4/30/2017

ang mga nagpahipi lamang

hangtod kanus-a
tagoan sa yuta ang 
dako nga bagtak
sa kamoteng kahoy?

hangtod asa ang
pungpong sa mani
diha sa ilalom sa
balason nga
yuta?

matago mo ba ang
kapuno? ang kalabong?
ang kahomot?

ang tinan-ogan nato
gugma pa ba kaha?

nanitsit ang tuway
sa lapokon nga bahin
sa dangoyngoy sa
suba


nadungog mo na ba
ang awit sa mga wati
dihang wala miulan
kagabii?

4/25/2017

ang sayaw sa kinabuhi

ang sayaw sa atong
kinabuhi

anaa sa kanunayng
paglibot-libot

makalipong, daghang
kasukaon

bisag gasunod-sunod
kita sa uban niining

sayaw sa usa ka lingin
anaa gihapon sa sayop

sa mga tikang, adunay
napandol, naay nayatakan.

sa tumang kalood gisuka ko ang nanglabay

sa dihang 
nakita ko ikaw pag-usab
didto sa usa ka
dungguanan

naglagot ako sa
akong kaugalingon
kon nganong kaniadto
sa akong kabatan-on

nahigugma ako
kanimo
diha sa tumang katanga
sa kagahi sa ulo
sa pagkawalay-buot

sa tumang kalood
gisuka ko 
ang nanglabay

ikaw

ikaw ang akong
ebedensya

kabahin sa panagbulag
sa gugma ug kaulag

kabahin sa ilang panagtagbo
kaniadto

ang usa nagpakabuta unya
ang usa nagpakabata

ako ang naghukom bahin
kanila

usa lang ang ilang ginikanan
ug kini hagbay nang patay

4/24/2017

ang pagpakabuhi bisan pa sa lain pang nga katarungan

ang pag respeto ko ko kanimo
mabati mo
sa dihang usa usab ako sa
mitabon sa imong 
bakak

usa ako sa misabot nga basin
ug mas bug-at ang imong katarungan
diha sa maong dakok bakak

basin ug sa paghimo niini
walay usa kanila ang mamatay

basin ug imo lang gayod nga
gihatagan ug dakong bili ang kinabuhi

ang pagpakabuhi bisan pa sa lain
pang nga katarungan

galawod-lawod sa unahan ang laing mga kamatooran

sa sulod sa lawak
napuyok ka sa kangitngit

humot ang imong nasimhot
lami ang imong gibati
gani nakaingon ka
dinhi ang langit

sa dihang nakagawas
ka na sa lawak
ang pultahan mikatawa
ang gawas ang
mitug-an sa tinood kanimo

gidapit ka sa lunhaw nga
hangin
nangamay ang kabunturan
ug sa makausa pa
mihatag ug laing paglaom 
ang mga panganod

galawod-lawod sa unahan
ang laing mga kamatooran
daghang lukot sa balod
ang mga pagtoo

4/23/2017

pag-antos

kini ang akong
nasulat
samtang giihaw
nila ang kanding
samtang nadungog 
nako ang tingog
sa kamatayon

ingon siya
disir gilubag ang
liog
gipainom una
kini sa suka
sa naglutok nga
mata sa kanding

mas lamian kuno
kon kini tagaan sa
gamayng pag-antos

4/21/2017

ang kuto diha sa ayuyok

matingala ka nganong gapnod
ang akong gipakita kanimo

apan mao lang gayod kana,
ako ang imong gapnod.

matingala ka nga lubog ang suba
nga atong gilawig, 
apan mao lang gayod kana ang anaa
diha,
lubog gayod ang atong suba.

hinayhinaya lang pag-irok ang mga kuto
ayoha, dugaya pagdimdim ang kalipay
sa matag pagpisat mo niini.

matun-an mo ra sa kadugayan ang
kaanindot sa lubog, ang kaanyag sa gapnod
ang kabalaan sa kataposang irok
sa kuto diha sa usa ka ayuyok.

sa usa ka paghinuktok

unta kon aduna lamang akoy kaisog sa
pagsulti kanimo sa tanang matood, basin

ug didto sa payag sa kilid sa baybayon
mas lamian pa seguro ang atong kape bisan
ug bugnaw na kini

mas lamian pa seguro ang atong mga gisumsuman
kabahin sa uban, mas kusog pa gayod unta ang
atong mga katawa, tabon sa kiwa natong mga 
pahiyom

samtang ang adlaw nagkamang na paingon sa
sabakan sa kangitngit
samtang ang mga bitoon nangiwil aron molawig
na usab sa atong langit

usahay manghinuktok ako, kon ang akong dughan
dili mahaw-as sa iyang mga gitipigan, mas malipayon kaha ako? 

