6/29/2015

mga samin sa imong kinabuhi....

walay gihimo
walay miabot
sa walay
katarungan

ang itom nga sulom
ang pulang hulmigas
ang balas og mga
bato
ang balod og ang
baybayon
ang pangpang og
mga patag
ang mga bungtod
og mga balilihan
ang mga buak nga
bildo og
mga botelyang puno
pa sa bino
ang buling sa agtang
ang bag-ong
bugas-bugas
ang bintanang sirado
ang pultahang piang
ang trapohan sa tiil
ang alfombrang uga
ang sabon nga humot
ang ilok nga lagom
ang paang puti
ang ulat sa sampot
ang luy-ang tudlo
ang buhok nga gasanga
ang ulan nga walay
undang
ang hulaw nga
gahig ulo



pamati, batia,
hunong sa makadyot
lantawa ang imong
mga mata

silang tanan mga
samin
sa imong kinabuhi....

sultihi ko kon wala ba usay kasakit ang mga gawasnon

mga salampating
gihawla sa pipila ka
tuig

karon nga gawasnon na
kamo

mamati ako
kon mas nindot ba
ang kokorokoro
ninyo karon

magpaabot ko
kon makakokorokoro pa
ba kamo?

sultihi ko
kon wala ba usay kasakit ang
mga gawasnon

sultihi ko puhon
kon ang kapait og kapit-os
anaa ra ba
sa mga piniriso
gamiton mo ang
mata
sa isda
nga kuno makamaong
molataw
sa kalibotan isip
usa ka bola diin
ang tanan
masulod og
makita

motiglom kas
kinalawman
aron unta itago
ang tanan

gamita ang mata
sa isda
sulayi kon
dili ba ikaw
mahikalimot
diha sa
sa kaasgad.

kon mahimo

kon mahimo
palihog kog
himo og kumo
aniay akong aso
kuhaa
kon mahimo
ikumkom
pag-ayo
sulayi lang
ayoha
sulayi lang
kon sa imong
kinumo
makumkom
mo pa ba gihapon
ang aso
ning akong
kagahapon...

sa payong nga nakalimtan

inig kahuman
ning ulan
magsinaw ang 
kalibotan

walay mabasol
sa payong nga 
nakalimtan

hubkas

mibuto na ang hubag
milanab ang nana
morag bulkan nga
mibuga sa tanan

ingon ana ang gitagong
kalipay.

6/28/2015

buta gayod ang gugma

kay ang gugma
matang nagpiyong
bisag ulan
di mangitag payong
sulayig buka
mawa ang gugma

kadtong nagbuka
mangingilad
patakag bungat
nga siya gugma

kay ang gugma
gikapoy
sa imong hilot
nanimhot

lahi kini siya
gilabay ang kaalam
giputol ang pako
gibanlas ang utok
walay rason
nagpaitok

di ko gustong ikaw
ang gugma
apan nganong ikaw
man gihapon?

haskang yawaa
haskang bugoa
ako ang gugma
kanunayng buta


piniit sa kaulag

kanunay
kang adunay sapot

putos na putos ang
imong lawas
sa daghang sapot

igang
init na ka kaayo
basin puhon ikaw moboto

ayaw palabig tago diha
sud sa imong sapot
natuok na kaayo ang
kalipay
di na kaginhawa ang
gugmang
piniit sa kaulag

pagpili sa saktong lugas og lugar sa kalipay

ang lugas sa kalipay
dili sama sa lugas sa humay
nga motubo sa
nagbasa nga yuta

wa mo damha nga kini
mitubo 
sa luna nga imong
gikahadlokan

kon lig-on ka ugaling
ayaw na paabota nga mogamot kini
ibta dayon
sa dili pa ulahi ang tanan

dili tanang kalipay makalipay
dunay uban nga imong ikamatay

6/27/2015

alang da sa mga wala intawon yamo

kadtong mga gagmayg luna  ning kalibotan
o dili ba kadtong mabaw rag sabaw
sa kalipay

kon ako pa si bathala 
akong dugangan og hatag
nga mas labaw pas imoha


ang usa ka dangaw
gitamnan niyag kahoy nga
ang gamot
dulot sa kinalawman sa yuta
nga abot pa ganis
tinais mga bato

ang tasa nga puti
sakto sa kapuno wala niya gipaawas
ug gikan sa akong gilingkoran
mipahiyom ang ngabil sa
akong kasingkasing

