2017/12/30

bisan wala ang gugma

tungod kay wala ka
man sa akong
kiliran
unya gikinahanglan nako
nga mawa kining
kahaw-ang

bisan wala ang gugma
bisan dili unta angayan
bisan dako kaayo ang
giwang
anaa, nagdunol kanako sa
sabon
ug tualya
anaa, nagtimpla kanako
sa kape
nagluto sa akong pamahaw
anaa nag-abli sa ganghaan
anaa nagpahiyom kanako
sa akong paglakaw

wala ang gugma dinhi
apan kinahanglang magpadayon
ako sa akong mga adlaw

bisag wala ka, bisag lahi na.
magpadayon gayod ang akong
mga adlaw
uban kaniya, wala ang gugma
apan anaa ang mga adlaw
misibog, milabong.....

ang iro nga itom

ang iro nga itom sa
wala pa mamatay
nagpabati sa iyang
pagpahawa

sa dihang naglingkod
ka iyang gipatong ang iyang
ulo sa imong tuhod
mitutok nimo

human siya gilubong sa dihang
nagbuy-od na kining tikig
sa kamalig

dunay gamayng kahaw-ang
sa tiyan mo nga gikutoy
nahinumdom ka gihapon sa
iyang pagkaitoy

ikaw sa akong panglantaw

sa buntag
nag-ingon siya
ikaw ang
saad, ang maanindot
nga buwak
sa florera
ang humba sa
platito

wa kong katingog

dugay ka na
nga bato sa akong
agianan
ang halas sa
kilid sa balay
ang dag-om sa
langit
ang kusog kaayo
nga ulan
nga nakabasa
pag-ayo kanako
ang katugnaw
ang layo pa 
kaayo nga balay

2017/12/29

kita lang gayod.

kon gihiguma mo man ako
aduna akoy hangyo kanimo.

ayaw kog himoang butunes
sa imong uhales. Kinaraan na
kana, dili kana angay kanato.

mas nindot kon tubig lang ko,
unya imong pabukalon unya ikaw
ang baga ang sugnod.

dugay pang panahon aron ako
mawala diha sa kaha, magbaga ka
sa dugay, hangtod nga ako mawala
unya ikaw mahimong abo. 

moabot ang hangin, ug sama kanako
ikaw sab mawala. Oo, tinood tang duha.

diha sa pagkawala.  Kon unsa man
ugaling, walay makapanugilon kabahin

nato. Kita lang ang nahibalo bahin niini.
oo, kita lang, kita lang gayod. tubig sa abo.

2017/12/28

ang isog nga gugma nga atong gikinahanglan

lalom ang imong lantaw kanako 
dugay sab kong mibalos, morag miingon ka
kanako, bisag walay gigamit nga bisag usa ka pulong:
nasayod na ako.

wala na ang katalaw gikan kanako didto sa 
nasirad-an nga pultahan nga akong giablihan kaganiha
sa wala ka na human sa kusog ug balikbalik nga
pagtuktok, sa walay gamit nga pulong mibalos ako
kanimo: daghang salamat

gitugkad ta ang mga dayag nga anaa sa lalom
gamit ang taas nga kawayan sa kahilom

ngano ba?

ngano ba nga 
inig kahuman sa ulan
sa dihang 
mitulo na ang katapusang
lusok sa tubig
bation mo man ang kabidli
sa dinalang
kabugnaw

kaganiha lamang nabati ko
ang kainit sa imong dughan
wala ko mapaso
sa tumang kahidlaw

nagbugno ang kusog nga
hangin
sa ibabaw sa atop sa balay

oran oran nahupay
diha sa nausik nga kalipay

tanday

wala matuyo ang
tanday
wa sabota ang
panagtupad
diha sa usa ka
higdaanan

gamhanan ang kalimot
migapos kanato
diha sa mga katuigan

miulan ang langit
mitulo ang atop
dili kaayo kusog
sa hinay hinay
nahuwasa ang
mitugtugaok

gakos

mas maayong
mogakos ang
kangitngit kaysa
sa kahayag

sa kahayag
kinahanglang ipiyong
pa ang mga mata
aron nato
mabati ang wala pa
diha

