2019/06/30

kaminyoon

kaniadto nag-abot kami sa
sulod sa simbahang katoliko.

nakit-an kaming duha apan
wala namo batia ang kaulaw.

tim-os ang mga pagbati sama
sa lunhaw nga mga panganod.

naghawiray kami sa among mga
kamot, nanag-ampo sa among ugma.

nangyam-id ang tigulang nga babaye
nga ang putong lapas sa iyang likod.

ang pari nga nagpakalawat kanamo,
mahimong mas dako ang panabot.

ang simbahan, bugnaw, haw-ang,
gamay lang ang tawo, ang nagtoo.

milabay ang katuigan, gibulag kami
sa kapalaran.

mahimo diay nga maminyo ka sa
wala mo gihigugma. 

managhan ang inyong anak, sama
sa mga saad.

managko sila sa gitago nilang mga
pangutana. 

unya ikaw andam na ug tagana sa
mga tubag.

mga pamahala, mga kamatooran,
kasakit, apan dili kaayo hilabihan

wala nato kini gikamatay, apan
wala pod nato kini gikalipay.

anino

ANG MGA gililong alang sa
tinood nga nahigugma
magpabilin nga mga lilong
lamang.

ang mga lilo, nga ania sa
atong palibot
milamoy kanato, apan bisan
pag wala na nato makaplagi
pa ang kamatooran, nga
dili sab nato masulti kang bisan
kinsa,
ania kita hilom sa kisaw sa
dagat,
mga barotong walay katig,
nga balod nga dagko pas balay,
ania kita, sa ilalom sa huyong,
mitutok.

gisapnay ko ang imong misteryo
gigakos mo ako isip imong tinagoan.

ako ang hari nga miluhod sa tubig.
ikaw ang bato nga mipara sa kusog nga
agas niini.

wala kitay nasabtan kaayo
apan mas nabuhi kita dinhi.

ako natigulang na apan nabata pag-usab.
ikaw batan-on, apan mihalok ka kanako.

bisan ug wad-on na ang tanang tinohuan,
magpabilin ako sa akong gitindugan.

aron magpabilin kita dinhi, ang atong
mga anino, anaa sa likod sa pangpang.

mikapyot sa atong mga lawas.
nanangpit sa gahom sa kangitngit.

kining atong gugma...alang kang M.

gisulti ang dili angayang isulti
gispanugid ang dili masabtan
ang mga pamaagi gisuhid
gisulti ang ania apan wala sa
tumong ang pagsabot
gisugid lamang ang gisulti
aron dili mo kini masabtan
madungog mo ang madungog
anaa ang mga tanghaga 
anaa ang mga anino sa tabing
anaa ang iro nga walay ikog
ang kalapati nga walay pako
ania ang baroto sa itaas sa kisame
anaa ang tabili sa sulod sa puko
anaa ang kaka sa mata sa dagom

ania kini dinhi sulod sa akong
dughan
gihambin, apan dili ikapanangpit
madungog mo apan dili mo kini
masabtan,
anaa kini kanimo apan dili mo
usab mahatag
magpabiling mga misteryo ang
atong pagpakabuhi
makita mo kini sa pagpiyong
sa imong mga mata
mabati mo kini sa pagpanirado
sa imong mga tudlo
gisaluhan nato apan dili gayod
nato malitok
kining mga tanghaga sa gugma
nga dili makapamasiyo sa
plaza, dili malitok, gabati lamang
walay pulong, walay bukog 
kining undan tang gugma.

2019/06/28

Abutanan

Gikan karon, atangi ako
Didto sa atong kanhi abutanan
Kay isugilon ko kanimo
Ang tanan nga akong tinaguan
Gikan sa bati, ngadto sa pinakabati
Iyagyag ko ang akong tanang gibati
Ayaw kalimti pagdala ang kape
Ug ang sopas nga bag-ong hinaon
Atong kinaham nga sumsuman
Sa atong unyang paghinabi
Ikaw ug ako balikon ko

Kanhi, Karon ug Ugma

Unsay angayan kong buhaton
Wala ko masayod unsaon paghikalimot
Sa tanan tang kagahapon

Unsay nasaypan
Wala koy nahinumdumang binuhatan
Gawas sa gibiyaan kong balak dili bakak

Dili pa ba diay igo
Nga kamatuoran lang ang ako
Walay rebeti, kolorite nga mahandom

Unsay naingnan sa pagbiya mo
Matuod ba nga siya na ang gahupot
Sa gugma mo nga kanhi ako

Kanhi, kanhiay ako
Nga imong damgo ug gugma
Karon siya na nga nahimo mong pahiyom

Ako ang KANHI
Siya ang KARON
Manghinaot lang ko
mga mahikalimtan ka UGMA.



