4/28/2011

trip lang

nagmelt na tanan
ang ice cubes sa iced tea
wa pa nako
nainom
nalimtan man

back to writing ko
no choice

reminisce lang god
kadtong kids pa ta

so tiring
but ok lang
dunay matawag tang
envigorating

join ko sa inyo ato
pasuhol og tanom
kay i was just the only one
missing sa group

Papa did not like it
of course
going with the workers
makadaot sa name

sosyalan
pero wa excitement
sa mga plastics

better
go to the mountain
and make inom
with the bahalinas
with matching
paaso pa
gani sa
nilikit nga lumboy

nice kaayo
after the tanom
mud slinging dayon
morag sab
diay tag
mga politiko
with a little difference
wala ang defamation thing
pure pleasure
hampaslupa ang arrive
didto sa
newly planted ricefields

match kaayo ang
tinunoan nga mudfish
sa suka nga bisaya
pagkalami
sab sa mongos nga
gilamugan sa nilat-ang
tiil sa baboy

we were kids
child labor then
after the planting for the whole day
init kaayo ang adlaw
sunog ang skin
didto we learn how to smoke
champion cigarettes
no parent is watching naman kc
di ba?
then at 5 pm
after work
go to the hills ta
under the mango trees
slide slide sa
kilid sa bungtod
using the palwas
nga morag porma
sa atong mga
ilongs

medyo ngitngit na
going home na tang tanan
riding on the carabao backs
in threesomes
passing sa river nga
taob
we all jumped there
swimming with
the carabao
(and the hungihong about
the crocodile of
Baut?

do you remember him?
kadtong modakop kuno og
buaya nga siya
ray makakita?

then wa pa ta mahupong
not believing in the existence
of that legendary children eating
crocodile
we continued swimming
using the tablon
as surfing tool
or raft nga pinutol nga
bani ang gitusok og bamboos

until one odd thing happened
nawala si Jose

nanguli na lang ta
hangtod karon
wala pa gayod hikit-i si Jose
and the rumor
must be true
nga ang crocodile ni Baut
maoy nakatukob
niini

weird
nanglimbawot na pod
ang akong
mga balahibo

unsa kaha no kon ako
to?
dimalas nimo
wala'y makasulat ani dinhi
bahin ato

bilingual poem for Bro. Trappist

kaganiha
ngitngit pa
giatubang nako
ang monitor
ning notebook
kong gamatoy

sulat, sulat,
siging sulat
wa na gani
hunahunaa kon
unsa ang
gisulat og
nasulat

galutok ning
akong
study lamp
gasimag ang
flourescent tube
sa ceiling


later
nadungog nako
ang tingog
sa miabre nga
pultahan
sa kusina

nag-prepare
na og breakfast
ang maid
tulog pa si
misis
morag dili mo church
karon
gikapoy
sa (kabalo na ka
anang buluhaton
sa mga minyo,
momata aron
matulog

ako
here na naman
sa usual
nga redundant
aning
naandan

facebook as
early as 4 am
greet ko hello
sa friends nga
sama nako
mga early birds
pod

actually wala na
kaayo'y meaning
ning mga hello
nga nagpungpong
morag
lanzones
nagbahan morag
tsunami sa
fugushima

pero hello lang gihapon
wa may mawala

ang pikas mao
sab
nag-alipasa ang
kalag
hello pong dako
makalingaw
samtang
og imong hunahunaon
busy pod
in other matters of
equal importance

naandan na lang
ni
motultol og mata
ang kalag
sa alas tres sa
kaadlawon
dayon og hunahuna
kon unsay angay
buhaton

(nahuman na ang hapwag
nagawsan na
unsa pa ba ang sunod?

kon anaa ang kahoy
nga namunga
og daghang meanings
sa kinabuhi
kon tinood kini
gusto nakong katkaton
kini
dalhan og basket
og hutdon og kuha
ang mga bunga

morag less na kaayo
ang meaning sa
life nga ambot og nganong
nagdiminish ang
passion for
everything

sahay morag galakaw ka
sa bukid nga
walay klarong dalan

ikaw lang ang nagmugna
sa dalan og abi nila og duna
kay saktong padulngan

wala
ampaw
gahapdos ning tiyan
nga walay sulod
bisag unsaon
pag kaon
aron unta mabusog
hait ang hangin
makasamad
ning pagkahawhaw
sa mga
pagbati

emote
sa una drama lang

you search for silence
wala na pod kini
bisan gani sa kwarto
anaa ang
aircon nga walay undang
og bagotbot


perhaps i need a long
vacation
dili na sa Ho Chi Minh
mahurot atong mga
dongs didto
bisag feeling nato
milyonaryo na with just
a hundred dollars
in our pocket

ah, perhaps
Guimaras via Iloilo
that land of the tikals

spend ko
four days didto
makalingaw
sab tong mga
medyo bayoton nga
mga monks
gasinaw ang upaw sa
usa
unya ang kadtong
ga-cassock og brown
nga morag maya
nga kiat
ambot
basin magabaan ko
pero
honestly
not only looking
tala-tala
objectively
talatala jud

