2017/01/31

salig lang

salig lang
subay sa panahon
ayaw wad-a
ang paglaum

matag pandol
sige lang gihapon
ang paghaybol

matag dakin-as
matag pangos
sayaw lang
gihapon sa imong
kuskos

awata ang tiki
nga sa matag 
kaputol sa iyang
ikog
atua walay
tagam
nagsumpay sa
tatam

ang gipili sa iro....

ang dakong iro 
sa balay nga sa matag
sayong buntag
mokuyog sa akong asawa
didto sa simbahan
nausob sa dihang nakita niya
ang bukog sa 
lechon sa daplin sa karsada

anaa naghapa 
nagsupa sa dakong bukog
sa tiil
sa baboy
kaysa mamati sa katolikong
misa

2017/01/30

..sa dihang miabot ang pagbati

walay utok ang
mga pagbati

anaa nangabot
mga walay buot

nanayaw, nag-inom
nangatawa,

gibali ang mga
lamesa

giligid ang mga 
lingkoranan

unya ikaw usa ka
bata nga 

milantaw lamang
wala kasabot

apan malipayon
pagkamalipayon!

mahimo kaha?

mahimo bang
ang duha dugay na
nga nagkauban

unya nagsigig ingon
nga mahal nila ang
usag-usa


unya sulod sa ilang
dughan wala na diay ang
kanhiayng 
kalipay?

mahimo ba nga lain
ang giyubit sa baba
unya lain ang 
giamoma sa kasingkasing?

2017/01/29

ambot lang

sukda ang akong
kalig-on
ibutang ang alibangbang
sa akong agtang

sukda ang akong
kaligdong
ako ang mokuha sa
alibangbang
sa imong aping

sa kataposan
gilangkat ko ang 
pagbati 
sa akong dughan

gitaplak ko ang 
mga letra sa
akong agtang

gisulayan ko ug
tapak ang akong likod
nga nagisi
sa imong halok

ang kabag-ohan sa laing bahin

nagpatas-anay ug nagpahabugay ug
labat
gipangsirad-an ang mga suba, dagat,

unya pak-an baya ang kaaway
unya dili sab sa tinuoray makita.

..ang kabag-ohan....

dunay laing gipatay karon
didto sa sicayab

magtiayon 
batan-on pa sila

ang balita kabahin
sa druga

buak ang ulo sa lalaki
nagpasad sa karsada

ang bala milapos sa
dughan sa bana paingon

sa migakos nga asawa
mibaha ang dugo

walay mitingog sa mga
nakabasa ug nakadungog

...pait-pait gamay......

samtang sayo pa dawata
ayaw iwakli ang akong giingon nimo
kaniadto pa

miari ka diri nga ikaw ra
ako sab
mobiya ka dinhi nga ikaw ra
usab
ako sab

miabot ka nga nag-inosara
nangutana ko ana pa bay pamahaw
anaa pa

nakapangutana ko 
asa na ba ang imong lima ka mga anak?

itom ang imong sanina 
ang kwentas nga perlas anaa sa imong liog
dili kaayo hinog ang imong pahiyom
saktog tina ang imong buhok
nga bag-ong pinutlan

anaa ang piniritong itlog nga nahibilin
ang duha ka pan de sal
gihaon ang init nga kape
nga dili na pabutangan ug asukar

dili ba ikaw man ang nagsulti nga
kon mas daghan ug anak mas makalipay?
nga sili magpabilin aron mag-atiman kanimo?
asa na ba si bobong? si merian?
wala na sila

hilom ang kabuntagon dinhing
dapita
morag patay ang kalipay unya
lubnganan ang abtanan sa
kasakit

gipakita ko kanimo ang akong kinabuhi
diha sa pag-abri sa bentana ug pultahan
diha sa paglingkod dapit sa veranda
dayog lantaw sa mga kahoy ug mga panganod
samtang hinay kaayong gihikop ang kape
nga mas lami kon kini pait-pait gamay
kay morag kasakaon na kita kon kini
butangan ug daghang kamay.

