4/30/2009

gabii nag-ulan

nag-ulan
madungog ko ang tingog sa ulan diha sa atop nga sin
masubay mo ang ilang mga kanaas diha sa ilang mga agianan
hilom kaayo ang kagabhion kay ang mga langgam nangatulog na
sa gawas migilak ang mga dahon nga nanghulam sa dan-ag sa bulan
naglingkod ko sa hagdan atubang sa karsada
walay mga sakyanan nga nangagi
dinhi sa maong oras mora bag nangamatay na ang tanang mga buhi
walay kisaw og ang mga ginagmayng kahayag nga anaa sa mga balay sa unahan
haskang layoa gayod
morag mga aninipot lamang
nagtipun-ok ang akong gihunahuna
morag mga bulingon nga ugma kinahanglang labhan na
bahong lata nga sagbot diring dapita
og ang kahoy nga mahogany nga habog kaayo
wala gayo'y lihoklihok morag gigapos sa hangin
sa akong kamingaw mabati ko ang paggimok sa mga ulod
ang mga tunob sa hulmigas mikatay diri sud sa akong dalunggan
ang hangin gikan sa bukid morag mga hunghong nilang nanay og tatay
ang hagdan misabak kanako
mingaw gayod diay
kon ikaw wala na sa akong tapad
ang hagdan dili man god kamaong motingog
dili kamaong mohawid sa akong mga kamot
dili gani modap-ig sa akong panit
bisan sa akong kadugay nga paglingkod
bugnaw gihapon kaayo ang salog
og ang ulan mikalit og undang
gilumsan ko
sa tumang kahilom sa mga dahon
sa tumang kamingaw sa mga abog
nga nanapot sa dingding
sa libro nga wala na gayod nako ukba
pila na ka semana.

mingaw man, mas maayo pa unta ug wala na lang
miundang ang ulan

walay pangilabot

kon unsay akong naabtan
mao ra usab ang akong biyaan

lisod ang paghusga sa mga nauna
wala kita masayod kon gayod unsa

kon ang tanan baya na lang pasagdan
mas angayan sila sa ilang nahimutangan

ang baso nga walay sulod puhon-puhon
sumala sa kapalaran mahimong pun-on

ang mga sagbot mokatay rag ila
paingon sa kalipay nila

ang mga dalan mapapas
ang mga bukid modasdas

ang mga panganod manglutaw
ang mga dagat magtagawtaw

ang mga tawo mangamatay
apan kahibalo usab kining mosanay

wala'y angay kabalak-an
wala'y kinahanglang aninawon

inig abot pundo kadyot lantaw
pahulay ginhawa dayon lakaw.


ang pakighilawas
diha sud sa botelya
morag
lahi ra

morag dili na ko
kaginhawa

sa kalami.
ang akong kasingkasing
gahig ulo

ang akong ulo
walay kasingkasing

nagkuyog man unta
ni silang duha

apan lahi man ang ilang
iistorya

ang langayan

ang langayan
(og ang tapolan)
nagpadayag nganong
magdali man
(unsa'y kugihan?)
unsang rason nga siya magmakugihon
o magbinut-an ba hinoon
nga og siya pa'y pasultihon
mao ra mang lisora gihapon
ang iyang antosan
pag-abot sa unahan

pagpanghinguto

diha sa hagdan
sila usab naghagdahagdan sa ilang mga ulo
gisusisusi ang mga lusa og kuto
nga sud sa ilang mga buhok nagtago

og samtang nagsumsum sila sa nahitabo
kagahapon kabahin
ni Tonying og Claring
nagsigig irok anang mga kuyamad
og mga kutong tambok
og hiyod bira anang mga lusa

ambot og nakita ba nimo nga
ang ilang mga kalag nga niwang
morag gibayaw didto's ikawalong langit?

hay, usahay, sa panghayhay
dili baya lisod ang pagkahayahay!

ang pagbalik sa kagahapon

karon nga duna ka na'y nakitang
nawala diha sud sa imong bulsa
ang imong pitaka nga dunay sud nga
kwarta
og usa ka hulagway
naghinuktok ka kon asa dapit sa imong
kagahapon
ikaw nasipyat
kon unsang unsaha nga ang imong pitaka
wala na man diha sa imong bulsa

mao kana ang rason nganong usahay
mobalik kita sa dalan sa atong kagahapon
ato na usab nga sugdan ang pagpanghinguto
anang mga kanus-a lang
kinsa ba
og ngano kaha?

usa ka gatos nga mga toro

adunay usa ka gatos ka mga toro
sud ning akong dughan
nga akong gikoral
sa balaod sa kataha, kaulaw og
pagpakatarong (kunuhay)

naghingos, nagpanikad
nag-aso ang ilang mga
ilong kay gustong manggawas
kay gusto nang managan
paingon sa daghang kasagbotan

akong gilig-onan ang mga
bara og mga trangka
akong gipahabogan
akong gipangsirad-an
ang mga bangag
aron ang usa ka gatos ka mga toro
dili gyod makapalag

nangatulog na lang intawon sila karon
apan ako nabalaka

unsa kaha ang mahitabo ugma
niining akong usa ka gatos ka mga toro?