selpraytyos

nakita nako ang yakmo nga babaye
nga nag-atang sa kilid sa haligi

nanglabay ang mga nangabot bitbit
sa ilang mga bagahe


nipis na ang iyang buhok
apan ang iyang mga ngipon wala
mangatigpod


gusto unta nakong lantawon ang
iyang mga mata kon mao pa ba gihapon kini
kaniadto sa dihang sigi pa niya akong
ipamalihog sa dili nako gustong buhaton


apan nagdali sab ko
bug-at sab ang akong dala
unya ang akong mga kamot
naglaylay


usa siya sa mga dili nako gustong mahinumdoman
apan unsaon ta man
mas daghan pa ang sama kaniya sa atong katilingban


sila ang kanunayng naghunahuna nga sakto
sila sa kanunay
bisan kanus-a og bisag asa

og ang langit nga gisaad sa Ginoo
para ila lang gayod kuno

semseksmarids

sa kadugay sa panahon
sa kahalayo sa panaw
sa dihang nangamatay na
ang mga tiguwang

mao pa gayoy pagkakita sa
haring upaw sa usa ka
bangaw


ang obispo nagmagahi
sa pagsulti kabahin sa kaanindot
niini


kadtong wa kadawat sa mando
miingon nga ang bangaw hinimo
kini sa usa ka demonyo.

mga magtutudlo

ang kalaay sa lima ka tudlo nganha sulod sa bulsa sa imong karsones
ang kasakit sa patay nga kuko nga hapit na nga matangtang sa kumagko
ang gadahonog nga kaaslom sulod sa imong tiyan nga kusog pas lilo
ang pagramparampa sa mga buyog diha sa sulod sa imong ulo nga gitabunan sa maanindot nga pinahapay sa imong gitina nga buhok
ang kanunay nga pagrumbo sa mga dos por dos nga kagahapon diha sa imong batikulon
ang samdan nga kasingkasing nga morag walay pagkaalim

usa sila sa mga magtutudlo kon unsa puhon ang tiunay nga kalipay
samtang wa pa miabli ang pultahan sa langit

ang ubang mga magtutudlo wala pa miabot ug buot na usab makig-ila-ila kanimo
gidungog nga ang ilang mga disipulo kaniadto mitapot sa usa ka ang-ang lamang
ug wala na makaila kon unsa ang mga busilak sa adlaw.

6/20/2015

mahimo pa ganing ikulit sa bato.

dili tanang gipatik nimo
nalabyan

kadtong kanding nga bungoton
nga naputlag ikog

mitagbo to nimo

usahay ang mga giukit nimo
mao ang umaabot nga unta
gusto nimong mahitabo

gilabyan ka man lang

nag-ugtas kas kahaw-ang
apan unsa bay mahimo nimo niaanang
wala

wala.

pila na ba ka tuig nga ikaw
buhi lang gihapon

natino nimo nga ang tawo diay
moagwanta sa kasakit nga mora kining
tubig nga ininit ka kanunay gibubo sa
likway

nalaya man ugaling apan pagkaugma
human sa kaadlawon

mobalik na usab ang mga lunhaw nga
dahon

nga imong kutloon
isubak sa anino sa bulad nga naglangoy
sa dagat nga aso

didto sa imong kusina.

og kini imong gipatik, og kon aduna
pa may panahon nga mosibo

mahimo pa ganing ikulit sa bato.

ngano kaha?

makatawa ka
human sa pipila ka tuig
nga sa imong pagbalik
sa lugar nga naghatag kanimog
kasakit

sa nawong nga imong naibgan
sa lawas nga imong gikamingawan
sa halok nga imong gipangandoy
sa gakos nga wala matuman

sa imong pagbalik
karon nga layo na ang imong naabtan
unya nausob na ang imong panglantaw

makatawa ka
kon ngano kaha?