2017/01/28

ang akong masulti unya sa sunod natong kita

anaa ang
mga gamot 
nagpabilin

bisan unsaon
walay bisag
usa nga 
naputol

lig-on ang 
pamalaod dili
gayod
kini malangkat

apan mao kini
ang akong 
masulti unya 
kanimo

ang buwak wala
na kaila kon
unsa ang gamot

bisan gani ang
bunga nga nalata
sa kilid niya
wala sab kaila

ang mga sagbot lamang
ang 
nakaila kon unsa ang
kalimot

didto sa unahan

dunay mga tawo nga ang gusto mao lamang nga matapos na ang tanan
unya makapangutana ka, unsa man diay ang tanan? ah, ang tanan ang tanan gayod

morag wala nay puniton bisag usa aron mahulma ang tanan
raspa, morag tsinelas nga imong gibuno sa galaray nga lata unya imong giayog igo
aron matumba ang tanan, ang tanan gayod

sa nagsakay ka sa bus, gihunahuna mo usab ang abtanan, asa ba ang abtanan?
didto sa unahan, kanunay nga dito sa unahan, maong nagsigi kag pangutana asa ba gayod
ang kataposan?

para kaniya, wala kay kataposan, ikaw ang naghunahuna ug nagmugna nga anaa ang
kataposan,

pagkapait diay kon mawala na ang gugma, bisan ug unsaon nimog lingaw ang kasingkasing
aron sa makausa pa mosayaw kini, wala ka na diay mahimo

nanampiling ka, naglutok ang mata, milantaw sa unahan, nangayog kataposan, didto, didto
sa unahan....

sakto ka

sakto ka
gikinahanglan gayod ang
pag-inosara
diha sa lawak nga sa sayong
kaadlawon 
iyang gibiyaan

ang habol atua sa 
salog
ang imong mga mata
mitutok sa
kisame

dayon diha nagsugod
pag-usab ang
pakighimamat sa
imong kaugalingon

gisugdan na usab 
pagtuki ang 
naputol niadtong
miaging
domingo

2017/01/21

pakighimamat sa lawak ug sa kaugalingon samtang gibisitahan sa mga kalag sa kaliwat

sa dihang ikaw 
na lang sa imong lawak
tungod lagi
kay namahawa na man
sila
adunay nangabot nga 
laing tulo ka mga
persona
morag tulo ka panahon
o hugna sa imong
kinabuhi
kuyog nila ang puting
kabayo
nga atua gahulat sa kilid
sa pultahan
unya miingon sila kanimo
"dali na, mangadto na kita"

"asa ba kita paingon?"

ayaw na ug pangutana
dali na
atua na sila nga mipahawa
nagpaabot na usab
kanimo

milantaw ka sa lawak
anaa ang laya nga buwak
ang nabuak nga plorera
ang bulingon nga karsones
ang botelya sa bino nga
wala nay sulod

"dili ako makakuyog
dili na kita maigo diha
sa likod sa kabayo"

naunsa ka ba?
panahon mo na kini nga
makabuhi ning lawak mo
nga rehas

dili ko makakuyog kaninyo
pasayloa
aduna pa akoy
lukaton nga patay
didto sa 
menteryo

naunsa ka na ba?
wala na ang mga patay
hagbay ra silang nabanhaw


buhi ako
dili ako sama kaninyo

giunsa mo pagkahibalo niini
nga ania ka man sa sulod
sa damgo?

gihigugma ko pa
gihapon siya
bisag wala gayod niya
ako higugmaa.

pagkabuang mo
pagkawala nimoy puangod
sa imong kaugalingon

pasayloa 
kining buhi nga buang
gaatiman
sa kasakit sa iyang dughan.

ang tawong nahigugma pa gihapon kanimo

ang pagtug-an dili
malalim
ang kabahin sa tinood
makasunog

busa ania ikaw 
nahimong manunulat
morag manulunda
naghawid sa sulo
nga walay kahayag

gipamulong mo ang
tanan
diha sa kangitngit 
nadungog sa mga bato
nga humod sa 
yamog

sa laing bahin
anaa ang pagbutyag
nga dili kaayo
sakit

tapsing lang unya
sayod ka nga siya nga
nahigugma
nakasabot na niini

kon ikaw iya pa gihapong
gihigugma
bisag wala na kini mipahiyom
sukaron pa gihapon niya
ang lamian mong panihapon

matulog pa gihapon siya
tupad nimo
sulayan paghisgot ang
mga kaniadto.