kon giabrihan ko ang bentana sa kusina diin gitigom ang aso, unya makagawas kini sa pultahan
paingon sa hardin paingon sa mga panganod
mas molalom pa kaha ang akong mga ginhawa
aron mokaw-it sa akong mga kamatooran?

daghan na kaayo ang mga katuigan ang nanglabay
nausik lang kaha kini diha sa pagkumkom?
mas nindot ba tan-awon ang buwak nga wala kaayo mibuklad? mas halandumon ba ang iyang
sugilanon nga kini sa tungatunga sa iyang pagkapyuos ug sa pagbuklad kini gikutlo sa kapalaran unya sa walay bisag usa ka pagpanghupaw kini namatay?


kabahin sa usa ka hitabo

sa imong paglantaw sa gawas sa bentana
diha sa akong pagliraw-liraw ko kanimo
dali ra kaayong masayran nga wala na didto
ang gugma. Sakit handumon apan mao man
gayod kana ang tinood. Gitipigan ko kini sa
kilid sa akong dughan. Wala na manghilabot
ang mga katarungan. Dili kini iya.

sa atong tagboanan hagkan ko ang ngabil nga
bugnaw. Hawiran ko ang kamot nga laylay. 
Hapohapon ko ang dughan nga walay sulod.

ingnon ko pa ba ikaw nga kon ako mohalok 
kanimo, mas maayo gayod unta nga ipiyong mo
usab ang imong mga mata?

gisulayan ko paghimamat balik ang akong kaugalingon sa atong panghitabo. Daghan pa
ako ug wala nailhan. Ang mga katuigan kaha
nagbudhi ba kanako?

mga kalahian

lahi ang gugma
lahi usab ang mga
panginahanglan
sa unod

dili buot ipasabot
nga sa akong paghaploy
sa imong buhok
sa usa ka pagbudhi

nga gikalimtan ko na
ang nangagi sa 
mga rosas

wala ko hikalimti ang
kalayo sa dapog
ang kahumot sa bag-ong
gihaon nga
sinanglag

lahi lang gayod ang kurog
sa akong kumagko
ayaw sabta nga nawala na
ang akong mga pangko

lahi ang gugma sa iro
sa usa ka bukog
lahi usab ang gugma sa
kagabhion
sa mga aninipot

ang mga walay nahimo

dakog nakawat
sa oras
ang mga walay
nahimo

ang hingtungdan
anaa
gakagot ang ngipon
gasakit ang
pus-on

4/20/2017

nganong mas daghan pa man hinoon kag nakita?

sa nakuhang kahayag
miabot ang panahon 
sa gikinahanglang 
kangitngit, 

sayon lang ang pagpalong
sa suga, 

nahingangha ka
nganong mas daghan
pa man hinoon
kag nakita?

paghimamat

ang paghimamat
dili lang pag-ila-ila

paghawid usab kini
bisan sa imong
kaugalingong kamot
lang

tungod kay wala nay
bisag usa nga nabilin
diha kanimo

hagbay mo rang 
nailhan, ayaw pang
himakak,

wala lang gayod
nimo kini gaksa
sama nga ikaw na
gayod ug wala nay
lain...

4/18/2017

ang naa sa tunga nato

wala nagpasabot
nga sa dihang nagbulag
ang atong mga
panglantaw
nga wala na tang duha
nagkuyog paingon
sa atong padulngan

ingna lang nga
nagbinantayay tang duha
ako sa too
ikaw sa wala

inig abot sa atong 
kaaway
dungan tag iskrima
ako sa wala ikaw
na sad sa too

ang naa sa tunga nato
kon dili mabun-og
patay

ang paghikalimot

wala kuno
gituyo ang paghikalimot

hunahunaa kuno
basig gipugos

ang motumaw dili
ba lumsan man?

kadtong wala na
nato ganahi

di ba wa na nimo
ginaambat?

nga bisag naa diha
morag wala?

sa paglunos sa imong iro...

