2017/05/28

human sa usa ka kagabhion

sa tinood lang
mas nindot kang lantawon
kon wala ang
imong sapot unya 
nagtindog ka atubangan
sa bentana samtang
gikaligo mo ang kahayag
nga miabot sa usa ka
hilom kaayo nga kabuntagon.

ang seda nga kurtina gitayhop
sa bugnaw nga hangin gikan
pa sa kabukiran

kitang duha lang samtang
ako mao pay paghigmata  gikan
sa lalom nga katulugon.

ang nahinanok nga mga tinipigan

daghang mga angayan nga dili 
na litokon, mas nindot silang tan-awon
diha sa ilang siradong kahimtang,
sulod sa garapa, sulod sa kaban nga
karaan, sulod sa lawak nga bisan ug
wala na kaayoy hangin, mas nabuhi
man hinoon sila, bisan sa tumang
kangitngit, kuyog sa mga abog, ug
sa mga balayan sa mga lawalawa,
nagpabilin silang nahinanok sa ilang
gipili nga kahimtang, nga kon imo
silang pukawon, unya abrihan ang
mga bentana, ang pultahan, ang lawak
manglupad silang tanan, dili mga salampati
o alibangbang sa imong hunahuna kondili
mga kwaknit nga pula ug mata, gasiga,
nangitag paakon, unya daghang mamatay.

lantawa sila sa ilang kahinanok, ayaw
gub-a ang mga balayan sa lawalawa,
ayaw tayhupa ang mga abog, kay diha
sa maong kahimtang, dili matay-og
ang balayan sa kalinaw ug sa kalipay.

dili ko ikabaylo sa coron

gibalikbalikan na nato ang
agianan

sa gihunahuna nga kalipay
nga kaniadto

abi natog dili tinood nga
kini wala diha

ang kaanindot sa kainit
kangitngit ug kahilom

dili na kabayran ug langit
dili ko ikabaylo sa coron.

ang kahimtang

sa silong sa punoan
sa pitogo
didto sa baybayon
sa olingan
talagtag ang kahayag
nga nahulog gikan
sa langit
samtang ang itom
nga alibangbang
nangitag
kapahulayan
nakapangutana usab
ako sa akong kaugalingon
kon asa na ang nektar
o naa pa ba kaha?

2017/05/26

ikaw

ayaw siya ug awata
ayaw ug kasina
panamin ug usob
bisan gani ang imong
panagway diha sa
samin lahi ra man
sa tinuoray nimong
dagway. ikaw lamang
ikaw ug ikaw lang
gayod lamang ug wala
na gayoy lain.

2017/05/25

tugpahanan

puting kalapating misulod sa akong lawak
mas puti pas kahayag, balahibong mas humok
pas lumot sa panit sa kahoy,
gihimashimas nako ang iyang dughan
gihagkan ko ang iyang sungo, wala kami
nagtinutukay, lahi ang among gigikanan
lahi sab ang among padulngan, akong
gibuhian ug milupad kini sa gawas sa 
akong balay, usa ka tinipigan nga akong
gihatagan ug kaluwasan, ug sa kanunay
gihandom ko ang pagbalik niya sa akong
abli nga bentana, aron unta mahibalik na usab
siya isip akong tinipigan.
walay hisgot kabahin sa gugma.
walay hisgot kabahin sa ugma.
ang karon lamang, ang karon lamang.
nga among gikalipay.