when we were there
during the mango festival
gitagaan baya ko
niya og
basterful of mangoes
nga well arranged
sama sa iyang
poise despite the
pressure

misakay ko sa boat
going back to Jordan
feel nako
ang gentleness of the
water

when was that?
di na ko kahinumdom

4/27/2011

nabuak na ang
tipaka sa itlog
buntag na
gutom na usab
nagpaabot ang
batil
sa usa ka
pagpangga

usa na lang
ang akong itlog
apan
imo gihapon kini

mahimo mo ganing
higopon
sama sa paghigop mo
kanako
niadtong init nga
kagabhion

banag banag

hanap pa kaayo
apan segurado tang
moabot ra gayod
ang gikahinamang
kagabhion

buntag na
haskang layoa pa gayod
kining pagpaabot
sa laing botbot

Didto, Sila lang, Ang mga buyog

naglunang
silang tanan
sa katam-is
sa ilang
kaugalingong

duga

4/25/2011

pagkabanhaw sa usa ka dili pa gihapon motoo nga ang buwak nga tapul diay motubo usab sa dakong disyerto...

wa ko nakaiyak
sa iyang sugilanon
kadtong didto siya sa
Baguio sud sa
katorse ka adlaw
og sa hamubong higayon
sa dihang giayag niya
ang kainit og ang kabugnaw
nga nagsalapid
morag iyang mga pulong
nga sa iyang mga ngabil
nasakpan nga
namakak
tungod og alang sa kalamian
sa gugmang iyang
nakaplagan didto
nga nagkita sila og nagpahuwas
sa tanang wala kagawas
ayaw isipa nga
pulos pus-on lang kini
sayog ka
miapil sa mingaw nga sayaw
ang kasingkasing
samtang nagtalikdanay
ang duha
aron mahipos ang kainit
gamay lang kaayo
apan nakapabuhi kaninyo
duha ka kamingaw nga
naghangop

wala ko moiyak sa inyong
sugilanon
naandan na kini sa akong dunggan
gani wala na kaayo kini
mamati og wala na kaayo
mag-ambat sa nakita
nga mga gapnod
og sa mga tunob

kapoy na
kining manunulat usahay magbutang
sa usa ka kataposan
nga ingnon tang tinood
kay lagi
wa man matuman

sama sa usa ka mangga nga aslom
nagtubod ang akong laway
unsaon ko kaha pag-antos nga dili
motoo
sa dihang gihidhiran na kini
sa ginamos nga
mayos?


mangagho ko
kausa, kaduha, molingolingo ko
dili kini tinood
sa kataposan didto sa hardin sa ibabaw
sa bungtod
tupad sa mga gapnod
nga gialirongan sa mga giyamogan
pa nga mga buwak
gigakos mo siya
hugot kaayo
gihawiran mo ang iyang nawong
og dayog
sirado sa iyang ngabil ngadto
sa imong ngabil

pagkamahimayaon sa kalinaw
ning unang pagbakod sa gugmang
kanhiay rang
patay....
lami pa man unta
ibalik
kadtong tapot kaayo natong
halok

apan pagkahuman niadto
mobalik man sab tas
unahan

kadtong natikalbong tang duha
og nalapok sa
tunaan

maong mihukom na lang ko
nga ato na
lang tong kalimtan

mas gamay baya
ang kalipay kay sa pagbasol

pagkahuman
nga di jud
kabayran
kanang "and they live happily ever after"
duda ko ana
nga dili tinood,
"more pa!" gikuros ni Susing ang iyang
duha ka tudlo

mihatag og apasumpay
"ipakita kanako ang tawong malipayon
kay akong
ipasundayag kanimo ang gahubo
nga buang
didto sa atubangan sa bulangan"

suko sa Roma?

paghuman og anunsyo ni
fr. gorordo nga ang tanang iamot
karong ikaduhang sibot
maoy ihatag ngadto sa Roma
wa baya gyod miabre sa iyang bag
si Rhodora
aron paghatag na lang bisan og
kwarenta

4/23/2011

kabahin sa paghatag

balikon ko ang pag-ingon
nga ang punoan sa mangga nga gahitik
sa bunga
dili na mangutana kon kinsay angayan
sa nga mamupo og mokaon
sa iyang gihambin
alang kini sa tanan
apil na gani ang walay mga buot nga
bata nga naa rag plantig sa iyang
mga sanga

hinuktokan ko

nakalabang ba kaha
sa suba ang akong
gipasabot
sa nagbaha nga
kamatuoran?

lisod palungon
ang nagbagang
kasingkasing
nga gustong molanay
sa tig-a nga prinsipyo

4/22/2011

hangyo sa kasakit

ayaw ako biyai
ikaw ang sa matag adlaw
nagtudlo kanako
kon unsa ka
bililhon diay
ang kinabuhi og
kalipay

ang hagit sa buyog sa hulmigas

ngadto sa
Kamatayon
nanghagit ang
buluyagon nga
buyog:

mora rag pinaakan
og hulmigas

kadto untang
paak sa bitin?

si Kuting

kay wa taronga og
pakaon sa iyang paboritong
karne norte
mikawat og gawas sa
labat
nakigkuyog sa puti nga
silingan
miadto sa merkado
mitangag og dakong
bagtok nga morag tulo
ka adlaw ng patay
og busa ania
nanimaho sang patay
ang among
balay

maayong manimalos ning
iroa ni.

