2010/05/31

PAGPAHALUNA


GIPAHAluna na sa usa ka
inahan ang usa ka bakak
nga bata
sud sa iyang duyan nga
matood

milagaak ang duyan sa usa
ka hinay nga pagtabyog
ang bata bisag nabusdak
nabangga ang ulo sa kilid
sa bongbong
wala gyod miiyak

ang pagtabang

adunay pagtabang
nga nagpaabot usab nga tabangan puhon
klarohon lang
adunay tabang nga tabang lang
walay pangayoon
nga balos
adunay kamot nga imong gitunol
sa laing kamot
aron ang anino dili mahulog sa iyang
lawas
adunay tabang aron luwason
ang naa sa pangpang sa iyang kamatayon
apan dunay tabang
nga molungtad sa kahangtoran
nga dili usab nimo ihatag
kanang iyang pagpangayo og usa
ka malipayon nga
kamatayon
gikan gayod sa imong kamot nga hinabangon

kitika siya
patya siya sa tumang kagilok
sa imong mga sugilanon

patya siya
sa usa ka kamatayon nga walay ilhanan
sa imong kaayo
sa iyang kasina.

balak sa usa ka maskara


dili ako mag-ambat kon
unsa ang unod sa balak
kon unsa ang dangatan sa
nagbasa niini

hait ang akong tutok
tak-umon ko ang akong baba
kuhaon ko ang akong agtang
og dili gayod ako
mangilabot kon unsa
ang dangatan sa adlaw
og bulan

ang mga panganod nga
naglutawlutaw lamang
sayod kana
nga ako usa ka maskara
lamang

kon makalabera na ang tawo

sa pag-abot sa takna
nga makalabera na ang tawo
maglingkod pa kaha kini
sa iyang silya
maghinuktok pa kaha kini
og maghunahuna
kon unsa ang angayng buhaton
sa iyang kahimtang?

dili kaha kini siya mahadlok
sa iyang anino?

sulog


mokuyog ang kadaghanan
sa kusog nga sulog sa bugnaw nga sapa
usa ka buntag niana
human sa makusog nga ulan kagabii
sa dihang nahulog kuno
ang dakong buhawi
ikaw ang kahoy nga nagtindog nga
walay nahimo
nagpaabot kon kanus-a malukat ang
kilid sa yuta
dili kasyagit sa pag-abot sa pagkatangtang
sa pagkalangkat sa mga gamot
ako ang bato nga magbabag
kontra sa sulog
dili malangkat
dili maanod
dili motingog

sa papel nga dagat


sa puti nga papel nga dagat
mamasol ta
sakay sa puti nga papel nga baroto
kita nga mga puti nga papel
nga tawo

2010/05/29

unsaon ba pagdalidali og himo og balak kon kalibangon na ka kaayo?

una, lingawlingawa usa ang imong
kaugalingon
hunahunaa nga dili ka kalibangon
kon dili madala
palimpyohi una ang kasilyas
sa imong katabang
ingna nga ayohon paglimpyo
patyon tanang kagaw
butangan og lysol
sabonan, trapohan pag-ayo
ang inodoro
(aron ang imong tae
maulaw nga mogawas)
kay gilimpyohan ba baya
ang imong private nga kasilyas

sunod
ibusdik ang imong tiyan
aron kini modako
og ang tae naa pay iyang
katagoan
dayon hinay hinay og ginhawa
aron at home ang
imong tubol dapit sa imong
pus-on
hunahunaa na pod nga
duna pa kay lami kaayong
balak nga sulaton
nga kon dili kini nimo masulat
mawa rag iya
morag kalag sa imong tatay
molabay lang
kalit ra pod nga mawala
nagtoo gani ka
nga dili to tinood
busa padayon sa og sulat
bisag nagkasayopsayp na
ang imng spllling kay kaliabangomn
na jud ka kaayo pog
moagawa naa ang immag
tae....

ex sus me...opppps...
misiplit na jud ang igit
mantsa sa imong
brief...

2010/05/28

ilusyon

kaning panaw nga sukwahi
salunggat sa nagtuyok nga
ligid sa kunabuhi
aron magmadaugon
nagkinahanglan ug pako

untitled

sa balilihan,
pasidaan sa agbon
duol na ang unos

may kalooy ba?