2017/05/24

itom nga alibangbang

sa kakapoy
magsalimuang ang
hunahuna

apan dili kini magdugay
diha sa kalaay
sa kasakit sa gibati
sa umaabot

mahimong ablihan
ang hawla
aron manglupad ang
tanan puti nga
langgam

sa mga panganod sa
kisame
mahulma ang dag-om

ang mga lingkoranan
manubo isip kahoy
unya ikaw diha sa kakapoy
motugpa isip usa ka
itom nga alibangbang
nga kahadlokan
sa mga lumalabay

tuyoktuyok

dili ka gayod nako
mabyaan
unsaon na lang?

ania,nangamuyo gihapon
sa imong pagbiya
unsaon ko kaha kini?

kini,kana, kadto, kita,
ikaw, ako, sila, pagkadaghan
bang tawo ining dapita
sa hardin sa atong mga pagtoo
sa balay sa atong mga paglaum.

dili ko gayod ikaw mabyaan
unsaon ko kaha kining tanan?
ania, mibalik ako
aron paghikalimot nimo.

2017/05/22

aninipot

aron makab-ot ang
kalipay
morisgo sab tag
gamay

tunlon sahay ang
kaulaw
ug kon mahimo kon
unsa ang
sa baba tagoan sas
alingagngag

ayaw hunahunaa kaayo
ang imong kalimpyo
kay kabahin niana
wala na kaayoy motoo

padayon sa gimbuhaton
dakpon ang kalipay
samas aninipot diha
sa sulod sa garapon

kagamay kadako

sa dihang nakita na nako
ang akong kagamay
gibati baya pod nako
ang gamayng kaulaw

pako sa kwaknit ning
akoa apan kanang imoha
pako sa agila

putol na ang akong mga
kuko
apan ang imoha mas
hait pas kutsilyo

maong sakto ra gayod
kining akong pagpakahilom
karon

ikaw sab, nganong mihilom
ka man?
duna ka bay nabating mas
dako pa nimo?

2017/05/20

sa dili na masukod nga kalisod

gihigugma ka nila
sa imong kadangag
sa laing bahin mahimong
mas gimahal ka nila
sa imong pagkawalang
muhang

mahimong mas gihigugma
ka nila sa mga taras
nga wala na nila
sila nga nangahimo ng
halas
sa ilang mga templo
makalanag 
makamatay
bisan gani sa ilang kaugalingon
nanggiunay

gihigugma ka nila
sa imong pagkawalay nahimo
ikaw nga gihisgotan
tupad sa namatay nilang 
kauban
gihisgotang kataw-anan
gisumsuman nga 
pulutan
hangtod sa ilang pagkahubog
paingon sa
pagkawalay puangod
sa katilingbang
gaaginod sa dili na masukod
nga kalisod

uyon uyon

saari ako sa masanagon nga
kabuntagon
diin magtagbo kita sa baybayon
manginhas kitag kinason
ato kining hikayon

saari ako sa bulawang kahaponon
hinayhinay nga malamposon
sa usa ka bugnaw nga kagabhion
usa ka basong ilimnon
usa ka halok nga mangalimyon
nga dalhon kos akong katulugon

2017/05/18

ang dili ato....

ag sa mga bata
pa kita kataw-anang
panghitabo ang sig
pangawat natog mga
itlog sa salag
sa maya
didto sa mubong sanga
sa lemonsito

apil na kadtong mga
hinog nga bayabas
didtos bungtod
nga matod pa nato
wala man say
tag-iya

karon dagko na kita
dili na kini
mahimong kataw-anan
karon nga naklaro na gayod
nato unsa ang ato
ug dili ato

nasabtan na nato ang
salag
nalooy na usab kitas
mga manggang
hinog

maglakaw kitang walay
pagmahay
o kaibog sa mga butang
nga dili gayod ato
nga bisan kanus-a dili gayod
para kanato 

apil na kini sa natad
sa gugma
sa bisibisan sa luna
diin nahaluna
ang kaminyoon


2017/05/17

aron dili ka maligsan

kon dili mo maawat
ang iyang gibuhat
unsaon mo kaha pagkat-on
gamit ang pulong lamang?

mag-unsa pa man ang mga
tambag
kon human na kini gibuhat?