ang ako mang gong koral
morag dili na modoral
gustong mohoral

4/29/2009

kontra gobyerno

kaniadto misyagit ko
miisa ko sa akong mga kamot
pormag kumo
batok sa gobyerno

kaniadto dagan-tago ko
sa bukid sa lungsod
sa lasang og patag

kaniadto nalisang ko
nalooy ko nanglood ko
mipakita kog pagsupak
misukol ko sa gobyerno

sa kadugayan
nakaamgo ko
nganong makigbisog ko
batok sa gobyerno
nga ako man kaha ang
katawhan nga nagpili
sa gobyerno

ang gobyerno ahente ko lang
kay ako ang matood nga
naghatag kaniyag gahom
sa pagdumala kanako

nganong pasakitan ko man
ang akong kaugalingon
samtang ang gobyerno
nagpahayahay?

kaganse ko uroy
busa karon mikuyog kos gobyerno
diri ko sulod molaro
sul-ubon ko ang ilang sul-ubon
kan-on ko ang ilang kan-on
imnon ko ang ilang imnonon
sayawon ko ang ilang sayaw
mokuyog kos bagang panon
tan-awon ko kon asa dapit
ang ilang kamatayon

ang dikotomiya sa tambaloslos nga nangawkaw sa trono ug usa ka adik nga nanghay-ad sa starbucks



"Sa sertipiko sa imong pagkawala
Ang hamugaway niyang baba

Maoy gamitong tamla."

- vicente vivencio bandillo
(gikan sa balak nga "ang tambaloslos")


"dude, it's all just lip-service, man..."
- bobong sandayong
(callcenter agent / shabu addict)



o samalaykom de salam por dios por santo
dyeste! odyes! inilog! biya! sangyaw sa kristo
politikong hipokrito, pasiriti ra gud ko
dili ko! dili ko! kay hugaw ka'g kuko
dili ko nimo, kay gusto ko ug bata
mura ug pungko-pungko ginabot with suka
sariwang-sariwa kay bag-o pa'ng habwa
madam pagawsa nya ko ha? ayaw lang saba
presidential clemency, do u agree?
gayaya lang kay wa sila kaagi
si congressman tingali kay...mao lage
"money works in a mysterious wee"
si jonas burgos kumusta na diay to?
tua, gipalamoyg bato, gipausab ug bildo

this sick motherfucker state is sleeping like a hog.
can't sleep can't think, my mind's raped like a dog.

sakit akong ulo, sakit akong tangkugo
sige lang ko lubog, sige lang ko luko
tungod tingale ni sa pungkopungko?
kay misuol man sad ang akong lukoluko
doktor tambaloslos, doktor tambaloslos
tambagi ko please kay akoa di na mo us-os
sakit pod ako tumoy, di ko kalamoy
high-blood ka boy, likayi ang baboy
kaon sikwa, kaon otan,
tongkat ali pod para pakusgan
kay sa mabungol ko ug mabuta
motrabaho jud ko ug kolsanta
hahaha! funny lagi kaayo ka
but i like it there, u know, daghang gwapa
hangout@starbucks, drink coffee hay-ad hay-ad
wa kay sapi? uli inyo! lanlan asin, usap buwad!
then we party @ paseo coz we like to disco
tukari ra gud ko ug sadya kanang ocho-ocho

but the truth of the matter is i want to be a priest
may na lang, dili ko mo-burn in hell, atleast

headlines karon ipasupot ugma
kay hubog ang mga tudling sa atong balita
"snatcher nadakpan, naghikog sa prisohan"
"bebe gandanghari: rustom, gusto na ug man?"
"pari nitimpasaw! pari nalumos sa sabaw!"
"obispo nagkibotkibot kay nakwangan ang sibot"

pro choice o pro life?
hahay, kalisud biya sa life...
o mamma mia! mamma mia!
tagayi ra gud ko ug bahalina
hurot na mompo, hurot na hostiya
gikobit sa sakristan, abi ug piyaya
bolawan sa simbahan kinsay tag-iya?

ang dikotomiya
sa simbahan
ug balay-balauran:
usa ka dakong anomaliya!

saba diha oi, galisngag lang nang imong wait!
nagyawyaw man lang ka diha ug kalit
o kalisud sa life, o kapait, kapait
nakakaloka, nakakasira nang bait
bait diha! walay chicken joy sa army!
bulahan, kay wa kailag diet ang pobre.

kagabii nalupig ko sa away

kagabii nalupig ko sa away
nailalom ko
og ako na man
hinoon ang gimakmak
sa maong bungtod
og langob morag wala
ko katoo nga ang
akong pantalan
girapido na man
hinoon sa daghan
kaayong mga sakayan
nabasa ko sa mga balod
natabonan ko sa
mag buhok sa
itom kaayong mga
panganod.

pagkahuman ang
katre nahilom
ang mga salog
nahinanok sa katulog
ang mga habol
wala na magbagolbol
ang mga alugnan
nagkaguliyang.