ang kangitngit ug ang
imong mga bukton
magtagbo

dayong ang mga ngabil
sa kamingaw
magtapot

madungog mo ang mga
anghel
nga miawit sa kilid sa
ganghaan sa langit

paak

naay paak
nga dili tinud-on

nganga nga
dili kaayo dako

padapat sa ngabil
dapit sa likod

sa liog dayon 
morag nanilhig ang

dila diha sa tingkoy
dayon ang paak

dili idayon tungod
kay madungog mo 

man ang hunghong
nga magsugid sa

usa ka pagmahal
nga hilabihan

oracion

tungod kay wala naman
ang salosalo didto
tungod kay wala na ang
halohalo

maong ania kami diri
nagsadya sa among pagkawala
ania kami diri
naglipay sa among kakulangon

dunay nag-inong nga ang
langob nga among gipuy-an
sa sawa gipulihan
maong siempre amo na gayong
gipangbiyaan

tila

nag-inosara kong
naglantaw sa mga balod
nga nasangko sa
lapyahan

gibati ko ang akong
 lapalapa nga
gitilatilaan sa iro didto sa
akong higdaanan

ang akong igsoong babaye nga kulungon ug buhok

lima pa lamang
ako ka tuig kaniadto
akong adlawan
niadtong enero
didto sa among balay
sa dihang milayas
si nanay nga giapas
usab ni tatay
ang akong igsoon nga
babaye nga kulungon
ug buhok 
migasa kanako ug baga
kaayo nga sweater
nga dili nako magamit
sa init nga panahon

abi mo di ko kadto
makalimtan
sangko gayod sa langit
ang akong kalipay

katalagman

si linda
nagpatong ni
samuel

wala silay
mga sapot

didto sa
nasunog nga
motel.

unya daghang walay kalibotan

kanang imoha
pangcontest
busa ayaw ipatik.
kining amoa 
pangmasa

kini mao ang
trapo sa banggera
sa mga katabang.

kini mao ang 
bukag nga gigamit
nila nga hakotanan
sa lubing nangapulak.

kini mao ang lampaso
sa salog nga napuno sa
abog gikan sa karsada
nga  nalimtan sa 
mayor

kini ang brush sa
kasilyas
ang lugod nga 
nahulog sa 
bowl

ang gatulo nga atop
ang buslot nga bongbong
ang kutsilyong habol
ang sundang nga gibang

disposable
gamiton karon ugma
ilabay
morag pampers
sa batang palaiyak

bisag unsa na lang
ang masulod sa dughan
ang iluwa sa kasingkasing
ang isuka sa
galamhan

kining amoa
pangmasa
baratohon lang
dili na hangyoon

kanang imoha
mahalon
palitonon
unya daghang
walay kalibotan

walay aso nga makumkom

sayod ako niana
walay aso nga makumkom

oo, kita mo ang aso
gikan sa akong kusina

apan wala ako nagpista.
nia ako, nagpainit lamang
kilid sa pugon.

giinit ang kalaha nga
walay mantika
gipabukal ang tubig
nga walay laraw nga
isulod sa termos.

kinsa ba god ang ganahan
mokumkom ug aso?
asa man usab kini ibutang?
sa ilong?

kon masayran mo ang tanan
kinsa pa bay pangutan-on?
kon ako ang imong pangutan-on
dili ko motubag

gani, akong isimang,
naunsa ba diay ang iro 
nganong naligsan man kini
sa motorsiklo nga misirko
dayon namatay ang bata nga
sakay

kay ngano
sa buhi pa sila
nalipay ba kita?
kay ngano kon duha
lang
abi mog maghigugmaay?

walay aso nga makumkom
wala say kumo nga mag-antos
diha sa iyang pagpanira

kon makita mo ang aso
nan unsa man dayon?
moiyak ka ba? motyabaw
ka ba sama sa kabar?

ang tanang aso
paingon sa langit.
busa sabta na lang
nga mao kana
ang paraiso.


ang akong mga balak

ang akong mga balak
wala sa libro 
wala sab dinhi
kon nabasa man nimo kini
dinhi
kon napatik man kini dinhi
kana tungod kay
nagapasilong una sila sa
maong lugar
dinhi
apan kini sila mga langgam
mga panganod
mga ulan ug baha
mga dahon ug hangin
adlaw, bulan, bitoon, mao
kana sila sa kasagaran
apan dili kini sila kanunay nga
ingon ani

ang tinood kanila dili makita
mabati man gani apan dili sa hangtod

utitod, ulod, dragon, 
pangagho, ginhawa,
ug uban pa ug ubay ubay
pa gayod

kalag, hunahuna, 
puto budbod biko. 