karon nga
naglunos ka na
diha sa salog
sa balay

akong gibalhin
ang akong panglantaw
didto sa iyang
mga mata nga hangtod
karon
giutitod gihapon sa
tumang kadangag

kabahin sa kinabuhi ug kamatayon

ang kahoy nga
gipuy-an sa anay

nangabuslot unya
ingon ka

wala na kini pulos
ilabay

unya kinahanglang
dili motakod

pamatyon ang tanang
anay

ang kahoy nga gabok
anay lamang 

nga kini isugnod
aron ang tanang anay

madamay diha sa
iyang pagkasunog

unta kon mihunong
ka lamang

sa makadyot diha
sa paghinuktok

maaninaw mo unta
ang kadugay 

sa atong panahon
makita mo unta

kon unsa ang tinood
nga gugma

ang tinood nga
hunghong kanato

kabahin sa kinabuhi
ug kamatayon

ang kalig-on sa gugma

suknaa ako kon
unsa ba kadtong
nakapalig-on kanato?

pagkaanindot sa
mga bentana nga
naghatag kanato sa
hangin

pagkalig-on gayod
sa upat ka haligi sa
balay
nga wala magtapot

pagkahayahay sa
atong pagpamati sa
mga hangin nga
naglapos-lapos sa
abri nga mga pultahan

ang ilang pagpanglupad

mag-undang na
kitag hisgot kabahin
sa mga nangawala

sugdan na nato ang
awit sa mga nahibalag
ug sa mahibalag pa
nato

nindot lantawon ang
mga kalapati nga puti
nga mitugpa sa hardin
dayog tuktok sa gisabod
tang mga lugas sa
humay

abi mo kon unsa gayod
ang mas makalipay kanako?

kadtong nanglupad na sila
sa dihang imong gibugaw

hisgotan na nato ang
pagbiya
basin ug daghan pa kitag
makutlo
bahin niana

pagbuak sa akong kahilom

kapila ko na
kaha nadungog
ang pagbuak
mo sa kahilom?

sa una
lami pa kining
pamation
pawala sa puol

sa ikaduha
morag dili na
misakit gamay
ang akong
dunggan

sa ikatulo
nasamdan na gayod
ang akong
kasingkasing
sa mga bildo 
niini

mas daghan 
pas maya nga
lagaw

4/17/2017

ang tingog nako

aduna akoy
kaugalingong tingog

gipamati ko kini
sa matag buntag

dili nindot ang akong
tingog
ang gipanulti sa akong
baba
nakalagot sa akong
dila

gipamati ko ang akong
tingog
masulub-on kini
maampingon

sa kanunay nagpanghadlok
nga unya madunggan
kini sa wala pa nakakita kanako
sa wala pa makaamgo
nga usahay ang tingog 
lahi sa ngabil
lahi sa tiil
lahi sa kinabuhi

kasakit


hangtod kanus-a
pa kaha ikaw moingon
kanako

nga nasulti mo na ang
tanang nasulti
nga nasulat mo na ang
tanang nasulat

nga ang tanang pagpanugon
nahuman na?

duha mo ka nawong

ang anino
nagpahipi kanunay
sa atong likod

milantaw kini
sa kahayag sa kabuntagon
dapit sa bentana

nahisama kini sa
nagpahipi mong lain nga
kaugalingon
nga hadlok usab sa 
kahayag

kay basin unya kini
siya mawagtang
kay siya ang anak sa
kangitngit nga imong
gimahal

duha ka nawong sa
tawo ang anaa kanimo
kon asa ang gitawag
nilag laksot atua ang 
imong kasingkasing

busa ang kahayag ug
kangitngit magsoon 
dili mabuhi ang usa kon
wala ang usa
kon imo kining ipanghimakak
sa tungang gabii
maglayog ang tumang
kahadlok ug kabalaka

kon giunsa pagkahibalo ni kulas nga si coring wala gayod nahigugma kaniya

tam-is kaayo
ang pahiyom ni
coring sa dihang
gidawat niya
ang hinagboan ni
kulas gikan
pa sa layong dapit

gibugtian ni coring
ang gihatag ni kulas
ug usa ka pilit kaayo
nga halok
sa ngabil ni kulas
nga mipaak sa iyang
init nga dila

gihipos ni coring ang
salapi sa iyang
dughan
ug ang bag-ong
sapot
nga seda

didto sa kusina
sulod sa kasilyas
durong panglimogmog
ni coring
ug usa ka baso nga
tubig sa iyang
baba

nga mora bag gusto
niyang iluwa ang tanang
pagkatawo ni kulas
didto sa silong nga
gitugwayan sa anay

aron dili masakitan
nanglimogmog sab si
kulas
bisan pa sa kamatooran
nga natulon na niya
ang laway ni coring
sud sa iyang tutunlan