Ang Mga Saksi

Saging, balanghoy, ginamos, buwad,
tinuwang higsiw ug ang utang bisaya
ang gisaw-an ta matag karon ug unya

Pag-uma, pagpangani
pagpanginhas sa hunasan matag hapon
unsa pamay atong pangayuon
gibuligan kita sa yuta ug sa langit

Silang tanan saksi
ginikanan, igsuon, silingan
ug ang atong mga anak
nga nahimong kabahin
sa atong matag-adlaw adlaw
nga pakig bisog ta sa mga unos

Silang tanan saksi
silang tanan nagpamatuod
silang tanan mibulig
sa atong gugmang gisaw-an
nga karon usa nalang ka balak
bakak.

Unsay Imo

Usbon ko,
wala nako magkinahanglan nimo
wala nako maghuwat sa imong pagtagad
mukayod kog ako

Kay ngano man ug mag-inusara?
kay ngano man diay ug mag-istoryang mao rang usa?

Unsay imo?
unsay labot mo'g ika-istorya ko
ang mga gihambin kong lawa lawa
sa akong panumduman

Sila nalang ang may katungod
sa pagsudya kanako
 dili nana imo




2019/06/24

ang kasuko ni senyor tanga (dili ni ako)

kadtong
ako ang mibangka
lami baya
ang pagkaon
unya giabi-abi
kaayo mo
gipaabot
wa gani mi nagsugod
ug kaon
samtang wala mo
nangabot.

apan kadtong
kamo na kunuhay ang
molibre
naunsa bang nawala
pa gani mi
paingon sa baratohong
kan-anan 
unya pag-abot namo
didto
hapit na mong
nahuman sa inyong
pagkaon

dili ni balak
walay tanghaga dinhi
kini ang akong 
kasuko

letseha mo
wa mo kamatay ug sayo
matangtang pa unta
ang inyong tanang
mga ngipon
maputol pa unta
ang inyong mga dila

dinhi lamang ako
kutob
wala nay usob.

baga, dapog ug uban pa

wala na ko miduol sa
dapog
sa panegurong dili
na ako mapaso

ang simag nga mata
sa tintal anaa gihapon
sa akong atubangan
nagabaga

sa akong tiilan anaa 
ang agipo
sa akong agtang anaa
pa ang 
krus sa abo.

kabahin ni manang berta nga nag-inosara na sa ilang balay kay gibyaan sa banang batan-on

kana bang 
nakig istorya ka na
lamang sa
imong kaugalingon

siempre ikaw lang

usab ang namati
kay wala na silang
tanan dinhi

si merian kadtong 

kulungon ug buhok
nga gidanggaan ni 
nang rosa nga usa ka
toro

si nang mely nga

nahibaw-an mong patay
na unya wala ka maguol
kay sige ra man pod to
siyag pangutang nga
walay bayadbayad

si manay socorro nga

bag-o lang nabyuda unya
ang makalipay niya kanimo
mao man lang kadtong mga
lab-as nga balita sa
atong barangay, kinsay
naburos o kinsay napordoy

pait handumon nga patay na

silang tanan unya ikaw na 
lang ang nahibilin unya ang
imong silingan nga maayong
mohubad sa bibliya matag
prayer meeting ninyo matag
biernes sa hapon mibalhin
na man usab ug puyo didto
sa cagayan de oro

maong karon ikaw na lang

ang nagtikawtikaw sa imong
lawak, nagkalingaw ug ihap
sa mga nasabod sa balayan
sa kaka nga dili sab nimo
mabugaw tungod sa tumang 
kamingaw

unya aron dunay gamayng

kagubot nga mohatag ug
kabibo dinhing lugara 
nakiglantugi ka sa imong 
kaugalingon kon unsa kaha
ang dangatan aning presidente
nga sigi lang ug pameste
nga ambot bisag unsa iyang
ka bastos, love mo pa man gihapon
ang nangitom na nga agtang 
sa maong kanahan.

