhi sa Room 610

gipahaluna ang attache case sa ibabaw
sa lamesa nga mahogany sa hotel

naghubo sa iyang sapatos nga florsheim og medyas
og sa iyang puti nga polo shirt nga collectionez
og sa iyang wool nga karsones

ang brief nga jockey nga kolor itom dili kini niya sagad suoton
mas paborito niya ang puti
apan mao kini ang iyang nadalidalig suot gikan sa ilang balay

ania na kita dinhi, ako og ikaw, ang akong kaugalingon
nga nakighimamat sa akong kaugalingon
niining adlaw sa kamingaw

ngitngit
apan dili ganahang pasigaon ang suga

gusto ang kangitngit
mipaduol sa bintana og giwahing ang baga nga kurtina
nga ang kolor pula
morag kalayo nga nagdilaab kining hotela
nabati niya ang dakong sunog sud sa iyang dughan
apan wala na kini niya ambata

pagkahabog sa pikas nga hotel hyatt
nga atbang sa bintana
mikab-ot na man sa panganod

wala kitay laing buhaton karon
kita lang duha una dinhi, ako og ikaw, ang akong kaugalingon
makighimamat sa akong kaugalingon nga dugay na nga gianod
sa buhagay sa dakong baha sa mga katuigan
tupad ka sa akong kaugalingon

tungod sa kakapoy mangatulog una kita
karong gabii makigkita ta og lain didto sa
pan pacific.

ngil-ad

mao kini ang balita
nga si Sonia kuno og ang iyang bana nga si Dondie
nagbulag.
Dugay na nga nakabantay ang buotan nga bana
nga ang palibot sa pusod
ni Sonia haskang punoa og mga tsikinini
nga og kon makauli
alas kwatro na sa kaadlawon

ang mahimo na lamang ni Dondie mao
na lamang ang paglumos sa iyang utok
diha sa pila ka kaha nga beer

dakong kaulaw alang sa magtiayon nga
gidungog nga "loving" sud sa 20 ka tuig nilang
panag-ipon
og karon nagbulag lang
sa usa ka mabaw nga hinungdan

(basaha lang dapit
sa kataposan)

ang bag-ong giiponan ni Sonia nga atua
na sa chicago karon nangamaw
mao si Dodong nga haskang

amigoha raba gyod unta ni Dondie

nanabi pa gani nga
wala gayod diay kuno malipay ang iyang
asawa kay ang maong bana
dili man kamaong mogamit
sa iyang dila

lahi pa kadtong naghimog mga tsikinini
sa bugan ni Sonia
nga 20 anyos lang ang edad og waiter
didto sa hotel resto nga sagad
kan-anan sa magtiayon

kalooy ni Dondie apan
kamalipayon kuno ni Sonia nga morag
kulasisi nga dugay na
kaayong gipriso sa
hawla sa kaminyoon nga wala nay pulos
og karon nakabuhi
milupad-lupad sa hangin
sa kalamian

wala jud katoo si emily sa maong balita nga iyang
nahagdaw gikan kang Totsie nga taas og
simod
og si Richard nga gikan pa sa Manila
wala ganahing namati

kabahin anang tila
sa bugan
nga mao kuno'y rason nganong
nagbulag ang magtiayon

samtang sa sud sa hunahuna
ni Richard (nga wala na mikomentaryo)
naka"ingon" siya

basin pod og ang tila sa bugan
dili mabaw nga rason
basin og aduna pa'y lain

kay kinsa man god ang nasayod sa bikil
sa magtiayon?

ang Ginoo lamang, apan ang katre
aduna usab kini'y
daghang nahibaw-an.

Plato

i

bahalag dili malipayon
basta tawo

ii

wala'y hinungdan
ang kalipay sa usa ka baboy

iii

ang baboy dili kaila og
bulawan

iv

ang tawo usahay morag
baboy

v

ang baboy haskang busuga
wala'y kalibotan

vi

sayri ang imong kaugalingon
kon kinsa ka

1/25/2010

1/24/2010

Aw!

