8/31/2010

sa akong unang hangyo
bisan og dili kini gusto sa imong kasingkasing

miingon ka sa yanong pulong
ok lang

sa kaadlawon sa akong pagtoo nga linaw na ang tanang
unos sa imong dughan

mihangyo na usab ako kabahin sa akong ginadamgo
alang kanato

miingon ka sa pinugos nga
ok na lang

sa pagkabuntag sa pag-abot na unta sa katumanan sa akong damgo
alang sa udtong-tutok og sa umaabot nga pagsalop sa akong mga adlaw

wala na ka migawas sa lawak
nagdugo na ang imong kasingkasing og mitulo na ang mga luha nga midagayday sa imong aping

dili na ako makasulod
nanirado na ang pultahan naghuot na ang imong kasingkasing og wala ka na kabungat og pulong

lahi ang kasingkasing sa utok
lahi gayod ang hukom sa hunahuna kaysa pagpahaluna sa mga hangyo diha sa dughan

nakasabot ko
mituktok ko og hinay sa lawak sama sa mga tikang nga inihap aron ka lamang duolon og

pasaligan sa akong gugma nga gibungat ko kaniadto sa una pa kitang nakita
wala ang pulong anaa lamang ang haploy sa mga kamot sa imong buhok

gihawiran ko ang imong kamot og miingon ako nga ok na
gipalakaw ko na sila
ok na
ako ng gipapas ang akong damgo
ok na
kita lang gayong duha ang magkuyog sa atong lubnganan

nianang pagkagabii akong gihangad ang tanan sa langit
gipataas ko ang akong suwang
gipiyong ko ang akong mga mata
diha sa ibabaw sa daghang kunot
sa akong agtang

mitoo ka sa dihang gisultihan ko ikaw
sa kalipay sa usa ka itom nga alibangbang nga
nag-inosarang nanimsim sa mga bulak
didto sa hardin ni Maria

gani gusto pa nimo ang dugang pang mga
kinuti kabahin sa gibati niyang kabusog sa dihang
nakadimdim na kini sa pipila ka nga nektar
nga sa akong pagpalabaw haska gayong tam-isa

ang mga tanghaga nga akong gipamulong
apil na ang mga tabi sa hangin
og mga hunghong
sa mga dahon sa kahoy
imong gibali og labay kanako

nga kuno ang tanan
mga sugilanon lamang
og ang tinood
akong gitabonan

nga kining tanan
kabahin lang gayod usab kanako og sa akong
mga tinagoan
apil na ang akong
mga damgong wala gani tagad
makapanamkon

gibali ko ang akong kalibotan
nagpakahilom na lamang ako
og akong gipangita nga ingon mo ginagmay lamang
og dili man matawag nga kinahanglan
sa atong mga lugway

ang mga gilubong didto sa ganghaan
sa mga
giagian diha sa pagsalop sa atong adlaw
kabalo kong molipay
sa akong kaugalingon
sa tunga-tunga sa galawod
kong kamingaw diha
sa ibabaw sa salog nga
gihanigan

aron dunay gamayng kainit
niining kabugnaw
akong ipatong ang akong tiil
sa ibabaw sa pikas
nakong tiil

aron dunay gamay nga kagilok
diha sa kahapdos
akong pasayawon ang akong
mga kuyamoy
sa ibabaw sa bukog sa akong kiting
subay sa
ugat
sa lain nakong tiil nga
hapit na nga mamatay sa
tumang kakapoy

og dinhi sa saktong oras
makita mo ang akong mga balahibo
nga manuybo
kon madungog na ang akong
pagyubit og
i love you.

ang lion

pipila na ba ka gabii
nga mitutok kanako ang leon
walay tingog kining
nanumbat kanako nganong
wala ako'y nahimo
kabahin sa wala paggawas
sa akong hinimong
prisohan.

kon maabtan kini og bulan
seguro
maawat ko na ang iyang tinutukan
og ako na usab ang
motutok diha
kanimo.