May alingawngaw
ang nangagi nga gisalindot
sa kangitngit

hinumdumi,
nga ang makanunayong
pagpatak sa talithi
motipak sa balibato
sa kamatuoran

tuguti,
nga ang kalooy sa nasamdan
dili badbaron nga dautan,
bisan ug sa yutang-bunbunon
gisabwag ang tipasi,
sa gugmang way katumanan

ang pagpaabot

dili baya usab lalim anang magpaabot ka
anang walay klaro
ang imong lig-on nga lawas gasandig sa poste
sa imong likod ang bongbong nga nangatangtang na ang pintal
sa lugar nga walay ngalan walay tawo walay kisaw
mora ka og namasol sa sapa nga walay isda
ang mga langkay naglutaw nga morag mga patay
nagpaabot ka sa panahon nga haskang kusugang pagkapalid
morag doldol sa hangin
morag dahon sa ipil-ipil nga gidagit sa dakong baha

daghan kag gihunahuna sa imong pagpaabot
siya nga imong buhusan sa pila ka balde nga kalipay
siya nga molup-it og papel nga tagsa ka libo
sa ilalom sa imong habol sa dakonga katre nga dili inyo
pagkahuman sa usa ka pakighinabi
lalom kunuhay, duot kaayo, apan wala'y nadutlan.

2010/05/27

unsa ba ang akong giingon nimo Inday?


giingnan ko na ikaw
nga daan
nga kining tanang puros
mga mugna lamang
sa hunahuna

ang mga balak
sama sa usa ka lalaki
nga nagtabon sa
iyang ulo
anang asul nga
hanig

ayaw tan-awa ang iyang
mga mata nga
gitabonan
ayaw ukba ang dughan
nga nagbongbng
og kasingkasing

kay basin makita mo
ang mga bakak
nga tinood
kay basin og sa imong kalibog
makaingon ka
nga lisod nang
bulagon ang tipasi sa
puti kaayong lusok
sa humay
nga perlas sa lalom
kaayo nga dagat

naanad na ang kalibotanan
sa mga bakak
og dili na kini andam
sa hilom nga kamatooran
wala na kini kasinati
sa kagot
sa iyang kalipay

2010/05/26

didto sa among suba kaniadto


didto sa among suba kaniadto
nangaligo kami nga hubo
wala ang malisya bisan og
tag-as na ang among mga bungot
og bulbol

ang balikog nga oten ni dadok
wala niya kini gikaulaw
ang pisot nga si bagti
maoy siging masurahan
ang kang junior haskang gamaya
morag mongos kadak-a
ang kang pedro maoy dako
mora og sawa
ang akoa morag limatok nga
nagluko sa tunga sa akong paa
ang kang simon makalibog
loyloy apan hagtik

tin-aw kaayong ang suba
og ang tanan namo makita
malinawon ang kalibotan
putli og ang panaghigala
tinuoray og wala ang pagbiya
nanaghiusa ang himaya
diha sa paghubo sa diwa

pagkahuman namog kaligo
didto sa malinawon nga suba
magbulad kami sa among mga lawas
atubangan sa adlaw
hay-ad ang basa nga mga dughan
duha ka paa og hiyak nga tiyan
nga gihangop sa sa mga kamot sa adlaw
didto sa lapad og habog nga pangpang.

kaganihang buntag

kaganihang buntag
naghisgot siya kabahin
sa aso
sa kwarentay singko

nangutana siya kon
tagpila ba ang
kinabuhi sa usa ka
tawo
kon tagpila na ba
ang usa ka litro
nga gasolina og
pila ba ka litro ang
kinahanglan aron dauban
ang daotan

kaganiha humot ang
aso sa
kwarentay singko

nakapangutana siya
kon maundang ba ang
kaso sa iyang tulo
ka anak nga mga lalaki
kon mawala na ang
testigo og ang batang
babaye nga nagtudlo
kanila nga nagtamas
tamas kaniya didto
sa ilalom sa kanipaan
didto sa katunggan

ig-agaw ko siya
og pag-umangkon ko
ang tulo ka mga
lalaki

gitubag ko siya nga
ang aso sa
kwarentay singko
dili gayod makumkom

asul

lima ka lintoy
nga asul
sulod sa asul
nga lawak nga
dunay upat ka
bongdong

lima ka asul
nga lintoy
lima lang
og walay kulang
itom nga kabayo
unsa ba gayod kini
bulok sa yuta
nagpaingon kanako
kusog nga dagan
ako kining sakyan
ako ang iyang dalhon
paingon sa kahaponon

itom nga kabayo
sakyan nako
unya manglupad
ang mga abog
paingon sa langit

kahoy nga nagsiga


duha ka kahoy
nga nagsiga
apan walay pagkasunog

morag tuba
nga nagbukal
apan wala moinit

dili mapaslot

2010/05/25

balak ala aldo krass

kon magsiga
ang kandila
pwes lamdag

kon mapalong
na kini
pwes ngitngit

unsa pa go'y
laing hisgotan?