ohm

itom
kini
apan bisan
sa tungatunga

sa kaitom
og kalalom
sa kaitom
sa
kagabhion
kining itom
nga imong
gihandom

bisan dili
pangitaon
sa makadyot lang
kaayong higayon
imo rang masalom
gisumsom gium-om gikumkom

saksak sinagol

kon ikaw matinooron
na ikaw jud ang mabilin sa panon

kadtong bakakon
magmalamboon

kadtong nagbinot-an
maoy sal-an

dinhi niining kalibotana
kon sa tagalog pa

"bawal po ang tanga!"

ang nailad way palad
ang way palad,

pungkol

dili tanang brayt sa klase brayt sa korte

ang brayt sa klase
napolpol sa korte

lahi na man Dodong
ang arte sa pagpanglimbong

ang tul-id tuison
ang tuis natul-id na man hinoon

ang tinood nga bakakon
mao na ang dakong halangdon

nag-una nga naulahi

sa iyang hilig nga
manglaktod
naunsa na man hinoon
siya mitapot
kay ang iyang sampot
nabutbot

4/28/2009

dili

nag-ingon ko nga dili nako gusto
madungog ang syagit
og tuod man misyagit ka
kusog gani pag-ayo
kanang morag mabuak
ang bildo sa akong dunggan
og aron lang unta
nga pauyunan ka
akong gitudloan ang akong
kaugalingon anang mga syagit
gani tanang klase sa syagit
sa matag adlaw
og sa katapusan
nasugdan na nakong nagustuhan
ang mga syagit
og mitug-an ko nimo nga dili
na nako gusto ang kahilom
og tuod man
nagpakahikom ka sa pila
ka semana
hangtod na sa pipila ka bulan

nasabtan ko na ang imong buot
ipasabot kanako
dili ko tantong bulok
aron masabtan nga
ang tanan kanako imong
gisupakan

dili ko bulok
nga dili makasabot sa imong gustong
mahitabo kanato

sayang lang ang akong mga pag-antos
kon mao lang man diay
gihapon ang mahitabo

sa imong mga ginikanan
kaniadto

48 ka tuig akong nahimong
buta, bungol, amang og bakol

walay sapayan
ugma wala na ako'y angayan
nga paaboton pa
ang akong kasingkasing
nakahibalo na anang pagpatig-a

walay asenso

ang imong nakitang sip-onon kaniadto
hubakon na karon

kadtong mutaon
og kikion

dalikdikon, kaspaon,
ap-apon lang gihapon

walay gayoy kabag-ohan
kining atong silingan

walay gayoy asenso
kining atong katilingban

ang mga kawatan kaniado
tulisan na karon

ang mga pobre
misamot ka pobre

og ang mga dato
misamot ka tuso

ang mga mangingilad
nagsigig pangilad

og ang mga politiko
nahaniti sa pagpanonto

didto sa negros

duha lang ka matang ang tawo didto
pobre lang
og dato

kon pobre ka
haskang pobreha jud ka
kon dato ka
haskang datoa jud kuno ka

wala'y naa sa tungatunga
morag lawas nga walay bukog ang tunga

ang kapong sa pier sa dumaguete

sa sayong gabii
nanghagad pa siya og mangga

kay wala jud lagi
sa kaadlawon nanghagad
na lang intawon
og kape

4/27/2009

migilok na usab ang akong ilok
sa dihang
nakahawid ang akong kamot
sa imong kamot
wala matuyo

ang paglikay wala nay pulos
nagawsan na ko's akong
2...

losyang nga katalaw
dili jud kati

lawlaw nga purol
dili
patas ang putol.

ang galot

duna kuno siya'y classmate
nga haskang brayta sa math
apil na sa ingles
maayo pag
leadership qualities
maayo sab sa arts
nga og siya pa
pagka-well rounded
jud kadtong
klasmeta

ang ngan kuno
mao si rico mendez

og si rico kuno ang ilang
salutatorian

nakapangutana dayon
ko kon kinsay
ilang valedictorian

og dali-dali baya siyang
miingon
nga "ako!"

gugmang guba

gugmang guba
ako ra poy gagubaguba
dili ikasulti
hadlok sa pari

kaganihang hapon
naguba na pod
kining akong
dughan
maayong pagkawingig
ang apapangig sa akong
kasingkasing

akong giayo
atubangan sa samin
wingig lang gyod gihapon
wa koy nahimo
ambot og nganong
ganahan sab ko
aning gugmang guba

morag silot
na jud ni sa akong mga sala
sa mga mamsa.

