2016/09/21

sa atong wala mahikap sa kagabhion..

pasagdi ang
hagawhaw

ingon ana 
gayod ang kabuntagon

diri kanato ang 
kahaw-ang nga 

unta gusto natong
mapuno aron mawala

pasagdi ang hagawhaw
tingog lang kana

nga dili kakusi kanato
hinungaw lamang

sa atong wala mahikap
sa kagabhion...

sa kanunay nagkulang ang panahon kanako

sa kanunay
nagkulang ang 
panahon kanako

adunay balak nga
nag-ung-ong sa
akong hunahuna
nga wala nako
tagad maluwa

wala nako matanom
ang liso sa nangka
nabyaan nako ang
itoy sa dagat
wala nako matangtang
ang paon didto sa 
taga

wala nako mahuman
ang labat sa balay
mikang-a ang nipa
sa atop nga wala 
pa nako matahi

kulang, kulang gayod
ang panahon
sa tawong kanunay
nga nagdali

milarga na ang tren
milupad na ang eroplano
migikan na ang barko
nakadagan na ang bus

nalarag na ang ngipon
naputi na ang buhok
naputol na ang bukog
mikurog na ang tuhod

sa kanunay
nagkulang ang 
panahon kanako

wala gihapon ang
gugma diri kanako.



tungod kay dili ikaw lang....

sa imong paghilayo
wala ko moundang

wala akoy rason 
nganong ikaw lang

sa imong kamatayon
wala  nako gihurot ang

akong mga luha. Dili
ikaw lang ang para sa

akong mga mata, dili
ikaw lang ang tanan 

alang sa akong gugma,
dako pa kaayo ang

kalibotan alang sa mga
kalanggaman, dako pa

kaayo ang mga lubnganan
alang sa laing kamatayon.

ang imong tinood nga katuyoan nga gisulayan nimog limod sa uban

walay motoo sa usa ka
buyog
nga nagpasaringsaring sa
usa ka laya
na nga buwak sa sampaguit
didto sa kilid
sa gilumutan na nga 
labat

gawas lamang kaha nga
sa tinood
ang tuyo niini mao ang
usa ka pyuos 
nga hapit na usab nga
mobuswak

ang adlaw baya dili buta
ang bulan dili sab tanga

ang kalibotan wala natawo
gahapon
aron dili makatimaho sa 
tinood nga tuyo

ang karaang suba sayod sa
tinagoan sa tanan
apan kini mikiaykiay lamang.

kwarta ug kondom

sukwahi sa tambag
sa iyang inahan nga
kulatado sa iyang 
amahan nga milalin
na sa laing kalibotan

imbis novenahan ang
sulod sa iyang pitaka
naa ang kondom ug
hinagoan nga kwarta.

ang mga wala mahuman

dili ka moinum
ug tubig nga kutob
lang sa tutunlan

sama nga dili ka usab
mokaon kutob lang
sa dila

gipangita gayod ang
kabuhong
ang kataposan sa kabusog
ug kauhaw

dili ka mosakay sa baroto
aron didto ka lang  sa
lawod
aduna gayoy dungguanan
nga adtoan

kon mohapit man ugaling
kadyot lang kana
sa dili madugay 
mahinumduman gihapon
ang gipangandoy

mao kana ang kasagaran
apan naay nilalang nga
nagpabilin sa tungatunga
sa mga tumong
sa tungatunga sa padulngan
nagpabilin sa lawod
nagpabilin sa kalimot
wala mabuhong
wala nahuman.

udlot usa sa bayabas

sa akong kagutom
lami na untag sak-on ang punoan
sa bayabas
aron kuhaon ang gabitay nga
bunga niini

apan hilaw pa man
sayang usab kon dili nako paaboton
ang pagkahinog niini
diha sa tumang katam-is ug
kahumot

busa ania 
nagmantinir usa ako sa mga udlot
samtang ang usa ka unggoy didto
sa laing sanga
gidaginot pod ug kitkit ang
nahibiling panit sa
saging nga kaganiha lamang
gilabay ni 
bering.

walay pispis nga magpabilin sa iyang salag

bisan asa ka na lang
gidaladala sa imong hunahuna
walay utlanan ang iyang
kapritso

mora ka na lang ug usa ka
itoy nga gitangagtangag sa 
nagutman nga inahan

sakto na ang panahon
wala nay ulan sa gawas
miabot na ang adlaw
nga ikaw mogawas na sa
imong kaugalingon

dili magpabilin ang pispis
sa iyang salag
ang mga pako motultol ra
gayod sa 
iyang nagtagad nga balay
sa kapanganoran