ang wala mabungat
ang wala malitok
ang dili unta litokon
ah, sagdi lang
ana gayod ang gugma

ang tam-is nga tubig gikan sa banga

ang banga sa gawas sa balay
nga gisag-uban sa imnanan sa tubig
sa matag adlaw

tam-is tam-is ang lami
daghang nakadayeg sa dihang
matilawan kini

human sa pipila ka tuig sa dihang
limpyohan na unta kini ug sa dihang
nakahukom ka nga hiposon na kini
kay dili na uso ang banga
sa dihang giyabo na ang tubig aron
paughon sa ilalom sa init nga adlaw

atua ang mga bukog sa balagtok
puti na kaayo unya wala mabungkag

ang kaminyoon dili gayod matagna

andam na ang bag-ong balay
dapit sa baybay
anaa na usab ang bag-ong sakyanan
gitunga na ang mga alipores
nadesisyonan na kon unsa ang dalhon
ug unsa ang ibilin
sa kadugayan nadawat na nga kadtong
punoan sa mangga nga imong gitanom
unya sa miaging tuig naghitik sa bunga
mahimong makalimtan ra
total mahimo man usang tamnan sa
samang punoan ang bag-ong luna didto
dapit sa baybay
daghan sang mga matahom didto 
mas presko pod ang hangin didto

sumala sa ginaingon ko kanimo
sa dihang bag-o kang gikasal didto sa
Sugbo
balikon ko
dili gayod matagna ang sangpotanan
sa kaminyoon bisag gahitik pa ang bunga
sa punoan sa mangga
bisag lig-on pa ang haligi sa karaang balay
bisan ug sinaw pa ang salog sa sala
bisan ug nindot ang panahon nga moingon
kag mahimong magdula pa ka ug basketball
karon.

andam na ang balhinan
nadesisyonan na ang biyaan.

2017/12/27

dili malalis

dili malalis
nga natiguwang ka na
daghang kunot ang
agtang
mitaas ang agtang
siging pangahulog ang
buhok nga
nahapla sa alugnan

ingna ko nga bakakon ko
ingna ang samin nga limbongan

sulod sa imong kasingkasing
midako ang kaisog
unya nakapangutana ka
ikaw pod kaha?
nakaila ka pa ba sa imong
kaugalingon?
nahibilin ka pa ba gihapon
sa lingla sa imong
kabatan-on?

nangagho ang bentana
mibuga ug bahong gininhawa
sa harden nga
hapit na usab malaya

paspas ang paglupad sa panahon

paspas nga milupad ang
panahon
morag langgam manatad
hait ang kuko
lig-on ang sungo
wa ko katulog dayon apan
sa dihang nahinanok na ko
nahigmata ako sa kagabhion
unya ang tanan didto sa balay
wala nay nahibilin
gawas na lamang sa mantel 
sa lamesa nga nahulog
didto sa salog
mga platong walay hugas
sa kusina

didto sa gawas sa ibabaw sa
lamesa
atua ang napalong nga sigarilyo
anaa ang abo
atua sa langit ang aso nga
nahilis ug iya
sa kangitngit

2017/12/26

ang duha sa kainit sa luha.

nagtagbo ang 
duha sa ngitngit
aron nila makita 
ang langit.

didto gipiyong nila
ang mga mata
aron makita ang 
Dios.

sa iyang mga kamot
niabli ang pultahan
sa kalipay.

walay nalitok ang dila
sa kainit sa luha.

amang buta

sayod ko
nga nahibawo ka na
sa tanan

dili ko matingala
nga nagpakahilom ka
lamang

morag wala lang ang
tanan
dinhing dapita
walay sayop
walay hinungdan

mao kini ang dapit
sa gugmang
walay kinutuban

bisan pa sa tanan
ako og ikaw lamang

ning akong sala
ning akong dakong sala
dinhing dapita
walay sad-an

ang tinood nga gugma
amang buta

Hait

Ang kahait sa imong siklap
Daw kahait sa ispada nga sinubhan
Walay kahabulan bisan sa naagian

Bisan ang mga sanggungot
Sa kabugangan nangahadlok
Mangatabas ug mangaputol
Sa imong siklap
Nga daw tulisok sa tanlag, kalag,
Maayo pang magbuwag nata.


unsaon gayod kaha?