Aw!
Abi nako'g
Ikaw.


Akoy
2010.1.24

sa salog sa mga balas sa dagat

ang katuyuan sa balak
mao ang pagsabot sa usa ka butang
nga ania kanato
nga gusto unta natong ipaambit
apan anaa ang kahadlok
nga sayop ang atong pagsabot niini
bisan ania na kini
sulod sa atong kasingkasing

ang wala masabti pag-ayo
mao baya ang naghasol
sa atong mga
matag-adlaw,

gisulti ko kini sa laing pamaagi
naghisgot ka
kabahin niini usa ka adlaw niana
mikurog ang akong tuhod
haskang hadloka gayod sa akong
ugma

gisulti ko ang kabahin sa sakayan
og ang dakong baha sa suba
ang pagkalunod sa tanang butang
didto sa tungatunga

didto sa salog sa dagat
magkita ta puhon
isulti ko kanimo ang wala nako
masulti sa mga pulong

ang mga balas sa salog sa dagat
ang mas nasayod
ang iyang kahilom ang magsugid
sa tanan

adunay mga butang nga dili na kinahanglang sabton

nasabtan mo ba ang
kabahin sa koryente?
kon asa ang laki
og asa ang baye?
nakita mo ba kini?
wala baya
ang imong nakita
mao lamang ang ilang
gitawag nga
agianan
wala ka'y nakita
sa nanglabay

apan hikapa og sulay
tan-awon tag
di ka ba mukorog
og mamatay

adunay mga butang
nga dili na kinahanglang sabton
kay kini
kon imong sulayan
makamatay

adunay mga butang
nga ako lang
ayaw paninguhaa nga imong
sabton

gibuhat ko kini aron lamang
ako mabuhi
ayaw na pangutana
bisan gani ako
wala na mangutana kabahin
niini
ania na kini gikan pa sa
sinugdanan
gisulayan ko og wilik
aron unta mawala
apan dili gayod kini makuha
tapot morag
ulat nga dili na gayod
masapsap
kon akong langkaton
mosamot kini og suksok
manganak
molaganap

wala na nako kini sabta
(kay gawas nga dili masabot
dili man gayod maibot)

aduna ka niini
wala ka lang seguro masayod

ang estoryan nga dili gayod nimo matuhog

dunay nagtubo
wala na nako giambat
wala'y hasol

gianinaw nako sa
dagat sa akong kasingkasing
kon anaa ba ang sakayan
ang mamasolay
og ang usa ka isda
nga nagpaabot sa
paon

nagpaabot ang
higayon alang sa pagkubit
diha sa taas gayod nga
kukabildo sa
manintalay

ang sakayan hilom
nagpundo
morag bitin nga
andam na nga
motukob

ang bulan gustong
mosulti kanimo
kabahin niini

apan gili ka na ganahan
nga mamati

naghisgot ang kagabhion
diha sa iyang mga
ngabil
kabahin sa usa ka gugma
og usa ka
kapakyasan

samok ang mga pulong
imong gitupi og
gitago diha sa
bulsa sa imong
tilaok

unsa ba ang gustong
mahitabo?
buhata mga kamot
ayaw na pananghid
kay kon gusto gayod sa
utok
nganong dili god kini
makaayo sa kasingkasing?

naglawod na ang sakayan
nawa ang paon
ang isda mikaratil og langoy
sayod na sa tanan

ang mamasolan nakatulog
sa tumang kamingaw


1/23/2010

ang sugarol, kawatan og bakakon

ang sugarol sa madugay og
dali kon wala na'y ipusta
magsugod na og pangawat
og dayon magsigi na kini
og pamakak,

sakto jud diay si tatay
nga ang sugarol magulang
ang kawatan mao ang manghod
og ang bakakon mao ang
tunga-tunga diha sa pamilya
nga adunay bisyo.