8/30/2010

yamyam

makasulat na seguro ko og laing mga balak sa sunod nga mga adlaw, duna'y
miabot nga klaro apan dili nako mabungat, nga akong gihunahuna apan lisod sabton
nga nia ning akong dughan
limpyo ang nataran, kita ang tanang mga batong gagmay nga nagpasad
sayon ra unta kining mga butanga sabton
apan wala bisag usa kanila dinhi nga nangabot nga makasabot niini
apil ka na
nga nangyam-id, og akong gihunahuna nga dinhi na magsugod ang akong
pagpakahilom
og dinhi na usab magsugod ang pagpanubo sa mga bag-ong balak
nga karon nahisama sa mga salibotbot
diha sa bag-ong gidaro nga kamaisan,
sayod ko
nga mao na kini ang pagkamatay sa akong tanang mga damgo
magsugod na ako sa pagpangita sa kolon nga bulawan
diha sa tiilan sa bangaw

kabalo ko nga wala kana
nagpahungaw lang ako sa gibati nako human nimo gilabay ang baso
nga nabuak didto sa pader nga
sementado.
ang puti nga kabaw
migawas na usab sa akong damgo

nagkinabaw ang duha ka kabaw
og ako ang
hilom kaayo nga nagtan-aw

miabot ang itom nga tawo
nga nagdala og pisi og sundang
iyang gigaid ang usa ka puti nga kabaw
og iyang giihaw

duha na kami nga galantaw
sa patay nga kabaw

gilat-an ang karne sa kabaw
midagan ang laing puti nga kabaw
og gihatagan ako og usa ka plato
nga nilat-an

unsaon ko kaha pagkaon
unsaon ko kaha pagtulon ang akong higala?

kutsara (awat-awat sa tinidor ni simic)

kiwa lang gihapon
kon mogamit ka sa kutsara

sa dihang gihawiran
sa imong kamot
akong tan-aw morag
dakong pala

didto sa paghungit
sa kan-on sa imong baba
wala ko'y nakitang
tumoy
gawas lamang sa imong
kuko
nga walay putol-putol

morag sundang
nga dili gibang.

8/29/2010

unsa ba'y masulat
kon wala na
ang gana? dili ka gani
kaingon kon bisan unsa
kay wala na
bisag usa, mangita ka
sa duha og tulo
wa.

wa jud.
wa. napiit ka anang
wa. nagapos ka anang wa.
kay wa jud lagi
bisag una na lang.
pagkagamhanan
ba aning wa
kay kon wa na jud
wa na jud
wa jud kay madimdim
mawa ka sa wa

dula sa pulong
bugno sa kalaay.

apan sa kanunay
nagpunit ka sa tanang mga
buak
sa tanang nangahulog diha
sa daplin sa imong
giagian
diha sa kilid sa imong
gitindogan
diha sa tunga sa imong gipatungan
namudyot ka og
kalipay, mitilok sa nabilin
pa nga
madawdaw.

gasto sa kusog
usik-usik sa pagbati

ning gauros-uros nga
kahadlok
ning pagkawala diha
sa wa.

sakit ang liog
laylay ang kamot.

ang mga mata gaduka
apan dili baya pod makatulog.

mora bag ang liog
gipatungan sa
bug-at nga dwende.

katol ang dunggan
gilok sa dihang gikulitog

hangtod nga
mitindog ka kay puno
na ang pantog

unsa goy imong katarungan
nganong gisunod man nimo
ang akong
gibiyaan nga dalan?

napriso ka ba usab
nianang wa?

8/26/2010

waling-waling
ang motagbo nga
Consolacion
diha sa nataran
pagkahuman sa kusog
kaayong bagyo
ni Doming
kagabii sa naguba nga
mga kadalanan sa baryo
sa Olingan

8/25/2010

daghan ang miingon
nga ako lang kunong giusikan ang panahon

kay ang bulak nga pula
dili kini magdugay
malaya na kini
sa pipila ka gutlo lamang


ang wala nila masabti mao
nga akong gipaabot
ang pagkalaya

sa bulak nga pula
sa akong dughan

ang usa sa gihay niini
mao ang ilhanan sa akong pagbalhin
sa laing panid
sa akong mga panghayhay

ang ubang gihay niini
akong iuli
sa tinood nga tag-iya niini

dili ikaw.

sa misyon

milabay na ang panahon
nga ako
magpahumod na lamang
sa ulan
sa tunga-tunga sa usa
ka unos

nahuman na kini
ugma magpasilong ako sa
balay
nga bag-o ang atop
og maglingkod ako sa
bangko

lantawon ko ang ulan nga
kusog kaayo
palabyon ko ang hangin
og sirad-an ko ang mga bintana
og pultahan

sa unang ting-init
sugdan ko na ang akong gipaabot
nga pagpanaw

kapila ko na kaha kini
nakita
apan wala ang kasumo
og kini
sama sa usa ka gugmang
guba nga plaka
balik-balikan