ang mga cowboys


ang mga boys nga
cowboys
naglisod og sabot
unsa ang
brokeback mountain

gipangutana nila ang
ilang mga papa
og ang ilang mama
unsa ba
ang brokeback mountain

gisugdan sa inahan
pag-ingon
dunay duha ka mga lalaki
nga nagkaamigo
nanakay silag kabayo
didto sa bungtod
nga ang ngalan
Brokeback Mountain

natuk-an ang inahan
unsay isunod...

misumpay ang amahan

tigmo tigmo agukoy
unya na kita mag-asoy!

paghinuklog

niining larawan
makita mo ang babayeng
nag-inom sa baso
anaa siya sa tunga
gani gialirongan siya
sa daghang tawo
apan usa lang gihapon
siya ka langkat
layo
wala siya diha
bisan pa og naa siya
sa kadaghanan

morag ikaw.

2010/05/24

haiku

miiwag sa gangsa
human sa sawumsom ~
dan-ag sa kahapunon
adunay panahon
nga daogon lamang
ang kinabuhi diha
sa lapa-lapa

ang mga uhay sa
kamatayon
mahimong giokon
niini

nag-ugot
ang relo
basin duna
kini kasuko
kanimo?

naay gugma


ambot og
nasayod ka na ba
anang gugma
nga ang may
kalabutan mao
lamang
ang mga tiil

kanang walay
labot ang kasingkasing
naminhod ang akong
mga braso
nga imong gikatulgan
kagabii.

kalinaw

walay kum-ot
ang samin nga suba
nakighinabi
sa panganod

haiku

duyog sa suba
nalum-it ang larawan ~
ning mga sa-ad

haiku

ning kagabhion
duyog nako pag-iswag ~
daktol nga bulan

2010/05/23

ANG IMONG BATASAN


naa kay batasan
nga makapatandog sa akong
balatian
kanang bisag asa ko mosunod ka
nga malipayon
dili kaayo nako maaninag
kay wala kay ikog
apan makita nako sa imong
pagpaabot kon bisag asa
ko
sa kusina samtang mokaon ko
naa ka sa akong tupad
og tungod lagi kay dili ko ganahan
nga imo kong haployon
og paraygan
kay lagi usahay morag init
ang akong lawas
kuyog sa init kaayong panahon
diha sa tumang kaigang
imong gipadap-ig ang imong
usa ka kumagko
sa akong tudlo
nga og kon mohungit ako sa akong
luto mora kog mabukog
sa imong pagkalumo
(sweet ra kaayo sama's dugos
gentle ra kaayo sama sa balahibo)
karon ania ako sa akong
computer
naghangad sa usa ka balak
nga gusto na usab nga
isulat
naa ka sa akong ubos
sa akong lingkoranan
imong gidap-ig ang imong
ulo sa akong tiil
diin ikaw nahinanok
sa pagkatulog.

ako ang akong itoy

haskang
atata sa dihang
nagsuroysuroy ko
sa baybayon
bitbit ang akog
itoy
sa dihang dunay
seksing babayeng
pagkprankang
nanaghoy og
nanitsit pa gyod
og miduol
og miingon nga
pagkagwapo gayod
sa akong
itoy.

nauwat na unta
ko apan
wa moundang si
sexy
mikuha sa iyang
cellphone og
nangutana kon
unsay number
sa akong itoy
og miingon
pag

" i'll give
it my
missed call"

