dayega ang Dios

dawaton ta ang
pagkulang ta sa pagkabalaanon
gikalipay kini sa Ginoo
di gayod kita
makatugbang kaniya
dayga ang Diyos
ang tnood nga Balaanon
mantsa kita sa tagok sa
nangka
sa tong mga mata nga
iyang nakita.

kagahapon sa usa ka gahi ug ulo

ang akong ulat nga taas 

gikan
sa akong paa milatas paingon

 sa
akong kiting

morag bitin
nga wala pa 

kapaak

matag lantaw nako

 niini
mahinumduman nako
si nanay nga
siging kasuko kabahin sa
kagahi sa akong
ulo nga
gikoronahan sa duha 

ka
ayoyok

kaniadto sa 

akong
pagkahulog sa punoan sa
balimbing sa kilid
sa paril nga sin
nga gibutangan 

og alambre

kay lagi wa man

mitoo nga unta

maligo na ako

sa banyo kilid

sa karaang atabay

nga gibuhat pa ni

Ingkong

Goryo

si nanay ang

 nakuyapan
samtang
gilantaw  ang dugo
nga mibanaw
sa akong tiilan

samtang

mibukad ang unod

nga 

nagpakita sa bukog

nga puti

kaayo

didto sa usa ka entablado

didto sa entablado
nga pulo lang ang tawo
mikanta ka ug misayaw
nagpaabot sa mamakpak
inig kahuman.

wala silay mga kamot
bisag taghoy wa sad kay
nadungog.

miuli ka sa balay
apan walay pagmahay.

ang driver nga si myrna

naunsang hitaboa
nga gisakyan mo man
ang manobela

mihangad kas langit
dayog syagit
dios ko dios ko
naunsa man ako?

ang angal ni myrna

nagtalikod si myrna
samtang gihawiran ni roldan
ang iyang abaga

mihangyo si myrna nga
hagkan siya sa iyang aping
nga nagbaga
apan lahi ang nabuhat ni roldan
gipasok ang dili pa unta
angayan

ubos og ibabaw

managlahi ang
kalipay sa ubos ug
sa ibabaw.

dakpa ang akong
ubos
kay kini dako na
ug kahiubos.

sa akong ibabaw
kitang duha mobayaw.

pagpapas sa ngalan nga dugay kong gikulit na unta sa dakong bato sa katilingban

usa sa mga butang nga
dili nako maispiling mao
ang gugma
nahimo akong bogo
sa tumang kalago.

gilabay ko ang tanang
ania kanako
aron lang maangkon
ang imong gugma

ang akong sungay naputol
ang akong ikog mibahag
ang akong baba minganga
ang akong dila nanilap
nga morag nanglaplap
sa unog gikan sa bukog

papason ko ang akong ngalan
aron malipay ka lamang.

sa imong mga atngal

init ang imong lawas
gidapion ko ang akong dila
saiong dughan
aron unta kini mabugnawan
nahmo kong dakong hangal
sa dihang midilaab ang kalayo
sa imong atngal.

ang imong halok

ang halok mo
sa akong ngabil
mibasa sa akong 
dila
dayon ang pagkurog
sa akong alingagngag
mibalod sa akong
tilaok
mipadidit paingon
ngadto sa humok nga
higdaanan sa akong
kasingkasing.

ang dakong kahiubos sa buwak sa kabuntagon

bulak siya sa
kabuntagon nga
nagbasa pa sa hamog
sa kaadlawon
unya imo lamang siyang
gilantaw 
dayon nimog lakaw
sa gibilin mong
kahingawa.

pasalamat sa usa ka pagbangon sa sayong kabuntagon

salamat adlaw
salamat bulan
salamat dagat
salamat mga kabukiran
salamat sa mga agianan
salamat sa tanan
kamo nga nagmahal 
kanako.

salamat salamat
mga bitoon sa langit
kawanangan nga walay
kataposan
salamat salamat