sa sulog sa hunahuna
diha sa baha sa handurawan

bahala ka
kon imo akong kasilagan

kapyot

lantawa kon giunsa pagkapyot
sa mga tendrils
diha sa sanga nga patay

kapyot physical
kapyot emotional

flaunting ang mga dahon
wala na maulaw

wala na ang pangutana
kon unsa ang moral

gipalabi na lang ang
kalipay nga balbal

dalilang

anaa pa ang mga tunob
nga gikan didto
og wala pa nahukmo ang
panaw paingon sa pikas


wala na ang pagpili sa pagbalik
og gihunahuna pa usab
ang pagpadayon

nagtuk-ong ang anino
atubangan sa bulan
mitutok og walay lihok-lihok

8/19/2010

sa wala pa ang bata
pagka-close gayod unta nato
kuyog bisan asa
ingon gani sila
kuyog-baboy ka

apan sa nakita mo na
ang imong true love
sa dihang migawas na kining
bataa
wala ka na'y panahon kanamo
kami nga mga walay
anak
kami nga ilang giingnan nga
gipangkagabaan
kami nga gisaway isip
mga kahoy nga walay bunga
nga angay kuno ganing
putlon

nagbuwag ta sa maayong kabubut-on
lahi ka na
ikaw na ang isla nga napuno sa kahoy
nga bag kaayog mga bunga
ikaw na ang sapa nga daghang isda
ikaw na ang langit nga daghag mga bitoon

og kami ang inyong tawgon nga
nagmamingawon

apan sayop ka
kami nagpabiling matinud-anon
sa sugo sa among palad
nagpabiling malinawon
sa among kabilinggan
sa gugman nagmalungtaron
sa kahoy nga bisag walay bunga
apan lig-on
sa sapa nga bisag walay isda
apan bugnaw og tin-aw

ang among mga tubig
nga mainom
sa Dios nga kanunay nga maloloy-on

oo, ikaw ang isla nga dungguanan
sa panahon
kami usab isla nga iyang
pagalalinan.

ang tanan naay swerte
ang dimalas hunahuna lang kana.
nagkulang ang among mga galamhan
sa mga pulong
nagaid kami og dugay diha sa kahilom
apan adunay usa ka kagabhion
nga kami mapukaw
magyawyaw
magsalimuang sa mga pulong nga wala
dili usab gani namo masabtan
mahubad ang among mga gapos
makaikyas ang among mga hunahuna
molupad kini
og mapalutawlutaw sa mga itom nga panganod
ning bug-at nga mga kagul-anan
nga hinimo sa palad
moulan kami kuyog sa ulang
mokuyanap kami kuyog sa baha
og moyukbo kami sa imong tiilan
mohalok sa imong mga tudlo
apan pagkahuman
mokuyog kami sa sulog
paingon sa dakong suba
hangtod na sa pito ka lawod nga dagat
hangtod nga dili mo na kami makita
og dili ka na usab namo
sa bisan kanus-a pa
mahinumduman og dinhi
magsugod na ang paghudyaka namo
sa tinood nga kalipay
sa paglantaw sa naglangoylangoy
nga mga bebe
sa ibabaw sa sapa
nga samin sa mga panganod

miapil ang akong kalag sa paglutawlutaw
migaan ang akong lawas
og nabitbit ko na
ang bug-at kong tanlag.
sa paglantaw sa naglangoylangoy
nga mga bebe
sa ibabaw sa sapa
nga samin sa mga panganod

miapil ang akong kalag sa paglutawlutaw
migaan ang akong lawas
og nabitbit ko na
ang bug-at kong tanlag.

usa ka lang
ka tuldok sa dagat
apan nganong
gihigugma ka man
sa dagat?

nganong nahigugma
man usab ako
sa gihigugma sa dagat?
gihandom nako nga ako
puno nga baso sa matag gutlo ning akong kinabuhi
apan wa,
wa ko kini sa tinood mabati bisan og sa usa ka gutlo lamang
haw-ang kanunay
hangin ang sigig sud sa akong utok
uhaw kanunay ang gibati
sa akong mga ngabil
gutom kanunay ang akong kasingkasing

wa sugod nga ako mapuno
lahi ang inyong nakita
ang inyong tinuhuan

wa sugod nga nabusog ang akong dako nga tiyan
wa sugod nga nabuhong ang akong kasingkasing.

sa kataposan
nagpasalamat ako sa Dios
nga Gamhanan.

alang kang C.