dili na mausob ang imong
nawong
apan mausob mo pa ang
imong kaugalingon

dili mo madungan paglingi
ang wala ug tuo
maong hinay-hinay lang
tagsa-tagsa lang aron dili
ka maligsan

kabag-ohan

ang tanan man god
mausab
gani ang nausob
nausab man sag kausob
ang atong
panilaw
dili na matagna
mingawon sab tas
kapait
sumhan sahay sa
kaasgad
miabot sa punto nga
kasukaon tas
katam-is
unya sa kahalab
naa sigig
pangutot ug
panug-ab

sige ang kabag-ohan
kadyot ka lang mibiya
pagbalik mo
duna ka nay dili na
mailhan
unya kadtong gitiman-an
mo, wala na

kadtong kahoy nga abi
mo dili mabali
nabali man
kadtong agianan nahimo
na mang suba
bisan gani kadtong gisemento
natabunan man sa sagbot
unya kadtong balay nga
gipuy-an sa daghang mga
bata
napulihan na man sa mga
giango-ango nga mga
tiguwang

ag punoan sa mangga nga
walay tag-iya
nga atong pagaduawon matag
ting-init
gilabat na sa bag-ong
mibalhin didto
di na ta kapataka ug pamupo
sa naghitik nga bunga

ang lam-aw nga atong
gitamnan ug haluan
gitabunan na
wala na ang ubang mga
sapa didto
gitukuran na ug daghang
mga kabalayan

kita nga midawat niini
morag mga bentana nga kanunay
nga nga nangabri
mga pultahan nga siging gisira-abri
sa kusog nga hangin
mora kitag mga salog sa karenderya
nga naanad na sa bisan unsang
tunob sa mga suki ni
aludia

sulod sa atong kasingkasing
diha sa pagdawat ug pag-anad-anad
sa hinay-hinay
gipapa na nato ang mga sakit ug
hapdos nga dili ganahang mobiya
tungod kay kini
silang tanan, bisag nahigugma kanato
dili gayod molungtad.

2017/05/16

kanaway

daghang kanaway ang miabot
nagpanon sa langit

ingon ka adunay bagyong moabot
magdalag kusog nga hangin

wa ka lang masayod nga daghang
kanaway ang nangabot sa akong 

dughan nga gihapon katabon
sa  haw-ang nga
kawanangan

2017/05/14

kami dinhi nga dili sama kaninyo

kon nasayod ka pa lang
sa among naagian
makaingon ka unta nga
kining tanan dili
gayod katuhuan

kamo nagsadya sa gugma
sa inyong mga ginikanan
kamo wala makalimot sa
ilang gugma ug kaayo diha
kaninyong tanan
kamo gihatagan sa tanan
ninyong gusto 
gihatod sa lugar sa inyong
mga damgo
kamo gipauyunan sa inyong
pamaliton
bisan ganig wala anaa man
ang inyong mga ginikanan
sa kanunay
nagpakanaa gayod

kami nagsubo
milunang sa tanang kahiubos
ug mga kasakit
nakapangutana pa man gani
ni Bathala
kon sila amo bang mga ginikanan
ug kon kami ila
ba gayod nga mga anak

atuay gibitay sa sako didto
sa kusina
gikaligo sa aso
atuay gilatos sa palwa ug
gipanghabog nga dila lang
ang walay labod
atuay gisagpa ug wala
katingog
atuay gipaluhod sa asin ug
monggos
atuay gikumot ang nawong
gipadupa sa altar
aron kunuhay basolan ang
tanang sayop nga
binuhatan

dili kami sama kaninyo
nga mapasalamaton
dili kami sama kaninyo
nga wala masayod kon unsa
ang paghikalimot ug
pagpasaylo

dulot sa among kabukugan
ang gamot sasakit nga
panghitabo
dulot sa among unod ang
kahapdos sa kagahapon
dili matangtang sa among
hunahuna 
ang mga nangagi