restraint

ang akong mga kamot
gusto nang mokamang paingon sa imong paa
apan
dunay miingon nga yuna pa
basin baya
og masagpaan ka,

og busa misulod na lang kini
sa bulsa sa akong karsones
migunit na lang sa
akong eggs

anad anad lang god

kanang gugmang
malumping
anad na ko ana

tiltil tiltil lang
sa pag-abot sa
kagabhion

mawala ra man
ang sakit
sa dayon

type

sa gamay lang
nga saghid
sa iyang kamot
diri sa akong
bukton

mikoryente
abot tumoy
sa akong
kiting

sa usa ka siplat lang
misaka ang adlaw
sa akong agtang

mibalod ang akong pilok
nagpasad ang
daghang isda
sa akong kalimutaw
ang iyang mga binhi
iyang gikorona
ang hangin ang
motabang
sa pagsabwag kaniya
lima ka tuig
siyang magpaabot
sa bag-ong bulak
sa iyang kinabuhi
ang mga gabon mihapnig
naghimog dakong banig

dinha sa mga aping sa bukid
gugmang napatik wa mapalid

kay ang bulan miabot na
aron mahikatulog na siya

pula nga tughok
itom og puntik

namaak sa bulak
wala moiyagak

4/26/2009

Ugma, Karon, Kagahapon

Ugma, Karon, Kagahapon


Dagan sa panahon dili mapugngan
panuigon mapun-an, magkatigulang.
Kung mabalik pa unta ang kagahapon,
niadtong usa pa ang niturok na ngipon
Hamubo panumbalingon, oras na halangdon.
Ang mahinungdanon, nagmaya pagkakaron,
kay basin ugma, di na igkita ang pahiyom,
tungod matabunan sa maitom na mga dag-um.
Naghilak ang adlaw kay ang iyang gilaw,
dili na maaninaw sa mga binuhat na nipanaw.
Kisdum! wala'y mikislap maski bugtong na bituon,
para unta sa mga masulub-on sa bintana tambuon.
Tungod sa kagamhanan sa panahon, di mapugngan
ang ugma ug karon, di na sad mabalik ang kagahapon.

-sakagawasan

talithi


ikaw na usab usa
sa tunga tunga sa lawod nga katawhan
dinhi sa dakong syudad

sa gawas
nagtalithi
bugnaw kaayo ang
hangin
og saba kaayo ang mga
sakyanan

sakit sa dunggan
ang mga nangagi
ang imong ngipon
mipaak sa imong
ngabil

sul-ob ang baga
nga jacket
migawas ka sa mall

nangandoy ka
og kusog kaayo
nga ulan
motabok ka
sa karsada

ang imong bulsa
walay sulod
ang takong sa
imong sapatos
napungig

mibaha na usab
ang luha

AWITA ang AWIT ko




Pangandoy ko’ng awiton kini

Damgo ko’ng imong mabati

Tinguha ko’ng mahalad kanimo

Kining awit nga gimugna ko.



Apan pangandoy lang gyod diay

Kay ang mga nota daw mitalidhay

Pakyas ko’ng awiton og ipabuhagay

Kining gugma nakong giatay.



Palihog lang awita ang awit ko

Pahinungod ko alang kanimo

Pasaylo-a kung dili ko kini mahimo

Hangtod ron padayon pang nakigbugno.



Ginamit ang lugas sa akong mga luha

Gisuwat sa palad nga hapit na madugta

Namugna sa huna-huna nga hapit malata

Nabuo ang awit sa gubat didto sa taliwala.



Kini ang awit sa akong pakigbisog

Awit sa gugma nga walay pagkabusog

Padayong naglagubo sama sa dalugdog

Hinaot nga ikaw niini makadungog.



Palihog lang awita ang awit ko

Awit sa gugma ko diha kanimo

Ug kon ugaling mahimo nang abo

Malooy ka awita kini sa lubnganan ko.


Hunahuna

Hunahuna

Bisan unsaun pa og puga
Ang utok ko dili na mapuga
Mas molana pa ang putot
Nungka ang hunahunang mug-ot.

Bisan pila na ka dahong papel
Ang nagkatag sa gilingkuran
Mas maayo pa ang naglukdo og barel
Makarason pa nga gibug-atan.

Nibalitok, niligid mura og gipatol
Gikuykoy na ang tanang nagkatol
Nangataltag na ang mga kaspa
Naapil na ang kugan og kugmo pa.

Gilumutan o gitayaan?
Ang mitapot na akong galamhan
Bisag unsa na lang ta ang mapaluta
Sa tintang dili mapapa.

Mas maayo pa maglamaw sa tagulo
May kalipay pa nga mapupo
Bisan og sa kakapoy gipaningot
Basta sa kaugalingon nakapahimout.

Ang kahago ko may ganti ba?
O di ba may modunol og kwarta?
Ang gipuktawan ko og sulat
Na mga storya og mga balak.

Dili mabayaran og bahandi
Ang sinulat na bunga sa pagbati
Sa kadaletra na nahipatik
Nakapahimo kanako na abtik.

Sa mga obra na ako nahuman
Wala gilaum na mabayaran
Igo na mabasa og maganahan
Sakto na makapatambok sa akong dughan.

-sakagawasan

Kasakitan sa Gugma

Kasakitan sa Gugma

Kung gugma na ang istoryahan
Magsakit dayun akong dughan
Tungod sa masakit na kasinatian
Ako dayun mahinumduman.

Puro man lang kapakyasan
Ang akong nahiaguman
Mao na siguro ni akong kapalaran
Busa dawaton na lang.

Nindot sad na mahigugma
Pero dili lang sad sobra
Para kung masakitan
Dili sad ta mabuang.

Hinauta na kung kamo mahigugma
Na andam kung magkinaunsa
Kay dili malikayan
Ang kasakitan mahiaguman.