ang patyanan

didto sa among higdaanan
samtang ako nagpaaron-aron sa
katulugon
gihinay-hinay niya ug ukay ang
akong paa paingon sa akong mga
kumagko
gihisulayan niyag haploy ang akong
kiting
gipangita kadtong gibantog
nga achilles.

nakahunahuna ko nga siya dili na
kasaligan
sa pagpunay ug pangita kon asa
ang akong patyanan.

ang akong inahan nga kagikan ni
Thetis
nasayod sa panghitabo busa sa dihang
gitusno ko niya sa suba
gihawiran ko niya sa dila.

kon masayod  pa lang gayod unta siya
kabahin niini
unsa kaha ang iyang buhaton nga kining
akong patyanan
mao man usab ang iyang pinakalamian.

ang imong kaparotan

sakto man ang gugma
sa tanang panahon
apan sama sa inom 
adunay taksanan kay
kon mahubog kag
magsamparay unya
natumba sa dalan 
wala gyoy ganahan
mopunit nimo para
ihatod kas pultahan 
diin ang kasuko nag
atang kanimo.

ang gugmang imong
gipahinungtan mao 
kana ang naghatod nimo
sa imong kaparotan

2017/01/20

ang pito ka ulo

pito ka ulo ang
apil sa
paglantaw.

lahi kini nga
mananap sa atong
katilingban.

ang usa ka ulo
milantaw sa salaod
dayog dakop.

ang ikaduha nga
ulo ang naghimo sa
sumbong.

ang ikatulong ulo 
mao ang
nagsugo sa pagbanlos
kaniya didto
sa mga rehas.

ang ikaupat mao ang
tighipos ang
tigsunod sa mga sugo.

ang ikalima walay mata
walay dunggan
siya ang mosulti kon
unsa ang tinood.

ang ikaunom mao
ang tigpanalipod kaliwat
sa tanang inahan
sa kalibotan
nga maoy tiglaban.

ang ikapito mao ang
imong silingan
nga mahimong
manira sa iyang bentana
o dili ba kaha
moabri sa iyang
ganghaan
aron mangilabot
sa katilingban.

kon walay motindog pwes wala....

kon natumba ang dakong kahoy
kon walay nakakita niini, wala gayoy
nahitabo.

bisag dunay nakakita kon walay
motindog sa iyang nakit-an, wala
gayoy nahitabo.

ingon ana ang atong pamalaod.
ingon ana ang hampak sa dakong balod

nga nakatangag sa walay buot nga bata
nga naghatag ug kahilom sa mga isda..


ang mga wala mangatulog sa kagabhion

dunay wala mangatulog sa
kagabhion.

kini ang mga nagbilar sa mga
patay.

dili sila ang namatyan. dili sila
ang nagsubo.

duna silay gihimo dili para sa
karon. Ugma, ugma mo pa kini
mahibaw-an.

ikaw ug ako ug ang buak nga baso

gipakita mo kanako ang
buak nga baso

miingon ka nga siya ang
nakabuak niini

ako sab ang namati
milantaw aron isulti nganong

nabuak ang baso ug kinsa
ang nakabuak niini

walay misulti kinsa ang
nakabuak unya kitang duha

namiya sa lugar dayog ingon
nga dili na nato kadto sala.

2017/01/19

ang mga dili tawo

sila mga panghitabo lamang
wala nato bisag kanus-a gipakisama nga
tawo nga adunay mga pagbati
mga kahigwaos, makamaong masuko
magdumot, modagmal, 
mopatay, sa pikas nga bahin,
mokatawa, maghandom, motugon,
mopalihog, mopangga,
moamoma, mohangop, sila dili sama nato
mga tawo,

ang ulan, ang bungtod, ang bulan ang adlaw,
ang lata, ang lansang, ang plato,

ang ulan nga naghatag sa dakong baha nga mikuha ug pito ka bata
ang bungtod nga midahunog nga mitabon sa usa ka balangay nga misuyop sa syagit sa kawhaan ka
katawhan
ang adlaw nga misunog sa mga kakahoyan nga
miuga sa yuta nga mikuha sa tubig nga mihatag sa taas kaayong hulaw
ang lata nga lumping nga gitay-an nga migansanggansang nga nakasamad sa tiil sa tiguwang nga namatay kagahapon
ang lansang nga mitaop sa kamot sa balaan nga mipaagas sa dugo 
ang plato nga milupad gikan sa kusina sa balay
nga nabuak didto sa hagdanan

wala silay mga pagbati, dili sila sama nato.
kita ang mga tawo, labaw pa kanila.
ang nanghambog nga nakasabot ug kamaong mobati sa kalooy.

