2016/04/29

ilok lay hinungdan

tungod sa imong ilok
nga itomon
giguba mo ang
nindot nga
relasyon

maong ako nga
gi block, sakit baya

diay ang imong kamatooran
ug nganong dili mo madawat

ingon ka, unta ang isulat
kabahin lang sa kalipay

dili man ingon ana ang
kinabuhi inday

wa man sab nimo hatagig
bili ang akong kagawasan

nga mosulti sa akong gustong
isulti

dako ang akong hawanan
ayaw ko ug labta

gisuroy ko ang kagabhion
gikatulgan ko ang adlaw

gikaon ko ang panit sa
saging
unya ang gikaibgan mong
unod
ako ra sang gilabay

ambot naunsa na ba ni
nga kon unsa kadtong makalagot

nimo ako mang ginabuhat
basin, basin, sud sa akong kasingkasing

kay puros na man lata

di sab ko
ganahang modaug
maong
di ko moapil

nanghiwi imong
nawong
galot, di ko ganahang

moapil, kay ang inyong
sukod sa kalalom
mabaw, kita mo ba

ang gakit nga milutaw
nga mibugtaw sa balod

sa suba paingon sa 
dagkong balod sa 

dagat, wala na maghimpos
ang inyong tikon

gibutang sa salog 
nga wala nay pulos 

ayaw sabta nga 
wa ko ganahi  sa 

inyong pungpong nga
bayabas

nga puros hinog nga

puros humot

asus, gamayng tabyog
sa hangin

kadali rang nahulog
puros man lata.

diha sa paghukom nga madalidalion

kasayon nimong
mohukom, walay pilok-pilok

walay diki-diki, ang manok
nga libat, hibat, 

ang iring nga pangag, lisngag
sag ilong, 

ang kabaw nga tapulan, ang
kanding nga kandingon,

sa usa ka lantaw lamang, diha
sa mga tunob

kini si kuan, kuan, nga kuan
gayod nga mag pagkakuan,

kasayon mong maghukom
di gani mabuntagan,

balitok ang utok, hiwi ang
hiwi nga morag sag suhi, 

wa nay panahon nga imong
hiloton ang piang, di na jud

mabuntagan, way panampiling
di mokilingkiling, mao na na

mao na na, di na mausab bisan
pag suwaw na ang suwab.

way daghang aw-aw

nakadayeg kos akong 
iro nga itom nga siga ug mata
nga kon di ko kabantay
mosaka sa lamesa ug motangag
sa akong nabyaan nga bukog sa
baka kay kagabii walay tingog niyang
gipaak ang bagtak sa lalaking
dakog lawas nga mikatkat sa
among pader unya misulod
sa among nataran
walay daghang aw-aw
wala may kisaw
nasamdan ang opaw

2016/04/28

gusok

wa ko mangilabot
usa lang ka laplap sa
kahilom

usa ka tulo sa singot
pignit nga kalipay

sud sa akong dughan
ning akong pagkatawo

wala nay lain ikaw og ikaw
lang gihapon

ayaw tag-naa ang akong
gahom sa paghikalimot

motagolilong ko sa akong
anino

ning tabyog sa kausbanon
lilo sa lingla ug labok sa
gusok


mikaon sa hangin walay nahibilin

gipili nako ang lugar
nga walay nakaila kanako

daghang kawayan
walay klaro ang dalan

mingaw ang alawiton
sa gangis ug dulon

pinisik ang ulan
ang suba naughan

nakatulog ako dinhi
tupad sa mga tabili

ug dinhi gisugdan nako
ang pag-ila-ila nako

wala miiyagak ang
salog sa akong kurog

gipamati ko sa bongbong
silong sa kalandong

ako ang tinagoan
nga dili mo masabtan

mikaon sa hangin
walay nahibilin

ikog sa alindanaw

labaw ko nimo
gamay

usa ka dangaw
lamang

but-an ka ra
kaayo

kasukaon na 
ko

ang akong gitago
nga kamaldito

akong ipakita 
nimo

kini ang labaw
usa ka dangaw

ikog sa alindanaw
akong gipasayaw

ang kabag-ohan

gusto lang god
nako ang kabag-ohan

sininang daan 
mahimo man segurong
ato lang sa pong
alisdan

ang lawak nga giabogan
atong pahanginan

ang hardin  nga kasagbotan
akong padampasan

walay nabuhat ang mga but-an
kaanindot sa pahiyom
katam-is sa mga pulong
kamasanagon sa mga saad