6/19/2015

naglantugi lang gihapon.

ang mga papel gapatong patong naghimo og usa ka dakong buntod sa imong atubangan.
ikaw usa ka bata namubo nahimong walay kahadlok

daghan sa mga karaang tawo ang nahiagom sa kamatayon tungod sa mga bukid nga papel.

ang mga kagahig ulo, ang kahalab, ang pag-away kabahin sa katigayonan mao kanunay ang
miabot sa imong lamesa

nagpanglingo ka, ngano ba nga ikaw nga bata mao may ilang himoon nga tighusay sa gubot nga
pahanoh

dili mo kini mahuman
ikaw ang ilang humanon

nagpanglingo ka. Kutob ra kini karon. Unya kon dili sila mahusay, sunugon ang mga papel.
ipabilin ang mga abo, unya sa ilang aso ikaw mokuyog.

namingaw ang lamesa. nagsubo ang naugdaw. Pagka-oran oran nadungog ang bag-ong nangabot
naglantugi lang gihapon.


pragmatismo


wa bayay kanaway 
nga molantugi sa dagat
kabahin sa makatagbaw
ug hilom ining bahandi
nga mga bulinaw

ang kaanindot sa kagimiting

inig kagabii moabot ang dakong lawod sa lawak nga mora bag tabonan ka
unya ikaw morag usa na lang usab ka bonhok

ang nakaanindot kay sa imong pagkabonhok sa imong pagkagimiting dili na ka
madutlan anang usa ka paglubong kay mas dagko man ang mga lugas sa bonbon sa
usa ka lawod nga balas

buhi ka
kay makaginhawa man gihapon

6/18/2015

basa na kaayo

bisan pag makamao na nga mosulti ang
ulan sa atong pinulungan
dili gihapon kini nato masabtan

basa ka naman god kaayo.

kwangkwang

kulang pa kulang pa
kulang kulang pa
kulang pa gihapon ang
imong pagpasobra sa
imong minugbo nga obra
de paporma

duha ka tukog

nakat-on ka baya
nalig-on man gani kadtong
ikaw ra
kaniadto

walay saktong katarungan
nganong kamong duha magmahuyang
sa inyong
duha ka tukog nga
sa nahibiling sagbot sa inyong
lawag

nanilhig

ang nag-inosarang poste

dili mingaw lantawon
ang  poste nga nag-inosara
sa kilid sa tulay
tabok  sa
sitio sa rizal

bibo man god ang iyang
kahayag
nga nanamin  sa
sabakan sa  hilom nga sapa

pusod

diri sa karaang
isla nanubo ang mga hagwa

hmm, mga
pulo ka tuig

ang mga hagwa wala
gyud mamunga

kadyot lang ang mga
udlot

ang kalipay mitabok
sa pikas isla

walay kisaw ang
mga bas

ang kahilom wa sab
mamunga

ang ilang mga udlot
kulungon

uga, apan adunay
kalainana

daghang gamot ang
kahilom

gilukop ang tibuok isla
nga namunga sa mga panganod

nga ang garbo mao lamang
ang mga luha

nga mihumod sa balas
nga nananga

ug mga kalig-on
samtang ang mga kalipay

giiway, sama sa
pagputol mos imong pusod


Ginoo

usa ka adlaw
gihatag na niya ang
imong giampo
human sa 50 ka tuig

bungag
singot ang
tanan

human og tubo
mikatol
gipaningot ka
misamot

usa ka adlaw niana
samtang
nagtugtog kas gitara

sa kalit lang
nawagtang ang tanan

ang bunga sa singot
ang 50 ka tuig

apil ang Ginoo

deshabu

mora kog sunoy nga
misuroy sa
balilihan ug sa kakognan

wa damha
sa way katuyoan
mibalik na usab ako

ug nangakha sa akong
agi

dunay gipangita
apan wa kabalo kon unsa

balik sa balay human sa lima ka adlaw nga pagpaospital

pag-abot namo sa mindanao
linaw ang dagat

kaganiha nagsamparay ang
MV Lady oF gOOD vOYAGE
labay sa
Apo Island

samtang nangihi kos CR
sud sa barko
wa kini matunong sa
onidoro

nagsuka ang babayeng
hamis og panit
sa tejeras

ang iyang tupad nga macho
naghagok sa iyang mga damgo


pag-abot na dapit sa Dipolog
paingon sa Puerto sa Galas
nindot ang talan-awon

sa usa ka puting seda nga panganod
nga mipurong sa mga bungtod

kabalo ko
atua na usab didto ang akong kasingkasing
morag alibangbang
nga nagpauraray sa bugnaw kaayong
mga gapnod nga gitayhoptayhop sa
asgad asgad nga hangin

kay ginoo ray magabalos

sakay sa taxing daan
sa driver nga ug siya pa
bad trip daw

haguros ang dagan
morag ang taxi mismo gustong
mamatay

ang iyang babayeng anak
abonohanan kunog type AB nga dugo
ang kaso
cancer of the blood
leukemia

