3/31/2016

alang sa halas

misayaw ang duha ka kaulag
sa awit sa kagabhion

pagkabuntag anaa ang tasa
sa kape nga
nabalintong samtang
gisuyop sa balas ang
tanang nausik

ang duyan nga walay tawo
gipalid sa hangin sa samang
pagtabyog 
walay tumong ang pagbalik
balik

sa kasamtangan anaa ang
adlaw nga walay paghunahuna
sa iyang kahayag nga
midan-ag alang sa mga walay
pag-ampo og sa 
kanunayng nagluhod

sa halas nga nag-atang sa lain
na usab niyang tukbon karon

alimyon sa usa ka kagabhion

ania ang
imong gipanamkon
gianak
mo na

ania ang mga bunga
sa imong
mga pangagpas

kutloa na ang buwak sa
imong mga panaghap
simhota ang
kaalimyon sa usa ka
kagaghion

sipyat

gibayloan mo ug usa
ka lugas sa humay ang
imong umahan

ang imong lawas sa
imong sapot
ang imong kumagko sa
usa ka singsing
lamang

gibayloan mo ang imong
kaugmaon nga matod mo
dulom
sa tutulo ka gutlo sa imong
kagahapon
nga kon ako pay imong
gipangutana
wa baya say bisag usa ka
got nga kahayag

3/30/2016

reykjavik

nag-abot ang
kalayo ug yelo
sa tunga sa tubig

didto ta nangaligo
wa ta mahadlok

apan ngano ba nga dako man gihapon ang kasakit?

walay kinalamian nga
magmahal
ang inahan

walay kinalamian mahalon
kondili ang
anak

apan, ngano ba nga
dako man gihapon ang kasakit?

lami man unta. ang anak misimang
ang inahan nagkamang

ang anak nakalimot 
sa inahan nga humot

3/29/2016

venice

sakay sa
gondola
namati
sa mikantang
botero

humag
bayad
sa dihang
nakanaog
na miluag
ang dughan
human
sa gibuhian
nga 
ulog-ulog

angayang lud-an

i

gikapoy intawon
siyag kuha sa pula nga
lapok
aron maghimo og
kolon para nimo
unya human sa lima
ka adlaw
sa miabot ka
imo man lang kining
gilabyan


ii

gikapoy tawon siyag
sulat sa maong
balak
unya sa dihang gibasahan
ka niya
mora mga wala lang
gani mikatawa ka man
nga morag
gihilasan

iii

sakit baya pod tawon 
dako kaayog kahiubos
ang maong hingtundan

iv

ang Ginoo nga naglantaw
sa ibabaw
galagot na nimo
kon di ka gihapon mausob
iya kang
himoong bato

o lamok ba kaha
o tulo sa ulan

ako na nakadungog bahin ini
kon magkita ta puhon
palayo lang
gilood ko basin ako ka pa unyang
malud-an

3/27/2016

ang mga gitabontabonan basin og masalbar pa unta gihapon

nakita na usab
nako ang imong latest
post nga picture sa facebook

hala kapyot jud
sa gugma
hangtod naa pa

hala pusta gyod
sa imong bukton
ang kalipay
samtang giganahan pa

sakto ka
bahala na
basta sakto lang gyod
ang projection

bahala na kon
unsay naa sa sulod
basta sakto lang
ang wrapping 

kon unsa man
ang tinood
ila na nang problema

basta
happy lang
happy happy lang
samtang makaya pa

unsa man god poy
ilang labot?
imong kalipay
imong hulagway
pwera saway

wa ko mi comment
sayod ko ug labaw nga
sayod ka

nihit na ang kalipay
karon
wa na kaayoy 
madaginot nga dukot
anang rice cooker

ingon ka
ayaw na ko dugangi pag
putos anang
bringhouse nga kalipay
kay kuno
wa nay kasudlan sa imong
kanunay nga puno
nga ref


kataw-anan
sayod ka ug mas labaw sab
nga sayod ko

imong post
ikaw ang bahala
di na jud ko
mo comment 

magpaabot kos
naandan
natong tagboanan
andam na
ang bag-ong sipa
sa dakong
botelya sa 
red horse

maghubog ta
mangatawa ta
kabahin sa mga buktot
piang
bungol ug buta
ug mga
amang

alang kang J.