(bisag ako lang
ang nasayod niini)
sa pagmahal
ninyo kanako.

aniaa na ang adlaw

ania na ang adlaw
nga karon sa hinayhinay
misilaw

misidlak kini 
amigo
ayaw hunahunaa nga
kini alang
lang kanimo

gihapuhap ang imong buhok
gihapuhap ang imong panit
gipainitan ang imong dughan
ang tanan nahimong lamian...

nganong nagsubo ka man?
ayaw kahiubos, ayaw kasuko
kay sa kilid sa adlaw 
anaa sab ang imong tuko
tapot nimo, walay kasuko.

ning sayong kabuntagon

kay lagi sayo man kitang nangatulog
kagabii
sayo sab tang ningmata 

wala pa miabot ang adlaw
migawas kas balay aron paglakaw
libot sa plaza de katipunan
diin anaa didto ang karaang kahoy
sa akasya nga makalolooy

daghan sang bulak ang maong 
palibot
kuyugan sa labong nga carabao grass
nga gituyo ug tanom  sa
nagdumala sa maong plaza

pagkapresko sa hangin
pagkamingaw sa palibot 
walay nagtikawtikaw dayon ikaw
lamang ang naglakawlakaw

madungog mo ang awit sa mga
dahon
ang hunghong sa mga kalag nga
kaniadto gipamatay sa mga hapon
niadtong mga katuigan sa kasakit ug
kasilag

nadungog mo ang hunghong sa
imong kaugalingon
mga tubag sa imong mga pangutana
unya sa dihang miundang ka na
ug milingkod sulod sa gazebo
lami ang imong pamati
nga mora bag nahaw-as ang tanang
kahigwaos sa imong kasingkasing
nga mora bag ang tanang kum-ot diha
sulod kanimo
naplantsa na gayod pag-ayo

period

matag chat namo
mao gyod ni iyang ingon,
daghan pang katalagman
ang moabot
hangtod matapos na ang
kalibotan

gikapoy kog pamati
aning mga manulunda sa
kasakit, mga tigmudmud  
kanato sa kahadlok,
busa, giwagtang nako
siya sa akong kalibotan

blocked him in facebook.
period.

makalolooy nga sunflower

makalooy uyamot kining
sunflower sa akong harden
nga mibuswak alang sa
adlaw
nga magsunodsunod kon
asa ang kahayag

karon ania nalaya na
patay na
apan ang adlaw anaa ra
gihapon misubang
walay paghunahuna kon
kinsa o asa

sunflower nga makalolooy
namatay alang lang kaniya
siya, nga walay pagbati kon
naunsa na ang nahigugma 
kaniya.

pagmahay

tungod kay naulahi ka man
sa pag-abot dinhi sumala sa
atong gisabotan kagabii niadtong
mibiya ka na kanako,
wala mo nakita ang pagbukhad
sa adlaw sa akong kabuntagon
diin nakaligo ako sa kainit ug kahayag
midagayday ang singot ang luha 
sa akong nawong samtang wala ka.

kabahin kanimo

ang akong mga pulong
gidala sa akong dila diha sa
imong baba

sayod ko nga dunay mga
pulong nga guba na
ang uban dunay tunok sa
isda

ang akong mga mata 
nanugilon sa akong gugma
diha kanimo
mikuyog ang akong mga
kamot nga mihapohap
sa imong buhok

bisan sa kadugay sa panahon
anaa gihapon ang pagduda nga
ikaw wala gayod mahigugma
kanako
pasayloa ako kabahin niini

hinoon, sa laing bahin
anaa ang akong consolasyon 
nganong hangtod karon wala
mo pa man gisuka ang akong
mga pulong

subayon ko ang lawak sa
imong kasingkasing
sa pamasin nga atua ra
kini didto nga tungod sa
gugma
wala na nimo kini gikasakit
wala na kini nimo giambat pa
gipapas, gipulihan, gitamnan
sa buwak sa mga rosas.