giulod man ang mga dahon
naughan ang mga gamot
nangalaya ang mga dahon
nalugti ang mga sanga

walay pulos ang mga but-an
mga kamot gigaid sa mga 
maayong pamatasan
ug ang katilingban wala
na maatiman

buhii ang mga kabayo
ipasipa ang mga ungo
baraha ang mga halas
ipanglabay ang mga haplas

ang mga kagaw limpyohan sa mga kagaw

nahuman na man kaha
ang mga but-an
unya unsa may namat-an?

mao lang gihapon
nagpista ang mga kawatan
kuyog sa mga adik apil pa
ang mga sapiang
kidnappers

dunay giputlan ug ulo
gipatungan pag insulto

karon moari kos maldito
sulayan nako ang ilang 
mga tinonto

basin pod diay og sila
ray makalimpyo
ang kawatan kawatan ang
kawatan
ang mopatay patyon sa mga
makamaong mopatay
ang mga kagaw limpyohan
sa mga kagaw

basin pod diay
sulayan nato ni gamay

hulaw

ang mga tunob sa
hulaw sa bulan sa abril
milakra sa 
galiki nga basakan
samtang ang mga 
uhot nangauga na
kaayo kanunayng
nagpadungogdungog
sa bata nga
nagdula sa posporo
sa kilid sa kangga nga
guba nga gitangtangan
ug yugo sa kabaw
nga unta kon masipyat
lamang sunugon na
lang silang tanan

2016/04/27

pagpasalamat

magpasalamat ka
nga sa tungatunga sa kalapokan
nagpabilin gihapon ka
nga usa ka
sidlak nga bulawan

.......

didto sa hawla nga tayaon
usa ka gihapon ka tamsi
nga manggiawiton

.........

sa usa ka labat diin ang
mga baboy 
nagligadligad
usa ka gihapon ka tawo
nga halangdon
sa imong kaayo
kaligdong
kalimpyo..........

nakita

ang kahayag sa kabuntagon
midap-ig sa aping mga dahon
sa punoan sa saging

diin didto nagbitay ang daghang
bulig nga sa ilang kahinog
nanapit nga nga unta imong
putlon dayon lung-agon ug 
ipaambit sa imong mga kaila. 

pasalamat

ang maayong
pamatasan
milutaw

mipatigbabaw
gayod ang
pagkamaayong
tawo nimo bisan
pas iyang
gihimo kaniadto

magsadya ta kay
siya wa katakod
nimo

maglipay ta kay
anaa nagpabilin pa
ang kaayo sa imong
kagikan

ang imong hardin
namuwak
ang iyang salibotbot
wa kasulod sa imong
kunot

salamat salamat o
ginoo
daygon gayod ang
imong kaayo.

2016/04/26

makamao sab mi...

kamo man god pod
wala may pamahaw

kami nga dayo
mao pay mangita ug pagkaon

samtang kamo nagpunay
ug katulog o nagpatulogtulog

karon nia kamo diri 
di diay sab mi kamao?

gikandadohan namo ang
among mga balay
wala mi dinhi.

pasensya na lang usab.
makamao sab mi oi.

daghan sab kog buluhaton karon.

karon
mitawag ka, "dia na ko diri"

namati ko

ang akong mahinumduman 
ikaw usab

"dia ko diri" pareho tag panultihon
inig abot

apan wa ka man kadungog
nakita ko ikaw nga naglabaylabay lamang sa dalan

unya ako morag kahoy nga imong gilabyan
wala koy mga tiil didto sa inyong dapit diin ang mga bata

nagdagandagan diin ang mga inahan naggukodgukod
sahay nagkudkod sa kalipay unya tua ka didto nakigdula usab

unsa kahay imong panglantaw kabahin anang patas-patas
unsa kaha karon ang gusto nimong madungog gikan nako?