gihagit ka
sa tawong naghisgot og bisong
ang usa wala lamang naghisgot bahin sa bisong
bisan wala kini niya gisyagit
apan iya kining gipiit-piit
ayaw palupig
daghang bisong sa inyo
naa sa kusina naa sa garahian
nagpasad ang bisong
sa plaza sa sapa nagtihaya

gusto ka nga mobalak
sulayi ang
pagmugna kabahin sa ulok.

violet, diha ka magsugod.
apan kon gigil-asan ka kay sukwahi kini sa imong
bocabolaryo

mahimong mobalik ka sa imong mga lalom nga
sambingay
sa imong mga pulong nga morag kalayo nga nagakalatkat sa mga balumbong
sama sa budbod sa Tanjay
nga kon makatapot na gani sa balumbong
nga lisod na gayod
ang pagtangtang.

ayaw palupig.

8/18/2010

cockscomb



nagkatawa ko.
o nakatawa ba hinoon ko

kay sa atong
katilingban
aron ka tahoron
kinahanglang naa kay
tahod sa imong
kiting
kinahanglang tak-an
ka
morag sunoy nga
naay giring-giring
nga dila
nga gihimong kurona
nagsabilay
dapit sa iyang
agtang

8/17/2010

sakto ka j o j o
ako na lang pod diayng tagaan og dakong

s
p
a
c
e
ang akong mga words

apil na usab ang mga tawo
sa akong mga p a l i g i d.

breathing space
aron makaginhawa
aron

usab sayon


rang


s a b t o n

ok ba jo?

morag kanang balay nga
dakog lagwerta
hawan kaayo
nga og kon magparty ta
dili mag-abot ang atong mga siko
dili mag touch ang atong mga skins
dili magdungog ang atong
mga tabi

(ahh, dili pod dagway aron?)

kanang morag beach ni Salonoy nga walay mga tanom
gawas lamang sa mga
green grass, then
ang iyang sand layo, lapad
dayon ang dagat mabaw kaayo
unya kinahanglan pa tang molakaw og tungag kilometro
aron makalangoylangoy

(di ba god kapoy gihapon, jo?)

pero morag naa kay point ana
kay si emma nanuhol og mga trabahante
gahapon
gipaibot ang mga palms
gibalhin sa kilid sa fence
aron mahawan ang
garden nga iyang gipabutangan og
mga peasize mga pebbles
arong limpyong tan-awon
dayon nagpalit siyag rocking chair
aron ihapla ang iyang lawas
og dayog duyanduyan
kuyog sa hangin

makita na ang langit
og ang mga k
a l an g g am a n.




si elvis, si Michael og si Joel og si Eduard




sa pagpakanaog sa hukom batok

kang Elvis
(dili Presley ang iyang apelyedo)
akong nadumduman si Kuting
nga nanganak og unom ka
itoy nga lain laig balahibo
nga kon moduol na gani si Pretpret
og si Samsam
haskang isuga jud
mopagawas dayon sa iyang hait nga
mga bangkil og moulbo ang tanang
balahibo sa iyang lawas

mao kana si Elvis sa dihang
nasamdan lang sa botelya sa Sting
ang wait sa iyang anak nga
si Michael (dili Jackson ang apelyedo
og labaw na nga dili Jordan)

iyang gibunalan og bato ang ulo ni
Eduard nga nakuyapan sa daplin sa
dalan og bisan og wala nay panimuot
sige lang gihapon siyag sipa og labay
sa iyang hagtok nga kinumo
nga og kon wala siya bitara ni Joel
(dili Torre ang apelyedo)
nan segurado jud untang maundang
ang kalendaryo sa
hubog usab nga si Eduard

sus kapaskong dako sa Barangay Uno
ambot og ngano nga walay kalinaw ang mga tawo
ambot og ngano nga ang unahon mao man
ang inom og
paghuboghubog
dayog pangulata sa mga milabay

bisan gani og dili kaila

nindot ba gayod ang bation nianang mga paregla?
daghan ba jug yawa kining atong balangay?

naglisod kog sabot
niining bagang sagbot sa atong katilingban.
kada human og sulat
sa usa ka desisyon
mabati nako nga adunay
kulang sa akong kaugalingon
dunay nawala
apan wa na ko kabalo kon asa mipaingon
dunay morag nadugang
apan wala man sab ako'y mahikap
gusto nakong matukma unta
apan dili man gayod
mahulma ang nawong sa tukma
nangalap ko sa kangitngit
mitakos ko og kabo sa kahayag
apang wala ako'y nakita
nga sakto
puros lamang banabana
ang pagsukod sa kamatooran
ang paghisalagma sa lawas
sa hustisya
nagpasulagma nga unta
mahawiran ang danlog nga
ikog sa isdang
wala nay hasang.