unsaon ba paglikay
ang imong gihigugma?

kadtong wa ka masayod
nga imog diay kining gihigugma

tungod sa matag adlaw
ang gugma nahimong dili mo kaila

ngano bang wala na kini nimo
mabati? sa kadugayan anaa ang
kahapdos

unsaon ba paglikay ang gugmang
dili mo na gustong bation pa?

kon maghisgot ka man 
gamita ang laing hulagway 

ayaw litoka ang ngalan ayaw
hikapa ang lawas

samaha lamang nga kini dahon
nga nahulog sa suba gikan sa panganod

gidagit kini sa sa sulog sa kahilom
gilamon sa mga lintonganay....

balas sa bulan

layo ka kanako
samtang 
nag-estoryahay pa
kita

dugay na ang panahon
gikalimtan ko na
ikaw

nagkita kita gahapon
sa mall

duol ka man kanako
apan
mas layo ka na karon

gikalimtan ko na ikaw
wala na akoy nailhan
bisag unsa pa kanimo

nagtinan-away tang duha
balas sa bulan

2017

kitang duha
morag mga alugnan
sa higdaanan

humot, humok,
tupad
walay lihoklihok....

walay ogam

dili baya pod sayon
dili lalim

ang paghangop sa
kamatooran

ang pagpili sa mga katuigan
ang pagputol sa

buwak sa kaulag
ning sanga sa sala

ning katam-is nga naandan
sa kinabuhing walay ogam

ang likod

naay likod
ang mga katawa
ang mga gakos
ang halok

didto sa likod
atua ang 
mga kamatooran
nga hagbay ra
natong gidawat

busa pagkahuman 
niining
mga pagpahulagway
kuyog sa uban
tang mga gihigugma
og bisag mga kaila
lamang

namalik kitas atong 
gilingkoran
namati pag-usab sa
mga daang awit
sa mga karaang kansyon

namalik kita diha sa
paglantaw lamang
nga mora bag wala na
kitay
labot 
sa umaabot
ug sa
mga panghitabo

2017/12/23

sakit sa dughan

gusto natong 
isumpay ang putol

apan sa kadugayan
mas nindot na man

hinoon nga nagpabiling
putol ang mga putol

ang sinumpayan kon buot
sutaon, sakit sa dughan.

2017/12/21

Klarong Panan-aw

Gitugotan ko ang akong
kaugalingon nga
mamahimong tino-od nga ako,
apan dili modapig kanako
ang kalibutan

Wa na koy labot kon unsay
naa sa ilang huna-huna

Gipalong ko na ang suga
sa akong utok, tapos na
ang akong mga pangutana.

Nisulod na ang lab-as nga hangin
sa akong baga, dili ako mahimaya-on
sama kanila apan lu-ag ang akong ginhawa
ug klaro ang  akong panan-aw


saad sa 2018

pagpangita
sa kahayag
paghandom sa
makalipay
pagpuyo nga
malinawon
pagsandurot
sa kanunay sa
mga matarong
ug mga
malumo
pagtimasa sa
kahilom
pagbungat lamang
sa mga
mabuhat
paglikay sa
mga bakak
pagtahod 
pagyukbo sa
Diyos.

2017/12/20

ang gibalikan

kanunay mong
gibalikan ang
kaniadto

unsa ba gayod
ang imong gipangita?

ah, ang wala na
diha.
ah, ang dili na 
mabalik.

natalaw ka ba sa
unahan?
aduna bay wala mo
pa madawat/

miingon ka,
pagkawala moy puangod
nakita mo lang
ang imong nakita
nadungog mo lang
ang imong nadungog
apan bisan usa ka
tagaktak sa ulan
wala mo gayod
mabati

ang nabasa nga piso
ang kamatayon nga
gikuyugan sa tumang
kahilom

alang kang ......

pagkalamian
busa gitilawan
pagkaanindot 
pagkaanindot gayod
busa di gayod
mabiyaan
dili gayod makalimtan
gibalikbalikan
ang akong sala
ang akong dakong sala
ang akong himaya
ang atong himayang
karon, ugma, hangtod
na kini
sa kahantoran