ang tag-sulat
durong paningkamot
kon unsaon niya
paghuman
ang nahibiling panahon
nga kon sukdon
mubo na lang
baya pod unta

dunay mga letra
nga morag lugas sa
mais nga
iyang gisabod sa
dalan

gusto niyang makita
kini nga
mogawas manambo nga
dahon diha
sa iyang naniradong
bentana

gamayng panahon na
lang
hapit na matuk-an
ang mga gutlo

dili lalim ang
pagpaabot diha sa
pagtapos

hinay kaayo ang
dagan sa mga kamot
sa orasan

pagaw ang tingog
kapoy ang mga mata
kurog ang tuhod
laksot ang kapalaran

anaa ang paglaom sa
pagpaabot
bisan gani kon 
sa tinood lang
wala nay moabot

dag-om sa langit
kaulanon
apang ning higayona
dili na buklaron
ang dala nga payong

tambag sa usa ka hapit na matigulang

mitambag ka

kon inigmata mo gani sa
kaadlawon unya ang imong kadulog
wala na diha unya wa pod gani
mananghid kon asa
siya paingon

unya sa wa damha nagkubakuba ang
imong dughan

ayaw pahinungti ang maong pagbati
nga motunol nimo sa dakong
kabalaka dayon
paingon didto sa kahadlok kon unsa
ang ihatag kanimo sa sunod nga
mga oras

bangon diha ingon ka
gawas sa balay
kay niining tinghulaw nangalaya ang
mga dahon sa imong mga tanom
mamubo ka
kay sila sa tumang kauhaw
gimingaw na kanimo

human niini
mag-init ka ug tubig
hiposon nimo ang kainit
sa usa ka thermos
 
motak-ang ka sa nilung-ag
initon ang inun-unan
manarapo sa lamesa ug lingkoranan
apila na usab og silhig ang salog

ayaw kalimti pagpilo sa imong
habol
baliki ang lawak
biyai kini nga hapsay

paabota ang pagsubang sa
adlaw dapit didto
sa imong veranda
diin namuwak na usab ang
imong gibitay nga
pangadlaw
didto sa kilid sa imong
balay

lingkod tupad sa lamesa
andama ang kape, ang pan
tupari sab sa sardinas
(kadtong pinalit nimo
sa Montaño)  

pahayahay
hinayhinaya og higop
ang imong
kinabuhi
tagamtama ang tanang
kalami niini
diha sa usa ka tasa
nga kape
nga init unya dili
kaayo tam-is

(gani mas lami man
ang kape para kanako
kon kini dunay gamayng
pait) 

kon moabot siya
nianang higayona
sa imong pagpakahilom
labaw nga maayo

mas lami man god gihapon
kon duha ka tasa nga
kape
ang maabtan sa dili pa
kaayo
init nga adlaw

unsaon ba pag tapos ang imong panahon

molabay ang mga adlaw
nga nahisama sa mga daghang
nawong sa mga tawo nga dili
mo kaila didto sa usa ka 
lapad nga karsada

wa kay maambat sa bisag usa
kanila tungod kay managsama
lamang ang ilang dagway unya
balik balik lang ang ilang mga
nilihokan kon asa sila paingon
kon asa sila mohunong

ingon tong usa nga gadagan
naay dakong kumbera sa unahan
dunay gikasal unya duna say
gibunyagan

unya matagboan mo ang nagluto
og puros itom ang pamayhon lain
sab tong gakuyog nga puti ang 
pantalon ug puti sab ang sapatos
dala sa puti nga buwak og kandila
dunay dakong tawo nga namatay unya
gihaya dapit sa bungtod 

mangadtota aron ta moduyog
sa ilang dakong kasubo sama sa
usa ka bungtod

ikaw nga dugay na dinhi unya gitahod-
tahuran na 
mohapsay sa kabug-at usab
sa imong abaga
 tarongon ang kwelyo
hiposon ang kamot sa bulsa
 hikapon ang
kalo kon sakto ba ang pagkatabon sa
imong pinahapay 
unya sa hinay hinay
lakton mo usab ang dalan paingon sa
laing adtoanan
 bisan kon wala na sila
didto nga imong gihandom.