naglakaw kami sa among
panaw diha sa kahilom
adunay uban nga hangtod karon
wala kabangon
nalup-og napiangan
adunay nakabakod man apan
ang kasaba sa kagabhion
anaa nahisama sa kangitngit
nga walay bitoon

busa kon naghudyaka man kamo
sabta kami
nga dili makaapil kaninyo
samdan ang among kasingkasing
unya ang mga ulat niini
dili na gayod mapapas

kaniadto didtos ilang lolo ug lola

si lola
labihang ka strikta

tungod sa kapobrehon
didto ko gilabay
ni nanay ug tatay
sa ilaha

tigtrapo sa sala set
tiglimpyo sa kanal
tiglampaso sa salog
tigsab-og sa tubig
tiglawog sa baboy
ug iro

kalami unta sa
ice candy nga buko
sa ref
apan dili man
manghatag si lola

kalami unta sa
adobong manok
upan tiil man lang
ang akoa

bisan gani ang
pan de sal
inihap man ang
para sa akoa

kalami pa unta
ibasa sa libro
apan panahon na
sa paghugas sa
mga plato sa kusina

wala sab masipyat
ang latos
sa dihang
wala ma-shine ang
sapatos

si nanay

ang giuna ni nanay
mao ang pagprito sa mga saging
dayon pagtuhog sa mga
kamote
pag-ihap sa mga budbod
ug bingka
aron ibaligya na
sa eskwelahan nga
iyang gitudloan

wala maprepaparar ang
pamahaw
wala mabutang nga
tinap-an
walay tubig ang baso
walay kape sa tasa

lima kaming nangeskwela
unya walay klaro ang trabaho ni
tatay
nga mas daghan ang panahon
sa inom ug sa
barkada

wala na tagad mataod ang
mga kurtina
walay limpyo ang banyo
walay lampaso ang salog
wala masilhigi ang kwarto
wala gani malabay ang
mga ilo


giuna ni nanay ang
pagpangita sa kwarta aron
gastohon sa among pag-eskwela
bahala na kon unsay
ikasulti sa mga silingan ug sa
mga bisita
nga wala makauyon sa
kahugaw sa kusina

2017/05/11

ora et labora

wala na ko
sa domingo
wala na sab
kos miyerkoles
ayaw sabta nga
wala na ko
atua ako sa 
akong mga 
buluhaton 
atua ako sa
maong natang
sa pag-ampo

naglitaniya
ang hangin ug
balod
nagrosaryo
ang mga dahon
nga nangahulog
nagsermon ang
dugdog
namati ang yuta
sa lusok sa
nangka nga
akong gihaya

2017/05/10

ag didto ta hongkong

tungod kay aduna man kitay
gipaabot
nagpabilin pa gihapon ang
kahulugan sa atong
kinabuhi

pila ka oras ba siya miabot?
dugay dugay usab dili ba?

nabati nato ang suhi nga
paghitabo sa dihang miabot
na gayod unya ang atong 
gipaabot

dili mao, dili kini mao,
wala sa among hunahuna nga 
ikaw ang moabot

ang kaguol naghatag ug laing
kahulugan
sa among kinabuhi
ambot kon ngano nga nawala
naman ang kalaay
nawagtang man ang kabalaka

mipuli ang kasuko ang paghandom
nga unta mausob ang tanan
nausob ang hangin
nahilom na pag-ayo ang
guba nga bentana
unya ang pultahan naglibog
kon manira ba o mangabli

pagbasol

niadtong panahona
nagpabilin ako nga walay
kalabotan sa bisan kinsang
nanglabay

human sa pipila ka adlaw
sa gilumot nga dagat sa
baroto nga natay-an ug piraw
sa naguba nga labat
sa balas nga napalid sa
hoyohoy sa hangin gibasol
na nako ang akong kaugalingon

2017/05/09

kapalaran

mitoo ako
sa kapalaran
human nako
nabuhat ang
tanan unya
wala gihapoy
nahitabo
kanako.