Paghikalimot

Matod pa sa akong nabasahan nga balak
Kalit nga niabot ang sangputanan
sa mga unod sa hunahuna
nga walay igong balor,

"dili kuno angay nga panumbalingon"

Pagtul-id sa balikog
pagplantsa sa kusot
paghapsay sa kapakyasan

Listo kaayo ang
utlanan sa hait nga kutsilyo
inubanan sa dila sa panuway
nga nagsiging-siging
aron patyon ang kabalaka

Hugti pag-ayo ang bakos
patigayon sa paghikalimot


2016/09/20

unta

unta hinay hinay lang
usab
maoy tambag sa
kinhason
sa kasili nga kusog
kaayog misirit
sa ibabaw sa 
bato

tan-awa nasamdan
ka na hinoon
sa hait nga tipak
sa imong agianan


paghimulso lamang

si manong gorio
nga manghihilot sa
baryo sa galas
sumala sa akong
nahinumduman kaniadto
sa gagmay pa kami
samtang dalhon kami
ni tatay didto sa
iyang balay
kon kami
hilantan
mohubad sa tigmo sa
among mga gibati
diha lamang sa usa
ka paghimulso.

pagpanglimpyo sa balay namo


sa  dihang nanglimpyo
si tatay
sa among balay nga
dugay na nga wala maatiman
sa among mga sinaligan

mitabang mi

gisprihan namo ug baygon
ang mga suok suok
da, patay ang daghang mga
ok-ok

giguba namo ang mga salag
sa balagtok
daghang nangamatay gawas
lang sa nakaikyas
apil pa gani ang mga bag-ong
gianak nga mga bagtok
nga gibiyaan sa ilang mga
inahan
patay gayod silang tanan
ambot wala may nalooy sa mga
bagtok
nga kusog usab nga mikutkot
sa mga sanina ni nanay ug
ni tatay didto sa daang 
aparador

pagkadaghang sagbot nga nasilhig
abog nga nakahig
mantsa sa salog
nagpasad nga mga dahon nga
miabot didto sa sulod sa lawak
ni lolo ug lola

kapoy baya usab ang manglimpyo
nagkaduihay ang mga singot sa huerto
milaylay ang among mga kamot sa 
pagsilhig, mikurog ang mga tiil sa dugay
nga pagtindog

walay samok ang maong pagpanglimpyo
walay nangutana nganong gipatay ang mga
ok-ok, ang mga kuting, ang mga garapata,
ang mga balagtok, (nga gani ako nalooy man
gihapon sa mga bag-ong namuyo didto)

human sa pagpanglimpyo nahapsay ang
balay, sinaw na ang salog, wala nay mantsa
diha sa bongbong, wala nay abog ang mga
lingkoranan ug lamesa, wala nay sagbot sa
mga lawak, nahiluna na ang tanan

pag-abot sa kagabhion, dungan kami sa
panihapon, human sa pag-ampo, among
gisaloan ang kalinaw ug kalipay.

diha sa selos malabay gayod diay ang edukasyon

si nang soling
manindahay lang ug tuba
sa among
balangay

ang iyang mama
usa ka maestra didto
sa lungsod

ang iyang papa
gitawag nga caballero
amigo sa tanan
bangkero sa inoman
pinangga sa mga
tindera
apil na si soling

nagselos ang maestra
gilabay ang edukasyon
gisulong si soling
giyabo ang mga tuba
nangabuak ang mga
baso

gitusok sa tumoy sa iyang
payong nga itom ang
puti nga itlog sa palahubog
nga caballero

dayog yaka sa karsada
durong iyak nga morag bata
nga giilogan sa iyang
monyeka.

kabahin sa gugma ni linda ug emmanuel ( ...among mga katabang sa balay kaniadto)

ang gugma ni linda
og emmanuel
ayaw kalimti, nagsugod
sa hagdanan
misaka sa pantawan
milubog sa salog
mikatkat sa bongbong
mitago sa kisame

silong sa atop nga nipang
nangabuslot
kita kaayo nila ang mga
bitoon....

ning among lungsod

dinhing lugara
silong sa dagkong mga kahoy
nga acacia
didto sa tunga ang istatuwa
ni jose rizal
gilumutan na

kadtong baho kaayong
balita kagabii kabahin sa
bag-ong gipusil nga
gibantog nga adik
sa Sinuyak

nasapawan sa milanog
nga kahumot sa
bag-ong gihaon nga
mga pan de sal sa
bakery niadtong byuda
ni kanhing mayor kwan
sa Katipunan

ang mga nag-jogging
sa sayong kabuntagon
libot-libot sa plaza atbang
sa municipal hall
walay estoryahan kon 
ngano ug unsa

ang mga tawo dinhing
dapita
naningkamot lang sa
tagsatagsa

diha sa ilang mga pangandoy
o mga damgo
nag-iya-iya.