2017/12/18

Kapoy na

Gikataw-an lang ni Lohika si Gugma
kay botol kuno

Matod pod ni Gugma walay
puangod si Lohika

Gikapoy na ko og paminaw
sa ilang bagulbol




2017/12/14

natapos na

naundang ang
naandan
wala na gipadayon
ang gikaganahan
gipangita
nakit-an ang kataposan
ang dayag
nga walay pagpakabana
sa pulong

natapos na
natapos na

sa laing bahin 
gisugdan na usab
ang alang lang
kanako

walay kataposan ang
kinabuhi
sa usa ka magdamgo

sayang
patay na siya

2017/12/03

kadtong....

kadtong nasilag
magdala ug dakong bungtod
sa iyang abaga
aron lang ipakita ang
anino

kadtong nahigugma
nagpabiling hilumon
bisag ug samok na 
kaayo ang nataran sa
usa ka pinatyanay

kadtong nakasabot 
nagpakabuhi sa karon lamang
ang ugma wala na
ang kaniadto wala na usab

walay pulong nga mabitbit
walay paglaom nga hiposon
kadtong tinood nga 
nahigugma kay siya andam
ug tagana na sa 
unahang mahitabo nganha
kaniya

2017/12/02

ang kiat nga buwak

ang kiat nga buwak
kusog nanaghan
mahimong imong 
purilon
apan ang dili nimo
maipanghimakak
mao ang iyang
kaanyag nga wala
diha sa ubang
mikatay, mihangad,
mikutod
nalaya, namatay.

ang samin

ang samin
hustisya seguro kay
kon unsa ang imong
gihatag
mao ra usab ang imong
makita
dili nimo makuha
dili mabawi
dayog kawala

2017/11/25

hilanat

tam-is ra kaayo ang
kahilom

sakit sa tilaok
katol nga di mawala

karong gabii mao
ang dakong
hilanat.

pangandoy

gipangandoy nato
ang dag-om
miabot na ang higayon
nga mas 
gikinahinanglan nato
ang ulan
kaysa sa kahayag

uga kita nga yuta
pugas kita nga nagpaabot
sa tubig.

2017/11/24

wala na

miabot na ang panahon
sa ato
nga nga dili na makadulot 
kanato

ang mga pagpanamilit
dili na pilit
ang mga panugon
tua ras pugon

karong panahona mao 
lang ang panahon
ako,ikaw, magpuyong
malinawon

wala na kitay ngalan
arang sangpiton
wala na kitay nga kuankuan
nga balikbalikan

2017/11/23

gikasilagan ang sakto

ang tambok nga
bayot
nakaingon sa iyang
iyaan

"nganong kamong
nindot og batasan
nag-ilaid man
sa kalisod?"

mihangad sa langit
nagpanglingolingo

"nganong kadtong mga
balasubas
kadtong mga laog
kadtong mga ngil-ad
ug batasan
wa pa man mahupong
sa ilang
kabutang?

milakaw palayo
naglibog sa kinabuhi
mikiaykiay

"tungod nila
maong naingon ko
ani"

gibasol ang langit
gikondena ang yuta
gikasilagan ang
unta sakto.

sa karupay

nahibilin ang akong
kasingkasing didtos bukid
sa karupay
tupad sa kang tatay
nasabtan kong nindot 
kadtong dapita
kay wala ka nay
asawa.

2017/11/22

ang gugmang nagpabilin

pagkabalasubas sa
panahon nga kusog kaayong
milayat sa mga
adlaw

gibinlan kas mga puting
buhok 
mga kunot sa agtang
gakurog nga kamot
ngutngot sa tuhod
balikog nga likod.

apan, wala ang pagmahay
sa laing kabilin, ang kaalam.
ang gugmang bisag guba
nagpabilin sa dughang
puthaw ang kubal.

solo tango

adunay misayaw
sa tango
nga nag-inusara
lamang sa
ilang balay

alas sais sa hapon
walay hunong pagtukar
sa iyang internet
you-tube ang medley
tango.

nagpiyong ang iyang
mga mata
abtik ang mga tiil
sa tikig nga lawas.

walay hunong ang
mga damgo 
diha sa pagsayaw.

lig-on gihapon ang
paglaum diha sa tumang
kamingaw.

lain lain

kadtong walay
mahimo, magtudlo.
morag, kadtong 
di kamao
anaa, magtudlo.

dali lang ang
pagsulti, sayod ka.
lisod ang 
pagbuhat.

dunay nagbuhat
nga wala
gigamit ang 
hunahuna.

dunay dakog 
hunahuna apan
wala sa buhat.