sa inyong paghandom


mahimong sa inyong
paghandom sa akong mga buhat
puhon puhon
oran oran pagkahuman sa akong
pagbalhin sa laing tampi
sa akong kagabhion
paingon didto sa kahayag nga
walay pagkapalong
sa kabuntagon nga dili na nato
maingon kon syangan
mahimong inyo akong himoan
og usa ka hulagway
nga sama sa akong nawong
mahimong inyo kining sementehon
apil na ang akong antyohos nga
itom
mahimong ibutang kini ninyo
sa usa ka lawak og inyong
palinyahan sama ni mao tse tong
o ni linen
mahimong inyo pa gani kining
patiketan
og inyong butangan og karatula
og uban pang mga parao
nga magsugid sa akong nasulat
og nabuhat
gusto ninyo akong lipayon human
sa akong dakong kasubo sa
akong kinabuhi nga nalata
sama sa panit sa saging
didto daplin sa labat nga
kawayan
apan palihog kon mao man lamang
kana ang dangatan sa akong
kimpang og lumping nga kinabuhi
ayaw ako og sementoha
mas malipayon ako nga inyong
hikalimtan
sama sa usa ka ok-ok ng natihaya
didto sa banggera
og wala kabangon
mahimong inyong pidyaton
og ilabay didto sa gawas
aron kan-on ako sa tiki nga
mihalok sa yuta usa ka alas sais
sa hapon niana
og niana natuman ang akong
mga damgo
nakapabusog gihapon ako
sa usa ka gutom nga
nilalang nga sa yuta mibalik
human sa iyang pagkalaglag
og mihalok niini
aron makabalik sa iyang
gigikanan.

2010/05/22

ang magbabalak isip tiglantaw lamang, tigsugid

tiglantaw lang ko
kon mahulog ang tasa
sa daplin sa lamesa
nga puno og ininit tubig
nga gihanigan og
panapton nga gibitad
sa bata nga
wala'y buot
og unya nahulog ang
tasa og unya
nalaphawan ang bata
ako kining isugid
kay mao kini ang
akong nalantaw

isip magbabalak
wala ako'y labot

mao ba kini ang imong
buot ipasabot kanako
Elsa?

kon nganong nalaphawan
ang bata
kon nganong nabuak
ang tasa
kon nganong naglanab
ang ininit tubig
sa salog
wala na ako'y labot niini

mao ba kini ang imong
buot ipasabot kanako
Busyo?



karaang larawan

lima lang kami
nga nahuman sa BS Chemistry
didto sa Ateneo de Davao University
Magna cum laude ko
sa tinood lang
gisayonan, dili sa panggalot
wala ko ganahi anang mga
atoms o g molecules, dili man god makita
ambot, usahay ang kinabuhi
walay buot, nganong nasulod
ko sa maong lawak
wa na ko kahinumdom sa mga
katarungan
seguro libog sab ang akong kinabuhi
wa kabalo kon unsa
ang gusto
basin gani og gusto lang nakong
magkarpentero
sumala sa imong
gisulti kaganiha
nga ang kinabuhi unta
yano man lang,

lima lang kami sa maong
propesyon
ako kanang niwang nga lalaki
nga nag-ubo
sunod si Rebecca, ambot og asa
na kahan siya gidala sa
daotang hangin,
sunod si Shirley, ang babayeng
nagtangag og swerte
nagtudlo na og high school chemistry
sa California (akong i chat og otro
dugay nami wa magkita
maayo gani kay naay Facebook)
sunod si Sol, mubo nga babaye ni
kusog mokatawa, naminyo og
lalaking ang apelyedo Keesey
apan dili amerkano,
tua na sa America, nanimpalad pod
kuyog sa iyang bana og duha
ka anak nga mga lalaki
ngakita mi dugay na sa davao
morag natigulang pod siya
(daghan kahag problema,
dunay nag-ingon nako nga kuno
siya battered wife, ambot og tinood
ba, tsismis lang seguro)
ang last si Tess, dunay anak nga
gwapa, beautiful version niya,
nurse na,
walay bana si Tess, apan sa
akong tan-aw mas malipayon
siya, hilomon man god,
di ta masayod kon unsa ang
naa sa iyang sud.

gusto ta nako nga kining akong
pagsulti bahin niini
himoon nakong balak
wa koy katakos paghimo og
balak
kabahin sa kinabuhing
matood
kabahin sa uban

akong sulayan puhon ang
kabahin sa kinabuhi ni
Fr. Ted Barcelon, kanang
naa sa among tunga

apan dili pa karon, og
ang kabahin sa akong
kinabuhi,

ah, basaha na lang ang
uban pang mga
balak,
ang ubang mga tigmo
tigmo agokoy
nga ugma ra baya pod
mag-asoy.