abi mo dili ko sama nimo kaniadto, kanang maglabaylabay lang 
sa punoan sa pobreng kahoy

apan yuna ra, mangutana ko, "ikaw ra ba diay ang makahibalo?"

dili man sab ko bugo,intawon, wala sab ko matawo kaniadtong
pagkailad ni rajah humabon, dodoy.

karon, ako na sab. Maglabaylabay sa pobreng kahoy.
manawag ka, di sab ko kadungog. mobabay ka, respetohan ta ka

kamao na kong mobabay karon.. Unya, pila ray pag-ingon,
pasayloa, di ko katagad, daghan sab kog buluhaton karon.

kay wala man gayod usab kami nabati nga kalipay

gipili ko ikaw
bisan ako mismo nagduda kon dili ba ikaw
mokaon
sa sama namo

dugay na ang mga katuigan 
gipangita namo ang sama nimo ug karon nga

ania ka na, misugal kami, among gipusta ang
among kalag

ang among kinabuhi hagbay rang nadagit
sa amo usang gisaligan kaniadto kay kami 

ang di kamaong mamili, nawad-an sa hunahuna
ug mosalig na lamang sa bisan kinsang moabot nga

morag sama usab namo, nga nagpaila sa iyang ngalan
nga pupareho ug tingog sa among mga ngalan

gitimbang-timbang na kini namo sa dugay nga panahon
ug among nasuta nga bisan pa kinsa kaninyo ang 

sa kaulahian mokaon sa sama namo, bisag hapit
na kami mahurot, wala na kami malisang niini

nadawat na namo nga kini mao ang among dangatan
unya kon mawala na kami dinhin  kana bang

wala nay mabilin pa kanamo , bisan pa ug anino na lamang
amo kining dawaton isip kapalaran, kay ug buot kwentahon

bisan usa ka pignit wala man sab kami nabati nga
kalipay, sukad masukad, wala gayod, wala gayod.

ang nawala kanako

wala ko mamati
ninyo 

maong ako kining
nadungog

pag-ayo, pasayloa
gisampungan ko na

ang akong mga
dunggan


ang akong mga
mata

naglantaw na lamang
kanako

nawala ang kalibog
labaw ang kasina.

ang natugkad

dili ko taga
dinhi
unya dili sab
ni ang sarang
nakong 
ginabuhat

ambot ngano
nga nia pa ko dinhi
unya sige nako
ning gibuhat

sila nanglupad na
kadtong mga
kaliwat sa
agila

sila nanglangoy na
didto lalom 
didtos pusod sa
dagat
kadtong mga kaliwat
sa barracuda

ambot unsa kaha
akong kagikan
ug kang kinsa akong
kaliwat

nganong nia pa ko
dinhi
unya nia sige pa nako
kining ginabuhat

wa koy kalooy sa
akong kaugalingon
nga akong gigapas
sa kalibog
nga nagpakagakos
sa dili nako
uyab.

2016/04/24

diili mga pulong....

miabot mi sa dagat
dili kaayo balod unya
ang hoyohoy sa hangin
mihapuhap sa among
mga buhok, aping
lawas
ganahan ko sa kahilom
sa balas
nga nakighinabi sa dila
sa dagat
mahimo diay nga ang
usa maoy magsigi ug
padungog sa iyang mga
sugilanon
samtang ang usa mamati
lamang
mahimo diay nga ang
ilang gamiton
dili mga pulong.