gigabas ang sanga
sa gituntungan.
gikuha ang bato ug
gipukpok sa utok.

dunay wala sa
plano ang kamatayon.
apan maoy
nahitabo.

gidamgo ang kinabuhi.
gikutkot ang 
lubnganan.


one day soon

si jingjing nagpost sa family picture nilang perlita
sa ilang likod ang ilang tulo ka anak.
ang usa ka kamot ni perlita atua sa paa ni jingjing.
nindot lantawon ang ilang mga pahiyom.
nagcomment ang ig-agaw nga si rey, " ka happy sa family"

karaan nga kadtong family picture.
milubad na gani. duna nay mantsa ug gisi.
tungod kay gi post man ni jingjing, maingon
tang kini iya diayng gihipos sa dugay na
kaayong panahon.

si perlita atua sa america.
si jingjing atua sa malaysia.
ang usa ka anak nga babaye atua sa dubai.
ang laing anak nga lalaki nagpabilin sa
manila.
wala ko kabalo kon asa na ang kamanghoran.
siya lang ang wala sa fb.

si rey walay anak. ang iyang asawa manghod
ni perlita. hagbay ra usab nga nagbulag.
wala kaantos sa kamingaw nga midaog sa
ilang gimugna nga gugma.

ang daang larawan. dunay gustong isugid.
dunay damgo. dunay gitipigang paglaum.

"one day soon" kanta ni tom jones maoy gustong
kantahon ni jingjing.
mitubag si rey, ako sab, "one day soon" kadtong
kang humperdeck nga version.


ang kapoy kaayo nga lawas

ang kapoy kaayo nga
lawas
sayong nahikatulog
sa katre sa kagabhion
ang limpyo nga konsyensa
maoy iyang alugnan
unya ang gahabol kaniya
mao ang bulawang kahayag
sa bulan diha sa abre nga
bentana
anaa ang gilak sa kahilom
sa daghang mga bitoon

2017/11/21

selfie

ang akong amiga nga si sofing
nangamaw sa america

ang iyang amaw haskang datoa
nga kon siyay pasultihon ang iyang
balay sa pinas
layo pa gani sa kasilyas sa iyang
tiguwang nga amo

wala nay memory ang maong tiguwang
nag alshaymers,
maong si sofing na lang ang nagsigeg
selfie atubangan sa samin diha sa kilid
sa tokador
samtang ang tiguwang nagsigig
katulog tungod sa iyang mga tambal

2017/11/20

way lami

ikaw ang kasagaran
dili ikatingala
nga kon dunay maslayd
sa panit sa saging
dili mo gayod
mapugngan ang pagkatawa

lahi ni siya
gisayangan siya sa panit sa
saging
og nganong imong nayatakan

walay kangitngit

walay kangitngit
o pulong ang makababag
sa atong
pagmata diha sa kahayag
diha sa paglitok
sa amang nga mga pulong
walay babil
sa atong kinabuhin ang
makapahinanok nato
diha sa kamatayon sa atong
mga paglaum

kita

balod ang atong
kinaiyahan
migo, busa ayaw, ayaw
og pahulay sa lapyahan,
padayon, padayon,
isip balod sa kadagatan
balik, balik sa lawod
ayaw ug tugdong sama sa
langgam 
wala kitay salag
wala kitay kapahulayan
kita nga usahay
maghimog unos
sa kalibotan

2017/11/18

ayaw intawon

ang balak
buwak nga gihagkan sa 
adlaw 
sa sayong kabuntagon
mibuswak
sa bugnaw pa nga
kainit

ayaw kutloa

ayaw huboi sa iyang
mga petals
ayaw putla ang iyang
mga dahon
ayaw balia ang iyang
sanga

pasagdi kini nga
mobuswak hangtod
sa iyang kagabhion

pasagdi nga kini
usab
mosandurot sa bulan
diha sa iyang
katulogon

ayaw tuguti nga
mawadla ang iyang
pagpangalimyon

ayaw huboi
ayaw patya

sa pagsayaw sa tango

mas nindot isayaw ug tango
kon nagpiyong ang akong mga mata

nabati nako ang akong paglutaw sa
mga panganod
unya ang akong ilong usa ka dangaw
ra diha sa imong aping

nabati, nasimhot, nahagkan ko ang
langit

ang akong nakita

imbis mamati sa iyang
abogado nga nagtukituki sa
iyang kaso
ang piniriso nga walo na ka tuig
sulod sa bilanggoan
naglantaw sa usa ka painting nga
gisab-it sa huwes sa bonggong sa 
korte

lalaki ug babaye nga nag-ani ug
humay sa basakan
sa unahan ang duha ka bungtod
unya sa tunga niini ang adlaw
unya sa kilid sa bungtod mao ang
payag 
unya sa sulod sa payag sa may bentana
nanambo ang batang lalaki
sa ibabaw sa payag mao ang mga 
panganod ug ang
mga langgam nga nanglupad
nanglabay