15 ka tuig pa lang
nadiskubre ang sakit  bag-o lang

gisabot niya ang gwardya sa gaisano mall
nga mopalit siyag dugo
kay after sa screening mo match man

sa screening pa lang bayad na siyag 1,500
discounted 800
wala pay labot ang bayad sa gwardya

kulang ang kwarta pambayad sa gwardya
gitagaan siya hangtod alas kwatro sa hapon
para madawat ang bayad

kay wala lagi miabot ang bayad
gibaligya sa gwardya ang iyang dugo sa laing
nagkinahanglan

bad trip
iyang anak naluspad na sa hospital
kay walay dugo

wala kuno mawa ang iyang pagsalig sa Ginoo
apan suko siya

nagpahatod mis pier 3
bad tip gihapon siya
hapit mi mabangga sa ten wheeler ganiha
(maapil man dagway mig kamatay
sa iyang bad trip)

ingon ko
salig lang sa ginoo
ang tanan dunay katuyoan
wa lang ta masayod
ngano

bad trip gyod siya
suko kaayo sa Ginoo sa kalibotan sa
kapobrehon
sa leukemia

(bisag duha duha ko kon namakak ba siya
o wala
midrama ba
o whatever)

ang ginoo ray mobalos
mitunol kos akong kinataposang
kwarta nga nabilin sa akong
pitaka

gipalit nako ang iyang bad trip
sa ngalan
sa Anak, sa Amahan, sa Ispiritu Santo

amen.

ginalot

kaila ka ni rudy romano, no?
kadtong gwapo, bright,
dato,
dayon buotan pa gayod

kaila ka ba di ba?

kahinumdom ka nga siya
varsity player sab siya
sa basketball
diver sab
mahilig sab sa scuba

di sab gastador, manggihatagon
dinayeg sa katilingban
philosopher
philantropist,

kaila ka di ba?
sikat kaayo siya.

sayod ka ba nga classmate nako to
siya sa ateneo de davao?

salutatorian to siya.

kutan-a ko kinsay valedictorian


(human sa pagpangutana, dayog tubag)---- ako.

6/11/2015

paglaom kanunay

midagko ang mga balod
apan wala nako kini ambata

nindot gihapon ang mga bitoon
nga atua sa langit

mikusog ang hangin apan
samtang anaa pa kita sa baroto
wala gihapon ako
mahadlok

pagkaanindot gayod gihapon sa
mga bitoon didto sa langit

nabali ang katig apan samtang ania
pa gihapon kita sa ibabaw sa baroto
wala gihapon ako miambak

kay misamot kanindot ang mga bitoon
sa langit
dayon ang bulan usa ka bulawang
sakayan nga naglutaw kuyog sa mga bitoon
didto sa langit

miabot ang kabuntagon
nalinaw ang mga balod
nahupay ang hangin

gikamingawan ko karon ang mga bitoon
ug bulan nga bulawang sakayan
didto sa langit


melancholia (akong bersyon kuno)

ang kasub-anan
karaang gasang gihatag
sa tanan
dugay na kining ania
kanato
walay pinihig
matag adlaw moabot kini

sa una akong
gilikayan
kon mamugos akong
kasuk-an
kon madutlan akong
palayason dalang
pamuyboy
kay bisag abiabihon
kasagaran paiyakon man
kita gihapon

apan karon usa na siya ka
higala
nga sa matag abot
nagdala kanako og gasa
nga akong gidawat
sa wala nay kabalaka

gani kon sayo siyang mopahawa
aron sa buan na usab
mohagwa

too kag sa dili
bation ko usab baya ang
kamingaw  kaniya

6/10/2015

kakita pog pulapula

gikan sa lalom nga
dagat
didto ko naglutawlutaw

hangad sa adlaw
piyong piyong sa mata
kakita pog
pulapula

kampay sa kamot
sikad sa tiil
kaway sa tubig
hanoy nga ganoy
sa usa ka haploy
sa pinong balod
nga pilok sa
dagat

hangtod nga sa kalapoy
midapat ang tiil
sa batong  pilpil

padulong sa mabaw
tumaw sa balas
hapnig sa kum-ot
pahaluna sa tudlo
sulod sa purol
sa nauplot nga siklot

usahay masina ko nimo nganong hangtod karon ganahan ka pa gihapong magtiniil?