8/16/2010

ang linugdangan sa daghang nahibaw-an

sa matag adlaw
nga ako ania dinhi
mao ra kini ang akong makita
sa kilid sa bintana
nga samin

sa unahan ning rehas
makita ang balay nga pula og gate
wala nay tawo nga nagpuyo dinhi

nanubo lang og ila ang mga sagbot
ang mga kahoy nag-iyahay og tugsoy
sa unahan ang dagat nanghapnig sa iyang mga balod
padulong na usab sa ilang mga panaw

nagpabilin ako dinhi
sa maong talan-awon
nasayod na ako kon unsa ang naa sa wala og too
sa kilid og tunga

ang sa ibabaw mga panganod nga naglabaylabay
sa ubos ang yuta nga kaging
adunay patay nga iring nga gilubong dugay na
walay tag-iya nga nangita
adunay gilabay didto sa dagat
nga nanimahong bagtok
adunay manok nga gikuhaan og mga balahibo
og gilaslas ang batikolon
walay matingala niini
mao lang kini ang naandan dinhing dapita

daghan ako og nahibaw-an niining dapita
og nasayod na ako sa ilang mga laraw bahin kanako

ang musa ug ako

angay bang palabyon
ang gapnod tungod sa  katahap
nga ako maunlod
kung kini himoong  gabayan?

milurat ang mga mata sa unos
sa dihang ako mitidlom  sa kahiladman
sa panahon sa pagsulay

siya ang unos, siya
usab ang gapnod

o  ako ba kaha hinoon ang
may pagbating salingkapaw?

8/15/2010

Ang Pana-ad

hinliton sa kaayo ang
sagal-sal sa kanhing
hamis nga dagway sa baybayon

labhan sa mga balod
ang tatsa sa angoy
sa kagahapon

buntugon sa batilaab
ang kagahob sa unos
sa pagsulay

lig-unon sa gugma
ang taludtod sa
kaugmaon

ang dakong panghitabo sa kinabuhi sa mga hulmigas

ang mga hulmigas
naghimo og imperyo sa kilid
sa dakong punoan
sa mangga

sud sa palasyong bonbon
gitago ang mga itlog sa ilang rayna
og ang tanang mga sundalo
abtik kaayo sa pagbantay
og ang tanang mga trabahante
kugi sa paghakot sa mga mumho
aron ipakaon kanila

sa usa ka dakong pagbanos
sa ulan
usa ka gabii niana
gibanlas ang tanan
nawa ang imperyo
nawa ang rayna

ang usa ka magsusulat og himasa

sakit kaayo
sa dihang

gipalayas ka
kay wala ka na
'y
gibayad

sa gamayng kwarto nga
imong giplitehan

wala ka moiyak
sa dihang ilang gipagawas
ang imong mga bulingon
og ginagmayng mga
kabtangan: ang daan nga sapatos
ang baho nga medyas
ang pula nga tsinelas
ang halhag nga toothbrush
ang colgate nga nipis

og ang pipila ka mga
libro sa mga balak og
mga papeles

gihinay-hinay kini nimog
hakot sa daplin
sa karsada

sa dihang mibunok ang
ulan og ang imong mga bulingon
nga gitabon sa imong mga libro
og mga papeles
wala na katabang og tabon

nangabasa ang mga libro
og papeles

og
dinhing puntoha
miagas ang daghang mga luha

mibaha ang imong
mga kahiubos
sama sa kalit kaayong pag-awas
sa tubig
diha sa mga hugaw nga kanal
didtong lugara

ang sangpotanan

nagkusma-ot
ang panganod
nga nasikdol sa daklit
niyang alimungaw
sa alingiis sa kanaway

nahipugwat ako
sa kalit nga
dalugdog
nga daw masong
mipukpok
sa haw-ang kong
galamhan

8/12/2010

alvinda


sa habog nga gitindogan
sa kahaponon
gisud-ong sa milabay nga
adlaw ang
mga kabukiran

pati ang mga anino
pagkaanindot!
nahikatulog sa lantay
sa bukid ang
mga kabalaka


pagkabugnaw sa dughan
sa bukid!

pagkainit sa higdaanan
nga atong gisaloan!

pagkaanyag gayod
sa lawas sa kaadlawon!