4/20/2011

dili na daginoton pa ang
ginagmayng kalipay nga
puli sa dagkong sala nga
mao unya'y makapahulog
makapadugmok sa
imong kalibotan

sa kanunay pilion ang
layo sa perdisyon apan duol
sa kaluwasan sa matag
adlaw nga kahidlaw

ingon ana ang kinabuhi
ilabay ang dagkong bato
itipig ang gagmay kanang
igo lang masulod sa bulsa
og dili makagisi sa pantalon
tungod sa kabug-at

dili na dugangan pa sa
kabug-at sa mga uwat
sa kasingkasing
sa mga buling sa agtang
sa piang sa bukton

wala na kanako ang katingala
gibuhat ko lang ang angay
kanang di ra pod ko manimahong
patay...

bakasyon sa bukid sa Tabon

sa Tabon
habog ang bukid nga
gitabonan sa mga
kahoy og sagbot
sa kagwangan

gisubay nako ang
iyang halas nga
dalan
og miabot ako
sa iyang pusod
ug natulog ako
tungod sa kakapoy
ning akong baktas
sa iyang
kasingkasing

sa kaadlawon
humod ang mga dahon
sa mga yamog
og ang mga gabon
naglibod sa mga payag
og sa mga bungtod

madungog ang
tubig nga walay undang
sa pag-agas
gikan sa tunggo

adunay mga tamsi
nga naghimo sa ilang
mga salag
sa punoan sa
dum-on

sa silong sa dakong
kahoy sa bawno
naniid ang ihalas
nga baboy

nahigmata ang kamanghorang
bata ni ronie
mitindog sa kilid sa pultahan
dayog pasirit
sa iyang ihi

nag-aso na ang kusina
nakalung-ag na si iyay
og tapol nga bugas
og si ronie miabot
nagbitbit sa iyang
nalit-ag nga
manatad

akong giabrihan ang akong
dala
ang paborito nilang
sardinas nga 555.

bahad sa babayeng balak

ayaw ko biyai dinhi
ayaw ko pasagdi
misalig ako kanimo
gibiyaan ko ang tanan
tungod og alang kanimo
kon imo kining buhaton
ikaw gyod akong patyon!

bomba

hunahunaa ayaw ang
kahugaw sa bomba
dili kana maoy akong
gibuhat
wa ko mitan-aw og bomba
wa sab ko mabuthi og
bomba

init ang panahon
nangliki ang yuta
abog ang kadalanan
laya ang mga dahon
nag-aso ang mga bato
nagsimag ang mga balas
sa baybayon

adto ko sa poso
magbomba ko
maligo..

walay tubig kay
walay kuryente
blackout sa amo.

alas dose sa kaudtohon

mihanap akong panan-aw
misurender ang mata
pagpanamin nako sa tin-aw
nga baso
tigulang ang akong nakita
kunot ang agtang
puti ang buhok
giuban pati ang bungot
mibawog ang suwang
nga morag gitay-an
nga sanggot

wa ko magbasol kong
nalimtan nako ang paniudto
haskang busaga baya
sab nako
sa gisukad og giusap nakong
mga balak....

4/18/2011

sa akong paminsar
walay kalooy si Dodong sa pagpataas sa
edad sa iyang Nanay
nga naputlan na
una sa kumagko
dayon sa tuhod
hangtod na
sa baligkawang
hangtod nga dili na kini
kasulti
o katug-an kon asa
dapit ang sakit
ang ngutngot
ang pait

sa akong kabahin
didto sa akong gamay nga balay sa ibabaw sa bungtod
akong gipalupad ang mga puting salampati
og wala nako sila ingna
nga mobalik

pagkaanindot sa hangin
nga lumalabay lamang

si luis

kay wala na'y ikatubag
gikitkit ni Luis
ang iyang
lapis

kalabasa na pod
moay sura ni Conrod.
sa kilid sa galingan
nagkanaas ang tingog sa
galing
gibulhot ang
mga tahop

sa unahan
duol lang sa akong
gitindogan
sa silong sa punoan
sa nangka
adunay duha ka bata
nga nagbitbit og
tirador
gipunting ang bala
sa usa ka maya
nga mubo ra
kaayo og lupad

naigo ang maong
langgam og
nangatawa ang mga
bata
gibiyaan ang langgam
nga dili makaon
gipraktisan lang
sa usa ka bata
nga karon gitawag
na og hanter