gisulayan nakog
sul-ob ang imong sapatos
sa walay pananghid
dayon nakog pasopaso 
sa hardin

matag bato nga matumban
lubong
matag hulmigas nga mayatakan
yatap

nindot kining imong sapatos
di masudlan sa tubig
init sa akong tiil
humot sa akong lapalapa

usahay
masina ko nimo
nganong hangtod karon
ganahan ka pa gihapong
magtiniil

ALIMUOT

daghan na ang nasugid
ang kabahin sa piang nga haligi
sa balay nga sug-ang
sa itlog nga tunokon
sa sapatos nga walay tikod,

sa una mora kog  maong nga
sige mong isul-ob
hangtod nakuspas sa imong
paglaba matag adlaw

daghan kog gitago
nga dili ko ikasulti
sa imong pagbiya
ako nalipay, kay karon ako
na ang magsugid sa akong
kaugalingon

ngari, sud sa akong dughan
daghan kog isulti nako
nakatawa ko, nahimuot,

kadtong milabay ang nakakita
nagtoong nabuang bahin nimo
nakatawa ko, nahimuot

nganong karon pa ko nakasabot
sa imong pagkaalimuot...

itago sa ilok, painit sa utok...

mas nindot baya ang mga hanap
daghan kang makita
dayon duladula diha sa tagnatagna
inig abot sa ugma
morag wala,

mas nindot baya ang mga pasumbingay
daghang hunahuna
lahi ang imo, lahi ang ako
kuko ko ikaw pako

mas nindot sab kanang wa na tay tingogay
kay di na gyod ka mag-away
kapoy ang away
sayang ang laway

mas nindot sab ang isulat kaysa isugilon
dayon pilopiloon, pwedeng idapion
itago sa ilok, painit sa utok...

ang gipili sa mamalitay

gitupad ang balak nga
dugay niyang kombati
sa putomaya, mangga, sikwate,

da, hurot lagi.

6/08/2015

ang makalipay kanako kaniadto
wala na

kon akong balikan ang atong
mga kahinam sa mga manggang pulak
nga nagpasad bisan asa
sa balilihan, sa kakugnan, apil na gani
ang mga tunaan sa kabaw
sa mga sabsaban sa kanding
sa mga inithan sa langgam

wala na usab

nausab na ang panahon, nausab na usab
ako

ang akong mga pangamuyo mao nga unta
mawala kanako ang
kahinam nga unta ikalipay ko na lamang
ang kahilom

sa balilihan, sa kakugnan, sa tunaan,
sa sabsaban

kon namatay og nalukat na ang manggang karaan
dili ko na kini ikaguol

mas nindot baya ang balilihan kon wala na ang
anino sa mangga
kon ang hangin maglapos-lapos na lamang
sama sa atong paggikan, pagpauli, pag-adto nganhi
sa walay panamilit

ang tulay kanatong duha nga karaan
naunlod
bisag wala nato tanduga
bisan walay nanghilabot niini
gawas lamang
sa pagtunob sa lapa-lapa sa
panahon
kini diha dayon nahugpa

wala ako mangita niini
ang iyang anino
wala usab nako handuma

aduna akoy sakayan nga gamay
nga nagpaabot kanako sa kilid
sa pangpang
ug subay ning suba nga milikos
sa kadaplinan
moadto ako didto

kon maguba ang tulay
dili angayan nga maguba ang tanan
kay sa kaniadto
nagkita kita nga walay tulay
nabuhi kita
milambo diha sa duha ka
dungguanan

hinungaw

puting sinina nga mihaom
sa imong lawas
makasilaw sa kaadlawon
samtang nahinanok ka pa
sa saloma sa
atong damgo

karon ang puting papel
sa tunga sa akong lamesa
naghay-ad

adunay kauhaw ang kaligdong
nagpangita samga takugi sa
akong mga kamot

kanunay kong gibungat kanimo
walay labot ang gugma dinhi
buta ako
ang ang punyal sa akong kiliran
kanunayng andam