2016/09/19

ang mga dayag

adunay ngalan ang tanang
nilalang

ang tuko nga mituko 
tuko
ang taluto, taluto, ang
tikarol, nitingkarol, ang
tamsi, nanamsi ang
sitsiritsit, misitsit, 

wala magsuot ug maskara
ang adlaw
wala magturong ang bulan

ang suba wala magkapa
ang dagat wala nagmalong

nindot ang mga dayag
diha sa ilang pagpadayag
kaanindot sa imong nawong
ayaw tabuni sa usa ka urom.

Pagkatalaw

Kanang pagmaskara
daghan og hinungdan,
usa na kana ang pagkatalaw

Sa kadugayon natong
tinungas sa bungtod
karon ka pa nagduhaduha
sa akong lakang?

May tin-aw baya nga tubig
nga puno di-ay og kagaw.
Wala pod magpasabaot
nga ang lubog nga suba
dili tim-os sa tuyo
sa iyang pag agay-ay

ingon ani unta ang paghimo sa balak nimo alang sa imong gikaibgan

sama sa atong paniudto
nga kinilaw
mas lamian ang sinilian
kadtong
puwa nga kulikot nga
haskang isoga

gihungit sa akong baba
gidulaan sa dila
gipaligid ligid sa alingagngag
ang kahalang

nanginit ang akong aping
mibukad ang akong apapangig
nakapiyong kos akong duha ka
mata sa gibating dili na 
masabtan

sud sa utok ang mga larawan
gugma, kaulag, gugma,
kaulag, hangtod di na maklaro
kon asa ang usa sa usa

nangita ang wait sa laing init
nga wait diha sa sinilihang halok

miaso ang lawas nga bisan
buboan sa usa ka gabiing ulan
dili gyod mawagtang....

pasayloa ko sa akong kahiubos kabahin sa inyong mga tag-as nga garbo ug kalaug

ang kasuko nimo sa imong igsoon nga babaye
haskang taasa, gikan diri sa akong gilingkoran
miabot sa tumoy sa tore sa babel lapos pa gani
sa adlaw hangtod pa seguro sa pluto, 

ambot kaha kon ngano, nga pati ang imong
mga pag-umangkon giapil mo man, nanukol
sab ang ilang kasuko tumbas sa imong kasuko,
morag bato nga misungag sa bato, pingki sa
garbo, 

abi mo, wala koy gidapigan, matag-usa kaninyo
sama sa kalibotan, dili gayod mahutdan ug rason
suporta sa pagbuhi sa kasilag, nga inyong gilawgan
matag adlaw sa iyang kagutom ug kauhaw,

mahimong magpabilin ako sa akong kalinaw, dili
mangilabot, tabang sa tabangonon, bangon sa mga
natikay-ang, apan sa dugay nakong pamalandong,

tugbang sa inyong mga kasuko ug kasilag, sa kalay-on
o kaha ba sa kataas niini, lapos sa adlaw, lapos sa bulan,
hangtod pa gani sa kinalay-ang pluto, 

mao usab ang akong kalapdon sa akong kahiubos. mga yawa mong tanan. Mangayo kog pasaylo daan.

walay puas ang kahilas

desperado si nicolas
labihan ka depressed
ambot ngano
di man pod motingog kon
pangutan-on
walay gikaon
di ganahan

miingon ang usa
dali diri nicolas
apil namo
mangatawa ta

ang usa sab miingon
moanha ko diha nicolas
sa imong pad
akoy bahala nimo

milili si nicolas sa ikaduhang
mitingog
miyango
misulti sa oras

ang depression ni nicolas
gustong anhaon
aron sulbaron sulod sa lawak
diha sa kangitngit
bisan pa kon init ang panahon

dunay mitambag
lahi ang depression ni nicolas
wala kini sa bukid
sa mga alindanaw ug sa mga
alibangbang
sa mga aninipot ug sa mga
buyog

dunay usa nga wala mitingog
kay sama ni nicolas
walay puas ang kahilas.

lahi sab ni silang duha

sa
resort, wala daw plano
apan 
silang duha
nagkita, milingkod sa kilid
sa pool
wala poy plano
apan naghukas
kay init daw ang kagabhion
ug naligo
naglumba pa gani ug langon
sa unahan
dapit sa ngitngit
nagtapot.