pagkaoran-oran
miabot ang inahan
nagsubay
kon unsay nahitabo
sa anak
nga bag-o pa lamang
mikanaog sa
salag

diha sa usa ka mubo nga
lupad

4/16/2011

kaadlawon

mimata sa alas tres
sa kaadlawon

hagong
ang nawala nga buyog
tul-id ang
agianan paingon sa
iyang kasingkasing
nangugat ang
liog sa mga pulong

miabot ang gubat sa
kalinaw
nagpasad ang mga singot
sa hwerto

daghang misiplit
nga pagbati
miagas ang
gugma og kalooy

nangaloyloy
ang mga mata
og dayog balik og
katulog
pagkahuman lamang
og labay
sa trenta minutos
nga pasundayag
ning duha ka
sirkador

buntag na
apan

mikawat gihapon ang mata
sa nahibilin pang
duka
nga mipilit diha
sa alugnan
og habol

simfonia sa kagabhion

alas sais
mibagting ang kampana
dayon ang kahilom

alas siyete
miabot ang tingatinting sa
mga kutsara og tinidor
nga nasapawan sa
nahulog nga taklob
sa kaldero
sa salog nga tugas
didto sa
kusina

alas otso
nagayamyam ang
baba sa tigulang
sa iyang rosaryohan
og sa
oracion sa ikasiyam
ka adlaw

alas nwebe
nindot pamation ang
paglatag sa banig
og pagpahaluna
sa mga alugnan
og habol
dayon ang pagtayhop
sa suga

nahulog ang kurtina
sa kangitngit

pagkaoran-oran
madungog ang agik-ik
sa katre
ang agulo sa duha ka lawas
nga haskang
basaa sa ilang
kaugalingong
nga singot

nahunong sa makadyot
ang hagok
sa byuda nga tigulang
morag dunay
gihunahuna nga unsa
apan
gipasagdan na lamang kini

sa gawas ang uwang sa
iro
gibaslan sa uwang usab
sa iro
sa ilang silingan

gibanosan kini sa
tingog sa tuko nga miundang
dapit sa
kanapulo

Simponiya Sa Kaadlawon

Sa pagmata, nadungog
Ang tugtogaok sa manok
Awit sa kalanggaman
Kasikas diha sa kahilom
Daw simponiya sa kaadlawon.


Akoy
2011.4.15

4/15/2011

sa panahon sa dugay
nga hulaw
ang langgam nga idlas
nga samdan og
dughan
mibalik sa hawla
nga giablihan aron
pag-inom
balik sa tubig nga
iyang gibiyaan

sayod ka nga dili
siya malipayon dinhi
apan
sa iyang pagbalik
wala mo na usab
kini bugawa

gikalipay mo ang
pagkatagbaw sa iyang
kauhaw
dili na ang iyang
pagbalik
ang mga dalan
usab
walay kapaingnan
ang mga ngalan
sa lugar
usa ka pagpakaaron-ingnon
nga kini
mao ang padulngan
apan pag-abot mo didto
wala ang utlanan

kagabii
wala siya duawa sa katulogon
misakay siya
sa mga pako sa kamingaw
og gihatod sa
mga dalan nga walay
utlanan

4/14/2011

kay unsa ba kunong puntoha na
siya magpasalamat sa Ginoo
kining kinabuhi niya nga napuno
sa dimalas

namatayog sayo ang iyang bana
mga bugo ang tanan niyang mga anak
adik-adik ang kamagwangang lalaki
polio ang kamanghorang babaye
ang tungatunga haskang
malditaha nga kusog kaayong
mosukol kaniya

haskang purdoya sa ilang panimuyo
lisod gani makapalit og bugas
pati bulad nihit

og unya miingon si Tulyang

"Manang Bising ang imong kinabuhi iuli mo na karong
alas tres sa hapon
kay dili kana imoha"

nagpanglingo siya, nakaamgo seguro sa butang nga anaa kaniya
apan wala kaayo niya mahatagi og importansya
nakaiyak siya og
miluhod, mihangad og mipiyong sa iyang mga mata
nga gisilawan sa tumang kahayag

og sa kataposan
ang iyang kasingkasing miawit

sa usa ka dakong pasalamat
alang sa Ginoo....
pagkahuman sa kahago
ning lapoy nga kasinkasing
ning lawas nga namugnaw
modalikyat ako sa
akong payag sa tiilan sa bungtod
atua ang duyan nga uway
og alugnan nga layang dahon
sa saging tundan

gitimbaya ako sa katulogon
ning awit sa hinanok
sa ubos sa bulan og sa mga bitoon
ania na ang hapuhap sa
mga bugnaw nga dahon og
hangin
kinsa man go'y wa kadungog sa
awit sa dahon nga
nahulog?

gani ang ubang awit niya
kon nakalimot ka
gikan baya kanato

kadtong nahubog ta og
wa na gayod kauli sa atong pinuy-anan

ang kadaplinan sa suba
natandog mikurog

apan kinsa pa ba kaha ang motoo kanato
kon kita man ugaling nagsubo?