6/06/2015

kabahin kanako

gusto nakong isulat ang wala pa nimo mahibaw-i
bahin kanako

daghang pamaagi sa pagsulat nga mahibaw-an mo kini nga dali lang nimo dawaton
nga abi mo usa lamang kini sa mga plato og kutsara og tinidor sa talad-kan-anan
sa usa ka yanong pamahaw

abi mo lisod baya isulti ang dili angayan isulti labi na ug bag-o pa lamang kini nimong
ihinagbo sa imong kalibotan

kon sugdan ko na kini mokunot dayon ang imong agtang
kon akong padayonon nga walay hunonghunong mogahi kalit ang imong apapangig
usa ka butang nga dili sab nako ganahan nga mahitabo kanimo
labi na og motikig ka na unya

busa nakat-onan nako ang pagsulat nga sama lamang sa usa ka gripo nga usa ka adlaw niana
nagtulo

dili ikatingala ang pagtulo kay dili man usab ikatingala nga ang gripo sa tubig sa madugay og madali
dantan man jud sa iyang pagkaguba

mao kana ang akong angay isulti kanimo ang kabahin sa pagkaguba
apan naandan mo na kini diha sa gripo busa dili na gayod mokunot ang imong agtang
dili na sab mogahi ang imong apapangig
labi na nga dili ka na usab matikig

kahibalo ko ang madawat nimo bahin niini
alisdan mo ang gripo, kay ning kalibotana daghang gripo

unya dili sab mahal.
walay angayan nga magsubo. Walay kinahanglan
kawilihan.

ang naguba pulihan. Dili na kini angayan nga iyakan pa.
balikan na pod dayon nato ang gripo nga wala na magtulo.

linaw na.

apan ulahi na ang tanan, paabota na lang unya ang sangpotanan....

ang pagbuhat sa maong sayop mahimong ikaw lang.

sekreto kini. walay bisan usa niani ang masayod.
bisan gani ang imong toong kamot
wa kahibalo niini,

dili ba nga kon walay tawong nakadungog sa pag-abot sa linti
o sa pagkiblat sa kilat
walay nakakita dili ba nga makaingon tang wala ang kilat
ug wala sab ang linti

ang pagbuhat sa maong sayop gihimo mo nga ikaw lamang.

sa mata sa kalibotan, wala kay nahimong sala. sa mata sa mga silingan
pagkabuotan mo. 

sa mata sa imong asawa sulundon kang bana.

apan inig abot sa kagabhion, sa dihang matulog na ka unta
mohunghong man ang baba sa habol nga duol sa nahimutangan sa imong gibuhat nga sayop,

unya ang kisame nga saksi sa tanan magsigi mag pasiplat nimo.

ang bentana ang wala kaantos. misulti kini sa hangin og busa ania ikaw karon
gustong maghinulsol.....

langit

gibalikan nako ang dapit diin gitukob sa tiki ang lamok

pagpaingon didto nahinumdom ako sa nindot nga lantawon
ang pagtukob sa tiki sa lamok nga mitapot sa iyang dila dayon gitulon niya sa iyang baba

nganong ganahan ako sa maong talan-awon?
makabusog ang kabusog sa tiki ug wala na nako ambata pa ang kadangag sa lamok

nga nagtoo kaha nga ang kisame 

langit?



kutay sa han-ay


ang kinamaayohan nga moburda
mao ang labing hilomon

pagkaanindot sa iyang mga buwak
nga gimugna sa iyang tanod
diha sa puting panapton

ang kinanindotan nga buwak 
sa panapton mao ang gabuswak
nga gaduhaduha pa 
sa kamatinud-anon sa adlaw

ang kinanindotan nga panapton 
mao ang nabordahan og buwak 
nga wala pa kaayo mobuswak 
ug nahawiran sa kamot nga kanunay
matuslokan sa dagom

ang labing maayo nga kahilom 
mao ang hapit na maburda diha 
sa puting panapton nga wala pa 
giluwa sa tilaok sa tanod 
nga gihuktan pa sa dagom

alang sa balak

salamat
salamat gayod
kon wala ka pa unta
hagbay ra akong
nawala

salamat
salamat gayod pag-ayo
sa mga panahong
wala na ako'y mahimamat
anaa ka
nagpaabot kanako
nagpailob diha sa usa
ka pagpamati

salamat
salamat, daghang salamat
sa dihang moambak na unta
sa lubog nga sulog sa 
kapakyasan
anaa ka
mitunol sa imong kamot
aron paghawid
og paghapuhap kanako

sugo sa maayong pamatasan

nagkita mo pag-usab
dugay na kaayo kadtong
panghitabo
diin ikaw gilupigan

nagtagbo ang inyong mga
dalan

dili na gayod unta ka ganahan
apan mobati ka sa 
usa ka kabuntagon
bisag dili ka na gayod unta
ganahan