ang kulang

unsa ba ang gibati sa ok-ok
kadtong hapit na siya nasakpan?
nasakpan sa unsa?
ikaw ang nangutana? wala, wala.
ok-ok lang ang hapit nasakpan.

apan kagabii akong gisulayan
dihang kalit nakong gipasiga ang suga
ug atua ang ok-ok nasakpan.
kalit kaning midagan nya hapit
nako naigo kay akong gibunalan.

kon ang ok-ok diay hapit na masakpan
modagan gayod kini likay sa kahayag
likay sa nakasakop sa iyang kaok-ok.

unsa bay bation kanang hapit ka
na masakpan? sakto ka, milupad ang imong
ispiritu unya ang nabilin mong lawas
nagkurog apan gisulayan mo ug agwanta
nga dili mokurog, unya wala kay isulti.

sa dihang giabrihan na niya ang pultahan
nga imong gisirad-an sa dihang migawas 
siya sa balay nagpasumangil ka nga 
nakatulog, miigham, unya mipadulong sa
pultahan, dayog pangutana, "kinsa ka palihog?"

unya siya nagduda, "wala ka na ba nakaila 
kanako?"

" si luisa kini ang imong asawa", sumala kini sa iyang nagkurog nga tingog.

ako lang diri nag-inosara. ako lang.
ako lang ang kulang.


ang mga mabati na lamang diha sa dughan

ang kanunayng nagtago
sa madugay makakat-on ra
sa kinabuhing walay 
kahayag

ang mga tinagoan manubo
diha sa kangitngit mamulak
molabong manghumot 
sa iyang kalagom

kon imo kining dalhon sa gawas
dili mamatay
makamao gihapong magpakabuhi
apan sa kanunay ang
handomon mao kadtong
nakat-onan niyang kalipay

ang bugnaw nga kangitngit
ang kahumot niini
sa kaanindot sa dili na makita
kadtong mabati lamang
diha sa dughan

...ang kabahin nato....

ang akong sugilanon
makaulaw
gisugilon ko kini sa inyong
atubangan
samtang nanginom kitag
kape ning kahaponon
mikatawa ka, gikutaw nako,
mas kusog gani
ang iyaha, mikitiw ang akong
tudlo
mikatawa sab kog apil
morag kataw,
ataya gyod, kabahin sa
sa sugilanon nga makaulaw
nga gihimo natong 
kataw-anan, bisag dili baya
gayod unta, apan
mao kana ang maayong
pagsugod diha sa pagtukaw
tukalahaw

kabahin kini sa iro nga
kamatyonon nga katoliko
nga atong paduhigan ug
balaanong lana gikan sa
hamis nga kamot sa pari.

kabahin kini sa kasal nga
imong bendesyonan sa layo
kaayong lugar nga mag-usa
sa duha ka bulingon nga mga
nilalang nga ug sa ato pang
pagsabot atong sakripisyohan
sabonan, ladlaron, kusukusohon,
paugahon, bitayon, utawon.

dili ka makadawat sa bayad 
niini, makaulaw. dili ka makatoo
kay makaulaw. mikatawa ko ug
kusog diha sa baso nga wala
nay sulod. dayon nakog pahaluna
ug hapnig diha sa banig,
sa usa ka kahilom sama sa 
pagbali nako sa kutsarita diha
sa samin nga lamesa  tupad sa
puti nga tasa, dayog 
ingon nako, nga kini kabahin
baya nato...natong tanan.

ang mga bukog nga naulawan

ang tinagoan
tinan-ogan hangtod
nga miduga
gikan sa pagkalata

ang mga bukog sulod
sa aparador
naulawan.

ang miambak didto sa dapogan

pagkasayang
sayang gayod kaayo

hingpit man untang
lantawon
bisag asang parteha

apan naunsa ba
miambak man hinoon
didtos dapogan

gisugba ang iyang
lawas sa iyang kaugalingong
kainit gikan sa iyang 
kaugalingong baga ug
kalayo

ang bayad

aron dili ka
masilotan sa langit
karon
silotan ka sa yuta

ang bayad sa yuta
mao mao ra sa bayad
didto sa langit

kasagaran
mas dako ang bayranan
sa langit
labi na sa paglimod nimo
sa imong simod.