8/11/2010

mata sa hagdan


mikanaog ka
sa lalom nga pamalandong
nagtuyok-tuyok
lang ang hunahuna
makalilong na kaayo
mipahulay ka
sa usa ka kahilom
nagtinukay ang
mata sa hagdan
og ang panganod
makalilong
makalilong gayod kaayo
ang utok
nangita og katre
nga katulgan

fantasya

nindot ang fantasya
ginama sa hunahuna nga milayas
sa realidad
nga tunukon nga makasamad

magpuyo sa damgo
gusto nianang taas nga kagabhion
wala na ang gana
sa pagmata

fantasya
bansay-bansay
sa sayong kaanyag
sa kamatayon

pagpanamin

nakaagi ka na ba nianang
paglabay sa adlaw
nga ikaw wala makapugong
sa pagpamakak
og sa gabii wala ka makatulog
nag-alipasa
ang imong konsyensya
nagligid-ligid sama sa usa ka
bato gikan sa
bakilid nga bungtod
og sa imong pagpanamin sa
sayong kabuntagon
ang imong nakita mao ang imong
nawong nga nahilis
morag kabo nga plastic nga
nasunog

gitiklop nimo ang samin
og nabati nimo ang kaulaw
sa imong
kaugalingon

gugmang walay pulos

siya
nahigugma
giampoan ang gugma
sama sa ginoo
matag adlaw
gihalaran og bulak ang gugma
matag gabii
gihandom labaw sa tanan
dili mahaluna
nag-alipasa aron lang pagkaugma
makita
bisan na lang gani og dili mahikap
ang gugma

sa pikas bahin
ang iyang giampoan
naglikay
nagtago dili gustong makita
bisan na lang og ang iyang anino
kasukaon sa iyang dagway
walay gibati nga
kamingaw bisan na lang og kiting
gilood.

8/10/2010

kasagaran sa magbabalak
salamangkiro

kay gikan sa iyang baba
manggawas ang daghang mga balak

ang iyang gininhawa
humot pa sa mga agwa

apan adunay magbabalak
nga wala makakat-on niana

dili ka malipay
wala kaniya ang hagwa

wala ang mga katawa
mapalaw ka lang

apan kon imong tinoon
diha sa iyang gihisgotan nga

mga kahadlok og mga kapakyas
og mga kahingawa

nahimo siyang samin
og sa imong pagpamati sa iyang mga pulong

makita mo ang
imong kaugalingon og ambot og ngano

gusto nimong siya magpabilin
sa imong kiliran

makita mo ang mga bungtod
ang mga itom nga panganod

ang sagboton nga agianan
ang sapa nga patay

mohigda ka tupad kaniya
og mahikatulog sa pipila ka mga damgo

sud sa korte

gitutukan ko ang
akusado

nahisama ako sa usa ka leon
og siya nahisama sa usa ka bagtok

sa akong paminaw
walay nausob

og kon duna man ang bagtok
nahimong halas

diha sa iyang sanga nga dila
nanimhot sa dalan

kon asa siya moikyas
diha sa mga bakak nga mga bintana
ang dalan sa unahan
magpabiling layo kanato

sa matag adlaw
nga tutok dili kini nato maabtan

kusog usab kining modagan
sama sa atong mga hunahuna

usahay makita nato
ang panagtagbo sa tanan diha sa usa ka

gunas sa balas
sa pipila ka lugas sa abog

usahay sa dili na nako makumkom
molingkod ako sa tunga

sa agianan
mopahiyom modawat mangandoy

lamang magyampungad
sa pag-abot sa kangitngit

8/09/2010

alang kang ariel

sulayi daw palihog
og latay ang agianan sa
tambayawan

sida dili ba?
lisod kapyotan ang maong
laway gikan sa iyang
baba
nga giagian sa iyang walo
ka tiil

kon dili nimo mahimo
ang paglatay
kay hadlok ka nga mahulog
sulayi na lang og
sulat og balak

alang sa mga kaka
dayon ako ang mosulay og katkat
sa akong kaugalingong
laway

og kon mahimo ko na kini
seguro
undangon ko na usab ang
pagsulat sa akong
mga balak

mamati na lang ko sa mga
tamsi
lantawon ko na lang giunsa
pagkubit sa tikarol
sa usa ka haw-an
didto sa tin-aw nga sapa
kaniadto.
dunay mga krimen nga nagtuyoktuyok
lang sa atong mga utok
adlaw adlaw
matag gabii giluba ta ang atong mga lawas
sa mga punyal sa lingla