walay kalainan
ang relasyon sa usa
ka lugas nga monggo
diha sa imong agtang
nga nabuak diha 
sa semento.

el dorado

maluag man o mahugot
masakto man o masayop
kon panahon na nimo nga
ikaw kabigon sa iyang mga
kamot, nan, walay ni bisan
usa kanila, o bisan ikaw ang
mabasol niini.

mag-agaw daw ang namali
ug ang namahala.
kinsa pod kaha ang mikayat
sa palaran? 
kinsa pod kaha ang
nagawsan sa dihang miluay kini
human gitakbas?

2017/05/08

scandal sa usa ka manapatay sa pista sa san antonio

ang mga tinagoang
kalabera sulod sa parasol
sa dihang mikalit pag-ulan
nangahulog gikan sa duha 
mo ka mga kamot nga
limtanon

usa ka wishbone sa manok
laing back rib sa baka
bukog sa liog sa patuten
ug humba sa  tiil sa baboy


bitoon sa langit nga ngitngit

diha sa tumang
kangitngit nila
makita ang
imong kasikat

didto sa layo kaayo
mas madungog nila ang
imong bulawanon
nga kahilom

ag sa dihang nahulog
ka na
didto nila gibungat ang
ilang mga damgo
ug kining tanan
nahimong tinood

2017/05/07

gitipigan ang luha aron dili mo makita

ania ako
dala ang bag-ohay pa lamang
nga nakab-ot nga
kalipay

nalibog ako
nganong nagmasulob-on 
man ako bahin niini
imbis mosayaw unta ako
sa kalipay
maghubog sa tuba
sa tumang kasadya?

sakto ka
nahinumduman ko na
hangad sa langit
naay mga panganod nga
lumping
mga bitoon nga buak
bulan nga hiwi
adlaw nga balikog
bato nga liki
isda nga gustong molupad
langgam nga gustong
mahimong ulod

hubo ako sa samin
nanglugod sa mata
gitipigan ang luha
aron dili mo makita

ang maanindot

nindot ang imoha
gikan s ginayubit sa matag
adlaw nga
katawhan
sa merkado man o
sa simbahan

nakadayeg ko
gani gibalikbalikan ko man
ang tinubdan sa
maong sumbanan

apan sa laing bahin
lahi ang akong mga lakang
ang akong gigikanan
lahi ang akong pinulungan
lani ang akong
pagbati ang akong gibati karon
gisubay ko pa gihapon
kon unsa ug ngano

busa salamat sa akong 
mga nadungog
gikan kanimo
nalipay ako ug dako niini

apan lahi ang akong lakang
lahi ang akong gibati
ug dinhi managbulag na kita
sa atong dalan

padayon sa pag-awit
kay ako magpadayon sa akong
kahilom

kining nahisulat dinhi
wala kini nako gilitok
dili nako kini
ikapanulti sa mga nangitag
awit nga makalipay
kanila

pagkaanindot sa mga panganod
nga nagpabiling amang
sa atong kalangitan
pagkaanindot sa mga bitoon 
nga dili sama sa mga kalanggaman
walay awit sa kagabhion

dito sa lapokan

sa dihang minaog
ka sa balay
adto sa tunaan sa
kabaw
mitupad
miumog unya
sa dihang miadto
ka sa suba
naligo
nanghugas
mihay-ad sa bato
hangtod ka nauga

karon mas nasayod
ka na
kon unsa ang mas
bililhon
mas nindot ug
bulawanon

2017/05/05

wala lang gihapon ako'y giabtan

Usa ka lamang ka 
kahoy nga gabarog sa
kilid sa bungtod

pasilungan panalagsa
sa tumang kainit sa akong
panahon

dili ako makigsulti kanimo
sa kabugnaw sa kagabhion
unsa na lang kaha ang
mahunahunaan sa 
bulan?