ang tabogok

ang tabogok
naghatag ug load
aron siya
tawgan sa matag
adlaw nga
mabati na niya ang
tumang kamingaw
samtang 
nananom siyag mga liso
sa nangka didto
sa abono daplin sa
suba

nalipay lang gihapon bisag
giingnan siya nga
ikalima siyang
uyab adtong adlawa.

ingon siya
"ok lang wa man sab ko
kaila niya"

lahi ra baya

suma sa bag-ong
gibulagan
kon haployon mo ang
iyang 
dughan
ang iyang mabati hapdos
nga morag
gipasoan ang iyang bagtak
sa init kaayong
tambutso sa 
habal-habal nga tungag
adlaw nga
miangat sa layo kaayo
nga bukid.

lahi ra kadtong gibati niya
sa dihang gikitkit ang iyang
kiting sa
iyang karaang uyab.

bisan tuod ug samdan
nabati gihapon niya ang pagbayaw
niya sa pito ka panganod.

kamatyonon

ang hustisya
usahay
giduladulaan sa
mga bata

dunay usa gustong
dakpon kini nga
morag alindanaw

ang usa gihawiran
sa usa
nagtulod silang duha
morag nangambak
gikan sa tulay
paingon sa dakong
baha sa suba

dunay usa mangita
lang kon suhulan
naa say usa siging
katulgon nga morag
bitokon

dunay tiguwang nga
nagpadula sa mga bata
dili na kaayo motingog
layo ang tinan-awan
kamatyonon.

sala sa kaulag

nakita nako karon ang
tawong giposasan
sa salang kaulag

gibasa nako ang sumbong
iyang tudlo gisulod sa kinaiya
sa batang babae nga
walay buot

medyo tiguwang na ang
maong lalake
iyang agtang gadangas
unya ang inahan nagtutok
ug ayo niya
morag dili na gayod niya
bana

milantaw ang babaye kanako
morag akong iro
nga nag-atong 
sa akong naandang ihatag 
kaniya

sobra-sobrang bukog sa
manok gikan sa
jolibee

ulan lang ang tiunay

ang tanan kaninyo
mangingilad

bangaw, bulan,
adlaw

ulan lang ang
tiunay

ang nagsumpay kanato

kay lagi
langit ka man
unya yuta ra ko
ang kasagarang
magsumpay
nato mao lang
gayod ang
ulan.

sahay gani
naa pay magsamoksamok
nga bangaw
unya kaw sab
malingla man

unya talithi na
lang ang
naghawid kanato

2017/01/18

walay molungtad

walay
molungtad

kadtong nanghakot
ug nagtigom
sulod sa kamalig
mabinlag abo human
sa dakong sunog

kadtong nagtoo
nga ang mga anak
maoy
katay sa imong
kahangtoran
mabinlag kuko nga
putol gikan sa
kumagko

hubo kang miabot
hubo ka usab nga
mopahawa

kadtong nagtoo nga
ang mga ugma
walay kataposan
nasayod kaha nga
sila mabilin unya ang
mga ugma
nagpunay ug abot dayog
pamahawa?

ang baki sa basakan sa likod sa inyong kasilyas

gahapon
miabot ang prinsipe
gikan sa bulan
nga naglingkod
tungod nimo
sa pantawan

mora kag irong
buang nga
ulagan nga wa 
katulog
miawo sa 
kangitngit

karon miabot ang
kahayag
ug kadtong prinsipe
nahimong baki
sa basakan likod sa
inyong kasilyas

nakaingon kag
unsang minoa kadto?
nakat-on ka
nga sa dili pa mohalok
paaboton gayod una
ang pag-abot
sa kabuntagon nga
kasagaran maoy
mobutyag
sa tinood.

muta

dako ang
kahiubos sa
imong paglikay
kabahin niya
nga nangita kanimo
tungod laman
sa usa ka katuyoan
diha sa paghimamat

apan ikaw nga
ang mga mata anaa
naglantaw sa imong
tiilan walay
hunahuna nga ang
paghimamat usa
lamang ka
lantaw diha sa
paglabay
sa pignit lamang
nga panahon

abi mog
ikaw ang adlaw sa
iyang
mga adlaw

pagkahungog mo
nga naghunahuna
niini
kay kon milantaw
ka pa lang unta
sa unahan
makita mo unta
nga ikaw muta
lang man diay
sa kabuntagon

pagbalitok

ang tanan
dili tinood
apan bisan
sa tanan
adunay tinood
nga imong
nasulti nga dili
nimo masupakan
nga ang tanan
dili tinood.