2017/11/17

bilanggo

duha lang
ang kapaingnan

madugta siya
sa bilanggoan
o mapusilan siya
diha sa 
kagawasan

isog nga tawo
diha sa kapakyasan
gipuy-an niya
ang tungatunga sa
dalan

sapa nga linaw
walay batong
makatugaw

ang mga kalit nga panghitabo

i

kadtong akong
kauban sa
landbank kaniadto
didtos Tubod
nga nakalimtan ko na
gani ang iyang ngalan
basta ang iyang
mga ngipon morag
sa iring
ang dili nako malimtan
mao ang iyang
kalit nga kamatayon
ang kasubo sa ginikanan
nga wala mawala
hatod sa ilang bugtong nga
anak
didto sa lubnganan
unya walay hunong
ang ulan
nga misulay pagpapas
sa mga luha ug
bakho


ii

kadto si marlyn
pagkabuotan
maalamon 
cum laude sa dihang
nahuman sa
ateneo de davao
apan unsang hitaboa
nga ako na lang
nadunggan sa diha
nahuman na sa
pagtoon
naburos kini
ug tungod kay wala
pakasli sa lalaki
nagpakuha sa iyang
gisabak
nga kuno nabinlan
ang tiyan sa hugaw
maoy iyang
gikamatay

ug samtang giuli
sa Pagadian ang iyang
patay nga lawas
wala madawat sa
amahan 
ug siya usab namatay
busa duha ka haya
ang tua sa ilang
panimalay

iii

si junjun
laing maalamon
graduate sa philippine
science high school
ug dayon sa dihang
nagpadayon sa iyang
kolehiyo sa
san carlos
dunay usa ka hitabo
nga dili gayod niya
madawat
busa miuli kini sa
dipolog nga wala
nay laing kan-on 
kon dili manok
dayon dili na maligo
dili na mogawas sa
iyang lawak
hangtod nga namatay
ang iyang inahan
unya gustong patyon
ang iyang amahan
nga milayas ug sa dihang
siya na lang
sa maong balay
migawas kini ug 
gisunog

iv

anaa usab si junel
gahapon lamang
misulod sa C.R.
didto sa korte
samtang nakauli na
ang tanan
miinom ug hilo
dayog kamatay

v

sa kataposan
anaa si ramon
usa ka piniriso
gipusil
sa pultahan sa korte
sa wala pa tagad
matawag ang iyang
kaso


ang sugilanon kabahin sa anak ni reymar

lantaw sa TV 
pipila ka oras sa 

boxing, duyugan pas
basketball dayon pakyaw
sa football

sigarilyo, beer, ug
sumsuman nga
barbecue


samtang ang iyang 
bag-ong puya natulog
sa kuna

wala na madungog
ang gamay nga
gininhawa

ahok

nindot ang pulong nga
"ahok"

labi na ug ikaw ang
maka"ahok"

nadungog mo na ba
ang balita

nga giahok ni Bewa
ang imong asawa?

ania ka

ania ka
napugos intawon ug lantaw
basa
diha sa paghulat

kinahanglan mong
mokaon ug pan
apan sirado pa man
god ang
mga tindahan

salamat, salamat 
salamat na lang

ania ka napugos intawon
ug ginhawa
kay wala pa ang
tiglubong.....