kita nga nasayod kon unsaon pagbitbit ang
mga itlog nga buak

kita na kamaong mohipos sa mga bildo og
mga lansang
daghang tanghaga
tungod kay dili ka pa
andam sa mga butang
nga

lood, baho,
makasuka
makapasuko sa
mata
makapandol
gani ang uban nga
mabaw lamang
pagkasayang
atua nagbitay
sa kahoy
naghikot
naghilo
miambak sa pangpang
og sa kahangtoran
wala na nila
masulti ang dili
gustong madungog
sa kalibotan

miingon ang mga tigulang
nga tag-as kaayog mga saya
og taas usab og mga
kilay
"kulang kamo sa pag-ampo
og busa kamo
nagabaan!"

dili baya lalim kon ikaw
ang nasudlan sa
maong mga
demonyo

nagpataka na lamang
og dagan-dagan
bisag asa
morag mga kabayo nga
gisudlan og
ligwan ang
mga dalunggan

nangluhod ang uban
dili atubangan sa mga santos
kay dili na
nila maantos ang
syagit sa mga baba
sa kamingaw

wala na gibale
ang kaulaw
mitindog kini og
miangkon
"kami ang dili pareho
kaninyo
apan dili kami mangayo
og pasaylo
kay wala kami
magdaot!"

miabot ang diliryo
apan sama sa tanan
milabay lang kini
og nagpabilin ang
mga kanunay
og ania

adunay mga gagmayng
kalibotan nga nagtuyoktuyok
apan dili kini sila
mangahulog

nakat-onan ra ang
angayan
nagpakabuhi
sa kahilom
sama sa mga
lumot
nga miputos sa
usa ka bato
sa daplin
sa sapa...
walay pulos kining gipanulat dinhi
nahisama kini sa bata nga naglibog
motikang, mohunong, mobalik og
mosungsong
(hangtod nga naligsan na hinoon
og namatay)

walay kay balita nga mahagdaw
dinhi
wala kay mapupo nga mga hinog
nga bayabas

daghan ang dili nimo masabtan
(tungod kay gituyo kini og
gitipigan
ang imong mga madungog
mao lamang ang mga hungihong
hinungaw lamang
sa pagbilar sa usa ka gubot kaayo
nga kagabhion)

walay pulos kining tanan dinhi
apan kon imo gayong sulayan
og tuhog
mahikapan mo ang
wala sugod
daghang naglaum nga
napakyas
ang wala dinhi
maoy imong makaplagan puhon
nga ambot
apan sa akong nasayran
nakapausob sa ilang
ginagmayng
kalibotan
adunay tungatunga diin
mopatag ang mga panaglalis
ibalanse kini
aron walay matuwad
walay mahuwad og
mausik lamang

dawaton ang kayahon
apan ang sobra itugpo
mo sa dagat

ania ka man god dinhi og
busa sundon mo ang ilang
mga balaod

lahi ang balaod sa imong
kasingkasing
usahay simang kini
walaon ka

usahay giingnan tika
ipiyong mo una ang imong
mga mata
og tan-awa ang wala
nagpakita diha sa
pagbati

pagkatul-id sa mga katarungan
dili kini mabawog sa pag-usob-usob
saligi kini
itak-om una ang baba
ayaw ikagot ang ngipon

kon hapsay na ang dagat
sugdan mo na ang pagtaghoy
sa usa ka awit
nga sukad-sukad wala pa
madungog sa imong
kasingkasing
tungod kay dili man
kining mga butanga
ikapanulti

gitago lamang kini
sama sa mga hait
nga punyal diha
sud sa lawak sa
kasingkasing

wala'y samdan
wala'y moiyak
iharong ko
kini kanimo
bisag unsaon
dili ko makita
ang rason
ngano nga
hangtod karon
mopitik
pa man gihapon

bisag unsaon og
og lantaw
dili tiaw nga
ako
usa gayod ka
buang
sa imong
atubangan

busa
wala ako'y
gibungat nga
pulong

dili og dili
gayod ako
moluhod
kanimo
adunay utlanan
nga akong gikulit sa
kahoy

gituman ko kini
wala ako
milakang o
miambak

akong naaninag
ang kainit sa akong palad
og sa unahan
nagdilaab ang daob
atua ang kalayo

anunugba ako
kon mopadayon

sunugon mo ba
ang akong
mga pako?
daghan na ako og
nakalimtan

og busa kagabii
nakigtagay ako
sa bulan
ang buktot
nga ilang gikataw-an
tul-id
og kinabuhi

una, wa kini mangawat
sa bahandi og
kalipay sa uban

ikaduha, wala kini
nanulis og kalooy.

balikan ko ang hunahuna

anaa lang sa pagpili
ang tanan
lantawa pag-ayo
ayaw padala lamang
sa hunghong sa
kasingkasing

kapila ka na ba niya
gibanhog sa
kasakit?