-sakagawasan

4/25/2009

Kamatooran

kamatooran


ang mga bakak
dili ba tahop
napalid sa bulhot
sa hangin
sa pagsulay

kana nagpasabot
nga ang mga bakak
gaan og ang kamatooran
bug-at

higala
wala ka ba bug-ati anang
imong mga kamatooran?

kaya pa ba?

wala ka kaha
napareha sa kabug-at
sa lana
nga imong gikaligo
sa imong lawas
og anaa ang imong
mga balahibo
natuk-an
naglisod og ginhawa

unsaon na lang ba
ang paglupad gawas sa hawla
paingon sa mga panganod
sa kagawasan?

Argumento

argumento


milutaw ra gayod ang tinood

ang mulutaw mao lamang
ang mga gaan
nga mga tahop

ang mga mongos
nga gikaon sa ulod
mao ang
milutaw sa tubig

milutaw ra gayod ang tinood
ang mongos nga giulod
ang gaan nga tahop

tinood ba ang mga tahop
og ang mongos nga giulod?

milutaw ang mantika
sa dihang gilamog kini sa tubig
asa ba ang
nagsulti sa matuod

ang milutaw o ang
naunlod?
sa iyang pagpakabuhi
gisulod niya ang baga kaayong gapnod
gipangita niya ang mga hanap
nga gabon

wala siya nagpahayahay diha sa
tungatunga nga dan-ag
hinonoa gisulong niya ang
dili unta angayan nga adtoan

kay sa kangitngit mibuka
ang iyang mga mata
sa gapnod sulod sa tumang kahanap
didto daghan kaayo siyag nakita

sa kamingaw natugkad niya ang
kalalom sa kalipay
sa kasubo sa iyang kasingkasing
nadungog niya ang
labing maanindot nga awit

prinsipyo

kamong tanan ang dagat
og ako ang dakong bato
nga mibabag sa inyong padulngan
anaa ako sa tungatunga
sa baybayon
kay ako ang utlanan
sa tubig og yuta

sayod ako nga inyo akong lumpagon
og sama sa mga balas
sa ilang kapildihon
inyo akong pagahadlokon

apan balalewala na kana kanako
andam na akong mobalik sa akong mga
abog nga mga ginikanan

sa mga nanglupad nga mga kanaway didto sa baybay


nanglupad ang mga kanaway
sa hanap nga kapunawpunawan
mga tunob sa baybayon
milapas sa usa ka utlanan
ang mga kamot mikawaykaway
sa mga nanglupad nga mga kanaway

sa pagkahinog na sa mga uhay


sa pagkahinog na sa mga uhay
kon wala pa gani ang manganihay
paliron na lang kita sa hangin
balik sa atong gitisokan

manubo na usab kita
tumban na usab nato ang yuta
og magbalik-balik kita
sa samang mga panahon
ang pag-ulan ang pag-init
ang pagtayhop og pagkauga

bation nato ang kapuol
niining pagtubo og pagkalaya
dili kita makagawas nianang
paglibot-libot sa kinabuhi og
kamatayan

anaa ang kakapoy
kay ang manganihay
nakalimot na kanato

siya man god ang maghipos
siya man god lamang ang motapos.

unsa ba ang imong panaw?


nahisama lang ba kini sa usa ka bata
nga nagtabyog-tabyog sa iyang kaugalingon diha sa duyan
wala man gani nahago
kay nalipay man kaha
apan wala baya siya'y naabtan

tipasi

ang tipasi mamahimong duha
ang unod og
ang tahop


sa kakusog
sa imong pagtayhop

tan-awa
wala na hinoo'y
bisag usa
nga nahibilin
sa imong palad

ang tinood nga bulak nga maanyag
anaa gayo'y nawong
nga andam niyang ipaatubang
sa kahayag sa adlaw

balod


balod sa tubig
ayuyok sa matang sa atong
paghimatngon

sabwag sa atong panabot
paingon sa pagkawala
ang tinood
wala sa ibabaw
anaa baya
sa atong mga ilalom

sa mahika og fantasya


miabot na ang panahon sa pagkahibalag
ang kabahin sa engkantada nga kaniadto gipaibog ni Nanay
dili tinood
ang kabahin sa mga dwende
og mga lastiko
ang miawit nga mga serena
ang pito ka magsoon nga gitagoon sa usa ka daotan nga hari
ang mga higante sa bungtod
ang mga flora del cielos
mga mugna lamang sa hunahuna

adunay gamit ang fantasia
adunay pulos usab ang mga kamatooran

mipahiyom ako sa engkantada nga mibatong sa akong agtang
og sa sigbin nga mitapad kanako

dili ko sila papaulion
sa ilang mga lubnganan
sila ang mobuhi sa akong mga patay na nga pagtoo
niining dula sa kinabuhi
ang bulok sa mahika og ang fantasia
ibuka ko ang akong mga mata
mopahiyom ako pag-usab
kay ang akong nakita
wala gayod nimo malantaw
ang akong nadungog
wala gayod nimo mabati

ang akong pahiyom nga nagpahipi
sa akong aping
mao kana ang tinugdan sa usa ka kandiis
nga imong gikasinahan

sa kataposan

sa kataposan ang kunot nga kamot
mihawid sa
kamot nga guot

walay gibilin ang nanamilit
wala po'y gipadala ang nahibilin

ugma pagaalisdan na ang mga alugnan
og mga habol

kadtong puti, humot, dili gani bag-o
apan bag-ong uga nga nilabhan
kadtong maayo gayod
kaayo nga pagkaplantsa

wala una'y matulog didto
bisan gani ang kahadlok
nagpanuko
bisan gani ang kabalaka
nagduha-duha.