lubi



usa lang
ang kinahanglan
aron mabuhi
sa isla
sa kasakit

usa lang
ka punoan sa
lubi

kahoy kana
sa kinabuhi

ang tanan
magagikan
sa usa ka
punoan nga
lubi lamang

bisan gani
og wala ka na
sa akong tupad
didto
sa isla sa
kasakit

sakit
pamation apan
mao ang tinood
nga kon wala
ka na didto
kon ugaling
molupad ka man
isip usa ka
langgam
paingon sa
syudad sa kalipay

makita ko
ra ang
isla sa akong
kalipay
silong sa usa
ka punoan nga
lubi lamang

mga yamog sa bulak nga amarillo sa kaadlawon

nindot ang mga yamog
morag mga perlas
bugnaw
pagkabugnaw gayod
sa akong mga kamot
nga misalod sa
mga yamog nga anaa
sa mga puti nga gihay
sa usa ka bulak

pagkaanindot
niining kadyot
pagkaoran-oran
mawala ra man

mabulukon


pagkambulukon sa kinabuhi
pagkamaanyag
ang iyang mga bulak
pagkapula morag aping
sa usa ka dalaga
ang iyang mga alibangbang
pagkaanad
nga mitugpa sa akong palad

pultahan nga sarado


sama sa imong
kasingkasing
sarado ang pultahan
sa balay sa gugma

ikaw nga naa sa sulod
mao ang piniriso

ako ang iring
sungkaban ang ilang
giapelyedo nako
dili ko sungkaban
ila lang kong gipasumanginlan
gikiha ko
nga ako kuno sungkaban
dili kana tinood
giinitan lang gyod ko
sa mga iro
nga akong nakawrasan
kay wa ko kaantos
nga ila kong
gipaghot nga ako kuno
sungkaban
napriso ko og usa
ka tuig
tungod sa pasumangil
nga ako sungkaban
ilang gihisgotan ang
balarete nga tinap-an
didto sa banggera
nga nabyaan
nga ako kuno ang
mikawat og pang-it
kay gidungog kuno
ako nga sungkaban
apan wala gayod ako
nakakaon bisan og
anino na lang sa maong
tinap-an
ako ang iring
nga napriso sa usa
ka butang-butang
wala'y abogadong iring
nga kanako nakatabang
walay silingan nga iring
nga kanako mitestigo
ang mga iro lamang
ang nakadaot sa akong
iring nga kapalaran

wala'y hustisya alang
kanako nga iring
lamang ning iro nga
katilingban

2010/05/21

sa dihang imong gilumsan ang isda sa aquarium


nakatawa ming tanan
sa dihang imong gisulayan
og lumos ang
mga isda sa
aquarium

morag ako nga morag bao
nga imong gilabay sa bugnaw
nga tubig
sa suba nga akong kalipay.

ang gwapang babaye sa baybayon


yellow ang panty
yellow ang bra

sa gwapang babaye
didto sa baybayon

sa boracay nga akong
nakit-ang nag-inosara

pagkamingaw sa babaye
wala na kaila og unsa

ang pahiyom
ang kalami sa gugma

ang kahumok sa kutson
ang tingog sa katre

pagkapait: wa ko kaila niya
wa sad siya kaila nako.

mga bato


akong feeling
kitang tanan nga ania dinhi
morag mga bato

walay kamot nga mopakpak
walay baba nga motingog

ang ania dinhi mao ang tumang kahilom
sa mga bato sa nawalang baybayon

silang duha

si erwin
sa elementary pa mi
kahinumdum ko
dili jud mohawid og yuta
kon mag
gardening kay
dirty

si dioning
as always kadtong diri
pa sa pilipinas
deny to death

maayo unta og karon
didto sa america
happy na sila forever

2010/05/20

ang gipinta nga nangitag titulo

dawat nimong
dili ka kaayo kamaong
mohatag og ngalan
sa imong
gipinta

kulang sa pulong
dili kay sa kulang sa
hunahuna

daghan kog
ikatampo sa imong
mga kakulangon

kadtong bata nga
miawit sa lata
sa milkmaid

kadtong kugita
nga mibugwak
og tinta
sa imong balak

kadtong gitarista
nga nakahubo
sa iyang karsones
sa iyang
kaigat
og ambak
ambak
sa stage
morag nakuryentehan
ang iyahang
lagay

kadtong tawong mahilig
sa pula
pulag kalo
pulag amerkana
pula pod kaayog mata

kadtong wala
mahuman nimo
dunay duha ka mata
og usa ka baba
apan
wala pa'y nawong

unsa ba ang
titulo aning tanan?

ah, saksak
sinagol na lang

sama sa atong mga
kaagi
dili mahakop sa baba
sa atong
atay.