gihimong bairan ang balas sa habol niyang pangandoy

aron dili matintal
ang ligwan sa pagpaak
gibuhat niya ang
dili unta angayan niyang
buhaton

kon nasayod lang unta
ang mga buwak
kon unsa gayod ang
nahitabo
niadtong kaadlawon

naputol ang usa ka pako
sa alibangbang
nagkulang na ang tiil
sa alindanaw

nahimong amang ang hangin
nga igo lang milabay
sa kahaponon
unya ang baybayon mao
lang gihapon
balik balik diha sa iyang
mga balod
gihimong bairan ang balas
sa habol niyang
pangandoy

ang mga ulagan

kusog kaayo ang
ulan kagabii

ang mga iring ug
mga iro nahinanok

nagmata ka ug kon
matulog man

manok-manok man
lamang

nanglupad didto
sa hugaw mong kusina 

ang daghang mga  ok-ok
nga durong pangulag

ang tapos

moabot ang panahon
sa pagbuhi

sa una kusog ang
pagpugong

naa ang daghang mga
maymay

duna pa gani ang mga
pagpangasaba

paghimo sa mga regla
paglabat sa mga giya

kinsa bay makapugong
sa baha? 

kinsa ba ang magbantay
sa usa ka kwadrang kabayo?

dili mo na mapugngan ang
tanang panghitabo

ug sama sa paghawid mo sa
balas 

mobilangkad ra ang imong
tudlo

pagawas sa mga balas nga
nausik sa imong palad

samtang ikaw anaa nagyaka
sa dalan

milantaw sa unahan sa mga
gipangbuhian

panahon na sa pagbuhi
wala na ang mga pispis

naguba na ang mga salag
nagsugod na ug pangahulog

ang mga dahon, ang mga 
sanga nga gabok

ang balay nga gianay ang
bongbong nga gibukbok

ah, dawata, dawata ang
panaw sa panahon

anaa ka, nagnganga sa usa
ka pagpaabot

kon kanus-a mahuman ang
tanan

ang tapos, ang panagtapok
ang hisgot-hisgot

amping amping

aron lamang mabuhi
pag-usab
malitok mo ang wala
nimo gibati

sama anang nadungog
kong
gihigugma ko ikaw
pahagka ko sa imong aping
padala sa
amping amping.....

dinhing dapita

sa tumang kahilom sa
kagabhion
dinhi niining
malinawon nga dapit
dungga pag-usab
ang awit sa imong
ginhawa
paminawa pag-usab
ang balak sa imong
kalag

sa usa ka damgo lamang

ang iro nga
imong gihuktan
ang duha ka
love birds
nga imong gihawla
ang goldfish
sa aquarium
ang batang
gikarang
ang bayongbayong
nga imong
pinugngan
ang kalabaw nga
wala nimo
gipatuna
silang tanan
usa ra ang gipangita
silang tanan
magdungan sa usa
ka damgo
lamang

ang gawasnon

ang atoa sa
gawas sa balay
sa sagbot
nagpalagaylay
silong sa adlaw
sa kilid sa
sapa
sa bugnaw nga
kalubihan
sa duyan
sa laing dughan

2017/11/15

Usa na kagawasnon

Niabot ra gayud ang takna
nga wala na siya kinahanglana,
naibot, nga daw bukog
nga nag-ungot sa akong gusok

Pagkatawhay sa paminaw
klaro na ang panan-aw,
limpyo na ang samin sa banyo
makita ko na ang gulot sa akong nawong

Humok na ang akong mga bukog,
ang akong panit pwede ng pilo-piloon
og ipahiluna didto sa maleta
ibabaw sa naglumpong nga mga letra

Gisakmit ko man ang imong kalag
nga nipaak sa bulan nga abtik pa sa kahayag,
ayaw hunahunaa nga ako usa ka katalagman,
 hilom ako nga sapa sa ilalom sa kakahuyan













aron dili na kini masayop

sa lingin tang
kalibotan
hawid tas atong
mga tagsatagsa
ka kamot
ning sayaw sa
kinabuhi 
piyong ang atong
mga mata
bati sa awit 
pasingot
sa walay paglantaw
sa atong mga tiil
aron dili na kini
masayop

nanglabay lamang

kahalangdon mo
daghang gustong 
mahimo sama
nimo

kon ako usab
mahimong sama nimo
maunsa man ang ako?

mahimong abo?
mahimong abog?
mawala ko sama
sa tanang
nahimong sama 
nimo

nia ko
naglingkod sa bato
milantaw sa tanan
nga nanglabay
lamang

2017/11/14

siya

kuskos sa gitara
sayaw sa musika
hudyaka sa katawa
asa ba ang kasakit?

ang tanan
isalig mo na lang
sa kahitas-an

siya ang tag-iya
sa tanang bahandi
siya ang naghipos
sa tanang kaalam
siya ang ipisan
sa tanang kalipay
siya ang agianan
paingon sa langit

Panginhas dire