diha ra kutob

duha ka matang ang 
patay

ang patay nga sa atong
tan-aw walay sala ug

kadtong sa atong tan-aw
makasasala

busa duha pod ka matang
ang atong bation

adtong usa, mawili ta apan
atong usa moingon ta "da, gaba!"

dunay mosulay ug sudya nato
bahin niini

dili numero ang patay
dili sab ka kahukom kinsay sad-an

gusto nimong buhion ang duha
sulod sa usa ka balay

hangtod nga ang duha magpatay
unya ikaw nga nabilin, kunuhay

magsubo, mangadye, moluhod,
mokuyog sa lubong, 

mohalad sa buwak, modagkot
sa kandila, unya diha ra ka kutob.

ang mga tinagoan nato

gihipos nato ang atong tagsa tagsa ka
tinagoan,

dugay na nga panahon, walay gihisgotan
bisag usa lang

baga ang abog sa lingkoranan nga uway
masubay nato ang gilabyan sa ok-ok

ang katre naghambin pa gihapon sa singot
sa atong duha ka likod

gitay-an na ang lansang nga seradora sa 
pultahan

karaang electric fan, baga ug nawong, 
dako ug tiil, lapad ang sampot,

tinagoan kini nga lamian sama sa usa ka
lata kaayo nga humba nga kon ihungit 

sa atong baba, nanam sa dila,
mo slide dayon sa tutunlan

lahos pa gani sa tiyan unya
walay saba saba

ang puthaw

puthaw siya nga
imong gibitay sa
bentana

kon imong bun-on
ug bato
mobalos kini sa
usa ka taginting

kon sigihon mo pa
pagbuno
dalitan ka niya ug
usa ka awit....

buhok sa agtang....

gusto unta nakong ipaabot kanimo ang balita sa iyang kamatayon.
tinood.

apan dugay ra man nakong gi-delete ang imong numero diri sa akong 
listahan. Tinood.

sahay kamao kong mopapa sa gitan-aw nakong sayop. Sayop kadtong
nagpailob lamang ako kanimo.

sayop kadtong akong gipasagdan nga nagsuot kag takuban unya misakay
sakay lang pod ko sa imong buslot nga sakayan.

sayop kadtong gipauyonan ka nakong nagkalo bisag naa na kita sulod sa
balay. Tinood na.

sayop ang akong pakigsandurot kanimo. Pila na ba ka higayon nga ikaw ang
siging sakto? Tinood gayod kana.

Busa, wala koy pagbasol nga akong gipapa ang akong larawan tupad nimo.
Pila ka higayon nga sigi mong gikumot ang akong papel de hapon? kadtong puti.

Namatay na siya, Sayod ako nga ikasubo mo kini. Sayod ko nga bation mo ang
kahadlok kay basin ikaw na usab ang sunod nga padawaton sa tatam ni 

Kamatayon. Tinood na. Ako na lang usa. Unya naglibog baya pod ko nganong
nagmalipayon na man hinoon Ako.

Mao kana ang tinood. Isipa na lang nga sa wala nimo pagkahibalo niini, buhi pa
gihapon siya.

Kay kadtong wala na nato hisayri, magpabilin mang buhi gihapon diha sa atong
paghikalimot.

Hangtod nga mokalit og abot ang ulan, unya ang imong alimpulos bation ug kahadlok,
dayon ang imong buhok sa agtang, mokurog.

mas halangdon....

sagdi lang kadtong
durong panguha durong tigom
sa dili na nila mahakop
sa dili na nila matago
sagdi lang
kadtong nagtoo nga sa 
kadaghan sa ilang mga anak
o mga kaliwat
o mga bahandi o propiedad
nga sila malipayon 
o magmalipayon hangtod sa
kahangtoran
dinhi

paghilom na lang.
ayaw og saba. hiposa ang
imong nahibaw-an.
tigoma ang imong pagsabot.

lingkod. pahiyom lang pod gamay.
ana, ana, mas halangdon kang 
tan-awon.

pag-una-una

akong giunhan
akong gipauyonan
bisan unsang bakak 
akong gisulayag
paninood maong
nagpasalamat ra pod
kos iyang gibinbhin
nga kahilom

sarap sa mindanao

gisarap ang mindanao
kuyog ang karaang maestrong
bol-anon,

gidala niya ang kolon
apan ila sab ang kamote

kon padak-an ang kolon
padak-an sab ang kamote

karon gipangita kon asa
ang tubig....