ANG GIHUNAHUNA SA INAHAN

ang gihunahuna sa inahan
og sa amahan
mao lamang ang mga baba
nga ilang pakan-on
sa matag adlaw
ang ipatula sa ilang
mga pispis
sa ilang mga salag

mahimong ilabay ang
prinsipyo apil na ang edukasyon
mahimo nilang
kumuton ang kasingkasing
wad-on ang baroganan
kuhaon ang mga labat
sa ilang mga hunahuna
madala lang ang
ang makapabuhi sa ilang
mga apasumpay.

reyunayted

si nene og si roger
reunited kuno together
ambot og unsay tinood
aning ilang larawan

(taod-taod ako ra
nya ning sumpayan)

si miming

si miming miluklok sa ilok
ni dodong
nga natulog kay nagdamgo
ni inday
si miming giganahan sa baho
(humot diay kuno) sa ilok ni
dodong
nahikatulog si miming
nagdamgo sa kainit sa lawas
sa ilok ni dodong
nga nagdamgo nga gihagwa
siya ni inday
ingon ani baya ang kinabuhi
sa mga gugmang piang
nagkatuiris, nagkabali,
nagkabalios, nagkawiring
si miming ganahan ni dodong
apan si dodong ganahan ni inday
nga ganahan ni miming

apan usahay nindot, lami, tam-is
si dodong giganahan ni inday
nga giganahan usab ni dodong
sampak, morag yabe nga sebo
sa kandado, nga dali rang maabre.

og si miming ang namatay sa kabaho
sa ilok nga baga og bolbol ni dodong.

silang duha nga nahigugma

nangawala
nangawala sila sa ilang kaugalingon
nakaplagan
nakaplagan lagi nila ang ilang kaugalingon
siya diha sa iyang liog
siya pod diha sa iyang dughan
silang duha nagkita sulod
sa ilang mga wait
sulod pa jud sa ilang mga dila
hapit sa baba
og tilaok
lapos sa ilang kasingkasing

(unta di na lang pagawson
sa lubot)

2010/05/19

human na ang adlaw

nahuman na gayod ang
adlaw
nanirado na ang langit
gibuhian na niya ang
mga maulagon
ang mga nanghalab
sa unod
nga karon nagsuroy
suroy na sa mga lawak
nga ngitngit nga iya
sa kagabhion
daghan na usab ang
maghangos didto
ang moagulo sa kalipay
ang mapang-it sa ilang
kaugalingong wait
ang mabilangkad sa
ilang mga paa og ang
molatos niini
daghan na usab ang mga
bakak og pasalig
daghan na usab ang
makasampit sa Ginoo
ang makasyagit sa
mga pulong nga mabungat
lamang diha sa langit
daghan ang mag-ingon
nga nakita na nila ang
maya nga nawong sa
atong Ginoong Dios
og ang ikaduhang Bathala

daghan ang mahikatulog
kay gabii na usab

nahuman ko na ang
daghan kaayo nakong
mga mugnang balak

karon, matulog na ako
hapnig ang akong mga damgo
banig ang akong mga kalipay
habol ang akong mga pagbasol
ugnan ang akong konsyensya
unya momata na usab ako
aron handomon ko ikaw

unya dapit karong oran-oran
human nakog remedyo niya. (dili rhyme, noh?)

human nakog kaog durian
karong oran-oran

si Iyay nga ulay nga mangkay


dunay lalaki
nga balhiboon og dughan
nga itom kaayog ilok
nga bunguton nga
ang mga mata
morag lumo sa karneng
baka nga ang buhok
utog pa sa iyahang
bukol diha sa ubos
sa iyang paa
nga ang iyang mga
bukton haskang lig-ona
nga maoy kinaham
ni Iyay (ngan Maria)
nga ang pahiyom
makapahulog gayod
sa panty niya
sa silong sa veranda

kini si Iyay nga may pagkamaldita
nakabungat baya og "Tagpila ba?"

akong bation sa dihang makasulod kog langub

dili ko na unta kini isulat
apan isulat na lang
adunay pagbati kabahin
sa langub nga dili jud kapugngan
kini ang akong gibati
nga dili sab nako mapugngan
nga dili sab nimo mapugngan
kana bang pagkahuman mabasa
og mauga naunsang hitaboa nga
kitang duha, pwera buyag,
pwera bastos, sa tinood lang,
ambot, og ngano, walay labot
ang mga kabaw og kabayo,
ang mga budbod og bingka,
ang mga kutsara og tinidor,
nganong, ayaw og saba,
ayaw ipanabi, ayaw itug-an
ni mama og papa, akong
ikumpisal, ambot, kon
nganong mosulod kog langub
nganong mautgan man ko?