ang gipili ni iska

gipapili ka sa usa
ka balak

o bibingka bisan
na lang ganig

walay kape o 
tsokolate

gipili mo siempre
ang makabusog

2019/06/19

sakto si Jose

sakto gayod si Jose
kaniadto nga miingon nga
kita nanakay sa usa ka
sakayan nga lingin
unya ang tanan
nanagbugsay ug dungan
walay gustong
mohunong aron lantawon
kon asa kita
paingon

nagtuyoktuyok ang atong
sakayan
unya unta mabalaka
o kaha ba maguol
anaa nangatawa man
hinoon ang tanan
kuyog sa miabot nga
kalilong

malunod na ang sakayan
unya anaa
nangatawa pa ang tanan
duna may nangasuko
apan imbis
tabangan ang sakayan
o dili ba
usbon ang pamaagi
sa pagbugsay
unsang hitaboa nga
gibuslotan man hinoon
ang sakayan
kuyog sa panghulga
nga kini sunugon
unya kadtong nangatawa
lumsan?

sakto si Jose
itom pas alkitran
ang atong
kaugmaon

apan mas sakto ang
manalabtan
nga nagnobena sa
mga patay
nga unta kitang tanan
manubag
nga siya lamang
ang dan-agan sa
kahayag nga
walay pagkapalong,

siya lamang
wala kitay labot
kay kutob ra
man kita
sa katawa ug
bagotbot

gamay lamang kini nga puling, mahimo ra kining ato usang agwantahon tungod ug alang sa kalinaw

sa pagpiyal nato sa gahom
mohangyo ako sa gamay kahilom

wala ako masayod sa tukmang
hinungdan
kon ngano, kon unsa, kon kanus-a

mohangyo ako sa dyutayng kahilom
kay ato una siyang pasultion

ayaw una paghisgot kabahin sa kawatan
kabahin sa iro nga sa kawatan milaban

layo pa kaayo kana, ania pa kita sa
paghunahuna kon unsa unya ang sangpotanan

gamay lang kaayong kahilom aron makita
ta ang landag, gamay lamang nga puling

sa atong mga mata nga pikot gamay lamang
nga buling sa atong aping nga bugason.

2019/06/18

ang nagbuhat

ang korte
gihimo mong
usa ka galleria,

mga larawan
sa sapa, sa kahoy,
sa dagat,
sa pharaoh, sa
usa ka moses,
sa kabaw sa
dahon sa usa
ka mayanang
pula,

wala nako kini
gihimo nga circus,
walay clown dinhi
hinoon daghang
magicians,

ang rabbit nahimong
kalo,
ang buwak nahimong
panyo
ang newspaper
nahimong kwarta

wala ko miingon
nga ang bakak nahimong
tinood
o ang tinood gihimong
bakak

hinoon, ikaw ang
nagbuhat niini,
dili ako.

2019/06/14

diplomasya

naa sa sulod sa dughan
ang dakong gubat
apan anaa sa baba, sa
kamot ang imong
diplomasya.

dakong sunog ang atua
sa sulod sa kasingkasing
ang ulan sa pag-ayom-ayom
sa kalinaw
atua sa gawas sa atong mga
panglantaw.

pagsulay sa usa ka sambingay

giborda mo ang mga bitoon
sa imong katulugon,

gisudlan mo ang laing
kalibotan

gusto nimong makalingkawas
sa prisohan mong lawas

sa pultahan sa gitay-ang mga
pagbati

giablihan mo ang trangka diha
sa imong kamot

kuko sa imong mga tudlo nga
wala maputol

kunot nga panit sa pawikan mong
palad.

sa fiesta

didtos fiesta sa gulayon
nag-inom mig beer
dayon miabot ang wa
damhang mga pangutana
kon asa na ang akong
asawa
dayon nakog ingon
nga hagbay ra ming
nagbulag
dili niya matago sa
iyang aping ang
nagdalagkamher nga
pahiyom unya ako sab
nga wala nangilabot
nagpadayon ug tungab
sa hapit na mahurot nga
san miguel beer.