2017/01/17

ang mga amor seco

ang mga amor seco
nagpabiling sagbot sa
nataran

sa dihang mitupad ko
nila diha sa paghigda
sa yuta dili baya sila
ngil-ad tan-awon 
dili sukwahi sa amor.

tul-id walay kahumot
kon molakaw ka ug
mosangit mosabod 
ug mokuyog

nagtindog nga morag 
nagtagad nangitag kinsay
kataptan aron kuyugan

gamingaw pod kaha?
o gusto lang pod niyang
kuyugan ka
kay nalooy sab siya 
nimo?

hayhayan

dakong
hayhayan ang
kalangitan
sa mga panganod

ulan ang
tinuluan sa mga
gabasa


nanginom ang
giuhaw nga sagbot

kitang duha
nagharayharay
sa veranda

milantaw sa
miabot nga adlaw

hubo nga 
gasinaw

ang tinubdan sa baha mao ang pagkawala sa sapa

ang dakong tubig
miabot
daghan sila morag
dakong 
pamilya


nakapangutana
ang tubig,"dili ba ato 
man kining lugara?"

"oo, sapa nato kini"
mitubag ang kuyog

"nganong ania man
kining tawhana dinhi
nagtukod sa
iyang dakong tindahan?"
nangutana ang 
ulan

ang insik nga nakadungog
mitubag
"ako kini,
 titulado ko kini"

nasuko ang tubig
naninghag, "amo kini
pahawa, pahawa gayod
karong dayon!"

ug busa mibugwak ang
tubig gikan sa ilang
mga baba sa usa ka dakong
kasuko nga
karon mao ang ilang gitawag
nga baha

gipalutaw ang mga kotse
gitumba ang mga pader
gitangag pa ang mga bata
gilubong sa lapokan 
ang mga ilogan

pahulay....

pagkahuman sa dakong baha
niadtong gabhiona 
nga gibiyaan ang balay ug
mga kabtangan
mobalik ka 
aron limpyohan ang salog
nga gitaptan sa mga lapok.

hugasan ang mga plato
ug mga baso
sabonan, trapohan aron
mosinaw ug mogilak 
pagbalik diha sa
silaw sa  adlaw

kon mahuman na ang
tanan
diha sa kakapoy
adtoa ang imong lingkoranan
sa silong sa kahoy 
pahulay
pamatia ang awit sa
kalanggaman
lantawa sila nga nanayaw
sa kapanganoran
hangpa ang hangin nga
miabot gikan sa
kadagatan.

ang karon....

ang karon
mao ra ang karon
mao lang
ang karon

ang ugma
iyaha ra kana.
moabot ra
moabot lang ang
ugma

kita karon mao
ang karon
ayaw usa
hunahunaa ang
ugma kay
ugma pa kana.
ugma lang.
ugma ra.

miabot kitang
malipayon wala nato
hunahunaa ang ugma
kay mas bililhon ang
karon diin kita
malipayon.

paawayon pa ba
nato ang ugma ug karon?
ang ganiha ug
gahapon milabay
na. 
ayaw na daginota.
wala na sila.

magpatukod pa
ba kita ug balay?
mopalit pa ba kitag
sakyanan?
mosuroy pa ba kita
sa kalibotan?

nahuman na ang
atong panahon.
wala nay panahon.
milabay na kita.
ania ang karon
maoy atong gamiton.

sa Junk Shop

ang iyang igsoon niadtong gabhiona
iyang giatangan dapit sa balay ni liza.

ngitngit ang pagka-alas otso niadtong
gabhiona kay  wala ang bulan unya 
hilom kaayo ang karsada paingon sa
merkado sa gamay nga lungsod.