pagpangita

bisan asa mi
dunay moapas nga
suliran nga gustong
magpasulbad, mga damgo usab
nga gustong magpahubad, mga
pisi nga maayong pagkahikot
nga dili gusto nga
maputol
nga duyan nga tabyogonon
mga tsinelas nga
hangtod karon nangita gihapon
sa iyang paris nga
nahulog sa sakayan nga gianod
sa suba nga wala pa
gihapon 
nahikaplagan

miabot ang tambok nga babaye
nga miiyak kay nahisulat sa iyang
kapalaran nga ang yuta nga hagbay
na niyang naimpas
pagakuhaon kuno sa tag-iya nga
wala ka pirma
sa kasulatan nga bisag unsaon
niyang halungkat ang mga
hunos sa iyang
balay nga kawayan di gayod gihapon
makit-an

tabyogon ang duyan nga nangita
usab karon ug
katulogon......

iring.....

bisan sa kadaghan
wala lang gayod gihapon
bisan pa
bisan pa bisan pa unsa
ang tawo tawo lang gihapon
galot, taas og garbo,
gahi ug ulo, lisngag og
panglantaw,
siging bugtaw sa iyang
anino
morag iring dili kadawat
sa iyang ikog.

prosisyon

ang dahon
nahulog tupad

sa bato sa kilid
sa dalan

ang bata nangariling
naligsan

ang dahon nga
nahulog tupad

sa bato sa kilid
sa dalan

ang pisot...

ang wala kanato
bisag kurit bisag pignit

atua gihambin sa bata
morag mga manggang 

hinog nga iyang 
giputos sa iyang sinina

unya sa dihang migawas
ang iyang tiyan

diin mibuy-od ang iyang
wala maayong pagkaputol

nga pusod morag nahadlok
ta kon unsa ang atong

kagikan basin og usa usab
kita sa mga wa maukay

nga mga trauma maong
sahay dili nato masabot

ang kagubot ang gusot
ang laksot ang pis(k)ot.

basura

human sa daghang
nasulat, matod pa ni Carlos,
bation nimo nga
kuwang pa gihapon, hangtod
nga moabot ka
sa utlanan: wala kay nasulat

busa ang tanan usik-usik lamang
sa panahon

kadtong imong gituohan nga imong
obra


diay basura.

2016/04/23

pagbaid sa sundang matag buntag

dili buot ipasabot nga
kon nagbaid ka sa sundang
duna kay gidumtan nga
patyon,

basin nabutaan ka lang
sa mga panghitabo
kay lagi

gitakbas man ni mario
ang kabit sa iyang asawa
niadtong adlaw sa 
domingo

unya ang kontar ni donato
natagbasan sab didto's
sabongan sa olingan
adtong martes

ingna mi nganong gibaid
mo ang imong sundang
matag buntag inig mata
nimo

kami daghan man god usab
ug mga sundang nga habol
kon ganahan jud ka
palihog na lang pod ug
apil

hisgot

ayaw paghisgot
ug pisi sa balay diin
dunay bag-ong
naghikog pinaagi
sa pagbitay

kahinumdom ka ba
niadtong napaakan
ka sa iro
manglimbayot baya
ang imong
balahibo kon hisgotan
ang bukog

kuyap....

wa ko na masabti
ang iyang gipanulti

morag milupad na
ang akong kalag sa

kagutom, milantaw
ko sa ubos akong

nakita siya nga
nakigsulti nako,

daghang sud-an 
ang gisuakad, puros

lamian, kasag, paklay,
salad, melon, naa pay

lechon, tupad sa 
dakong paa sa

crispy pata, apan
nahupas na ang akong

kagutom, milapos
na sa akong tiyan

namad-an ang akong
tilaok, mikurog ang

akong mga kamot,
ang akong mga tiil


milupad ang akong
kalag, gawas sa bentana.

ang lamiang panghitabo


gisakitan man ang kaadlawon
sa gabiing hilabtanon
apan ang dugo diha sa gabon
kanunay niyang gihandom

alang sa ulod nga gustong molupad

' ikaw ba kadtong
ulod nga gustong
molupad?"

nangutana ang banog

dayog yango
sa ulod

 "oo, nyor,
ako"

'palihog balik sa
yuta'

dayog yugyog
sa banog sa ikog
sa ulod

"wala kay lugar
diring dapita kay

amoa ang hangin
amoa ang langit"

maoy panapos nga
sulti sa
banog sa ulod.