2019/06/12

abli man ugaling ang bentana apan sirado ang pultahan....

sa kanunay
akong gipatik
ang mga
kalainan

ang dakong
kalainan
dili mahimong
malimtan

ambot kon
masabtan mo
ba ang akong
kinabuhi
ang akong
dakong
kalipay

mao ang karon
ug karon lamang
abli man
ugaling ang bentana
apan 
sirado ang 
pultahan....

putol na man god

dili na ako
mangumusta nimo

sa dihang
giputol ko na ang
tulay
tali natong duha

unsa pa may
pulos anang
pagpangumusta?

dia kos akong
balay
nanghimudlay

sa humok kong
alugnan
sa bugnaw kong
lawak
pagkalami kaayo
sa akong
katulogon

ang kalipay sa tiki lahi man sab sa kalipay sa baki

nag-post si auntie soling
sa mga pictures sa iyang apo
sa vienna

tuay nagdakpanay
tuay nangabayo sa iyang
lolo nga austrian

tua say usa ka plato nga
strawberries nga gikan pa
kuno sa iyang 
garden

spring man diay tuod sa
vienna karon
samtang diri sa atua ting-init

gabii karong orasa dinhi
unya mao pay pagkaluto sa iyang
lamian kaayong humba

kadtong adobo nga giluto
sa iyang kaugalingong mantika
nga grabe ang
pagkalami

malipayon siya sa vienna
sa daghan niyang apo ug sa
buotan niyang bana

dili ko moingon nga gihimo
ug gipakisama lamang siyang
sulugoon didto

apan mahimo kana
duda kos iyang mga posts
diin nag pasibya siya sa
iyang kalipay

sahay man god
lahi ang ipakita kaysa tinood
nga panghitabo

sa among kabahin
walay apo, walay mga bata
walay nagdakpanay
walay nangabayo
walay nagpunay ug katawa
samtang gitabangan 
ang usa ka plato nga
strawberries

hinoon wala koy
pagmahay
ang kalipay lain lain
puno man sag kwarta ang
akong kaban
nya nakasuroy man sab
kos kaulohan

sa moscow ug st petersburg
sa bali ug sa phuket
daghan klaseng kalipay
ang lain laing mga tawo

wala kanamo anag pagmahay
di sad mi kaingon nga
kami nag-antos ug
naguol

lahi ang among kahimtang
lahi sab sila
mahimong ang ilang kalipay
kasubo namo

sama sa ang among kalipay
usab
wala sab nila

kay sa tinood ang
kalipay sa tiki
lahi man sab sa kalipay
sa baki

sirgwelas

singkwentay otso ka
nga nabuhi

paglipay, ayawg hunahunaa
ang umaabot nga
kamatayon

sa usa ka minuto ka
lamang moundang

paglipay ayawg hunahunaa
ang kataposan

pagkadaghan sa mga
adlaw nga nahisama sa
mga dahon

sa naupaw nga sirgwelas
nagbutoybutoy ang mga
bunga
sa gikagid nga mga sanga

pagpamalak

nagpadayon ang balak
walay nagsugo
walay bayad

nagpadayon ang
unos sa pagbati
walay balikan
walay sanghiran

magpadayon ang
pagpamuswak sa
mga bulak
paingon lang gihapon
sa pagkalaya

magpadayon ang
tanan bisan pa gani
sa kamatayon

Pasaylo

kalakbit niadtong pangandoy
ang ikaw ug ako sa kahangturan

imo akong giubanan nga nagpatuo kanako
nga ako adunay ikaw

apan wala, walay ikaw uban kanako
diha sa gipanumpaan tang muhangtod

nakalimot ka ug nabaling ang imong mga mata
kaniya nga anaa sa kabatan-on;
katahom; pahiyom

manghinaot kong muhangtod
ang inyong kamalipayon

pasagdi akong mag-inusara
kalimtan ko ikaw sa akong mga damgo

ipaanod ko sa mga luha ang atong duha ka lagda
niadtong papeles sa atong kaminyuon

ug bitbiton ang duha ka matahom nga bunga;
hulog sa langit alang unta sa atong duha
ka naugdaw na nga gugma, gipasaylo na tika.