pagsalop

nagkahilis nga adlaw
dalag nga kamatyonon
kahil nga paingon sa pagkapalong
mikanaog na
padulong sa kasagbotan
mobanos na ang kangitngit
nianang pagpiyong
na sa mata sa adlaw

walay kanaas sa halas
walay kibok sa sapa
walay haguros sa hangin

haom sa akong katulugon

Ang Toro-toro

ang plawta ni Sappho
ang torotot ni Plato
ang awit ni Sophocles
ang hawid ni Aristophanes

mao kana ang pagsugod
sa pamilisopiya
mao usab kana ang
kataposan sa
pagpamalak

toro-toro


abi nimo og ang toro-toro
namugna sa atong panahon

ha ha ha
sayop ka higala

ang toro-toro maoy unod
na sa usa ka karaang bukog sa
usa ka panahon kaniadto

kinaham kana sa mga iro
nga nakig-gubat sa iyang mga igsoon nga iro
sa pag-ilog sa kalami
sa maong bukog
sa ilang kahakog

si Fanny
nagsugod didto aron siya maila nga tinood nga babaye
mao usab ang nahitabo kang
Alexander Pope
nga usa sa mga ganahan kaayong
molantaw
sa maong kataphaw

ayaw og kabalaka
sa atong panahon, gani dapat makulbaan na kita

kay sa tinood lang, ulahi ra ta sa mga kabuang nila.

ang tanday sa katulugon

gitandayan siya sa puti kaayo nga paa sa katulugon
gihapuhap sa iyang mga kamot ang bitiis
midampi ang iyang paa
sa iyahang bilahan
ang iyang ngabil mipauraray
sa iyang dughan

nabati sa kagabhion
ang nindot nga awit sa usa ka hinanok
katungod niya ang pagpanigarilyo
sa kwartong iyang
binayran

ang lubot mikulob
nangita na usab og tukob

silang duha nangita og gawsanan
sa ilang mga prisohan
silang duha lamang sa ilang
gipili nga lawak
ning gamay kaayong kalibotan
nagtakbo ang ilang mga hawak
wala na didto ang wakwak
ang nabilin mao na lamang
ang kalami
sa ilang mga iyagak



ang iyang mga totoy
nga nanambo sa iyang dughan
naghisgot og
mga katungod og kagawasan

ngano ba nga sila tabonan man?
law-ay ba ang kinaiyahan?
ang mga paa naglipay na
dugay ra silang
nakighilawas sa tubig
sa balas
sa lapok sa mga lamok
sa mga kamot

ang mga buhok
nanguhit sa abaga
walay malisya.

si ruben


nagmalipayon si ruben nga mihay-ad sa dagat
walay sapot
andam na siya sa paghapuhap
sa lalaki
nga adlaw

unyang gabii matulog siya
sa pagmaymay sa babaye nga bulan
og sa mga bataot nga mga bitoon
ang tigulang nga hangin nga nasuko nanghulga sa usa ka bagyo
og ang mga dili talagsaong balas
nga itomon
nga kagahapon nagsigi og biay-biay kaniya nangahilom
kay ang adlaw
mora mag nahigugma.
pagkaanindot sa
usa ka alibangbang
nga misuyop sa nectar
sa puti nga bulak

kon ako lang ang dahon
o ang sanga
ba hinoon
unsa pod kaha ang akong bation?

salamat

salamat kaayo
sa imong kaayo

mora kag busay
ang imong bugnaw kaayo nga tubig
sa akong mga tig-a og
mga bato
midagayday

morag mga buhok sa
maanyag nga babaye
nga mihapohap
sa akong lawas

ang huni sa tubig
ang kabugnaw niini
nakapahumok sa akong
bato nga kasingkasing

ang bidlisiw sa adlaw
sa sayong kabuntagon
nanuot-suot
sa mga haw-ang nga
kangitngit

namugaw na
kay iya na usab ang panahon
mora naalimungawan ko
kay kining
maanad na gani ta sa kagabhion
sa iyang kabugnaw
og kahilom

mao na lang man usab
ang atong pangitaon
mas maanindot na man
hinoon
ang itom kay sa mga dalag
nga dan-ag

mas nindot na man hinoon
ang mga damgo
kaysa tinood.

ang akong pangutana

nakalipay ba sa Diyos
ang mga awit ni Haring Solomon?

kita nga nagmatngon
mao na man hinoon ang nahimong nagpakaaron-ingnon?