bisan og wala kaayo'y
gihatag nga
kalipay ang hunahuna
ayaw kini
ilabay
kay mao kini ang naghimo
sa imong
tul-id nga dalan

4/11/2011

pati gani ang
lamesa
nabawog sa
dihang
nadungog niya
ang imong
tingog

pagkapait
sa imong gugma
pagkaasgad
gayod sa gabaha
nga luha
pagkaaslom
sa imong
kapalaran
morag giabis
nga hilaw nga
mangga
nga ginusnus
sa gisilihan
nga suka

sa usa ka pakighilawas

sa gababag mong paa
naunlod ang
iyang sampot

gipriso ka niya
sa kalami
nagpapriso ka
wala maghandom
og pyansa

walay gamit karon
ang mga sapot
sa pagbuswak sa
mga pagbati

sa dihang gipiyong
ang
mga mata
dihadiha nakit-an mo
ang langit

ang nagpahiyom nga
nawong ni
Bathala
puti na ang suwab
sa hunasan
dihang misibog ang kangitngit

nakipagsandurot
na usab ang mga bato
nga nag-asoy sa ilang damgo

ma-aghop ang huyuhoy
nga misapu-po
sa imong pahiyom

sa dayag mong mga bukton
natunaw ang tinipigan
kong mga pulong

Rai Rai Ken, Harrison.

sa Rai Rai Ken
nagpista kita sa sushi, sashimi,
uni, og atami
maayo kitang mokiwilkiwil
sa tsapstik
og dayon og inom
sa init kaayo nga
tsa

ang samin lang sa
maong kan-anan ang
nagbulag kanato sa pikas
nga bahin
ning atong hupong nga
kalibotan nga og ikaw pa
imo man
sab gayod nga
gikugihan

atong nasiplatan ang
bata nga bulingon
natulog sa banig nga karton
diha sa daplin sa
sementadong karsada sa
kilid sa century park

akong gitan-aw pag-usab
ang akong relong Seiko Kinetic
(nga tag-kinse mil ra
ingon nimo)

alas dies kinse na kadto sa buntag
init na kaayo ang adlaw
daghan na ang mga sakyanan
traffic na
og kon imong pamation
didto sa gawas
kay lagi di man nato madungog
diri sa sulod

pagkaalingog-ngog na gayod
sa syudad
kining sementadong lasang
matud mo

diha sa batoganan

ang manok nga walay
panimalay kamaong motultol sa
iyang naandan nga
batuganan
nga kon imong ulanon
og mabasa
monaog kani sa sanga
nga walay tingog
mobalhin sa pikas
og magpaabot
nga og kon mahuman kana
nianang imong
pagpasirit
og dayon nimog pahawa
ang manok nga walay panimalay
mobalik na usab sa iyang
batoganan
aron hutdon una
ang kabugnaw
sa kaadlawon

pilosopiya

anaa na kini og nasugdan na
nagpadayon sama sa usa ka adlaw
mopiyong sama sa mata
og maghatag sa usa ka pahulay sa
kagabhion
apan pukawon kini sa kaadlawon
aron sugdan na usab
ang mga wala mahuman
magsugod na ang panaw
tuyok-tuyok lang
adunay maabtan apan wala ang
pagbalhin
ni ang pagsibog
kon unsa ang gisugdan mao
usab ang taposon
apan kon sutaon wala diha
ang kataposan
anaa lamang ang kanunay nga
pagsugod
nakapangutana ang gikapoy nga
nagbasa
asa ba ang kataposang
pulong?

anaa kana sa imong
pangutana

nihit

ang unang pulong
nga misud sa akong dughan mao
kini, dili nihit,
mao kini ang una,
dili kini,
mao, mao ang una, kon nagbinantayon ka lang unta
nasabtan mo unta kon unsa ang
mao, og ang dili mao,
mao gayod unta ang angayan,
ang mao,
mao kini, mao ang unang pulong nga mikuyanap sa
akong kasingkasing
gusto sab nako
ang mao, dili ang nihit nga mao ang nagtakuban
nga una
isip usa ka uluhan
ning gapasagad nga balak.

4/10/2011

ang kamot
kamaong mohawid og sama sa kasingkasing
kamao sab mga motipig
sa bililhon

sama sa paghandom sa tinood mong
gihigugma nga bisan og kaniadto pa kadto
bisan og napapas na gani ang tunob
magpabilin kining gihambin
bisan gani og wala na ang mga kamot
mahimong salag ang
dughan
diha sa mainiton lang gihapon
nga gihigdaan
nga kasingkasing

ang pahiyom dili molungtad apan
mahimo kini nimong balikbalikon og hulma sa imong ngabil
hangtod nga ikaw na mismo ang usa
ka pahiyom

ingon ka
adunay panahon nga moabot ang kahinog
og dayon ang
pagkahulog sa yuta
og pagkalata