2019/06/11

pasagdi

pasagdan mo ang
gustong mamatay

dili baya lalim
ang pagkab-ot
sa pahulay

pasagdan mo kadtong
gustong mobiya

dili baya lalim
ang kamingaw 

ang pakig-uban
niya kanimo

ikaw nga nagpasagad
siya nga mapasagaron
usab

pasagdan mo ang
pagbuswak sa kamatooran

diha sa dakong
hawanan sa kahaw-ang

dose ka bulan
pito ka adlaw

putlon mo ba ang
pulo ka tudlo?

pasagdan mo ang
gustong maghikog

katungod niya ang
pagsulod 

sa ganghaan nga
ang ang kahayag
wala  mo pa 
matugkad

ang lamiang labad

walay hugaw
sa nataran sa gugma

ang baho baho man
ugaling
pero nagpabilin
ang kalami

nga hangtod karon
wala pa gayod
nimo masulbad

pakighiusa

nahikapan nako
ang dako mong kalugo

morag hait nga
bato sa humok nga
bonbon

dugay kaayo nako
namatikdan
didto sa ilalom sa
galasang mong
bolbol

morag itlog sa
maya
sa salag nga
abaka.

ang pagsalig sa mga alibangbang

salamat sa imong
pagsabot
ang imong mga mata
wala nay
giasoy kanako

karon ang panahon
sa gugmang
tiunay

ang mga pulong
mibatog sa daghan
dahon
nahisama sa mga
alibangbang
nga anad na kaayo
kanato

salig nga sa atong
mga kamot
dili mabali ang ilang
mga pako

sama sa gibuhat sa
daghang
mga bata
didto sa mingaw nga
bungtod

mas tam-is ang dugo sa dili nako samad.

mas tam-is
gayod ang dugos
human ka mapaak
sa usa ka gatos
nga lapinig

dili pait ang
natilawan na sa
pipila ka
kagahapon

bisan gani ang agi
sa lapis
sa papel nga puti
mapapas man
gihapon
labi na human sa
kadakong pagpasug-o
sa hupas nga
hangin

mas tam-is ang dugo
sa dili nako samad.

si Honey

nakawala sa akong
kaguol ang bag-o mong
itoy nga ginganlan mog
honey

dili nako masugid ang
akong nahinumdoman
bahin niini


tanghaga sa umaabot nga gubat

ang mga hari
nanagdula ug dakpanay
sa dihang
hapit na mosalop ang
adlaw

wala na ang mga
inahan nga mitawag
kanial sa
pagpauli sa panimalay
dahon
mag-ampo sa kagabhion

nagtagotago pa
gihapon silang tanan
walay usa nga
nadakpan

ang  mitabon sa iyang
nawong
sa ilalom sa kahoy
nahibiling naglagot
kay gibiyaan

2019/06/07

higwa-os

Gihubo ang imong sapot. Nakita ko ang imong lawas. Gigakos ko kini. 
Tanan gihimo ko na sa imong lawas.
wala ka misupak. Nagpatara ka lamang.
gipaabot ko nga bungaton mo usab ang gugma.
nga kini nakaplagan mo usab sa akong lawas.
apan wala. mahimong pakyas ako,
mahimong nalipay ako, apan anaa gihapon ang
kasubo, ang kamingaw ang pagbati nga basin
lingla lang kining tanan dinhi sa kangitngit.
duna akoy gustong madungog apan wala kini
nako madungog. gabati ko ang imong kasingkasing
diha sa imong dughan sa akong dunggan.
gibati ko ang imong kainit sa akong duha ka kamot.
apan wala gihapon nako masuta ang akong gipangita.

sa tinood lang, gipangita nako ang imong kalag
apan wala ko na kini makita sa imong lawas.
dili ka patay, apan dili ka usab buhi nganhi kanako.

layo ang imong panglantaw.
morag mayana sa kabugnaw ang imong dughan.
ang imong buhok gadughay
mora kag bata nga gikabuhi sa panaw sa kinabuhi.
human nagsuka, anaa namuti ang kalimutaw

nakuha ko na ang tanan apan wala akoy nakuha
bisag usa. asa kaha ang imong kasingkasing?
nganong wala man akoy gugma nga nabati dinhing
dapita?

mibuhagay ang dili tinood kong kalipay.
gikasubo mo kini, apan sa akong kasakit gisabot 
mo ang tanan.

gipangayo ko ang pasaylo sa hangin.
miluhod ako sa yuta, nakigsulti ako sa bulan.
gipanaw ko ang kagabhion.
gikatulgan ko ang tumang kaulaw 
sa akong kaugalingon.

sakto ka, ning balay, sa siradong pultahan,
wala ka na dinhi.

mas lami pas knilaw sa kusina ni manay

dili ko
masulat ang gugma
natong duha

mas lami pa 
kon hiposon ko lang
kini gihapon
sa bulsa sa akong
kasingkasing

kadtong gitago
kadtong gidili
kadtong mas lamian
pas 
kinilaw sa kusina
ni manay.