ang hunahuna makighilawas sa dili nato
kapikas
ang mga gumunhap nakisapaw sa
mga utlanan sa moralidad
dili makita ang mga kawras sa kuko
sa likod sa likod
ang mga mantsa tua ra sa sulod sa brief
nga imong gisulod sa bulsa og
dayog dalidali og laba sud sa kasilyas
nga ikaw rang usa

dakong kawat ang gibuhat sa too nga kamot
og ang wala nga kamot
nagpakaaron-ingnon nga wala masayod

sa damgo
nagawsan ko
sa pagpiyong sa akong mata lain ang akong
gidamgo nga nagpatong sa akong lawas

dumog sa gugma
layog sa kaulag
kumot sa mga nindot
dap-ig ang mga pus-on
magdilaab ang kainit

mitabon ang kangitngit sa
kagabhion
ang habol sigig pamakak
ang ugnan nagpakalimpyo
nagpakaputi
sama sa usa ka konsyensa
sa huwes

pagkaugma
ablihan ang bintana
pasudlon ang kahayag
pil-on ang mga habol
og hapnigon ang mga lum-it
ang alugnan
alisdan og ponda
ipadpad ang mga abog
gikan sa lawas

maligo sa kabag-ohan
manglugod pag-ayo aron matangtang ang tanang buling
og dalikdik

mamahaw
mosakaysakay sa laming estorya
sa pamahaw nga sunnyside up nga itlog
parisan sa chorizo
humot nga kan-on
init nga kape

halok sa hagkanan
mogikan
tagboon ang laing adlaw sa kinabuhi
lain na usab nga lingla

apan kinsa ba ang nakahibalo sa
tiunay og
tinood?

wala.
dili masulti sa tanan
sa yuta ang kabahin sa iyang mga balas

sama nga ang mga panganod dili
ikapanugid ang kabahin sa mga doldol

ang dagat lantawa
bisan sa iyang kalapad og kalalom

walay gisulti
walay tingog-tingog nga mopanaw

kon mohangop man kini sa lapyahan
kadyot lamang

ang mga kalanggaman mao usab
walay giisip nga panimalay

ang mga pako wala kini buhati og
mga baba

sama sa mga tudlo wala kini mga ngabil
kon mohaploy kini sa imong mga paa

og kon mopahulay kini sa imong dughan
wala gihapon kini giisip nga panimalay

mao usab kana ang gugma
usa kini ka panaw sa dagat sa langgam

sa mga panganod
wala kini silay panimalay

sabwag sila
mga hangin nga nagdala sa mga bulak

alang sa tanan
sama sa mga prutas sa kinaiyahan

8/06/2010


adunay isda
nga ganahan sa gamay nga baso
kay dako siya didto

adunay laing isda
nga mibalhin sa dako nga butanganan
bahalag gamay lamang siya didto
apan mabati niya
ang tumang kagawasan

8/04/2010

kon mamad-an
ang sapa
mangamatay ang
mga isda
ang mga lumot
ang mga bato
mag-uga
ang mga balas
makigsanib sa abog

baho ang mga patay
nga mga isda
langto ang mga lumot
ang mga bato
init morag mga
baga
ang mga abog
paliron sa hangin
ang mga balas
hapdos unya sa
mga mata

dili ko sapa
dili ka isda
wa nato pangandoya
ang bato
makapaslot ang baga
kinsa ba'y ganahan
sa abog

apan kon kita
magpasagad na lamang
kining tanan
mangatuman

kinutlo sa balak ni Sylvia Plath "Winter Landscape, with Rooks"

"ang naglagiting nga
kainit sa adlaw
nga milungsad
sa agusan
mayubitong
mitutok sa nangluod
nga balilihan.
Pak-an ang kangitngit
sa huna-huna,
sama ako sa bato
nga naglumlom
hangtod sa pag-abot sa
kagabhi-on sa tingtugnaw"

8/03/2010

magbabalak ka?