manugo baya gihapon
ang maayong pamatasan

6/05/2015

mas midaghan ka sa iyang panglantaw

wala niya
mahayi ang iyang pagkapulpog

diha sa daghang bildo
mas midaghan ka sa iyang
panglantaw

niadtong nalibat siya
sa kalami
duha lang ang nawong
sa gugma 
ang iyang nakita

diha sa mga nangabuak
nakita niya ang tibuok

ang anak ni osting nga mibalik sa Sinuyak gikan sa Pasay

ang dakong sakyanan
paingon sa Sinuyak puno

sa tapaloding atua ang
sinakong bugas nga gipatungan
sa batang sipat

sa kilid tua ang mga mikabit
nga mikabit usab sa mga kabit

sa prontsit tua si mam og ang
iyang duha ka alipores

anak sa kapitan ang drayber
nga naminyo sa titser

ang mga tiguwang atua sa sulod
nagtustos sa ilang tabako

ang mga sugarol naghaploy sa
ilang itatari

alas puno ang paglarga
balik sa bukid dala ang mga kinompra

ayaw og inarte
lamog sa baho sa mga singot sa hwerto

unsa to? " i wanna try this for once in my life?"
angig! mora man kag di anak ni Osting!

samin nga kasingkasing

kon ang atong mga kasingkasing
hinimo unta sa samin
mas maampingon gayod unta kita
mas masinabtanon kabahin sa
panghitabo sa uban

bahala na kon sa wala pagbantay
nabuak kini

ang mga bildo makamao pa gihapong
mosamin sa tanang makita

pagkaanindot gayod sa adlaw bisan kon mingaw ang mga kagabhion

miabot ang buang 
sulod sa among panimalay
nagkurog ang ngabil
blanko ang mga mata
hugaw ang sinina
wa mahaluna ang mga
kamot og tiil
nga mora bag gusto na
niyang ipanglabay
ang tanan

gipalingkod nako 
gipainom sa bugnaw nga
tubig
gipangutana bahin sa
iyang bana og tulo
ka anak
kabahan sa iyang balay
nga adunay hardin
sa agianan paingon sa
tulunghaan sa iyang
anak nga
nagkinder
sa silong sa dagkong
kahoy nga narra


nahupay ang unos
wala madala sa sulog ang
hiningtan nga sakayan
wala malukat ang lubi
nga midahili didto sa
daplin sa baybayon

pagkaanindot gayod sa
adlaw
bisan kon mingaw ang
mga kagabhion

kalit

wala na nako gibitay ang
akong purol sa hayhayan
ang nahibilin nga ginagmayng
tabon sa akong lawas
gipiyal ko na lang dayon
sa salog nga abog
wala akoy ligo 
tawo kaayo ang akong baho

diha sa gugmang tiunay
wala na ang plastaray...

pagpili sa mga makalipay diha sa atong mga dula sa pulong

dali na
magdula kita sa mga pulong

ang nagtuwad nga morag
sigbin
sikari dayon

ang naghayang nga morag
palwa
balibalia

ayaw lang usab palabi
sa imong gibati nga kasuko
kalma lang

mahimong usbon mo na usab
ang imong dula

kadtong napiang
hilota 
iuli ang bukog nga mitipas
sa iyang 
saktong plastada

kadtong mga nangalkag ang
buhok og 
naglirawliraw sa ilang mga
siradong lawak
sudlawi lang pod
kaligoa
pahiri sa saktong tualya
pulbosi
saninai og sakto

kon ako ikaw 
bisan sa daghang kapilian
pilia kadtong
nakatabang ka

sama sa pagpatin-aw sa lubog
nga sapa
pagkuha sa mga batong babag
sa dalan
pagpalupad sa mga salampati
human nimo kini
sabori sa mga tipasing humay

nindot man god lantawon ang
pagpagawas sa mga 
nangapriso
sa pagpalambo sa mga 
naupok
sa pagpapamubo sa mga tanom
nga dugay na nga wa katilaw
sa ulan

kon ako ikaw
managhoy ko sa kagabhion
maglunang kos kahayag
sa bulan
sundon ko ang dalan
paingon sa akong gikaibgan
didto sa unahan
sa kilid sa bakilid nga bungtod
akong kitaon
dayon haranahan

ang mga mosunod
mao na ang mga kalami
sa mga pagbati
nga imong gikitik og
gibukiki