4/16/2017

suringiw

gikan nako didto
apan dili gihapon ako
makabalong motudlo
kanimo
kon unsay buhaton
inig abot na 
niini

o nimo, suringiw ang
akong paghukom
hibat ang tanan

kon matudloan pa 
lang unta ang
kasingkasing
wa unta ako nahisama
kanimo

duha kamo nga
nagtupad sa usa ka
lingkoranan

mas bug-at unta ang
usa sa
yanong pangwenta
apan nganong
ikaw pa?

4/06/2017

ang gakuyog

ulan ulan ulan
latas mis gahiwi
nga dalan

ulan ulan ulan
gibasa mo kami sa
tumang kahinam

4/05/2017

ipiyong ko na kining tanan

ugma damlag
kon makita mo na ang
tanan

ug kon ugaling
dili na ako tagaan ug
gahom sa
kahilom

giandam ko na ang
angay kong
isulti kanimo sa dihang
mahibaw-an mo na
gayod ang saktong
tubag sa akong tigmo
diha kanimo

magun-ob ang akong
balay
maputol ang akong tulay
masunog ang akong
higdaanan
mangalarag ang akong
hagdanan

usa lang ang akong
masulti

ako mao ako
nasayod ka na niana gikan
pa sa akong
pagkatawo

wala na ang akong sapot
hubo na ako 
atubangan kanimo

ug kon ugaling mohikap ka man
sa akong panit
ipiyong ko na kining tanan

mahimong magpalayo na
ako kanimo
paingon sa ganghaan
sa akong gipangita nga
kagawasan

pagkaako

kini ang
akong pagkaako

nagpabilin bisag 
daghang milalin

bato sa adlaw ug
sa ulan

dili mopahawa
bisan pag
nangalaya na
ang mga
lumot

ikaw ug ang kasilag

dili nako ikalimod
nga nakita nako kaganiha ang
gabaga mo nga kasuko
nga gani nakasunog man
sa gauga nga dahon
sa kabuntagon

pagkabugnaw sa 
kaadlawon
pagkadako sa imong
kasuko sa
knabuhi

gugma ba kaha kining gibati
ko kanimo? ako nga wala magpakabana
kon naunsa ka na?
ako nga nagpadayon sa akong mga
buluhaton sa kabuntagon
diha sa paghalad sa altar sa kinabuhi
sa mga pag-ampo ug
pagdayeg?

gugma ba ang pagpaubos?
ang dili pagtubay sa imong kasuko
diin giisip ka na lamang
isip hangin nga lumalabay?

anaa ang abo sa imong
tiilan
wala na ang pagbati
kon adunay laing hangin nga
moabot
paliron kini dayon ang mabilin
mao na lamang ikaw
ug ang kasilag 

gilantaw ko sa sanga
ang buwak nga mao pa gayod
ang pagsugod
sa pagbuswak

ngano ba ng ako nasina man gihapon kanimo?

kalami sa imong
gipanulti, gustong tukion 
sa akong ngabil, apan,
kasakit pamation nga ang
imong tingog, sa kanunay
lahi sa ako, tiglom kini unya
ang ako lutaw, bato ka,
balahibo ko,

ako ang nakita ug gibati,
ikaw ang gipangita unya
gidanggaan nilag patay.

ngano ba nga ako nasina
man gihapon kanimo?

kalipay

malipayon ang uban
kay lagi miabot man lang
nga wala damha

usa ka gabii niana
nanuktok kini ug imong
giablihan

apan ang uban nagpangita
kon asa
bisan pa sa kadako sa kaalam
ug gahum
wala miabot kini

haw-ang ang kapa
katol ang korona
unya ang palasyo 
nagsigig pangagho

ayaw, kamong 
nagmalipayon, ayaw
did-i ang nagmasulob-on
kay dili lalim ang
ilang kahimtang kay wala
pay nasayod sa ilang
gidangatan

dunay miambak sa lawod
dunay nagpusil sa utok
dunay naghilo dunay 
wa na mogawas sa kwarto

unya anaa ikaw tupad sa
imong kapikas ug mga anak
wala maghunahuna kanila
ug gani sa walay pagdikidiki
miingon ka man, "gaba nila"

tambag kang pongpong

palihog ayaw
butangi ug daghan kaayong
kahiubos

ang gamay kaayong paya
sa imong panahon

gamay balak alang kang samsam

pagkagamay
 sa panahon
pagkadako
 sa daghang 
mga kasakit....