blanko nga baybayon alang kang Lubi ang Misteryosong Punoan sa Kahoy sa Kinabuhing Migamot sa Tumoy sa Langit

Lubs, palihog og uli
sa larawan sa baybayon
kay morag
haw-ang na ang
atong
patigayon.

kon dili na nimo iuli
mahimo bang alisdan
na lang nimo og
babayeng gabilangkad
kanang wala magpante
kanang wala magsaya

kadtong nagkarsones!

iring

dili nako hisgotan ang iring
daghan na ang naghisgot niana
apil na ang mga iro
nga kontra gayod ang iring
ambot og ngano
dili nako hisgotan kon unsay
buluhaton sa iring
kabalo na ang mga bagtok niana
dili na nako tawgon ang iring
kay naa na na diha
gani nagtan-aw man kana kanato
basin duna tay ihatag nga
piniritong pirit nga isda
akong hisgotan si Rodel
nga imong ...ahem, nga imong karaang
ahem, nga imong gi-ahem ahem
nga sige mong ..ahem, ahem
dats da way ahem ahem i like it,
nga kon makalitan
labi na og ma-slide sa panit sa
saging
ang favorite expression,

(ahem, ako ni
kay ang imo "I guess!" baya)

"Iring!Iring!"

(a roses, Charing?)

* kining balaka lingaw lingaw lang
walay daotan nga intensyon og walay giigo nga nilalang
apan kon duna man

ahem!)

nanampiling


sa hamubong pagkasulti
dodong
wala ka na mangilabot
dili ka na ganahang mamati
mao nga ikaw
nanampiling
full time ka nianang
pagpanampiling
mora bag dako kaayong
suliran
mora bag matabonan ka
sa dakong kalo nga puthaw
ning kalibotan
kapoy na,
labad ang imong ulo
kaihion ka
apan walay pader dinhing dapita
kalibangon ka
apan walay kasilyas
dunay kasilyas apan walay tubig
walay papel walay ginit
walay bato
bisan na lang untang
sanga sa palkata
nga imong kaid-idiran
sa imong dakong tubol
nga problema.

usa ka langaw
usa lang kini siya ka langaw
kaganiha lihok kini nga langaw
nga nagsaringsaring sa akong
sud-an nga tinap-an nga
bantaan
nga akong gihurot og subad
sa akong panihapon
kuyog sa usa ka
banhihado nga luto
og okra nga gilaphawan
nga ginusnos
sa ginamos nga
bulinaw nga gikan
pa sa sindangan
nga pinalit ni oscar nga
uyab sa akong amiga nga
nagnegosyo og kamay og
mantika sa merkado sa
katipunan
nga hapit masunog ganiha
kay dunay hubog nga
milabay sa sigarilyo dapit
sa namaligya og menudo
nga gasolina nga unta gidili
man kini sa mayor kay
lagi peligroso kaayo nga
wala pa jud patoo og busa
nangasuko ang mga tawo
nga nagubot kay gikapoy
intawon og hakot sa ilang
mga paninda sa sunog nga
nasumpo ra sa mga bombero
nga maayo gani kay miabot
dayon kuyog sa bag-ong firetruck
nga gihatag sa gobernador
nga midaog sa iyang ikatulo
nga termino sama sa among
mayor nga hinay kaayo ang
kontro.

yuna pa, usa lang ka langaw
ang akong hisgotan ning balaka
nganong miabot na ba
kita bisag asa?

ah, langaw nga wala na
maglihok
dili na kalopad
morag alom nga mitapot
sa aping
ah, langaw nga patay na
unsa pa bay pulos nga
kini atong hisgotan pa?

balik ta sa sunog nga
wala madayon sa merkado
akong nalimtan paghisgot
nga nag-away si Lorna og
si Jerry, ako rang ipaila-ila
nimo puhon kay lagi si
Jerry sa dihang nagubot
na mitabang man noon
og hakot sa mga butang
ni Epifania, ang dato nga
biyuda nga namaligya og
mga alahas , blah blah blah
daghay pa unto pero moundang
sa ko kay kalibangon na man
ko kaayo

di na ta mobalik sa langaw
nganong naa pa na diha
nga unta patay na man na

kon wa ka magdali
kuyogi ko sa kasilyas
maghisgot kog
tae....

Atake Sa Kasingkasing


Nagdali aron maapsan ang bus
Unya mibalik kay ang selpon nalimtan
Mikaripas na gyod aron dili ka mabiyaan.
Gihangak, mihuot ang dughan, natumba,
Ug nabundak sa semento imong ulo.
Nabiyaan ka.
 Sige na lang
Kay miabot
Gihapon ka'g sayo
Sa imong gipadulngan.