nakapanamin ko
og nakaingon nga kining akong kagabhion
mahimong magbalikbalik sama sa usa ka pahiyom
hangtod nga ako
mahimong usa ka kagabhion sa akong kaugalingon
nga ako usab mahinog
mahulog, malata

og balikan na karon nako ang molungtad
kadtong bisag wala na ako
apan nagpabilin

wala na'y makahinumdom pa kanako apan
ang awit sa suba
ang taghoy sa hangin
anaa milungtad sa tanang
pagkahinog
pagkahulog sa mga kagabhion
sa ilang
panahon
sama sa ihalas nga
gangsa gusto usab mulupad
ang isda sa lim-aw

gustong kab-uton sa kahoy
ang langit apan gihuptan
ang iyang ti-il sa yuta

dili sagabal ang bakak
sa damgo way kamatayon
nga dangatan

kabahin kanato didto sa lawak sa mga balak

gisud ko ang lawak
nga dili na kaayo hayag

igo-igo lang ang
kangitngit dinhi

bugnaw sa mata
dili hapdos ang kasingkasing

gibasa mo ang imong
balak og ako
sab miduko aron sa
tarong nga
pagpamati

sa usa ka pagkahinuklog
diha sa lalom nga
pagsalom
nahulma ang pipila ka
lugas sa luha
gisubay ang agianan
sa kunot nga
aping

gibutang ko ang akong
mga kamot sa
akong dughan
gihapnig nako ang
mga hunghong diha sa
akong kasingkasing

giangkon nako ang dakong
sala
sa wala pagsabot sa imong
mga pulong

sakto ka
ang kalapati nga
gisud sa usa ka hawla
nagpabilin lamang
diha sa
usa ka bagotbot

ang tamsi nga layaw
pagkaanindot
sa iyang awit
pagkaabtik sa iyang
mga pako
pagkahamis sa iyang
mga balahibo

kabahin sa atong pagsalop unya

palihog
ayaw lumsi
ang
mga kapakyasan
diha sud
sa baso nga
puno sa
bino

hinonoa
kuhaa ang
duha ka tasa
tunawa ang
kape
diha sa init
pa kaayo
nga tubig

butangi
og usa ka
kutsarita nga
asukar

manglingkod
ta atubangan
sa misalop
nga adlaw
og atong higopon
ang mga ginagmay
tang
kalamposan

pagkaanindot
sa mga bulok
sa atong pagsalop
pagkabugnaw
sa hangin
nga midap-ig
sa atong
dughan

palihog ayaw tubaga ang pangutana...

diha sa paraiso sa dili pagdawat
anaa ang tanan
sa usa lamang ka panaghap


ang mga alibangbang
mga bulawan
ang mga dahon sa punoan sa
kahoy nga tingga
pilak

mangabot ang mga kutsilyo
nasagang mo
sama sa usa ka sinesine lamang

sakyan mo ang barato nga pak-an
sa langit
nanambid ka sa paa sa bulan
og gilantaw mo ang
pasundayag sa kalibotan

milutaw ka sa hangin
lupig ang mga panganod
misalom ka sa lawod
sama sa usa ka bitoon nga
nahulog

daghan kag mga pangagpas
adunay daotan nga mahitabo
apan imo lang kini
giuyugan sa imong abaga
gipapha mo ang mga abog
sa imong sapatos

dinhi sa paraiso sa mga bakak
aron mabuhi ang imong lawas
gibuntog mo ang kamatooran
apan, hangtod kanus-a ba?

sa Iba, Zambales

nagprusisyon ang mga santos
kuyog sa dakong sulog sa suba sa hunahuna
korona ang kahayag
gisanina ang kilomkilom

ang kataposan nga mipasundayag
mao ang babayeng puti og sanina
sama sa kaudtuhon og itom kaayo
ang buhok
sama sa kagabhion

ikaw og ako lamang ang nakakita
sa daghang mitulo nga mga luha
ang uban nagnganga
nagtulo ang laway
diha sa usa ka lalom nga katulugon

4/04/2011

diha sa usa ka lam-aw


adunay katuyuan
ang kahilom sa lam-aw
ang mga dahon sa sagbot
nga morag kamot nga miampo
sa langit
ang mga naglutaw nga dahon
sa water lily
ang samin sa tubig nga
gipanaminan sa mga panganod
nga minghapit og dayon
mipahawa
anaa ang alindahaw
mitugpa og mipahulay
sa iyang mga pako sa kakapoy
anaa ang buwak
nga amarillo nga mibuswak
mihatag og kalipay
sa usa ka subo og kum-ot
nga kalibotan
ang mga gagmayng anak
sa mga baki
anaa mikiwil ang
mga ikog
misulay sa usa ka
sayaw
suma sa pagtudlo sa
kinaiyahan