3/26/2016

kon walay sulat nga gibilin

hunahunaa nga kon
sa pagbiya walay gibilin nga
sulat
nagpasabot kini nga ang
pagbalik usa pa gihapon ka
dakong umaabot,

sayod ka sa nahitabo kang
Junjun 
nagbilin ug sulat pagpasabot
kanato
kon ngano nga siya naghigot
didto sa 
punoan sa kaimito

kabahin sa akong libro sa balak

ang akong sapatos
nga bag-o dili nako
mahimong paalisdan
nako sa imong tsinilas

ingon sa akong lolo nga
bol-anon
ang yuta kaniadto dinhi
sa dipolog
ila lang bayloan og
tagsa ka gantang nga
asin

kadtong dako dako nga
yuta mahimong alisdan
nilag panapton apil ang
sapatos

naa koy libro sa balak
kon imong pangayoon ako kahang
ihatag nimo?

puhunan

namuhunan ko ug
tubig og mga lugas sa
uga nga humay
didto sa among
nataran

gisuklian ako sa
awit sa mga 
langgam

gipakapinan pa gayod
sa ilang
pagsayaw

diha sa pagsugod

kon unsaon mo kaha
pagsugod ang
pagsulat 

lingkod
piyong ang mata
lutaw

gisuyop ka sa
tungatunga sa kawanangan
dayon miabot
ka didto sa dakong trono

diin ikaw ang 
Hari dayon gibuka mo 
ang imong mga mata
og dinhang bahina

sugdan mo na ang wala mo
pa sugod 
masugdi sa tibuok nimong
kinabuhi

imo na karon ang adlaw
ang bulan og
ang mga bitoon

suma kini sa kasagaran nilang
giingon
kanako

kon unsa ang kinabuhi

gialirongan ka sa mga
sayop

ngano ba nga kining
mga abog ania pa man?

kanang tulo ka patay
nga ilaga nganong wala
pa man malubong?

ang imong kauban mikompisal
nga dili na siya mausab pa

ang iyang kabalikog kanunay
mao na gayod

gubot ang lawak unya ang
ang-ang sa hagdan buak

kanunay ka nga nangandoy
nga mausab unta kining tanan

apan walay kausaban, mibug-at
ang imong dalhonon

bisan gani sa gabii wala na
nimo makita ang mga bitoon

kanunay na lang ba ang 
mga dag-om, ang ulan?

mipahiyom siya nimo unya
miingon, nganong di mo man

higalahon ang mga abog ang
mga patay nga ilaga mahimong

ikaw na lang unta ang molubong
kanila aron usab mawala na ang

mga lagong. Mora kag mabuang
sa panghitabo, unya mipadayon

siya, ingon ana ang kinabuhi,
kon karon wala ka  pa mabuang

unya kon ang imong mga abaga
wa pa batiag kalaylay kon ang

ang imong mga tiil kasipaon
pa gihapan, nan, mipahiyom

siya gihapon, wala ka pa gihapon
nakat-on kon unsa ang kinabuhi.

apan

namasol siya sa sapa
nga walay bisag usa ka
isda,

oo, tuod man namukot
siya sa dakong lawod sa
dagat unya kaswerte sa
daghan niya kaayong 
kuha,

apan didto sa ila wa man
say namalit
busa ang iyang tanang isda
nadubok lamang

ang usa walay kuha sa sapa
ang usa wala say halin
ang iyang kahago ug kalangan
sama ra usab sa sapa nga walay
bisag usa ka isda

ang pulong nga apan sa
kanunay kuyog nila
aron sa matag adlaw anaa
magpaila.