Akoy
2010.5.19

Pagpadayon Sa Kinabuhi



Ako magpakabuhi
Alang sa pagpadayon sa
Kinabuhi.

Akoy
2010.5.19

bak

gusto unta kong mosulat kabahin sa E**t
para sa akong balak karong hapona
apan wala na lang nako dayona hadlok kog
mabastosan ang uban dinhi,

Bisaya ko, buotan, dili bastos
sa pagsulti nga bisaya ko, but-an og dili bastos, wala kini nagpasabot
nga ang mga dili Bisaya bastos,
sus dili na maoy akong ipasabot,

ah, aw,

ok, balik ta, Bisaya ko
malinawon

oops, dili sabton nga ikaw nga dili Bisaya
dili malinawon

ah, hmm,

ahh, ok, akong undangon na lang pagsulat ning balaka
karon dayon
samtang wa pa ni
nakapasakit sa uban


Susmaryosep, balak ba akong tawag ani?
dili na maoy akong ipasabot
dili nako tinguha nga kini tawgon ug balak




2010/05/17

sa kataposan
iro mo na lang ang
imong tinood nga
higala,

diha sa lawod
sa imong kinabuhi
tupad mo siya
kuyog kanunay
sa imong
panglantaw
gahalhal
nganong mogamit
ba kita sa kahayag
aron pa makita
ang kamatooran

dayag ba nga ang
kamatooran anaa
nagpahipi sa kangitngit?

ingon sila gamiton
ko ang kahayag nga
ania sa akong kasingkasing
aron makita ang kamatooran
sa unsa ba?

ang kamatooran ania ra
dinhi sa akong hunahuna
wala'y masayod niini kundi
ako lang

ang kamatooran ako ra kini
wala ka'y katungod niini
ania sa akong kasingkasing
magpabilin bisan wala na
ang kahayag ang adlaw
ang lampara ang posporo

sa dihang mibiya ka sa lamesa kay mangihi


serious
wa'y imik
nakatiming si alma
sa usa ka take

mitutok ko
sa dug-ot nga mga kahoy
sa bulahan
sa unahan

nagwarawara ang
akong mga
t.o.t.

gihaw-asan nako
og mga tae
ang akong
septic tank nga
utok

samtang ikaw
mibiya sa lamesa
kay mangihi

basin nalibang
kag taga
haskang dugaya
man god nimong
mibalik

kaulion na ko
kapoy ang
sosyalan dinhi
daghan kog
mahimong
mga sugilanon

ning akong
pagkahilabtanon
sa kinabuhi
sa akong mga
ig-agaw og
mga higala

sa tinood lang
di ganahan og
coke

ikaw ang nagbutang
ana
sa laing bahin
naunsa sab ni
si Vina nga
gahinuktok
man pod

nagmenopause
kaha?

hello gaw


ah, lonely table just
for one ra man
hain na man diay gaw
ang uban

aha naman si roger
ang imong pinalanggang bana?
hain na man si edu
ang imong bugtong nga anak
hain na man ang
imong pinalanggang
daughter-in-law

duda ko gaw
sa imong pahiyom
morag hilaw apan
mora pog hinog

dunay gaingon
misamot na man kuno
ka og kaseksi karon
unsa kaha gaw no
ang sunod nga mahitabo
sa imong
hataas og halapad uyamot
nga sugilanon?

aduna kahay panagsumpay
sa kadena sa gugmang naputol?
aduna na kahay hulip sa
kahaw-ang sa kasingkasing
nga iyang gibubhian?
aduna kahay umaabot nga
ganti sa mga kasakit?
unsa kaha ang kamatooran
ni Roger og ni Ferang?
Dula dula ra kaha kining ilaha
og tininood na?

gaw, sensya na
hilabtanon ang writer.
sa tinood lang
wala'y gisulti ang mga bato
kanako
kadtong akong gisugid nimo
gahapon
kabahin sa katig-a
sa ilang kasingkasing
og sa ilang kahilomon
og pagkawalaypakabana
kon naunsa na ang kalibotan
ako ako ra to
ganiha naglakaw ko
akong giagian sila
akong gilantaw pag-ayo
mikuha ko og usa
kanila
bato lang gyod gihapon
kon makatutok
mora bag
ako ang patay
og siya ang
buhi nga di kabalo
nga mamilok.

Panginhas dire