4/03/2011

kabahin ni tatay gorio og ni nonoy


gikalipay ni tatay gorio ang
kusog nga ulan kay ang iyang anak
nga si nonoy nga
angkas sa iyang kabayo paingon
sa bukid sa Bulawan
dili makatulog sa kabugnaw
og mapugos kini paglantaw sa
ilang giagian nga mga pangpang
og kagwangan

ang maayong panahon sama sa usa ka
adlaw nga anaa
nagpahuraray sa mga dughan

sa kabungtoran
matod pa ni tatay gorio
dili kamaong mohatag sa mga bulawanong
timailhan paingon sa usa ka
masanagon nga kagabhion

kagahapon man god
sa ikanapulo kaadlaw

nilag sakay sa kabayo
nianang halayo pa kaayo nga panaw
nahikatulog si nonoy og ang iyang hawid
sa hawak ni tatay gorio naluag
og hapit kini siyang nahulog sa bukobuko
sa itom nga kabayo
ubos sa hait kaayo nga kimpa sa
pangpang

gusto ni tatay gorio nga si nonoy
lig-on

mabinantayon
dili hingatulgon
abtik
dili huyang sa hagit sa kinabuhi nga
usahay
maayong molatos og mokastigo
sa mga mapasagaron

gipaabot ka niya...


hinay, humok, mainiton nga
pag-abot
kining usa ka pagbati

sama sa iring nga puti
nga misulod sa usa ka lawak
agi sa bintana
wala kini mohigda sa
katre
nanambo kini sa bintana
milantaw sa dalan sa milabay
nga katawhan
sa kahaponon og
gitilatilapan
ang iyang mga kamot og tiil
ang iyang lawas og
wala kay madungog
nga tingog o kasikas
man lang sa iyang
pagsibog

sa iyang pagpaabot
kanimo

estrellita

nahisama ikaw
sa usa ka punoan sa
mangga
nga gahitik ang
bunga

labong ang imong
mga dahon
og lig-on ang
imong mga sanga

ang akong gikalibgan
nganong
walay mipasilong
kanimo
bisan sa kainit
sa panahon

nganong walay bisag
usa ka laagan
nga natintal og katkat
sa imong mga sanga
og pupo
sa hinog na kaayo
nimong mga mangga

pagkasayang ba
nangahulog lang ang
tanan
og diha sa yuta
nagpasad
og nangalata

kinaiyahan

sabton mo
ang mga dili kapugngan
dili sa ingon
nga mangambot ka
og moingon
nga wala kay labot
kabahin niadto
nga mora bag wala
diha ang pagpili
og pakiglambigit
ikaw kadto
oo ikaw, ikaw,
ayaw og uyuga ang
imong abaga
dawata nga
mao kini ang imong
unod og bukog
sa usa ka ngil-ad
nga sayaw sa kinabuhi
nga bisan og
unsaon mog pamakak
nakahatag
sa usa ka pintik nga
kalipay
bunali ayaw ang
imong dughan
sakit na kining
daan
dungagan mo pa
ba?
diha sa mga aso
sa tumoy sa imong sigarilyo
gihulma ta ang atong
mga damgo

mibalak ko sa pipila
ka tuig nga milabay

mora akong tamsi nga
miawit diha sa gamayng sanga sa bayabas

napalong ang sigarilyo
napaslot ang imong tudlo

pagkakusog sa ulan
mibaha ang dalan

wala ka mipasilong
wala ka na midagan

ang mga aso sa sigarilyo
wala mabasa sa ulan

gipalid sa hangin
paingon sa langit

ako nga nakakita niini
mihangad

gisunod ang panaw sa
mga aso sa atong kagahapon

ang gugma ko kanimo

ang kahaponon
nagdilaab

apan kini
napalong dili sama

sa gibati ko diha
kanimo

hangtod pa kini
sa kaadlawon

magdilaab lang
gayod gihapon

mga pinutlan

adunay mga pagputol
nga walay duyog ang kasakit

gihimo mo kini sa imong mga
kuko, sa imong buhok

mahimo mo usab kini kanato
nga sama sa mga kuko og mga buhok

nawad-an na og mga
pagbati

mga patay nga kanhiay buhi

4/02/2011

Hapit Sa Kahilom



Hapit sa kahilom.
Lantawon, tan-awon.
Binlan og pahiyom.

Akoy
2011.4.1

ang gahi nga bato og ang pondol nga sundang...

ikaw ang usa ka
bato og ako
ang pondol nga
sundang

mahimo kang
bairan alang
kanako

og
samtang gibaid
ako sa
imong kagahian

lantawon nato
ang kidlap
sa atong kainit
diha sa
tungatunga tang
mga
pagbati

di ba mora man lang
usab og mga
bitoon?
pag-agi ko
sa pipila ka adlaw
miabot ang panahon
nga wa na ako kinahanglana

ta-as ang gibagtas kong
mga pulong ug ang akong
panghina-ot napalid
uban sa pagsibog
sa lapyahan

ang mga anino mibalik
na sa kasadpan
dihang nayag-yag
ang kahayag sa bulan

ang nahibilin
mao na lamang
ang imong ngalan