2016/09/17

toro

sa niadtong wala misukol
sa atong mga pagdunggab
nakaiyak hinoon ta

sa kalooy sa atong kaugalingon
nganong hangtod karon
wa gihapon nato hisabti
ang koneksyon nato diha
kaniya

kay sa kataposan
kita gayod ang
 makalolooy

mohandas

gibuak nila ang iyang antiyohos
maong dili na siya makabasa apan
makamao pa gihapong molakaw
aron sulayan niya pagpaayo ang
mga buak nga samin basin pag
matapakan

 o kaha ba paalisdan 
na lang 
walay gamit ang kasilag
diha sa usa ka 
panimalos.

sayod ka
 nga nagmadaugon siya
sa tumang pailob. 

Basin mao lang
kini gihapon 
ang imong gihunahuna
nga solusyon 
sa imong problema

karon. 
Walay labot ang nagbuak.
Walay silot sa malapason. 
Hangyoon
lang nga unta
 dili na kini niya sa sunod
buhaton.

paabot sa konsyensa.
 Ikaw nga wala na
niini, 


pusila.

DALI

dali na diri
kay dia si Dali

atong ibton
 ang
iyang bungot

ayaw kabalaka
wala na ang mga oras

nalanay na ang
wall clock

salimuang ni pokwang

sa tigmo nga natubag na
patyon na ang baka
sa mga wala pa
pagpadaplin kay ang
baka nga taas ug hait nga
sungay
mosungag na kanimo

ang nagbukal nga walay
kalayo
ang trono sa rayna nga
walay mata
ang baboy nga wala sukad
moiwik

ang pagpangabubho ni 
bobby kang rogen
usa ka isog nga baka
nga nanungag kang lilia
apan wala niya ambata

ang wakwak sa ibabaw sa
atop
nangita sa kaputol sa iyang
lawas nga
gibuboan ni lola onyang 
ug abo

daghan ang gustong mouli
apan walay kaulian
kadtong nagtikongkong
palihog ginhawa.

2016/09/16

kaugalingon

ngano kaha nga
kon kanus-a wala na siya
mao pa man hinoon ang
atong paghinumdom
kaniya?

aduna kahay kahumot
nga mas labaw ang
abo kaysa unod
ang kugang kaysa dugo?

gilabay ko na ang mga
buwak
kay wala na may mosimhot
niini

gipangkulob ko na usab
ang mga plato ug baso
gihipos ang mga kutsara
ug mga tinidor kay humana
man ang panihapon

inig katulog ko na sa katre
inig takilid nan wala na koy
laing hunahunaon kondili
ang ako rang kaugalingon

lumalabay ra ang tanan
ang milalin dili na mobalik
mas lisod mas kurat kitang
nangabiling buhi kay wa pa
ta masayod kon unsay dangatan

alang kang Jun K.

nagkita mi sa tubaan ni lagring
dugay na
didto sa purok morning star
sa iyang bulingon nga purol
ug putol nga tsinelas
dili nako malimtan ang iyang kataposang
bungat samtang gadala kos akong
maleta paingon sa pantalan padung sa
stasyonan sa bus nga modala namo paingon
sa zamboanga,

' magkita ra unya ta puhon bay"
dayog babay

nanimpalad kami sa samporna
sabah pila na ka tuig ang milabay
walay nahitabo sa among
kinabuhi
hapit pa gani kami nadakpan didto

sa among paghibalik patay na diay siya
naalaan sa mga barakuda

sakto siya, sa ako usab nga kahimtang karon
usa na lang ang nahibiling pangandoy nga
unta 

magkita na kami puhon, didto sa iyang
gipadulngan....


tabiraw

ang kabayong puti ni Tatay
patay na.

pagkadaghan pa unta sa atong
nakuha nga kumpay.

si Tatay ang unang namatay
dayon ang iyang kabayong puti

nga ato untang pagasakaysakayan
apan ang kabayong puti patay na

ang nakakita miingon nga napaakan
kini sa usa ka itom nga halas,

unya sa kalit human sa pagpaak ug
sa dihang namatay na ang kabayong 

puti, nawala usab kini dayon, samtang
ang tikaron nga asul, mipatong sa sanga

sa nangka, naglutok, nangandoy sa sapa
diin ang abo nga isda, kanunayng nagduka

pagkadaghan pa unta sa kumpay nga
atong nakuha sa daplin sa sapa apan

ang kabayong puti patay na, apan ang
itom nga halas kalit lang usab nga nawala.

Panginhas dire