tugbang

gipasulat sa papel

"i am sorry i will not do it again"

usa ka libo nga

"i am sorry i will not do it again"

ang nadugang mao

ang kalagot ang laing nadugang

mao ang pagdumot ngano nga siya mag-

"i am sorry i will not do it again"

nga sa iyang hunahuna wala man siya'y

sayop.

wala man siya'y sayop

usa ka libo usab nga gibalikbalik ug

sulat sa iyang hunahuna diha sulod

sa gadugo niya nga kasingkasing...


kon ugma damlad mahimo siyang 

usa ka maghuhukom

dili gayod kini niya buhaton

ug labaw na nga dili usab niya

itugot nga kini buhaton pa

sa laing wala pay  buot  sa ilang

kanunay nga gitawag nga

malditong bata.

2016/04/22

ang swerte

katanga
gud nimo nga minganga

kawa goy salig nimo sa
imong kaugalingon

sano, ang iyang gitagik
imo man unta kadto

ang iyang nabungat
nagbitay na man unta

sa imong dila, apan sa
imong katanga ug katalawan

diha ka nawalwal, ikaw man
ta tong gitahasan

kaw man ta to ang gigasahan
sa imong katanga ug katapolan

anaa, siya ang mihay-ad sa
karsada nga wala nay ginhawa

paghilom na lang diha,
swerte ka.

kahaw-ang

ang kahaw-ang
nga nagyaka sa
baba sa
florera
gilawgan ug
usa ka tasa nga
tubig
dayon kini si Marie
mikutlo ug tulo ka
rosas didto sa among
hardin
unya iyang gisulod sa
florera ang
maong buwak dayon

ang lawak nga haw-ang
mihunat sa iyang kandiis
diha sa kilid sa bentana
nga wa kapugong sa
iyang pahiyom.

2016/04/20

pung o buhat?

imong
gilantaw ang iyang ngalan
ang iyang pamayhon
labi na ang iyang
panultihon ang iyang
pahugyaw, sipyat ka

layo ra ang gipuy-an
sa iyang pulong sa gipuy-an
sa iyang binuhatan

kon nagbugalbugal siya sa
baboy
dili buot pasabot nga kadtong
baboy nga miiwik sa
kagutom dili niya
pakan-on

2016/04/17

mag-ila-ila pa gayod kita.

nakita mo
ang peligro, gihipos
mo kini
sama sa usa ka sulat
gikan sa imong
inahan,

sa dihang pati ikaw
wala na mitoo kanako sa
dihang ako usab nawad-an
na pod og pagtoo bahin nako,

mibiya ka
dili ko makahimo niini diri
kanako

maong bisan og wala na ako
mitoo kanako
ako gihapon kining gidawat

nakita ko ang tanan
nadungog ko usab apan unsa
ba ang gusto nimong mahitabo
bahin kanako?

kon akong biyaan kini
kinsa na lang ba ang mahibilin?

kalooy pod kaha
busa ania, ako kuyog nako
sa walay pag-usab bisan pa og
ako mismo wala na
mitoo nako

angay lang nga akong
labanan, kay kinsa pa ba ang
molaban kanako?

kalooy sab.
gilamano ko ang akong mga kamot
gihagkan ko kini pagkahuman

nagsulti ming duha,
mag-ila-ila pa gayod kita.

pagpangayo og pasaylo

sa ika pito
ka adlaw wala ako
mipahulay

unta mapasaylo ako
sa mga
wala magbudlay

paghubo

hunahunaa

ang punoan sa
bulahan
ning mga adlaw
sa hulaw

sa hinay hinay
nangahulog ang mga dahon

hangtod nga
ang nahibilin ang mga sanga
na lamang

gihubuan ang kahoy

hunahunaa kong ang
akong kalibotan usab hinay hinay
kamo nga mangawala

labi na ikaw.

ang mga utlanan

ang labat
subaya
kinahanglan
sa kalinaw
pati kalipay
ang mga dulunan

ayaw latas sa
mga utlanan
wa ka nako
hadloka

sa unahan kon
palabian
mahulog ka.

Panginhas dire