mao kana ang pagtoo
sa tigulang nga ang iyang imortalidad

anaa sa mga unod sa mga batan-on nga mga babaye
lisod usab diay kon ikaw na ang mahimong hari

ang emperador

dala sa pagkaemperador
sa Roma
ang iya usab nga pagkaulipon

dakpanay


sa france
nagdula og dakpanay
ang mga dagkong tawo
sa ilang katilingban

usa ka lalaki
og tulo ka mga babaye

walay mga tabon
ang ilang mga talibon.

pagkayano lang unta sa kinabuhi

mobalik kita sa kinaraan
dili na nato lantugian pa
dili na kinahanglan nga atong himoon nga komplikado ang atong kahimtang
ang atong mga tuyo
yano lang kaayo

ipahaom lang nato ang angay nga isulod
ako ang mosulod sa imong kinabuhi
og imo akong pasudlon sa walay dikidiki

haom na ang tanan
unsa pa bay gubaton niining atong lumalabay nga kalibotan?

kaunugon sa mga nanglabay nga panahon
kon dili nato masabtan kining yano kaayo nga misyon

ipahaom lang nato
unsa ba bay laing tuyo?

nagpakaaron-ingnon akong tulog pa
sa sayong kabuntagon
og ikaw mitutok kanako og mipahiyom

igo na kana kanako.

ang suba sa kinabuhi

anoron kita sa suba sa atong kinabuhi
sama sa dahon
sama sa kahoy nga nalukat didto gikan sa
dakong bukid
mikuyog lamang kita sa sulog
kinsa ba ang dunay mahimo
kon asa kita ibanlas
niining gamhanang sulog sa kinabuhi

sama sa kakusog sa atong mga pagbati
asa ba kita manghawid?

ahh, gikapoy na ako niining sulog
sa suba sa akong dughan
puslan man
awiton ko na lang usab ang mga huni sa kahanginan
ang yamyam
sa sulog ning suba sa akong kinabuhi

sa walay pagsupak
sa tumang pagtamod sa ilang mga balaod

basin diay puhon og moabot na ang
akong pagkabanlas diha
sa kalipay sa daplin sa baybayon

nindot baya usab ang pagpalutawlutaw lamang
unsa ba gayod ang angay nga kabalak-an?

usa lang ako ka dahon
usa lang ako ka kahoy nga naugkat gikan sa layo nga kabukiran
usa lang ako ka anod sa makusog nga ulan
usa lang ako ka mugna nianang dako kaayong baha sa kinabuhi
ang akong mahimo mao lamang gayod ang pagkuyog
ang pagpaanod

unsa ba gayod ang angay kon kabalak-an?

Bulak ng Feli

panahon sa tingtugnaw, ting-ulan
nahumod ang akong alungnan sa kamingaw
gabusay nga luhang niagay sa pagbating matuod

ikaw lang bulak nga feli ang katumanan
ikaw ang lingganay sa kampanang nipukaw
sa akong nahikatulog nga galamhan

iway sa panganod nga karon gihulipan
sa asul nga langit nga atong gipuy-an
ikaw feli nga bulak, nga akong gikamingawan

puti nga bulak, nibuklad sa akong pagtawag
nipadayag sa iyang matuod nga kaanyag
feli nga bulak, kanimo ang dughan nagsaad

abton ang katumanan nga ugma damlag
ikaw ug ako diha sa iyang ganghaan
gapuson sa gugmang matuod ug pagbati

gasa sa langit nga dili na mabakwi
ug 'di malangkat bisan sa sunod nga ulan
ug sa unos nga mudam-ag.

4/24/2009

pagkahuman

pagkahuman
mitindog ko og nagdali
kay ako usab gigukod
na sa mga oras
niining panahon nga
kinawat
natong duha

mikulob ka og
nagpiyong lang gihapon
sa imong mga mata

milingi ko kanimo sa
makadyot lamang
og akong giabrihan ang
pultahan og ako na usab
nga gisirad-an

mora og nagbasa ko
og nobela kabahin
sa usa ka gugma
gubat og pagbudhi
pagbasol og pagpasaylo

akong gibasa sa pipila
ka panid lamang
didto dapit sa gugma
og kay lagi kulang naman
sa panahon akong gitikyop
og akong gimarkahan
sa usa ka timailhan

og misaad ko nga akong
balikan og ako na usab
nga sugdan pagbalik

gisirad-an ko una ang libro.