kon magbabalak ka
ang unang elemento nga dili ka masabtan
unya dili sab ka ganahang magpasabot
mao nga

mogamit kag mga tanghaga
imbis moingon ka nga giuhaw ka
mokatkat ka na lang sa punoan sa tambis
og mokitkit sa tambis
og aron motubod ang laway
sawsaw sa asin,

unya usahay baduy,
kon mahigugma dili motingog
kasagaran magdala lang og bulak
alang sa palalab
unya kon duol na siya
dayog dagan
kulang sa kaisog nga moatubang
sa kamatooran

kon magbabalak ka
daghan kag naagian
nga dili nimo ikapanulti sa uban
kay basin sakit ra kaayo

makita kini sa daghang kabahong nga
nauwat sa imong bitiis
sa daghang buhobuho sa imong aping
mga gugmang nagnana, mibuto, nauwat na lang
apan walay nahitabo

apan kon magbabalak ka gayod nga tinood
nakalabang ka sa suba sa imong katalawan
sa imong kahilom
nakayubit ka ra og pulong
kabahin sa gugma

nahigugma ka
gisugot, nalipay ka, naminyo ka,
nakajerjer ka, haskang laloma sa dagat sa kalipay
ang imong nasalom
hapit ka mamatay
wa ka kaginhawa
apan nakat-on ka anang
gugmang aslom og pait
subak sa katam-is

kon magbabalak ka
og gusto kang molungtad niini
sa kataposan
nagsulat ka na lamang alang sa imong kaugalingon
gamit ang katarungan
ang pagsalig nga makalabang ka ra gayod
sa dakong unos
ikaw ang sakayan nga wala malunod
naglantaw kanunay sa unahan
sa imong dunggoanan

kon magbabalak kang tinood
dili ka mohopas
kay sama sa bulawan
ikaw ang silaw sa handurawan
ikaw ang perlas nga luha
ang kahaw-ang nga dili
mawala
ikaw ang paak sa kinabuhi
ikaw ang bisag unsa
ikaw ang pulong
sa kinabuhi hangtod na kana
sa kataposang singgit
diha sa kamatayon.

8/02/2010

kining hagawhaw
sa tanlag
ang kaugdang
nga misalindot
sa daw alimpulong
batilaab
maoy gabayan
sa panaw
aron magpabiling
tim-os dili alang ni
bisan kinsa,
apan sa pag-alagad
sa makataronganong
galamhan

8/01/2010

ang bato
mounlod gayod kana
ang mantika
motunga
depende sa imong
panglantaw

ang usa moingon nga
giduot sa lana ang
tubig
gipiit sa bato

ang usa usab moingon
nga gibitbit sa tubig ang lana
og ang bato ang nag-isa
sa tanan

moingon ang bato nga siya
ang kusgan
moingon ang lana nga siya
ang gamhanan

ako nga naglantaw
giuhaw
nangita og laing baso
nga ang sulod
puros lang gayod tubig

bugnaw ang kamatooran
morag tubig
nga mihupay sa akong
kauhaw

makalibog ang dula
sa bato og tubig og lana
sama
sa imong kalibotan
magsugod ka diha
sa hanap
pangitaon sa tungatunga
ang mga dayag
gusto nimong ipadayag
pinaagi sa
gitagoan mong mga pulong
ang ilang
gipaabot nga kamatooran
gusto mo usab kini
nagpaabot ka lang
sa saktong panahon
basin puhon
basin sa kataposang
adlaw
basin diha sa kinatumyan
sa kagabhion
apan bisan unsaon
moabot ka gihapon sa
susamang
panghitabo sa imong
kinabuhi
bisa unsaon pa og
pagkakha sa mga kuko
sa imong ugma
magpabilin gihapon ang
hanap
bation mo ang pagkabuta
diha sa usa
ka himaya
wala nimo kini hisabti
imo lang kining
gibati.
sa mga dagkong
tutoy sa
kalibotan
kita ang iyang
mga tungaw

pagkamaayo mong
mokuha sa usa ka hulagway sa usa ka bata
nga nagtanga

unsa kaha ang imong gisulti kaniya
nganong wala modapat ang iyang lapis sa iyang papel?
nganong layo ang iyang tinan-awan?

sukwahi kini sa tinood
sa iyang pagkawatsinango
nga kon imong tagaan og singkwenta
modagan kini sa tindahan
og ang iyang unang paliton
dili baya pan
kondili tirador.

gisakyan mo ang higala
nga gasakay
sa kabaw,

lisod hikalimtan
ang kainit sa atong mga sampot
nga midapat sa baga nga
balahibo sa kabaw

habog ang kabaw sa atong
kagamay
apan wala'y usa kanato
nga napiang
sa matag ambak
sa matag saka.

ayaw palabi

ayaw pagpalabi
nianang mga kalapasan
sa maayong gawi
og pamatasan
kay kini mobalik isip
mga anay
nga mokutkot sa tanan
nimong bahandi
apil na sa mga salog sa
imong kasingkasing og
sa imong utok nga
wala nay atop.