3/24/2016

ag itoy nga wala na maambat

kapoy
na inig abot
gikan sa
trabaho

kahulugon
ang mga mata
katangtangon
ang mga kamot

gitangtang ang
sapatos
sa kilid sa 
higdaanan

gilabay ang duha
ka medyas

unya ang iyang
itoy nga wa na niya
naambat

gitangag ang
medyas
gihimong tinabas

sa iyang
gitagamtam
nga hagok

wa na siyay
kaliboan unsay
nahitabo sa
mga ok-ok

pagsulat sa hwebes santo

dinhing lugara
ayaw kahiubos ha

akong kanunay madungog
mao ra jud ning mga tamsi nga
siging witiwiti

mingaw baya
pero kining mingaw kon maanad
ka
mahimong linaw

morag mabati mo ang imong hunahuna
hapsay, morag buhok nga gisudlay
kay kining sudlay dili baya sabaan
bisan ang buhok nimo gubot unya
morag alambre kagahi

madungog sab ang mga sugo ni manay
sa iyang sulugoon: silhiga ang mga sagbot
trapohi ang lamesa nga gikatulgan sa iro
didto ka manglung-ag sa dapog ayaw gamita
ang gasul
labhi unya ang mga trapo
magmap ka sa salog

ting-init sa mahal nga adlaw
hwebes, wala magpatukar og radyo
tingpugong karon

sa layo madungog mo ang talagsang tingog
sa mga motor nga milabay sa karsada
milabay sab ang mga bag-ong tubo nga
dili na mopatoo sa badlong sa ilang mga
tatay

magbasketbol sa gym dayon mangaligo sa 
dagat pagkahuman

kabahin nako, dulot gihapon ang kinaraan
puasa sa binignit og pila ka lugas nga pasayan og
paak sa kasag

dayon di kapugong, sulat sulat gihapon
naninguha nga unta ang akong isulat bahin sa 
bankaw, suka, kilid, dugo, mga sugarol nga nagpustaanay
sa sapot nga dili ilaha,

lansang, krus, bukid, dahunog, syagit sa mga namatyan,
bakho sa inahan, mapailobon nga anak
nga misangpit sa amahan,

eklipse, dayon, sa pipila ka gutlo, balik na pod ang
kahayag.

palit palit nga makaulit

mipalit siya og palette
nga abi niya og unsa

sa dihang iyang gisulat
abi niyag palate

lahi ang makaon nga
imong tilawan
lahi sab ang imong
hugawhugawan unya
ingnon nilang

"wow, kanindot,
unsa man na?"

kining palitpalit
sahay
makaulit labi na
kon di ka  kamaong
mogamit
sa imong napalit

gipaabogan,
gipasagdan,

gibiyaan, unya
pagkahuman

adto na pod balik
"wow, unsa man na?
akong paliton,
tagpila?"

3/23/2016

ang duha ka nagkahigugmaay

gusto nilang

dili sila magbulag

dili nila ikatugot nga sila

bulagon

busa sa tunga sa lawod

sa daghang balod

naghawiray silang duha

usahay ibag-id niya ang

iyang lawas sa iyaha

gusto niyang magtagkos

ang ilang mga tiil

magdug-ol ang ilang

kasingkasing

mausa unta, busa

nagpadayon sila sa

pagdag-ig

sahay siya ang maibabaw

sahay siya ang mailalom

ang gaugang dila

tungod sa kaparat

magbasa

hangtod nga silang duha

gianod

nadagsa sa usa ka lagpyahan

diin sila nagtapot

nga diha sa kalimot

nangamatay

tikig na nga nakit-an

diha sa

miabot nga

kahayag.

3/20/2016

kabahin sa patay

gipakita kanako
ni junjun ang patay nga
bagtok

iya unta kining ilabay
sa pikas balay

ingon ko ayaw
ilubong kini tupad
sa punoan sa 
mangga

abono ang patay,
dili angayan ilabay.

hagip-ot nga dalan

kagabii
gilakat ko ang dalan

wa ko kahibalo kon
asa kini padulong

wa ko kabalo kon
unsay sangpotan

gamay nga dalan
napiit ang kapalaran

mingitngit ang langit
morag moulan

walay balay nga
kapasilungan

sa kilid miaw-aw
ang upat ka iro nga

morag gustong 
mamaak kanako

gusto kong modagan
balik sa giagian

ngiob, mingaw, 
wala nay makita 

gusto nakong balikan
apan dili na, dili na.

hagip-ot nga kagahapon
dili ka pasayloon.

layo pa ang kabuntagon
mibakho ang kaadlawon.