nabati ang dakong lagubo dayon 
naghay-ad ang patay nga buak na
ug ulo, unya ang iyang utok miatak
diha sa kwelyo sa iyang sapot samtang
ang nagbunal kaniya naglantaw nga
morag nahuwasan sa iyang dako kaayong
kasuko nga giluom niya sulod sa iyang
dughan pipila na ka tuig ang milabay

gibaharan siyang daan nga patyon busa
nangandam usab siya kay matod pa niya
mas maayo pa nga siya ang makapatay
kaysa siya ang mamatay sa walay hinungdan
nga tawo nga iyang silingan.

ang babayeng nakakita sa maong pagpatay
miingon nga sulod sa iyang balay naglantaw
siyag balita diha sa telebesyon busa wala
gayod siya makakita kon kinsa ug giunsa ang
pagpatay. Migawas lang siya sa dihang
nadungog niya ang dakong lagubo ug mao
na lay iyang nakita ang tawong naghay-ad
patay sa karsada sa Maria Uray.


gibatbat sa abogado sa akusado ang kangil-ad
sa gipatay. Daghan kinig kontra sa barangay.
Naay iyang gitiunan ug pusil. Naay balay nga
iyang gipabuthan ug armalite. Naay iyang
gibato. Naay iyang gipatay apan gibayran
sa iyang amahan ang asawa busa wala na
lang kini mipasaka ug kaso. Daotan kadtong
tawhana maong mas maayo nga karon 
patay na siya.

ang nagpatay o nakapatay sumala pa sa iyang
asoy, wala kuno siyay sala. Igo lang niyang
gidependahan ang iyang kaugalingon kay 
gisulong man siya niadtong gabhiona tungod
sa away kabahin sa iyang anak nga gipasumanginlan
nga nangawat ug manok sa ilang nataran.

gisumpayan pa kinig away nila kabahin sa 
nasunod nga yuta sa ilang amahan nga otsentay tres
anyos na unya wala nay buot. Daghan nag-ingon
nga kaliwat silag buang ug kon mabikil mopatay
gayod ug tawo.

ang gipatay nakapatay na ug tawo. Ang akusado
mipatay na usab sa maong nakapatay.
Managsoon sila sa buhat. Igsoon silang duha.

si abel naCain. Unya si Cain usab naAbel. 
Unya imo silang timbangon nga morag nga
putol nga puthaw, tayaon ug mga lumping nga
lata. Kon imo nang pangutan-on ang tigtimbang
kon pila ang iyang palit, dili ka makatoo sa 
kabarato sa maong presyo. Junk shop.

ang piniriso

gipugngan mo ang
pag-abot sa kasuko
gihipos mo kini sulod
sa imong dughan
nga morag bato nga
puhon imong ibuno
kaniya

misamot kabug-at
ang bato sa dihang
gibati kag kalooy sa
imong kaugalingon
diha sa
kanunayng pagpugong

ingon siya kon 
padayonan mo ang 
imong gibati 
nahisama ka ra sa
tawong 
migunit sa baga diha
sa imong palad
mapaso ka

sa gamayng bata ka pa
sa imong kapungot
gitadtad mo ang bola
sa imong igsoon

ayaw kalimti ang kapungot
nga karon
naghipos kanimo sa 
bilanggoan

ikaw ang piniriso siya
ang prisohan

2017/01/15

sabat

kon mahimo
likayan ko ang sakit nga mga sugilanon

unta nasayod ka nga
talandogon usab ang atong kahimtang karon

daghang kasamok
daghang nangutana kon kinsay sunod
daghang naglibog ngano
unsa ba ang tinood nga hinungdan

baga kaayo ang  miuyon
sa atong talandogon nga kahimtang
busa kon mosugilon ka kabahin niini
ihunghong mo lang
kay hadlok ka kon dunay dili ingon nato
nga makadungog niini

talandogon usab ang akong kahimtang karon
kon basahon ko ang subo nga laing mga panghitabo basin ug dalhon ako 
paingon sa 
pondido nga lugar
wala ang kahayag
ngiob ang mga tubag
sa mga pangutanang
itom pas
alkitran

sabta nga ang akong pamation
akong pilion
ang akong ilitok akong salaon
ang akong iluwa
akong balikan ug tulon

dili ko na mawilik ang akong
sip-on kilid sa bongbong
dili ko na kini masikma
basin ug dunay dili ingon nato nga
makadungog niini


kon mahimo pagngon ko una ang musika nga
masulub-on
dili karon ang panahon sa pagtuon
kon unsa ang buhaton

kaganiha galubong kami sa usa ka higala
nga gipatay dapit sa tulay nga gilabay sa suba
nga gianod paingon sa bukana
nga gikulinitan sa mga kasag ug mga karpa
nga ingon mo paborito nimong mga putahi
diha sa lamesa sa imong panihapon karong gabhiona.