Gugma





Gikan: Rachelle Arlin Credo

simbahan sa paglaum

laum, paglaom, gilauman sa usa ka katawhan
ang usa ka ganghaan sa iyang pag-abli matagbuntag
kay nasayod silang mao lang kini paglaum
ang nagpalaum kanila sa pagpadayon

ug kay nilaum adunay silay giuban kanunay
nga kahinam sa dughan nga siya lang sab ang nasayod
bisan ang silingan wala gani makamatikod
sa iyang pagkanaog sa matag kaadlawon

haron ilang ihatod ang iyang kaugalingon
sa ganghaa'ng kanila mipasalig sa pagpadayon
didto sa dako'ng balay uban sa lain pang naglaum
ug sila nga galaum nagtigom sa daong lawak nga hilom

lawak nga daw palasyo sa usa ka hari
bulawan ang naa sa palibot ug kahayag ang naglimin
duyog sa mabugnaw'ng tugtod sa lira ug piano
ug ang awit sa mga anghel nga nigilak sa ilang mga hulagway

matag-adlaw bag-ong paglaum ang ilang gihan-ay
naghatag sa kahinam nga mipabuhagay
simbahan sa iyang mga katawha'ng nagbaton sa malaumong dughan
sa Diyos nga alang sa tanan.

alang kanimo

kon makaadto ka sa lasang
pangutan-a unya nganong namulak
ang mga ihalas nga rosas diha sa daplin sa mga dalan
pangutan-a kon para asa ba ang ilang mga bulak

pamatia ang ilang tubag
pamatia pag-ayo kay ang ilang mga baba dugay rang gipanguha
ang ilang mga dila dugay rang gipamutol
pamatia pag-ayo ang ilang dili ikasulti kanimo

wala ka ba'y nadungog gikan kanila?
kon mao, pamatia ang hangin nga saksi sa mga panghitabo
sila ang motug-an
nga ikaw ang ilang gipaabot nga moluwas kanila
gikan sa ilang kapildihon og isip halad
sila namulak og ang ilang mga bulak alang kanimo
ang katarungan sa ilang pagpamulak mao ikaw
og ikaw lang gayod wala na'y lain

busa kon imo man silang kutloon, pamatia una ang mga hangin
aduna silay isugid kanimo, og kon madungog mo na kini og masabtan
diha sulod sa imong kasingkasing,
makaingon ka: pasagdan ko silang mamulak

alang kanako, wala na ako'y katungod sa pagkutlo kanila.

pagpaabot


ang pagpaabot
sama sa paglaom
aduna kuno'y moabot
apan wala ka lang
masayod kon kanus-a
basin ugma
basin sunod tuig
basin gani wala
apan tungod kay
misalig ka lagi
mao nga
nag-paabot ka lang
gihapon

apan ang pagpaabot
labaw pa ka pasensyoso
sa paglaom

kay usahay bisan og
namatay na ang paglaom
nagpaabot ka lang gihapon
dili nianang moabot
kay lagi miangkon ka naman
nga wala na gayod kadto
apan nagpaabot ka lang gihapon
nianang pag-abot sa imong kamatayon.


4/23/2009

disgrasya sa simbahan

psst
milingi ang akong
amigo
sud sa simbahan

miduol ko
og mihunghung
nga
abri ang iyang zipper

ang dakong disgrasya
kay adtong
higayona

wala siya'y brief

ang tabian

ang tabian
dinhing dapita ang ilang giila
nga mas daghan og nahibaw-an
kay sa kaniya nga
nagpakahilom na lamang

sa kadugayan ang iyang kahilom
mao man ang milanog
og ang tabian
nabungol sa iyang kaugalingong tingog.

mas dungganon

mas dungganon
ka
kay mas ganahan ka
man
lang god nga
mamati

mao nga
tan-awa
midako jud ang imong
mga dunggan!
Ambot sa uk-ok
pila'y bayad sa hapwag
kaligo dayon

bag-ong tubo


Miliking Yuta
Masundayagong Liso
Dahon Nga Bag-o

balak sa usa ka mediocre

wala gayod niya mahimo ang sugyot sa iyang
kinaiyahan
kadtong sugyot sa iyang mga tuhod nga siya
moluhod na
kadtong tambag sa iyang mga kamot nga siya
moampo na
kadtong sulti sa iyang mga hunahuna nga panahon
na aron iyagyag niya ang mga hinog nga bunga
sa iyang hinipos nga mga pugas
sa milabay na nga kwarentay nuwebe

ka tuig

daghan ang nagmahay kaniya
daghan ang nahiubos nganong wala siya mokuyog sa mga panon
nga baga kaayo nga misabwag na sa
makamatay nga kamatooran

wala siya'y tumang kaisog apan matod pa niya wala niya kinahanglana ang maong
pagyukbo, pagluhod, pag-ampo, pagkuyog sa baga kaayong panon aron lang
siya malumos didto sa tumoy nga lalom kaayo nga dagat

dili siya bagtok sa Hamelin
og wala niya ilha nga angayan og haolangdon ang tawo nga miawit didto
kadtong mihuyop sa iyang
gamhanang selendron


sayod na siya sa nahitabo sa baga kaayong panon sa mga bagtok
og ang wala pagtuman sa saad sa mga hingtungdang gamhanan

ang iyang pangandoy mao lamang nga mabuhi siya nga malinawon
dili siya halangdon apan dili usab siya ulipon
nasabtan niya ang kalipay diha sa tungatunga og dinha siya magpabilin
hangtod nga mahurot na silang tanan
sa pagyukbo anang
gitawag nilang banggiitang kamatooran

dinhing dapita dili kaayo init ang adlaw og dili usab kaayo bugnaw ang kagabhion
dili kaayo gahi ang yuta og dili usab kaayo asgad ang dagat

dinhi siya natawo og dinhi usab siya mamatay.