bahala na kon ang imong halok mao ang halok sa pagbudhi

bahala na
kon ang imong halok
karon
mao ang halok sa pagbudhi
mo kanako

pasagdan ko na kini
kataposan man o dili

bililhon kanako ang
imong halok
init, tam-is, dili dali
mawala
sa akong panumduman,

bahala na kon
kini ang kataposang pagbudhi
mo kanako
sa ilawom ning bulan nga
buak
ning langit nga dag-om
ning lawak nga mas bugnaw
pas panit sa sawa

hagki ako
bahala na, inig kahoman niini
mobiya ka kanako
unya sa akong pag-inosara
sa panumduman sa imong
halok
makatulog ako
nga dili na maghandom sa
uban pang mga
damgo

2019/06/05

alang kang C.

wala gani nimo
gililong 
wala man usab
nimo gisugilon
kanamo

nadungog ko ang
kamatooran
gikan sa uban
nga layo kaayo 
kanamo

usahay magmahay
ko nganong ikasuko
pa man nimo kon
tawgon ko ikaw sa
matood mong ngalan?

niadtong gipangutana
ka kon unsa bay nisulod
karong adlawa

makalilisang ang
imong tubag
apan wala nakapahilom
sa tanan

ang sukdanan

gidawat nako
ang imong hagit

mipakpak ko
gamit lamang ang
usa ka kamot

tinood walay tingog
kon tingog man 
ugaling ang sukdanan


apan nabati ko ang
kaalam diha sa iyang
kahilom.

dili

ang gugma
sama sa paypay
kapila ko na
ikaw giingnan kabahin
niini

nahisama usa kini sa
napulo ka tudlo sa
akong duha ka kamot

sa dihang gisul-ob ko ang
imong singsing
sa ikaupat nga tudlo sa
tuo kong kamot

mangutana lang ko kon
nagpasabot na ba kini nga
imo na ang akong duha ka
kamot?

syatong

karon
sa dihang kita na lang duha
sa kataposan

wa damhang
nabati nato ang atong
kabatan-on

kadtong nagdula ta ug
siokok ug
syatong,

naugkat ko kaha ang
kanhiay pang gipasabot sa
syatong

sukdon mo pa ba pag-usab ang
katas-on sa akong utong?

pagkahupong

aron kaha masabtan nako ang
kinabuhi sa usa ka gold fish diha
sa usa ka glass bowl,

akong gisulod ang akong dila diha
sa imong baba dayon  panirado
sa mga bentana sa atong
mga ngabil

gibati nato ang langoy sa usa ka 
isda diha sulod sa atong baba
ang iyang mga kapay diha sa
kahinay, malipayon kita, diha sa
kahilom sa tubig, sa gamay kaayong
kalibotan nga lingin, 
samin, daghang kulang apan
hupong.

2019/06/03

kabag-ohan

karon
hapon na
kapoy na
kay 
hapon na

apan ning
kakapoy
sulaton ko
ang 
ang balak
kabahin
sa gugma

apan dili
na kini alang
kanimo

alang na kini
kanako
nga dugay
ko na usab
nga 
napasagdan
tungod
kanimo

ang miawat

nakita mo ang 
akong pag-inosara

sa airport
padulong sa lugar
nga wa mo sukad
matugkad

sa plaza 
kauban ang mga
langgam
nga saag

sa hulagway nako
sa new york
nabantayan mo ang
akong pahiyom
nga hilaw

aslom matod pas
imong pamantay
morag mangga nga
nahulog kay
gibato sa bata nga
sipat

nagsugod kos usa
ka kasakit
gipahinungtan ko kini
sa akong pag-inosara
hangtod nga
naanad na ako niini
sama sa naandan nato
kaniadto nga
pagtiniil bisag nakapalit
na si tatay
ug bag-ong tsinelas


naandan ko na ang
lapok ug ulan
busa wa ko na gihandom
ang payong 
ang botas

gikalipay ko kaha nga
imo akong gustong
awaton?

sa pagpamalak

yanong kalipay
sa payag 
usa lang ka pakpak
sakto na ang
pamahaw

dili kaayo
kinahanglan
sa kinabuhi
morag kabit
mahimong 
balikan
mahimo sang
biyaan

hinoon
anaa ang dyutayng
kasamok
halapad ang pagmahay
lalom ang
kasakit
ang kahapdos 
hatod sa langit.

Panginhas dire