ang mga panghitabo usa ka kadena
konektado ang tanan
walay putol
dili ka makaingon nga wala ako didto
nga wala akoy labot

ang kapobrehon usahay dili mo na mabati
tungod sa natamtaman mong kahayahay karon
dili mo mabati ang kahapdos sa dakong hanig diha
sa imong dughan
sa kasakit sa uban nga dili mo na gani gustong
mahinumduman

ang kamatayon sa laing tawo usa lamang ka numero nga nagsigig sibog 
ikaw mosabat, manapat sa tapos.

kon ikaw na kaha ang patyon o mamatay?
dali dali nimog pangulipi, "ayg hisgot ana,
ipalayo kana"

unya na nato hisgotan ang kasakit
kon moabot na kini
samtang ginantang, maglipay ta karon
samtang may kinabuhi pa.

ah ang imong kamatayon, nag-ung-ong na
gihadla ka na sa imong kapalaran dayon mog
ingon, "simbako! kon gusto ka, ikaw ra"


dili maseguro, dili gayod, karon ania kami
misabat kanimo.





merisi

  • [ n ] Italian painter noted for his realistic depiction of religious subjects and his novel use of light ( 1573 - 1610 )

si genoveva samtang nangaon 
mig lechon 
ug humba
miingon, MERISI

ang maong pulong kauban
sa mayra..maayo ra, apan kon
ayohog utingkay
ang buot ipasabot 
gaba

nagabaan ka, merisi nimo, mayra.

naglagot ang akong asawa sa maong
pulong.
daghang ganahan mogamit niini sa among
gipuy-an
nga mora bag kon malitok kini mas mohayahay
ang ilang pamati, 
gaba.

sa dihang naburos ang spoiled nga anak sa
among silingan nga adunahan
morag nagdungan ug pangyam-id ang tibuok
barangay bisag dili malitok sayod ka nga
ang gibungat
merisi.

sa dihang nadakpan si eddie ang banggiitang pusher sa purok
wala man gani mokomentaryo apan didto sa
barberohan samtang nag-alot sa buhok ang karaang barbero
maoy naa sa iyang ngabil ang
merisi.

hadlok sab kon kita na ang mamerisihan puhon maong nagkintokinto ang uban sa ilang
pagtikang sa lapokon nga kinabuhi
hadlok matikalbong.

sa dihang na-stroke ang anak nga babaye ni genoveva nga kulong kaayog buhok nga kusog kaayong mokaon ug tambok
dunay mibalos anang
merisi kay lagi mao man ang paboritong pulong sa maong himantayon

siya ang karaang tinubdan sa pulong nga merisi didtong lugara.
taas na kaayo ang iyang edad
mora ganig ang iyang mga higala puros
na man nahalin.

sa iyang kahait ug pamantay sa bisan kinsang
nawad-an ug panimbang
o kadtong gidimalas lang kaha sa paningkamot
sa tanang panghitabo diin ang gaba mao lamang ang posibilidad nga hinungdan
sa pagkaalaot ug kapakyasan
dali lang kaayong
isagbat ang merisi

kabahin niini nakaingon ang mga silingan
nga suod na kaayo niya ang pulong
busa wala siya hilabti niini

ang tanang mga mata anaa na kaniya karon
sa iyang kahaponon
kon unsa man ugaling ang mahitabo sa kaulahian
siya na usab gayod ang gamitan sa maong pulong.

sa haya unya, sa dihang mahuman na ang
pangadye
samtang iserbi ang kape ug pan
magtinan-away ang laing duha ka himantayon
nga kaliwat ni genoveva
ang ilang mga kilay mao ray mosugilon kon unsaon ug kinsa na usab ang 
gamitan sa 
merisi.


walay madungog sa nilugdangan

aron madali
mahimong pamub-an
aron mahuman
mahimong undangan

unya mahilom ka.

dili masugilon ang
kalalom niini.

di na makita.
walay madungog 
sa nilugdangan.

Panginhas dire