ingon ana lang ang 
kanunayng panghitabo
ako ang manghupaw
ikaw ang akong gituhuan
nga namati kanako

sa kataposan gipalid ang
imong mga patay nga dahon
sa kusog kaayo nga hangin

usa ka kamot nga miampo
sa mga panganod
ako ang mipanaw na usab
sa laing dapit

ikaw ang migamot sa akong
kinabuhi
ug sama kanimo bisan asa pa
ako
wala lang gihapon ako'y
giabtan

2017/05/03

wala kay kasingkasing gugmang kiting

bantayi ang mga
wala sa saktong luna

wala ang gugma sa
hangin

asa man ang akong
mga mata?

gitagoan mo?
gitagoan  mo.

dili nako mabati
ang akong mga tudlo

asa na ba ang kamatooran?
asa na ba? asa ?

ang mga pulong gisulat
mo sa tubig

wala kay kasingkasing
wala kay kalooy

ang imong gipuy-an
wala sa agianan

nahikapan ang kapon
mong batikolon

wala kay kasingkasing
gugmang kiting

..sa akong dakong sayop

usa lang ang
akong gihangyo kanimo

ang kataposang hangyo
diin gihawiran ko ang imong
kamot

dala sa pagpasalig nga ayaw
na kahadlok
kay miabot na ang oras
sa akong pagbiya

usa lang ang imong pangandoy
nga ako
mawala na sa imong panglantaw

nga ako unta sa kahangtoran
imo na nga makalimtan

ania ako sa pagpugong nangita na usab sa akong kaugalingon

ngano ba
kaha nga ang akong kalipay
kasakit mo man?

wala man gani ang luha
apan nalunod ang imong
mata diha sa imong
kalimutaw
sa tumang kasubo

wala kay pulong
naamang ka sa kauyamot
patay ang imong kamot
nga akong gibutang sa
akong abaga

nasayop ang panahon 
kanato
walay mausob kanako
ikaw, sabton ko 
nga sa pagbuhat sa ingon
wala ka didto

dinhi kita sa kangitngit
sa mga piyong nga mga mata
mosulay pagtungkad kon asa
kita kutob

asa kaha ang nilugdangan sa
mga dahon 
nga gitayhop sa hangin
palayo sa atong
panahon?

gisirad-an ko na ang lawak
ania ako sa pagpugong
nangita na usab sa akong
kaugalingon

2017/05/02

walay bisag usa nga akong makauban

sa akong kagabhion
tamsi ako
nga mihagit sa awit
sa kangitngit

sa bulan usab tamsi
ako nga midap-ig kaniya
samtang
gigansilyo niya ang
lubog nga kahayag 
sa ibabaw sa mga balay
nga nahinanok sa
katulugon

tamsi ako, nga nag-inosara
adunay salag apan
walay bisag usa nga
akong makauban
sa akong hagit sa usa
ka awit
sa daghang kangitngit

2017/05/01

sa usa ka samdan na nga daan

tali kanato
bisan pa sa
kadugay

o sa makadaghan
wala
wala ang tagkos
tali
kanato

bisan pa sa
kalalom 
bisan pa ug asa

wala ug
wala gayod ang
bugkos
tali kanato

giugom ang
akong kalipay
dili na kinahanglan
nga makita ko
ang pagluwa mo
niini

sakit kaha?
dili na kini
bungaton pa sa
akong kapalaran

ahh, kon mao na
ang naandan
asa pa ba ang
sakit nga
bation sa usa ka
samdan na nga
daan

hangtod na kini sa pagkahanaw

ang kainit sa
akong adlaw mao ang
makapatangtang
sa imong gisul-ob

nasulayan ko na ang
kusog nga hangin
wala kini naghimpos

ang kainit sa adlaw
ang kainit sa adlaw lamang
sugod sa
sayong kabuntagon hangtod
na kini sa pagkahanaw

Panginhas dire