balak ni Chule

bisan ug
gibayran ko na ang
tag-iya sa 
kalipay

unya gitunol
niya ang iyang
kamot
ug akong gihawiran

giapil pa gayod
ang laing akong
sa dugya na nga panahon
gikahinaman

pagkahuman
wala man gihapon ako
nalipay

akong gidugangan
wala mibalibad
apan sulod sa akong dughan
nagbakho man
ang akong kasingkasing
gustong ipasabot
nga unta maundang na
ang dakong sayop.

dalang suhi

bisan kanus-a dili ako
mamahimong ikaw

wa sab ko mangandoy
nga ikaw mamahimong 
ako

maong mag-iyahay ta
ug lakaw diha sa pag-inosara

unya ang kahidlaw bahin natong
duha kon anaa pa man ugaling
kana mao ray
makahimo pagtagbo balik sa
atong mga dalan nga
naghiwi

kinsa ba ang maalamon?

ang unang miabot
ang mabudhion
nga misulod sa lawak
nga kasagaran

dayon ang misunod 
ang bakakon nga nagharay-haray
sa duyanan sa ilalom sa
kahoy

nagkita silang duha 
nagkinihatay
nag-inom sa tumang kahilom

miabot ang nagkanta-kanta
nga bisag buntag nga dako
walay nakita nga morag 
nagpabutabuta

mikutlo sa bulak sa hardin
gihalokan kini
dayog tan-aw sa duha nga
morag di niya kaila

kon kinsa ang mas maalamon
nilang tulo
ang tungaw ray nasayod

4/04/2017

dugay ra kini, apan sa akong kahangal wala ko gayod kini nasulti.

ang wala ninyo mahimo maoy
akong himoon.
kadtong walay nakagusto bisag
usa, 
kadtong gidili, kadtong imong
gibasa unya nangyam-id ka

daghang pangutana nga mitubo
sa papel, dayog yawyaw, "unsa ba
ni? kalad-ang ba? nganong kani man?
walay bisag usa ang ganahan 
niini"


oo, mao, ako lang.

dili na kamo mangilabot 
kanako

ok lang.

ug hagbay rang
wala na usab ako mangilabot
kaninyo

dugay ra kini, apan sa akong kahangal
wala ko gayod kini nasulti.

kaibog

wala siya natintal sa
imong tingog
wala siya namakak
sa tumang kaibog

4/02/2017

buwak alang sa wala na mitoo

giganahan kas akong
tingog sa
kagabhion

wa ka na gani nangutana
kon kinsa ko kon asa ko gikan
kon unsa ako

mipaduol ka kanako
nabati mo ako
nabati ko ikaw 
sa kagabhion
humot kaayo ang
kainit

nahigmata ka sa kabuntagon
ug nakita mo ako
ug gikan didto wala ka na
mitoo sa akong tingog

bisan pa kon moabot ang
daghang kagabhion
bisan pa ug maghilak ka
sa kasubo

nangutana ako kanimo
apan wala ka na tagad makatubag
kabahin niini

mas lami

mas lami ang
kawat-kawat

mubo nga panahon
nga puno sa
kalipay sagol
kahadlok nga basin
madakpan

mas milami kini sa
imong panumpa nga

dili ka motug-an nga
kining tanan dalhon
mo paingon sa imong
lubnganan

mas milami ang lami
sa dihang
ikaw na lamang
malipayon nga karon
luwas ka na diha
sa imong
maskara

4/01/2017

hinay hinay

hinay hinay ang
pagkawagtang sama sa usa ka kahaponon

mohupas ka lang gihapon
molanos

nalarag ang kaniadto hayag 
naharag ang kaniadto lig-on 

nga haligi sa
balay nga dugay na kaayong gipuy-an sa daghang
kasadya

ang lawak sa gugma nakay-ag 
ang makita ang
tanan larag dinhing dapita

mga papel nga kasingkasing nga pug-aw
mga panghayhay nga nangauga na
 apan wala matangtang

walay misuot walay miabot
nikang-a ang mga nagtapot

nalawos ang buwak, nalarag, nahulog
nagpista ang  mga sagbot